1 Minna kw'Hana oze njọm, oben bẹ́,

"Kaam nyen ottemlebh kwiden k'Ọvaar Ibinọkpaabyi;

Ọvaar Ibinọkpaabyi kk'ẹfa chaam ọsa etinẹ* k'ẹrọng.

Kaam, nsi ẹmma nnang awawunanọng paam,

ettem elebh-m ch'asi-m nnaanga.

2 "Ọnọng za kode kw'owurọ mach'Ọvaar Ibinọkpaabyi;

Ọnọng za kode kw'ọkpanẹ kọ Ibinọkpaabyi,

Ẹtakpa kede ch'ẹgaangẹ mach'Ibinọkpaabyi kwamina.

3 "M'ẹgaga kàgbaak achina ororo,

tte ẹmma chabọnga ening ẹgaga ẹgbaakẹ.

Kirẹ, Ọvaar Ibinọkpaabyi ode Ibinọkpaabyi kw'ozong idik maphyir,

kẹ wọ ọd-ọkpaara aponga p'anọng.

4 "Nkk'ayuk p'akkikkaama aphyaka,

okenaka, ayok p'asir atto nkk'ẹfa ayena.

5 Ayok p'uwa mad-achi maa, madọhbh, maamba, nnad-asi itọhm s'anọng pira m'ayena ọchattọhk,

ayok p'uwa okwo ọkaam-ọkaama, m'ọdọk okwo kayim.

Kwanọng kw'uwa ọkpaan-ọkpaana, kk'iva achenọmfa ọmaana,

okenaka, oyok kw'uwa ikk'ajinọng k'ẹkaan ọmaana, ọdọk nnwa koyen.

6 "Ọvaar Ibinọkpaabyi wọ od-otima obo okwu, obir ọnang ọnọng akpen;

kẹ wọ od-otima anọng banẹ ochina z'offurabhon, obir ọphyabha anọng banẹ k'obo.

7 Ọvaar Ibinọkpaabyi ọd-ọtọhm opyibhada ọmaana ojibhada;

kẹ ọd-ọsaka anọng banẹ eninga, obir otinẹ anọng banẹ k'ẹrọng.

8 Kẹ od-otinẹ agbugbora z'ebonọ, obir otinẹ ayok p'aning k'owóra z'ititọhng;

osok bẹ k'ibyi majanẹ ọmaana avaar-va, obir osi bẹ maninga k'ẹvaarkkọhbhọ ch'ikpukpobha.

"Ọvaar Ibinọkpaabyi wọ oyen ẹtọma ch'iyagbin nja;

ny'ẹtọma ndo dọ ch'ottim iyagbin.

9 Kẹ m'ọkpẹmẹ ntọkọ s'anọng p'acher k'ikẹ,

okenaka, abyibyanọng mm'ape akponga k'orungibanga.

"Ẹfa azang ch'ọnọng od-otima okema;

10 mm'ajọhkọ anọng p'akaang Ọvaar Ibinọkpaabyi odik ma tukutuku.

Kẹ m'obik etum ọmaana ottempyibha z'ẹrọng otima otor bẹ;

Ọvaar Ibinọkpaabyi m'ọkpaara aponga p'iyagbin maphyir.

"Kẹ m'ọnang ọvaarnọng kwẹ ẹfa,

obir osi ẹfa ch'ọnọng kw'ikk'ana obyenga k'eso egorọ."

11 Nya o, Ẹlkana obina ọbhana z'Rama. Nnwa nwo oninga nya osi ọtọhm ny'Ọvaar Ibinọkpaabyi k'ititika, oninga k'okpebhẹ kw'Ẹli, kw'ode ọfọhn-nja kw'Ibinọkpaabyi.

12 Ajinọngva p'uwa Ẹli obhonọ made ivatama. Wa m'Ọvaar Ibinọkpaabyi mach'ọttọhk, katọk. 13 Wa ẹmmaana ch'afọhn-nja mad-asi ọmaana anọng p'Israẹl ede bẹ́, k'ogbe kw'ọnọng okwu ọfọhnọ ẹja, itọhmọ s'ọfọhn-nja m'itima ogbindara kw'oyen asa attaan ny'ọbọhk, okwu nya ch'eten etim ẹnọhn ny'ekpon. 14 Itọhmọ njo m'inọhma ogbindara nwo ny'izọhka njo siden. Okpenamkpen f'owong, vẹ f'ọfọhn-nja m'ọtọka ọnang ifor sẹ. Minna wọ kw'uwa mad-asi anọng p'Israẹl maphyir p'mad-akwu z'Shilo. 15 Okenaka, pira makwọmọ iyaak s'eten, itọhmọ s'ọfọhn-nja m'ikwu iben ọnọng kw'ọd-ọfọhnọ nja bẹ́, "Nang ọfọhn-nja eten ch'im'ọbhaabh, ndo ch'nkk'awọhna mọ̀tọka, kw'ọkpanẹ ekikebhẹ."

16 Ó̱de ọnọng nwo oben-ẹ bẹ́, "Tte nchi eden nkwọmọ iyaak s'eten nda maphyir nnang Ibinọkpaabyi pira atọka okpenamkpen f'im'atọka," itọhmọ njo m'ipọhn-ẹ bẹ́, "Mma, nang-m madidanma, ini minna ode, m'ntọka dẹ k'ẹfa."

17 Epyibha ch'iwa adikkobhva mba asi ẹbarẹ mawuriji z'Ọvaar Ibinọkpaabyi k'ititika, ch'iwa mad-atima nnanga s'anọng anang Ọvaar Ibinọkpaabyi k'ilulukọden.

18 Wa Samwẹl ode ojinọngnwa kw'ọd-ọfọra ẹphọd otima osi ọtọhm z'Ọvaar Ibinọkpaabyi k'ọsọhm. 19 K'icho k'icho, ọkka kwẹ, Hana od-okwum ọnọhma-baba kw'ikarẹ ochen-ẹ k'ogbe kw'ikẹ ttara odim mad-ayin ẹja ofufọhnọ. 20 Ó̱gbe opyirẹ, Ẹli m'osi Ẹlkana ọttara kwanọng kwẹ ittabọhng, obenẹ bẹ bẹ́, "Tte Ọvaar Ibinọkpaabyi ọnang-ọ iva p'afon m'kwanọng nwa, atima atera eso ch'oyok kw'oze njọm pira oyen-ẹ, ọkpa nnam ọttẹ-ẹ ọbọhk ọnang Ọvaar Ibinọkpaabyi." Macher nya, mabhana. 21 Minna kw'uwa Ọvaar Ibinọkpaabyi osi ejibha ọnang Hana; otima ibhọr ọmaan ajinọngva attaan, ọmaana panọngva afa. Minna kw'uwa Samwẹl obeng k'icho ny'ititika s'Ọvaar Ibinọkpaabyi.

22 M'ogbese nwa, wa Ẹli kk'ọtama mawuriji. Okwu ọbhaanga idik maphyir s'iva pẹ ad-asi anang anọng p'Israẹl maphyir, ọttara k'ose kw'mad-ayima amaana panọng p'ad-asi ọtọhm ny'ebhumma ch'ikkira s'etobha. 23 Nya o, oben iva pẹ bẹ́, "Osempira mad-asi idikse njo? Nd-mmaanga adiktama mba p'mad-asi z'anọng maphyir k'ẹmma. 24 Mma o, iva paam, idik s'mmaang anọng p'Ọvaar Ibinọkpaabyi ad-agbaak amaana bọnga ma, kijibhẹ o. 25 Ó̱de ọnọng opinẹ oyok, Ibinọkpaabyi oning ch'okwukọ k'ikẹ k'eso; okenaka, óde ọnọng opinẹ Ọvaar Ibinọkpaabyi, anyi wọ im'okwukọ k'ikẹ k'eso?" Chibhẹ nya, wa iva pẹ m'ẹmọng ch'otte ọd-ọkwọhrọ bẹ, kabhaang, okurọ bẹ́, wa ode ochibhẹ kw'Ọvaar Ibinọkpaabyi bẹ́, ọtọka akpen pabẹ.

26 Minna kw'Samwẹl ochin ororo obenga k'ifor, ọdaak Ọvaar Ibinọkpaabyi ọttara ayokinọng idik.

27 K'ewu danẹ, ọgbaak-ettem wanẹ kw'Ibinọkpaabyi okwu okebha Ẹli, oben-ẹ bẹ́, "Ma wọ ode odik kw'Ọvaar Ibinọkpaabyi ọgbaakẹ: ‘K'ogbe kw'uwa maning k'mbọhk s'Phero z'Ijip, wa nyaakẹ ifor saam bẹ́ ttaan nnang ẹsọhmmọr ch'ab'ttatta pabọnga. 28 Ny'mfonamma s'Israẹl maphyir, kaam nrọbh atte kwọ bẹ́, ode ọfọhn-nja kwaam, od-ovura ija-byi saam, ọkwọmọ insẹns, obir ọfọra ẹphọd k'kaam k'ititika. Nnanga s'anọng p'Israẹl mad-akwọmọ anang-m maphyir, mbir ntte ọbọhk nnang ẹsọhmmọr ch'atte kwọ. 29 Osempira malukọ ẹja chaam, ọttara nnanga s'mphyikẹ nsok ọsọhm kwaam o? Osempira akpobha iva pọ ayọhnga kaam, ad-ateka nten ọkkọkka s'ẹja kpenamkpen ch'anọng paam Israẹl anang-m, machi, mabar?’

30 "Ofona nya, Ọvaar Ibinọkpaabyi kw'Israẹl, obira oben bẹ́, ‘Wa nnwọhngọ bẹ́, ẹsọhmmọr chọ ọttara ch'atte dọ im'esi ọtọhm m'ikaam k'ititika ttattampe.’ Okenaka, Ọvaar Ibinọkpaabyi nobenẹ ma bẹ́, ‘Ọdọk minna mòde maphyir-phyir. Ayok p'akpobh-m, kaam m'mkpobha bẹ, ayok p'agbaar-m ajẹ, kaam m'nsaka bẹ eninga. 31 Ogbe okwuma kw'm'nsaka ẹfa chọ, ọmaana ch'ẹsọhmmọr ch'atte, ọfha ọtaminọng oning ọdọk k'echimma chọ oning. 32 Kọ m'aze itama ny'ọsọhm kwaam. Zaabẹ́ m'nsi ejibha nnang Israẹl, ńnòde ny'ẹsọhmmọr chọ, ọtaminọng ọdọk moninga. 33 Ọnọng kpenamkpen ny'abọnga k'ẹsọhmmọr kw'ina kẹ mmumọ k'ọtọhm f'ija-byi saam, m'nttẹ-ẹ ọbọhk oruk akpen p'isen osisọhrọ, mbira nkẹ-ẹ ẹbhaak k'ettem. Minna kw'iva p'iva pọ mmin'ad-ape ch'nkk'ajinọng asa.

34 " ‘K'iva pọ afa, kw'ode Hophni ọmaana Phinẹhas, bẹ mm'ade ẹkọhka anang-ọ. Bẹ anọng afa mm'ape k'ewu madanẹ. 35 Kaam m'nteka ọfọhn-nja ọkkọkka kwaam oyenẹ, kw'im'osi idik otor k'ettem chaam ọttara ochibhẹ kwaam. Kaam m'nsi ẹsọhmmọr chẹ ettima mawuriji, kẹ min'od-osi ọtọhm k'ogbe kpenamkpen ny'ititika s'ọnọng kwaam kw'ikk'ana mbyenga k'eso. 36 Ofona nya o, ọnọng kpenamkpen kw'orikẹ ny'ẹsọhmmọr chọ m'okwu ọraka eso ọnang-ẹ, ophyem-ẹ akpuka biribirẹ ọttara brẹd biribirẹ, obir okwuk-ẹ bẹ́, "Ototo, kkaan-m atin-m asok k'eninga danẹ ch'ọfọhn-nja, ọfha nd-nyena ọchattọhk e." ’ "