1 Ny'ewu ch'ettong ittaan, Devid ọmaana ajinọng pẹ mapyirẹ z'Ziklag. Maze bẹ́, anọng p'Amalẹk kk'egbong arima amaana anọng p'Nẹgẹv, ọmaana p'Ziklag maa, makwọmọ obhon kw'Ziklag, 2 mabir abọka panọng p'aning nya k'ẹmmọri, ọmaana anọng mboza maphyir, ivava, ọttara ataminọng. Matima bẹ afona. Ọnọng kw'mafhọ-ọfhọ kode.

3 Ch'Devid ọmaana ajinọng pẹ mapyirẹ z'Ziklag o, maze bẹ́, nkk'obhon kw'Ziklag akwọma maphyir, mabir abọka panọng pabẹ ọmaana iva maphyir k'ẹmmọri. 4 Nya o, Devid ọmaana ajinọng pẹ mabhom amọng maa ẹfa ẹsa bẹ. 5 Ny'ogbe nwo, nkk'panọng mbo afa p'Devid abọka k'ẹmmọri, p'ade Ahinoam kw'ofon Jẹzrẹl, ọmaana Abigẹl kw'ode opokwa kw'Nabal kw'ofon Kaamẹl. 6 Wa odik nwo ọyak Devid odik z'ettem mawuriji, ettem ebir epyibh ọnọng kpenamkpen okurọ iva pabẹ. Ofona nya, maben bẹ́, mm'atọhbh-ẹ ata. Okenaka, Ọvaar Ibinọkpaabyi oke Devid ettem.

7 Nya kw'Devid nobenẹ Abiyata kw'ode ọfọhn-nja, obir ode nnwa kw'Ahimẹlẹk bẹ́, "Chen-m ẹphọd." Abiyata o, ọtọka ọnang-ẹ. 8 Devid ọbọbh Ọvaar Ibinọkpaabyi bẹ́, "Ma, nkwubh anọng mbo p'akwọmọ Ziklag k'eden o? Ina nna bẹ mkpaang yirẹ?" Ọvaar Ibinọkpaabyi ọpọhn-ẹ bẹ́, "Kwubh bẹ, m'ana bẹ mkpaang ọna, abir atọka okpenamkpen f'ode fọ."

9 Nya o, Devid ọmaana ajinọng pẹ p'ade ẹnọhna okwuma arọbh ijobh mabina, mapyirẹ z'ilokodo s'Bẹsọr. Ayok banẹ o, maninga nya, 10 anọng arọbh ijobh m'ọdọk ẹfa kayen ch'mm'atima ajeka ilokodo njo. Okenaka, Devid ọmaana ajinọng pẹ p'ade ẹnọhna, machina ororo akwubh awawunanọng pabẹ.

11 Wa makwu aze oJipnọng wanẹ z'ẹgba, mabọk-ẹ achena Devid. Manang-ẹ asi ogwo, mabira anang-ẹ ọchattọhk ochi, 12 f'ode igbogbo s'matim fig asi, ọmaana ogbogbokwa ọfa f'matim grep kw'ikk'ọgwa asi. Ochi nya o, ifor ibira iphyabh-ẹ. Ode ch'ikk'oninga k'iyawu ittaan, ọmaana irungiwu ittaan, ọttọhk kochi, asi kobir ogwo.

13 Devid ọbọbh-ẹ bẹ́, "Anyi wọ ode atte kwọ? Afon memma?" Ọpọhn-ẹ bẹ́, "Kaam mfon Ijip, nde obira kw'ọnọng kw'ofon Amalẹk. Atte kwaam obhum-m ọbharẹ ma, ch'ikk'aam ọmma k'iwu ittaan s'ikk'ikpana. 14 Mina bọ mọrim egbong ọmaana anọng p'Kẹrẹt z'ẹbhaakẹ ch'Nẹgẹv, ọmaana ẹkọma ch'Juda, ọttara Nẹgẹv kw'Kalẹb. Mobir ọkwọmọ obhon kw'Ziklag."

15 Devid ọbọbh-ẹ bẹ́, "Ma, ina akpo atim-m eden mokebha egbongkaan ndo ch'ẹkwọmọ ibhon njo?" Ọpọhn-ẹ bẹ́, "Chekẹ nang-m k'ititika s'Ibinọkpaabyi bẹ́, kaam màfhọ, wanẹma kaam màtọka anang atte kwaam. Íkk'asa minna, kaam m'ntim-ọ nd-nkọhk-ọ ibyi s'maning."

16 Ojipnọng nwo otima Devid eden, mad-akebha anọng mbo za ch'nkk'araama, maninga k'ochichi, ọmaana k'igwagwa, ọttara k'izozo, okurọ ekpo saabhada py'nkk'atọka z'obhon kw'Philistiya ọttara kw'Juda. 17 Devid obina erima ọmaana bẹ, tọma ny'ẹsọhka ndo maa, pyirẹ k'ẹsọhka ch'ewu ndoza. Ọfhọ bẹ maa, ọnọng kw'ọnaang-ọnaanga kode, kw'ọkpanẹ ajinọng ẹnọhna p'manan k'akamẹl marọbh. 18 Wa Devid ọkpa nnam ọtọka ọttọhk kpenamkpen f'anọng p'Amalẹk nkk'atọka, ọttara panọng pẹ afa. 19 Ọttọhk f'odim-odimẹ kode; nnwanwa, wanẹma, odidennọng, odikkobh wanẹma ominanwa, wanẹma ọttọhk kpenamkpen f'iwa bẹ nkk'atọka. Wa Devid ọkpa nnam ọtọka byẹ maphyir. 20 Minna kw'Devid ọtọk etirakpo mbyo maphyir, ajinọng pẹ ayaar atima achẹ-ẹ eden, maben bẹ́, "Ma wọ ode ekpo py'Devid ọtọk z'egbong."

21 Nya o, Devid ọkpa nnam okebha ajinọng mboza arọbh ijobh p'maning z'ilokodo s'Bẹsọr p'uwa ẹfa ikk'bẹ ẹsa. Mayin k'iyaan akwu akebha Devid ọmaana anọng p'aning amaan-ẹ. Devid ọmaana ajinọng pẹ anyọm bẹ nya o, Devid ozima bẹ. 22 Okenaka, apyibhanọng banẹ, ọmaana akikọhra maphyir ny'ẹkaan ch'Devid maben bẹ́, "Ch'anọng mba nna mina atorọ moyin egbong, bẹ m'okebh f'ekpo py'motim okwuna egbong màyena. Tte ojinọng kpenamkpen okenaka ọtọka kwanọng kwẹ ọmaana iva pẹ otima ofona."

23 Devid oben bẹ bẹ́, "Mma e, ivotte paam. Tte moning minna osi ọmaana ekpo py'Ọvaar Ibinọkpaabyi ikk'mina ọnanga. Ọvaar Ibinọkpaabyi kk'mina okkera, obir ọtọka mgbong-kaan njo s'irim mina ábẹ̀ oke mina k'mbọhk. 24 Anyi wọ im'oyonga itọhng k'odik kwabọnga? Okebh f'ọnọng kw'oning ma okkerẹ ekpo, m'ode mbengana mach'okebh f'ọnọng kw'oyin egbong." 25 Nya o, Devid otima odik nwo osok ọsana ny'Israẹl, tọma za maa pyirẹ menda.

26 Ch'Devid opyirẹ z'Ziklag, ọtọka ekpo byanẹ py'matọk z'egbong, ọtọhm ọnang asogbọhkọnọng banẹ p'Juda p'ade ayokdikkobh pẹ, oben bẹ bẹ́, "Ma wọ ode ẹnanga chabọnga, ch'efon z'ekpo py'mọna awawunanọng p'Ọvaar Ibinọkpaabyi."

27 Wa ọtọhm nnanga njo ọnang anọng p'Bẹtẹl, ọmaana Ramọt kw'oning z'ẹbhaakẹ ch'Nẹgẹv, ọttara Jatir. 28 Obir ọnang anọng p'Aroer, ọmaana p'Siphmọt, ọmaana p'Ẹstẹmoa, 29 ọmaana p'Rakal, ọmaana anọng p'Jẹramẹl, ọttara anọng p'Ken. 30 Obir ọtọhm ọnang anọng p'Họma, ọmaana p'Bor-Ashan, ọttara p'Atak, 31 ọmaana p'Hẹbrọn, ọttara p'nkọma njoza maphyir s'iwa kẹ Devid ọmaana ajinọng pẹ nkk'akpaanga apyirẹ.