1 Minna kw'anọng p'Kiriyat-Jẹrim azeng akwu atọka Ẹkkọhbhọ ch'Echekẹ ch'Ọvaar Ibinọkpaabyi. Matọka atima achina z'Abinadab k'ọsọhm kw'oning k'egbe, marọbha Eleaza kw'ode nnwa kwẹ, masok-ẹ k'ọtọhm f'm'okkerẹ Ẹkkọhbhọ ch'Echekẹ ch'Ọvaar Ibinọkpaabyi.

2 Wa ogbe kk'obhira mawuriji kw'Ẹkkọhbhọ ch'Echekẹ ening z'Kiriyat-Jẹrim. Kibung-kibungọ, wa ode icho ẹrọbh. Anọng p'Israẹl maninga k'ikwosisi, mabira aror eden ch'mm'anyọma Ọvaar Ibinọkpaabyi k'ifor. 3 Nya kw'Samwẹl nobenẹ anọng p'Israẹl maphyir bẹ́, "Ó̱de mm'atima nttem sabọnga maphyir akpa nnam ator Ọvaar Ibinọkpaabyi, màrọbha aka p'ibhon idọk-ọdọk ny'abọnga k'ifor, màbira arọbha aka p'Ashtọrẹt maphyir màbharẹ. Màtte ifor sabọnga ọbọhk nang Ọvaar Ibinọkpaabyi, màbira kpobha kẹ-kẹ. Minna kw'ikẹ m'ọrọbha bọnga k'mbọhk s'aPhilistiya." 4 Minna kw'anọng p'Israẹl asokọ aka p'Baal ọttara p'Ashtọrẹt okikan, makpobha Ọvaar Ibinọkpaabyi kẹ-kẹ.

5 Nya o, Samwẹl oben bẹ́, "Màtobha anọng p'Israẹl maphyir z'Mizpa, kaam m'nkwukọ Ọvaar Ibinọkpaabyi k'abọnga k'nso." 6 K'ogbe kw'bẹ maphyir nkk'attonga z'Mizpa, makaabha asi abyenga nya ch'Ọvaar Ibinọkpaabyi oning. Ny'ewu ndo, mayima okwo, mabira ayaakẹ mpyibha sabẹ, maben bẹ́, "Mina nkk'itama ọsa z'Ọvaar Ibinọkpaabyi k'ititika." Wa Samwẹl wọ otim anọng p'Israẹl eden z'Mizpa.

7 K'ogbe kw'aPhilistiya abhaang bẹ́, anọng p'Israẹl kk'attonga z'Mizpa, asonọng p'Philistiya makwu bẹ́, marima bẹ ábẹ̀. Anọng p'Israẹl abhaanga nya o, ojora ọbọka bẹ okurọ aPhilistiya. 8 Maben Samwẹl bẹ́, "Njọm kàkpọka ozize k'amina k'nso anang Ọvaar Ibinọkpaabyi kw'ode Ibinọkpaabyi kwamina, ọfha ọkkaana mina, ọrọbha mina k'mbọhk s'aPhilistiya." 9 Nya o, Samwẹl ọtọka ọrọkimaannwa kw'otim ọjaabh ẹba, ọnang Ọvaar Ibinọkpaabyi mach'ẹja ch'ẹkwọmọ. Obhom ọkpẹkẹ Ọvaar Ibinọkpaabyi k'eso ch'anọng p'Israẹl. Ọvaar Ibinọkpaabyi ọbhaang-ẹ.

10 Nya ch'Samwẹl ọd-ọfọhnọ ẹja ndo ch'ẹkwọmọ, aPhilistiya mbo mazenga anyọma bẹ́, makwu arima anọng p'Israẹl ábẹ̀. Minna kw'Ọvaar Ibinọkpaabyi otim ẹbhaangkpon obik etum ny'ewu ndo, ẹtta aPhilistiya mbo, eke bẹ k'damadama, ebir eke bẹ opoma, ọwọhkọ anọng p'Israẹl makwubh bẹ mawuriji. 11 Anọng p'Israẹl asẹr-ọsẹr ayin z'Mizpa, makwubh aPhilistiya mbo, mapekẹ ayok banẹ ny'eden ch'echin z'izek-izek kw'Bẹt-Kar.

12 Ofona nya, Samwẹl ọtọka ọta ommin ny'njeka kw'Mizpa ọmaana Shen. Okpe ọta nwo Ẹbẹneza, oben bẹ́, "Minna kw'Ọvaar Ibinọkpaabyi ikk'mina ọkkaana opyirẹ." 13 Nya o, wa makema aPhilistiya, m'ọdọk ẹbhaakẹ ch'Israẹl kadimẹ.

K'akpen p'Samwẹl maphyir, wa ọbọhk kw'Ọvaar Ibinọkpaabyi oten aPhilistiya k'itama. 14 Ibhon s'Israẹl s'itọm ny'Ẹkrọn maa pyirẹ z'Gat s'iwa aPhilistiya mabọk, wa anọng p'Israẹl kk'nnam abir akpa ayena sẹ maphyir. Israẹl ọkkaana ayok-nkọma s'iwa ining k'ẹfa ch'aPhilistiya. Wa ẹmẹm ebir ekwu eninga ẹmaana Israẹl ọttara anọng p'Amọr.

15 Samwẹl ochina ororo otima Israẹl eden k'akpen pẹ maphyir. 16 K'icho k'icho, od-ozenga ọkọbha Bẹtẹl maa opyirẹ z'Gilgal ọttara z'Mizpa, ọd-ọttọhna aponga p'Israẹl ny'obyi mvo maphyir. 17 Ócher nya, wa ọd-ọkpa nnam z'Rama, za ch'obhon kwẹ oning, obir ọttọhna aponga p'Israẹl. Wa osi ija-byi nya ọnang Ọvaar Ibinọkpaabyi.