1 Samwẹl 21

Devid ọrọbhọ okebha Ahimẹlẹk z’Nọb

1 Wa Devid ọta z’Nọb od-okebha Ahimẹlẹk kw’ode ọfọhn-nja. Ojora osi Ahimẹlẹk, ọfọn-ọfọnọ od-okebha Devid, ọbọbh-ẹ bẹ́, "Ode yen kw’azeng manchenẹ? Kayen kw’ọnọng nna atọnọ?"

2 Devid ọpọhn-ẹ bẹ́, "Ọvaarnọng ọtọr-m itọhng, oben-m bẹ́, ‘Tte ọnọng oning odik kpenamkpen ozong ọmaana ọtọhm fọ ọttara ntọhna sọ o.’ Ṉ́nòde ajinọng paam, kaam kk’bẹ mbena bẹ́, makebh-m k’ibyi janẹ. 3 Bọng-ọttọhk f’ayen madidanma? Nang-m abrẹd-duk achen, wanẹma, ọttọhk kpenamkpen f’akpo ayena."

4 Ọfọhn-nja nwo ọpọhna Devid bẹ́, "Brẹd kw’awuriji wọ oning ma, kw’uwura nnang-ọ, óde ajinọng pọ nna panọng ayim amaana. Kaam brẹd nwoka ma kintim."

5 Devid ọpọhna bẹ́, "K’odik ọkkọkka, ode minna bẹ́, k’ogbe kw’ntim bẹ nyin k’iyaan, panọng mina k’ifor kad-anyọma. Ifor s’ajinọng mba iwur-owur, zaa wura itọhm s’mad-asi kizeng imaana awuriji. Menda iter iwur iyọhng-ọyọhnga!" 6 Minna kw’ọfọhn-nja ọnang-ẹ brẹd nwo kw’awuriji, ch’brẹd ọdọk-ọdọk ina ode kw’ọkpanẹ nwo kw’marọbh ny’Ọvaar Ibinọkpaabyi k’ititika, mabir atera ọmaana brẹd kw’ọkọm-ọkọm ny’ewu ndo ch’marọbh nwoza.

7 Ny’ewu ndo, ọtọhmnọng wanẹ kw’Saul oning nya kw’mabọk asok okurọ ọtọhm f’Ọvaar Ibinọkpaabyi f’im’osi. Wa kẹ okpen Doẹg, kw’ofon ẹkọma ch’Edom, ode oso kw’akker-arọkimaan p’Saul.

8 Devid ọbọbh Ahimẹlẹk bẹ́, "Ma, kọ ayen ọkọhn, wanẹma ọkkangkkang kw’uwura anang-m yirẹ? Kaam ọkkangkkang kintim, ogbongttọhk kpenamkpen kimbir ntima, okurọ eduka ch’nduk k’ọtọhm f’ọvaarnọng ọtọhm-m."

9 Ọfọhn-nja ọpọhna bẹ́, "Ọkkangkkang kw’oning ma, ode nwo kw’Golayat kw’ofon Philistiya, kw’uwa afhọ z’ilokodo s’Ẹla. Mabhọrọ k’ibara masok ny’nnam nnam kw’ẹphọd. Ó̱de im’atọka, atọka, okurọ bẹ́, ọkkangkkang ọdọk-ọdọk ma kode kw’ọkpanẹ nwoma." Devid oben bẹ́, "Nwoma okerim koyen, tọka nang-m ka."

Devid ọrọbhọ ochina z’Gat.

10 Ny’ewu ndo, Devid ọrọbh z’Saul, od-okebha Akish kw’ode ọvaarnọng kw’Gat. 11 Okenaka, atọhmnọng p’Akish mabọbh bẹ́, "Devid nwo kw’ode ọvaarnọng kw’izek njo azang ma? Kẹ azang kw’mad-akkọhn k’amọng ọmaana k’otubha kwabẹ bẹ bẹ́,

‘Saul kk’anọng ọfha k’nnọhna k’nnọhna,

Devid ọfhọ anọng k’nnọhna s’ina obhika ide’?"

12 Wa Devid ọtọka idik nja oke k’ettem, obir oyena ojora mawuriji k’Akish kw’ode ọvaarnọng kw’Gat. 13 Ofona nya o, Devid ọtọma osisi mach’ettem ina etorọ ny’abẹ k’ititika. Ny’abẹ k’mbọhk ọdọk o, osi mach’ikk’odinga, ọkkẹr ekpo ny’amma p’ebhumma, otte attabọhng pẹ ọbọhk mabhobh-ẹ z’ẹmma, masaka z’ammaphyabha.

14 Akish oben atọhmnọng pẹ bẹ́, "Màkkerẹ, ojinọng nwa kk’eding-edingẹ ọsa e. Osempira matọk-ẹ achen-m o? 15 Adingidingẹ bọ awor-m o, kw’matim ojinọng nwa akwu bẹ́, okwu osi dingẹ-dingẹ m’kaam k’ititika? Ọbaan za bẹ́, ojinọng nwa okwu m’kaam k’ọsọhm o?"