1 Minna kw'ọgbaakadik kw'Samwẹl ọnyaamẹ opyirẹ anọng p'Israẹl maphyir.

M'ogbe nwa, anọng p'Israẹl mabina ayin egbong amaana anọng p'Philistiya. Anọng p'Israẹl mayima egbong z'Ẹbẹneza, aPhilistiya ayima z'Aphẹk.

2 APhilistiya matọhm agbongnọng pabẹ k'ọsaabh bẹ́, makebha Israẹl. K'ose kw'egbong ndo ẹnyaamẹ, aPhilistiya makema anọng p'Israẹl, mafhọ anọng p'mm'apyirẹ nnọhna ijobh z'igbongtitika.

3 K'ogbe kw'agbongnọng p'arọbhọ anaanga makpa nnam z'ibhinga-byi sabẹ, asogbọhkọnọng p'Israẹl abọbh ayok bẹ́, "Osempira Ọvaar Ibinọkpaabyi otte aPhilistiya ọbọhk makema mina minna menda? Matte mọd-ọtọka Ẹkkọhbhọ ch'Echekẹ z'Shilo ọfha etor mina mofona, ebira ẹkkaana mina k'mbọhk s'awawunanọng pamina."

4 Minna kw'anọng mbo matọhm ajinọng z'Shilo, matima Ẹkkọhbhọ ch'Echekẹ ch'Ọvaar Ibinọkpaabyi kw'Ẹfa maphyir akwuna, ọnana ẹvaar-ẹvaar ny'njeka kw'acherubim. Iva afa p'Ẹli p'ade Hophni ọmaana Phinẹhas maninga nya amaana Ẹkkọhbhọ ch'Echekẹ ch'Ibinọkpaabyi.

5 K'ogbe kw'Ẹkkọhbhọ ndo ch'Echekẹ epyirẹ z'ibhinga-byi s'Israẹl, makwọhrọ amọng maa, izek inyengẹ. 6 K'ose kw'anọng p'Philistiya mabhaang izozo njo, mabọbh bẹ́, "Bọng-izozo s'nd-mbhaanga kina ekwurọ ch'aHiburu?"

Ch'makwu azonga bẹ́, Ẹkkọhbhọ ch'Echekẹ kk'ekwuna z'ibhinga-byi s'anọng p'Israẹl, 7 aPhilistiya mbo ojor bẹ. Maben bẹ́, "Ọka vanẹ kk'ọkwa ny'abẹ k'ekwurọ. Nn'oning k'odik ma e! M'odikse nwoma otim ọd-ọza o! 8 Kk'opyibha ọnang mina! Anyi wọ im'ọrọhbha mina k'mbọhk s'ọka f'oyen ẹfa minna? Aka mbo bọ asi anọng p'Ijip itama k'akira k'akira k'ogbe kw'maning z'ibyi s'anọng nna arukọ e. 9 Bọnga anọng p'Philistiya, màgaangẹ ifor o. Màdo ifor mach'ajinọng, ini minna ode, mm'akwu ade abira anang aHiburu, k'ose kw'bẹ nkk'abira ada anang bọnga. Màgaangẹ ifor mach'ajinọng, màsi erima!"

10 Minna kw'aPhilistiya mbo marim egbong amaana anọng p'Israẹl, makema anọng p'Israẹl. Ọnọng-ọnọng ọrọbh od-odim z'ikẹ k'ikkira. Anọng p'uwa mafhọ nya makem ẹsaabha. Agbongnọng p'izek p'Israẹl p'uwa mape nya, made nnọhna arọbh attaan okwuma ichi. 11 Wa aPhilistiya mabọka Ẹkkọhbhọ ch'Echekẹ; iva afa p'Ẹli, p'ade Hophni ọmaana Phinẹhas, mape nya.

12 Ny'ewu ndo, ọnọng wanẹ kw'ofon k'efona ch'Bẹnjamin, otima ẹbhar obina z'igbongtitika, ochina z'Shilo, ekpo py'ifor kk'ẹyaakẹ maphyir, eso ebir ede ebon-ebonọ. 13 Ch'opyirẹ nya, oze Ẹli ch'oning ẹwọr k'ogbera ny'adenkonga d'okkerẹ, okurọ ojora f'ọmaan Ẹkkọhbhọ ch'Echekẹ ch'Ibinọkpaabyi. Ch'ojinọng nwo odimẹ ny'obhon ọgbaak okpenamkpen f'oyinẹ, obhon kibungọ otto za, matọma amọng obhubhom.

14 Ẹli ọbhaang obhoma nwo nya, ọbọbh bẹ́, "Ẹlọ ndoma eyinẹ yen o?"

Minna kw'ọnọng nwo oduk-oduka od-okebha Ẹli. 15 Wa Ẹli node icho arọbh anna okwuma ichi k'atam, ọdọk iyaan kod-oze. 16 Ọnọng nwo oben Ẹli bẹ́, "Z'igbongtitika jọ s'mfon ma e; nnọbhọ za nkwuna menda e."

Ẹli ọbọbh-ẹ bẹ́, "Nnwa kwaam, bọng-odik wọ oyinẹ?"

17 Ọnọng nwo kw'otim itekẹ njo ọpọhna bẹ́, "Anọng p'Israẹl arọbhọ z'ititika s'aPhilistiya, agbongnọng pamina kk'abira apa mawuriji. Iva pọ afa, p'ade Hophni ọmaana Phinẹhas, nkk'apa. APhilistiya kk'Ẹkkọhbhọ ch'Echekẹ ch'Ibinọkpaabyi abir abọka e."

18 K'ose kw'ojinọng nwo opyi ẹmma z'Ẹkkọhbhọ ch'Echekẹ, Ẹli otto nnam-nnam ny'ogbera kw'oning, nya ch'ọnyọm ebhumma. Ọphyakẹ ẹdọngọ, ope, okurọ ch'iwa kk'ọtama, obir ọdọhbh-ọdọhbh mawuriji. Wa kẹ kk'anọng p'Israẹl eden otima k'icho arọbh afa.

19 Wa ọnyẹ kwẹ, kw'ode kwanọng kw'Phinẹhas otim ibhọr s'ikk'inyọma k'ọmaan. Ch'ọbhaang nya bẹ́, nkk'Ẹkkọhbhọ ch'Echekẹ abọka, ọmaana bẹ́, otte kw'odim, ọttara odim kwẹ nkk'apa, minna kw'ọmaan ọbọk-ẹ, ọmaan ny'eninga ndo. Okenaka, irem s'ọmaan mvo, inẹ-ẹ ẹfa. 20 Nya ch'ina od-opope, panọng mbo p'akker-ẹ ọmaan maben-ẹ bẹ́, "Gaangẹ ettem, kk'ojinọngnwa amaana." Okenaka, odik kọpọhn, itọhng kobir oyonga.

21 Kwanọng nwo okpe nnwa nwo bẹ́, Ikabọd*, oben bẹ́, "Abarada p'Israẹl kk'afona". Obenẹ minna okurọ ch'mabọk Ẹkkọhbhọ ch'Echekẹ ch'Ibinọkpaabyi, ọmaana obo kw'otte kw'odim, ọttara kw'odim kwẹ. 22 Oben bẹ́, "Abarada p'Israẹl kk'afona, okurọ bẹ́, nkk'Ẹkkọhbhọ ch'Echekẹ ch'Ibinọkpaabyi abọka."