1 Wa matekẹ Joab bẹ́, "Ọvaarnọng oning za obhomọ ẹmọng e, obira oninga k'oforpyibha okurọ obo kw'Absalọm." 2 Ofona nya o, odidaama kw'agbongnọng ayen ch'makem egbong ny'ewu ndo, nokwu ode oforpyibha ọnang bẹ, okurọ ch'mabhaang ny'ewu ndo bẹ́, "Ọvaarnọng oning k'oforpyibha k'obo kw'nnwa kwẹ Absalọm." 3 Agbongnọng mbo mammin akwuna z'obhon ny'ewu ndo, mach'anọng p'egbong epyibh-ewu, pira marọbh akwuna ttara mgbar. 4 Ọvaarnọng obubha mbọhk ny'ititika, obhom k'ẹrọng bẹ́, "O nnwa kwaam Absalọm! Absalọm kwaam, nnwa kwaam e, nnwa kwaam e!"

5 Nya o, Joab odim okebha ọvaarnọng z'ọsọhm kwẹ, oben-ẹ bẹ́, "Menda kk'agbongnọng pọ maphyir alẹka, p'ade anọng p'makkaan akpen pọ, ọmaana p'iva pọ k'ejinọng ọttara k'ẹpanọng, ọmaana akpen p'panọng pọ, ọttara p'ayok-nọng pọ. 6 Nze bẹ́, awawunanọng pọ adaak-ọ idik ọtam ayọhnga anọng p'achibhẹ ọkkọkka amaan-ọ. Menda kk'mina akọhka bẹ́, akpen p'agbongsonọng, ọttara p'agbongnọng oyenẹ, m'kọ odik kabarẹ. Kk'nza bẹ́, wura ettem elebh-ọ olebh, óde Absalọm oning akpen menda, mina maphyir mope. 7 Bina madidaanma, kebha agbongnọng pọ z'iyaan, ake bẹ ettem. Nchekẹ k'eche ch'Ọvaar Ibinọkpaabyi bẹ́, óde ina z'iyaan ayinẹ, pira ewu epyi, ọnọng kw'im'obira oninga ọmaan-ọ kode. Odik nwa m'opyibh ọyọhnga idik s'ikk'ọ ikpẹka k'akpen, tọma z'edikkobh chọ maa, pyirẹ menda."

8 Nya o, ọvaarnọng obina od-oninga ẹwọr z'ẹvaarkkọhbhọ chẹ, z'ebhumma ch'obhon.

Itekẹ ipyirẹ agbongnọng mbo bẹ́, "Ọvaarnọng kk'ẹwọr oninga z'ebhumma ch'obhon e." Ofona nya, bẹ maphyir makpa nnam attonga za.

Ny'ogbe nwo, anọng p'Israẹl kk'arọbha achina z'abẹ k'isọhm.

9 Wa ny'nkọma s'Israẹl maphyir, anọng mad-akaanga ayok idik, maben bẹ́, "Ọvaarnọng wọ ọrọhbh mina k'mbọhk s'awawunanọng pamina, ọmaana k'mbọhk s'aPhilistiya. Menda, kk'Absalọm ozeng ábẹ̀ ọrọbh m'ẹkọma nda. 10 Absalọm oyenẹ kw'mobyeng ana k'eso mach'ọvaarnọng kwamina, kk'ọpa z'egbong. Osempira m'odik otima ọgbaaka k'ose kw'ọvaar Devid m'ọkpa nnam?"

11 Ọvaar Devid, ọtọhm ẹkkaabha ọnang Zadọk ọmaana Abiyata p'ade afọhn-nja p'Ibinọkpaabyi, oben bẹ́, "Màbọbh asogbọhkọnọng p'ẹkọma ch'Juda bẹ́, ‘Mad-akibhẹ ogbe asi mbọng, kw'nna ọvaarnọng akwu atọka ọkpa nnam z'ikẹ k'odimpa? Ka, itekẹ kk'ọvaarnọng ipyira k'idik s'anọng p'Israẹl mad-agbaak. 12 Bọnga made ivotte paam, p'izẹ majanẹ isi. Mad-atik mbọng kw'nna ọvaarnọng atima atọka atima akpa nnam?’ 13 Obira oben Amasa bẹ́, ‘Kaam ọmaana kọ mode izẹ majanẹ. Tte Ibinọkpaabyi ọyak ọbọhk ọnang-m irem, tọma menda china ororo, óde ina ediden ch'Joab atọk mach'oso kw'agbongnọng paam.’ "

14 Nya o, Devid odebh nttem s'anọng p'Juda, bẹ maphyir nnagbaak odik mawanẹ. Bẹ anọng p'Juda matọhm ẹkkaabha anang Devid bẹ́, "Kọ ọttara atọhmnọng pọ maphyir màkwuna e." 15 Minna kw'Devid ọbhan, ozenga maa, opyirẹ z'ọraanga kw'Jọrdan.

Wa ny'ogbe nwo, agbongnọng p'Juda kk'opyipyirẹ apyira z'Gilgal bẹ́, mad-attema amaana ọvaarnọng, mfha matim-ẹ ajeka ọraanga kw'Jọrdan. 16 Shimeyi kw'ode nnwa kw'Gera kw'ofon Bahurim, z'ẹkọma ch'Bẹnjamin, ọsẹr-ọsẹr otor agbongnọng p'Juda bẹ́, mad-attema amaana ọvaar Devid. 17 Anọng p'uwa matọnọ p'mafon Bẹnjamin made anọng nnọhna mfa okwuma arọbh ijobh, ọmaana Ziba kw'ode ọtọhmnọng kw'ẹsọhmmọr ch'Saul, ọmaana ajinọngva ichi p'kẹ Shimeyi, ọttara atọhmnọng pẹ ẹrọbh. Masẹr-ọsẹr achina z'ọraanga kw'Jọrdan, makebha ọvaarnọng za. 18 Minna kw'malọhkọ ajeka ọraanga nwo z'ibyi s'igbẹr-ọgbẹrẹ bẹ́, mad-atọka ẹsọhmmọr ch'ọvaarnọng atima ajeka k'okwubha, mabir asi ọttọhk kpenamkpen f'ọvaarnọng ororọ.

K'ogbe kw'Shimeyi kw'ode nnwa kw'Gera kk'ọraanga kw'Jọrdan ojeka, od-otto okwubha k'ekpikpobha-maana ny'ititika s'ọvaarnọng. 19 Oben-ẹ bẹ́, "Ọvaarnọng kwaam, ototokinẹ, mpinẹ saam kasaana o. Nkwuk-ọ okwukọ, mpinẹ s'ọtọhmnọng kwọ osi k'ogbe kw'abin arik Jẹrusalẹm kàjima. Tte odik nwo ọsa ọvaarnọng z'ettem. 20 Kirẹ kaam ọtọhmnọng kwọ nzong bẹ́, kk'epyibha nsa. Nya wọ osi nde ocheden kw'obin z'efona ch'Josẹph nkwu nkebha kọ ttatta kwaam."

21 Nya o, Abishayi kw'ode nnwa kw'Zeruya oben bẹ́, "Ma, Shimeyi k'obo kọbaan m'ọttọhk f'osi ma yirẹ? Kẹ ọlọhkọ ọnọng kw'Ọvaar Ibinọkpaabyi ikk'ana obyenga k'eso."

22 Devid ọpọhna bẹ́, "Bọnga iva p'Zeruya, bọng-ọttọhk vọ ọmyẹ bọnga ọttara kaam o? Menda bọnga nkk'awawunanọng paam abhaka. Ọbaan za bẹ́, mabira afhọ ọnọng m'Israẹl menda? Bọng nkazong bẹ́, kaam wọ mbaabha Israẹl menda?" 23 Ofona nya o, ọvaarnọng ochekẹ ọnang Shimeyi bẹ́, "Kọ màpe."

24 Wa Mẹphiboshẹt kw'ode nnwa kw'nnwa kw'Saul obir okwu nya bẹ́, oze ọvaarnọng. Tọma ny'ewu ndo ch'ọvaarnọng obin z'Jẹrusalẹm maa, pyirẹ ny'ewu ch'okwun k'ọdaam, Mẹphiboshẹt mmo kogbobhọ, ammaphyabha kodo, ẹfọrakpo pyẹ kobir ogbobhọ. 25 K'ogbe kw'Mẹphiboshẹt obin z'Jẹrusalẹm okebha ọvaarnọng, ọvaarnọng ọbọbh-ẹ bẹ́, "Mẹphiboshẹt, osempira kaam katorọ mofona?"

26 Ọpọhn-ẹ bẹ́, "Ọvaarnọng kwaam, mbenẹ ọtọhmnọng kwaam bẹ́, ‘Chen-m ẹnyanya chaam, ọfha mvura nyaar ntor ọvaarnọng’, ch'kaam mphyakẹ mkpẹtẹ. Okenaka, Ziba kw'ode ọtọhmnọng kwaam ọbọhr-m, kaam kochen. 27 Kk'ọtọhmnọng kwọ oluka ọnang kọ ttatta kwaam. Ttatta kwaam ode mach'ozeng-eden kw'Ibinọkpaabyi. Ofona nya, si k'ose kpenamkpen kw'ọdaak-ọ. 28 Átor-otor, ọnọng kode kw'obin k'ẹnọhmma ch'atte kwaam kwiden, kw'ina k'obo ọbaan k'mbọhk s'ọvaarnọng kwaam. Okenaka, kọ atte kaam ọtọhmnọng kwọ ọbọhk, nchi ọttọhk k'okpokkoro kwọ. Bọng-ẹfa ch'mbira nyena bẹ́, mbọbh ọvaarnọng ọttọhk?"

29 Ọvaarnọng oben-ẹ bẹ́, "Abir ad-agbaak mbọng o? Kk'kọ ọmaana Ziba ẹfa nnanga bẹ́, makebh owonọ nwo."

30 Mẹphiboshẹt ọpọhn-ẹ bẹ́, "Ch'ọvaarnọng kwaam ikk'otera okwuna k'ọdaam, tte kẹ ọtọka ọttọhk kpenamkpen."

31 Wa Bazilayi kw'ofon Gilead obir obina z'Rogẹlim okwu nya bẹ́, otor ọvaarnọng majeka ọraanga kw'Jọrdan, ọfha orik-ẹ k'eden. 32 Ny'ogbe nwo, Bazilayi kk'ọtama mawuriji. Wa node icho arọbh anna, obir ojibh-ẹ ojibh mawuriji. Wa od-oke ọvaarnọng ọbọhk k'ogbe kw'ọvaarnọng oning z'Mahanayim. 33 Ọvaarnọng oben Bazilayi bẹ́, "Tor-m mojeka z'okwubha, ad-aruk amaan-m z'Jẹrusalẹm. Kaam m'nkker-ọ."

34 Okenaka, Bazilayi ọpọhna ọvaarnọng bẹ́, "Kaam m'mbira nruk mpyirẹ yen, kw'kaam m'ntor ọvaarnọng mochina z'Jẹrusalẹm? 35 Kaam ninde icho arọbh anna k'atam. Ma, nna mbira mkpo nzonga ọttọhk f'ojibh-ojibh ọmaana f'opyibh-opyibh o? Ma, nna ọtọhmnọng kwọ obir okpo olebh f'ọchattọhk, ọmaana f'atuk ọbhaanga o? Ma, ina mbira mkpo mmaanga ọkọhna kw'ajinọng, ọmaana panọng o? Kayen kw'ọtọhmnọng kwọ m'ode ẹtọhka ọnang kọ ọvaarnọng kwaam? 36 Ọtọhmnọng kwọ m'otor ọvaarnọng mojeka z'okwubha kw'ọraanga kw'Jọrdan, mobira ọtọn ozenga bẹ́ kẹrẹm. Kayen kw'ọvaarnọng m'osi-m ẹtaamse nda? 37 Tte ọtọhmnọng kwọ ọkpa nnam z'ikẹ k'obhon, ọfha ḿpe ńnọhnga nyọma epekwuk ch'atte kwaam, ọmaana ch'akka kwaam. Okenaka, kirẹ Kimham kw'ode ọtọhmnọng kwọ ma. Tte kẹ otor ttatta kwaam majeka z'okwubha. Si ọttọhk kpenamkpen f'ọdaak-ọ, nang-ẹ."

38 Ọvaarnọng oben bẹ́, "Kimham m'ojek-ojeka ọmaan-m. Kaam m'mbira nsi ọttọhk kpenamkpen f'ọdaak-ọ, nnang-ẹ. Ọttọhk kpenamkpen f'arorọ abọbh-m, kaam m'nsi nnang-ọ."

39 Nya o, anọng mbo maphyir p'ọvaarnọng matọnọ, majeka ọraanga kw'Jọrdan, pira ọvaarnọng nojek. Ọvaarnọng ojek nya o, ọbaaka Bazilayi, obir ọsẹ-ẹ ittabọhng. Bazilayi ọbhana z'obhon kwẹ.

40 Ch'ọvaarnọng kk'ojeka z'okwubh kw'Gilgal, Kimham ojeka otor-ẹ. Agbongnọng p'Juda maphyir, ọmaana igboka s'agbongnọng p'Israẹl mabira ajeka akebha ọvaarnọng za.

41 Ogbe kobhirẹ, anọng p'Israẹl maphyir makwu akebha ọvaar Devid, maben-ẹ bẹ́, "Ttatta, osempira ivotte pamina p'ade agbongnọng p'Juda mafu kọ ọmaana ẹsọhmmọr chọ, ọttara agbongnọng pọ maphyir matima ajeka ọraanga kw'Jọrdan?"

42 Anọng p'Juda maphyir mapọhna anọng p'Israẹl bẹ́, "Mosi minna okurọ bẹ́, ọvaarnọng ọmaana mina mofon k'ẹbhọr danẹ. Osempira opyibh bọnga ettem o? Mba ọttọhk kpenamkpen f'mochi k'ọvaarnọng kofon. Mina m'ọttọhk kpenamkpen fẹ kobir ọtọka."

43 Anọng p'Israẹl apọhna anọng p'Juda bẹ́, "Mina moyen mgbega minna ijobh m'ẹvaar, mobir oyena Devid ọtam ọyọhnga bọnga. Osempira masaka mina eninga? Mina azang bọ wendo m'ochi eden oben bẹ́, motima ọvaarnọng kwamina ọkpa nnam?"

Minna kw'anọng p'Juda mayak ọbọhk apọhna ẹkọhr-ẹkọhr ayọhnga anọng p'Israẹl.