2 Samwẹl 18

Obo kw’Absalọm

1 Wa Devid otobha agbongnọng p’aning amaan-ẹ k’nkwurọ k’nkwurọ. Ọrọhbha agbong-sonọng p’akkerẹ nkwurọ s’anọng nnọhna, ọmaana agbong-sonọng p’akkerẹ nkwurọ s’anọng arọbh achen. 2 Otọhm bẹ k’nkwurọ nttaan. Osi Joab oso kw’ekwurọ danẹ, osi Abishayi nnwa kw’Zeruya, kw’ode ọgbaanọkka kw’Joab obhonọ, oso kw’ekwurọ danẹ, obira osi Ittayi kw’ofon Gat oso kw’ekwurọ danẹ. Ọvaarnọng oben bẹ bẹ́, "K’odik ọkkọkka, kaam oyenẹ mm’ọtọn ofona."

3 Agbongnọng mbo maben-ẹ bẹ́, "Mma e, mina kàtor e. Ó̱de awawunanọng pamina akwubhọ mina mọrọbh, ọttọhk f’m’ọyak bẹ odik kode. Zaabẹ́ mina anọng igboka mobir ope, bẹ odik-odik mòsi. Okenaka, kọ abarẹ odik ayọhnga mina igbedim nnọhna ẹrọbh okwuma ichen. M’ojibh ọtam bẹ́, kọ atera aninga m’obhon ake mina ọbọhk."

4 Ọvaarnọng ọpọhna bẹ bẹ́, "Kaam m’nsi okpenamkpen f’ojibhẹ bọnga."

Ofona nya o, ọvaarnọng obe ny’okikaan kw’ebhumma, agbongnọng mbo maphyir mabina ozenga k’nkwurọ s’anọng arọbh achen, ọttara k’nkwurọ s’anọng nnọhna mfa okwuma arọbh ijobh.

5 Ọvaarnọng oben Joab, ọmaana Abishayi, ọttara Ittayi bẹ́, "Màzenga kaam ábẹ̀, mayobh Absalọm nwo kw’ode ojinọngnwa kwaam o." Wa agbongnọng mbo maphyir, mabhaanga ntọhna s’ọvaarnọng ọd-ọnang aso p’mgbongkwurọ njo okurọ Absalọm.

6 Nya o, agbongnọng mbo mayin egbong oririma amaana anọng p’Israẹl. Wa egbong ndo etto z’ẹtam ch’Ephraim. 7 Agbongnọng p’Devid makema anọng p’Israẹl, mafhọ bẹ k’ọsaabh. Anọng p’uwa mape ny’ewu ndo, made nnọhna arọbh afa okwuma ijobh. 8 Erima ndo ẹnyaamẹ ny’ẹkọma ndo maphyir. Anọng p’akpong ny’ẹtam ny’ewu ndo masaabhẹ ayọhnga ayok p’ape k’ọkkangkkang.

9 Minna kw’Absalọm okwu ottema ọmaana agbongnọng p’Devid. Wa ọd-ọyaar ẹnyanya chẹ. Ẹnyanya ndo etim-ẹ edim k’ẹdabhẹ ch’abọhnga p’echi ch’oak, isisa sẹ idan k’echi. Absalọm ọyọhn ny’iwokọ, ẹnyanya chẹ ẹzọhng mach’ẹzọhngọ nya.

10 Ogbongnọng wanẹ kw’Devid ọzẹ-ẹ nya o, od-otek Joab bẹ́, "Nze Absalọm ch’ọyọhnọ z’echi ch’oak e."

11 Joab ọpọhna bẹ́, "Abẹ? Azẹ-ẹ majijik? Osempira kẹ kafhọ ny’eninga ndo? Wúra áfhẹ-ẹ, wura nnang-ọ asilva ijobh, ọmaana odikpa kw’okkikkaama."

12 Ojinọng nwo ọpọhn-ẹ bẹ́, "Zaa wura manang-m nnọhna mfa okwuma arọbh s’silva m’ọbọhk, kaam nnwa kw’ọvaarnọng ọbọhk mintwu. Nkk’ọbhaanga ch’ọvaarnọng obenẹ kọ ọmaana Abishayi, ọttara Ittayi bẹ́, ‘Màzenga kaam ábẹ̀, mayobh ojinọngnwa nwo kw’ode Absalọm.’ 13 Wúra ikk’ifor saam nka k’odik mfhẹ-ẹ, pira ọvaarnọng okwu ozonga, wura akaan-m abharẹ."

14 Joab oben bẹ́, "Kaam ọdọk minna mìnninga ntik-ọ." Minna kw’ọtọk akọhn attaan, okwum Absalọm ny’ittemmọma ch’otim okkirẹ ettem, ọyọhn ny’echi ch’oak. 15 Atim-egbongkpo p’Joab anọng ijobh, makọbha Absalọm ake k’ettem, macher-ẹ afhọ.

16 Nya o, Joab oje enyisa, oben agbongnọng p’Devid bẹ́, makpọka agbongnọng p’Israẹl okwukwubh. 17 Matọka oforbukọ kw’Absalọm, mabharẹ z’epe danẹ ch’ekem edonga ny’ẹtam ndo. Mayak-ẹ ata maa, mater k’okkin kwiden. Ny’ogbe nwo, wa anọng p’Israẹl maphyir kk’arọbha abhana z’abẹ k’isọhm.

18 Wa ch’Absalọm otim orukọ akpen, ottim ọta ny’Ilokodo s’Ọvaarnọng okurọ ch’ochibhẹ bẹ́, "Kaam ojinọngnwa kinyen kw’im’osi eche chaam eninga echina ororo." Wa okpe ọgbagba nwo obhuna ifor sẹ. Kẹ wọ osi, matim ayerẹ ọta nwo Ejima ch’Absalọm, pyirẹ menda.

Devid obhomọ Absalọm

19 Nya o, Ahimaz kw’ode nnwa kw’Zadọk oben bẹ́, "Tte nd-ntek ọvaarnọng ẹkkaabha nda bẹ́, Ọvaar Ibinọkpaabyi kk’ẹ ọrọhbha k’mbọhk s’awawunanọng pẹ."

20 Joab oben-ẹ bẹ́, "Kọ azang im’atek-ẹ ẹkkaabha ndo menda. Tek-ẹ ewu ọdọk-ọdọk. Kọ ọbọhk mìntte atek ẹkkaabha ndo menda, okurọ bẹ́, nnwa kw’ọvaarnọng kk’ọpa."

21 Nya o, Joab oben ọnọng nwo kw’ofon Kush bẹ́, "Zọhng tek ọvaarnọng k’ose kw’ikk’aza." Ọnọng nwo ọraka eso ọnang Joab, ọfona.

22 Ahimaz kw’ode nnwa kw’Zadọk obira oben Joab bẹ́, "Ototo, zaabẹ́ ode yen, tte ntor ọnọng nwo."

Joab ọpọhn-ẹ bẹ́, "Nnwa kwaam, osempira aben bẹ́, min’afona, ch’ina ẹkkaabha ayen ch’im’ẹnang-ọ ẹtaam o?"

23 Ahimaz oben bẹ́, "Zaabẹ́ ode yen, kaam m’ntima ẹbhar nzọhng."

Nya o, Joab oben-ẹ bẹ́, "Zọhng kẹ!"

Minna kw’Ahimaz otim ẹbhar ny’ẹkpẹmẹ maa, ọkpan ọnọng nwo kw’ofon Kush ny’eden.

24 Ny’ogbe nwo, Devid oning ẹwọr ny’njeka kw’ebhumma ch’ẹtaanga, ọmaana ch’iyaan. Okker-oter ozenga ny’etumọ ch’ebhumma ndo ovura z’ipubhaang. Mod-otinẹ ichen, oze ọnọng ch’od-otima ẹbhar manchenẹ okwu-okwu. 25 Okker-oter nwo owon ọvaarnọng, otek-ẹ.

Ọvaarnọng oben bẹ́, "Ó̱de ozeng manchenẹ, zonga bẹ́, otim ẹkkaabha ọkkọkka okwu." Ojinọng nwo otima maa, ọnyọma.

26 Okker-oter nwo obira otinẹ ichen oze ojinọng ọdọk-ọdọk ch’od-otima ẹbhar za manchenẹ. Owon okker-oter, oben-ẹ bẹ́, "Kirẹ ojinọng ọdọk-ọdọk wọ od-otima ẹbhar kina e!"

Ọvaarnọng oben bẹ́, "Oyok nwo obir otima ẹkkaabha ọkkọkka okwu."

27 Okker-oter nwo oben bẹ́, "Oker-m mach’ochedennọng nwo od-otima ẹbhar mach’Ahimaz kw’ode nnwa kw’Zadọk."

Ọvaarnọng oben bẹ́, "Kẹ ode ọnọng ọkkọkka. Ẹkkaabha ọkkọkka ch’od-otima okwu nya."

28 Ahimaz opyirẹ nya o, oyerẹ ọvaarnọng, oben bẹ́, "Ttatta, idik maphyir ide mawuriji!" Ọraka eso maa, otwu izek, ny’ọvaarnọng k’ititika. Oben bẹ́, "Mọ̀tọhnga Ọvaar Ibinọkpaabyi kw’ode Ibinọkpaabyi kwọ! Kẹ kk’anọng p’arim ọvaarnọng kwaam ábẹ̀, okema."

29 Ọvaarnọng ọbọbh-ẹ bẹ́, "Odikkobhnwa nwo kw’ode Absalọm oning za k’ọkkọkka yirẹ?"

Ahimaz ọpọhn-ẹ bẹ́, "Nze damadama kwiden, ch’Joab ọd-ọkam bẹ́, ọtọhm kaam ọtọhmnọng kw’ọvaarnọng, kw’mbir nde ọtọhmnọng kwọ, ẹkkaabha. Okenaka, damadama nwo kaam kọttaanẹ."

30 Ọvaarnọng oben-ẹ bẹ́, "Bina be m’okikan." Minna kw’obin obe ẹbhaakẹ danẹ.

31 Ny’eninga ndo, ọnọng nwo kw’ofon Kush opyirẹ. Oben bẹ́, "Ttatta, kw’ode ọvaarnọng kwaam bhaanga ẹkkaabha ọkkọkka! Menda Ọvaar Ibinọkpaabyi kk’ọ ọrọhbha k’mbọhk s’awawunanọng pọ maphyir."

32 Ọvaarnọng ọbọbh ọnọng nwo bẹ́, "Odikkobhnwa nwo Absalọm oning za k’ọkkọkka o?"

Ọnọng nwo kw’ofon Kush ọpọhn-ẹ bẹ́, "Tte awawunanọng p’ọvaarnọng kwaam, ọmaana anọng maphyir p’marim-ọ ábẹ̀, made mach’odikkobhnwa nwo."

33 Minna kw’ifor ibhakẹ ọvaarnọng. Ozeng z’idongọ s’ebhumma-okwubha, oninga za ọsọhrọ asen. Ch’iwa od-ofon-ofona, od-oben bẹ́, "O nnwa kwaam Absalọm! Absalọm kwaam! Nnwa kwaam! Wura kaam wọ ntera mpe obo nwa e. O Absalọm, nnwa kwaam, nnwa kwaam!"