1 Wa ny'ogbe nwo, anọng p'Philistiya matobh agbongnọng pabẹ, mfha matima arima anọng p'Israẹl ábẹ̀. Akish obenẹ Devid bẹ́, "Zonga bẹ́, kọ ọmaana anọng pọ mm'ator-m egbong."

2 Devid oben-ẹ bẹ́, "Kọ m'aze ọttọhk f'ọtọhmnọng kwọ im'okpo osi." Akish ọpọhn-ẹ bẹ́, "Ojibh-ojibh, kaam m'nsọ-ọ ade ọnọng kw'im'od-okker-m, ttattampe."

3 Ny'ogbe nwa, wa Samwẹl kk'ọpa, anọng p'Israẹl maphyir mabhom-ẹ, mabir anọhng-ẹ z'Rama, kw'ode obhon kwẹ. Saul obir okwubh achiranganọng ọmaana abọhnganọng ny'izek s'Israẹl.

4 Anọng p'Philistiya mattonga, mabir asi ibhinga-byi z'Shunẹm. Saul otobha agbongnọng p'Israẹl maphyir, obir osi ibhinga-byi z'Gilboa. 5 K'ogbe kw'Saul oze agbongnọng p'Philistiya, opoma ọbọk-ẹ z'ettem, ojor-ẹ mawuriji. 6 Ofona nya o, ọbọbh Ọvaar Ibinọkpaabyi ọttọhk f'im'osi. Okenaka, Ọvaar Ibinọkpaabyi idachen, wanẹma Urim, wanẹma agbaak-ettem ch'Ibinọkpaabyi, kotim ọnang-ẹ ẹpọhna. 7 Nya o, Saul oben atọhmọ pẹ bẹ́, "Màror kwanọng kw'ode ọbọhnganọng nang-m, ọfha nd-mbọbh-ẹ."

Mapọhn-ẹ bẹ́, "Kwanọng wanẹ kw'ode ọbọhnganọng oning z'Ẹndọr."

8 Minna kw'Saul obhon ẹnya chẹ, ọfha maning-ẹ atin-ẹ. Otum ny'erungọ, kẹ ọmaana ajinọng pẹ afa mad-akebha kwanọng nwo. Oben-ẹ bẹ́, "Si ẹbọhk atek-m odik kw'ọnọng kw'im'nyerẹ eche ma." 9 Kwanọng nwo ọpọhn-ẹ bẹ́, "K'odik ọkkọkka, kọ azong ọttọhk f'Saul osi ma. Kẹ kk'achiranganọng, ọmaana abọhnganọng okwubha m'izek nja. Osempira anwọn-m ọmma bẹ́, mpe o?"

10 Saul ochekẹ ọnang-ẹ k'eche ch'Ibinọkpaabyi bẹ́, "K'ose kw'Ọvaar Ibinọkpaabyi oruk akpen, ọnọng kw'im'ọnang-ọ irem m'ọttọhk mva, kode."

11 Nya o, kwanọng nwo ọbọbh-ẹ bẹ́, "Anyi wọ kw'im'nyerẹ nnang-ọ?" Ọpọhn-ẹ bẹ́, "Yerẹ Samwẹl."

12 Ch'kwanọng nwo oze Samwẹl, ọkwọhrọ ẹmọng k'ẹrọng, oben Saul bẹ́, "Osempira abọhr-m o? Kọ ade Saul!"

13 Ọvaarnọng oben-ẹ bẹ́, "Oning-ọ ojor. Bọng-ọttọhk f'aze?" Kwanọng nwo ọpọhn-ẹ bẹ́, "Nze ọttọhk mach'ọgbagba ch'od-oyin z'izek."

14 Ọbọbh-ẹ bẹ́, "Okerẹ mbọng o?"

Kwanọng nwo ọpọhn-ẹ bẹ́, "Ojinọng wanẹ kw'ikk'ọtama wọ oyinẹ nya, ọfọra owurọ-baba." Ofona nya, Saul ozonga bẹ́, Samwẹl wọ. Ọraka eso otwu izek k'ikpukpobha.

15 Samwẹl obenẹ Saul bẹ́, "Osi yen kw'ayer-m za ch'nning, ayak-m odik?" Saul ọpọhn-ẹ bẹ́, "Ettem ẹyak-m odik ọkpan. APhilistiya arim-m ábẹ̀ ka, Ibinọkpaabyi obir ọkpa nnam ọbọr-m. Ozeng k'idachen, obir ode k'agbaak-ettem chẹ, ọdọk kaam ẹmọng kod-osi. Nya wọ osi nyer-ọ bẹ́, atek-m ọttọhk f'im'nsi."

16 Samwẹl oben bẹ́, "Osempira akwu abọbh-m odik, ch'Ọvaar Ibinọkpaabyi ikk'nnam ọkpa ọbọr-ọ, obir ode ọwawunanọng kwọ? 17 Ọvaar Ibinọkpaabyi kk'ọsa k'ose kw'uwa ọkamẹ, otor k'ọgbaakadik kwẹ kw'oyin-m m'ẹmma. Ọvaar Ibinọkpaabyi kk'ẹfa ọtọka z'ikọ k'ọbọhk, ọnang ọnọng kw'ọnyọm-ọ, kw'ode Devid. 18 Wa kọ Ọvaar Ibinọkpaabyi kakpobh, anọng p'Amalẹk ottempyibha kwẹ kakọhk mach'obenẹ. Nya wọ osi ọsọ-ọ odik nwa menda. 19 Ọvaar Ibinọkpaabyi m'ọtọka kọ ọmaana anọng p'Israẹl oke k'mbọhk s'aPhilistiya. Ophyinẹ, kọ ọmaana iva pọ mm'aninga amaan-m m'offurabhon. Ọvaar Ibinọkpaabyi m'obira ọtọka agbongnọng p'Israẹl oke aPhilistiya k'mbọhk."

20 Ny'eninga ndo, Saul otto idumsẹ ny'izek, ojora ọsẹ-ẹ okurọ ọgbaakadik kw'Samwẹl. Ẹfa ẹsẹ-ẹ okurọ ch'ina ọttọhk ochi k'ewu kibungọ.

21 K'ogbe kw'kwanọng nwo oze bẹ́, Saul kẹ ojora maa nọd-ọfọn-ọfọnọ, oben-ẹ bẹ́, "Ttatta, kaam ọtọhmnọng kwọ kk'odik kwọ mkpobha, ncher obo nsi ọttọhk f'aben-m bẹ́, nsi. 22 Madidaanma, yonga ọtọhmnọng kwọ itọhng. Tte nnang-ọ ọchattọhk achi ọfha ayena ẹfa azọhng abhana."

23 Saul obhum, oben bẹ́, "Ọttọhk mìnchi." Okenaka, ayok-ẹkaan pẹ ọmaana kwanọng nwo magwẹ-ẹ, ochera ọmaana bẹ. Obina z'izek oninga ẹwọr k'ebin.

24 Kwanọng nwo ọtọka ọbhaamnwa kw'ode ifor ma dọrọdọrọ kw'ọgban nya, ọfhọ. Ọtọka abuma p'mad-atima asi brẹd ọlọhbh, otima osi brẹd kw'nna yist ake. 25 Otinẹ ọchattọhk mvo obera Saul ọmaana ayok-ẹkaan pẹ, machi. Ny'erungọ ndo, mabina afona.