1 Samwẹl oben Saul bẹ́, "Kaam kw’Ọvaar Ibinọkpaabyi ọtọhmọ bẹ́, mbyeng-ọ ana k’eso mach’ọvaarnọng kw’ọbaabh anọng pẹ, Israẹl. Ofona nya, yonga itọhng madidanma, k’ẹkkaabha ch’efon z’Ọvaar Ibinọkpaabyi. 2 Ma wọ ode odik kw’Ọvaar Ibinọkpaabyi kw’Ẹfa maphyir ọgbaakẹ: ‘Kaam m’nnang anọng p’Amalẹk✝ irem k’ọttọhk f’uwa masi, ch’mabe k’eden atik anọng p’Israẹl, make bẹ ẹkọhr k’ogbe kw’mabin z’Ijip. 3 Nya o, zọhng, rima anọng p’Amalẹk ábẹ̀, kibhẹ ọttọhk kpenamkpen f’mayen. Bẹ kàjọhkọ o, fhọ bẹ maphyir k’ejinọng, ọttara k’ẹpanọng, ozeng k’ivava, ọmaana iva p’matim k’mbọhk, ọmaana adamogbodo, ọmaana arọkimaan, ọmaana akamẹl, ọttara nnyanya.’ "

4 Minna kw’Saul oyerẹ agbongnọng pẹ k’ibyi majanẹ, obhik bẹ z’Telaim. Obhik f’agbongnọng p’izek ode nnọhna ẹnọhna okwuma nnọhna arọbh achen; f’ayok p’abin Juda ode nnọhna ẹrọbh okwuma nchen. 5 Saul obina ochina z’ebhondim ch’Amalẹk, mayima egbong z’ilokodo. 6 Nya o, oben anọng p’Ken bẹ́, "Màbina rik anọng p’Amalẹk, ọfha nning bọnga mfhọ nttara; kirẹ wa bọnga masi ejibha anang anọng p’Israẹl maphyir, k’ogbe kw’mad-abina z’Ijip." Ofona nya o, anọng p’Ken mabina arik anọng p’Amalẹk.

7 Nya o, Saul orima anọng p’Amalẹk ábẹ̀, tọma z’Havila maa, pyirẹ z’Shur kw’ọnyọm Ijip, za ch’ewuchen ed-eyin. 8 Ọbọka Agag, kw’ode ọvaarnọng kw’Amalẹk k’ẹmmọri, otima ọkkangkkang ọfhọ anọng pẹ maphyir. 9 Okenaka, Saul ọmaana agbongnọng pẹ, m’Agag kafhọ. Wa m’ekpo byanẹ mach’arọkimaan p’ajibhẹ ọtam, ọmaana adamogbodo, ọmaana abhaamva, ọmaana arọkimaanva p’ajibh ifor, ọttara ọttọhk kpenamkpen f’iwa ojibh-ojibh kabir afhọ. Ekpo mbyoma, wa nkakamẹ bẹ́, makibhẹ kibungọ-kibungọ. Okenaka, ọttọhk kpenamkpen f’mabhum-obhum, obir opyibh-opyibh, makibhẹ kibungọ-kibungọ.

10 Nya o, Ọvaar Ibinọkpaabyi oben Samwẹl bẹ́, 11 "Ettem kk’aam ẹmma ch’nsi Saul ọvaarnọng, okurọ bẹ́, kk’nnam ọkpa ọbọr-m, ọsana kwaam kobir okpobha." Ettem ẹyak Samwẹl odik, obhom ọkpẹkẹ Ọvaar Ibinọkpaabyi ny’orungiwu nwo maphyir.

12 K’ekpikpebha, Samwẹl obina ofona bẹ́, od-oze Saul. Matek-ẹ bẹ́, "Saul kk’ochina z’Kaamẹl bẹ́, od-ottima ọttọhk f’ejima f’im’ọnang-ẹ ikpukpobha. Ocher nya o, ọbhakẹ ọkpa nnam z’Gilgal."

13 K’ogbe kw’Samwẹl okebh-ẹ, Saul oben bẹ́, "Tte Ọvaar Ibinọkpaabyi ọdọ-ọ! Kaam kk’ọsana kw’Ọvaar Ibinọkpaabyi mkpobha."

14 Okenaka, Samwẹl ọbọbh-ẹ bẹ́, "Bọng-avu bọ ad-amẹmẹ ma? Amọng p’adamogbodo p’nd-mmaanga ma, mafon men?"

15 Saul ọpọhna bẹ́, "Agbongnọng atim jẹ z’Amalẹk akwu e. M’arọkimaan ọmaana adamogbodo p’ajibh ọtam kafhọ. Masokọ bẹ́, matima afọhnọ ẹja anang Ọvaar Ibinọkpaabyi, kw’ode Ibinọkpaabyi kwọ. Okenaka, mokibhẹ mbyoza maphyir."

16 Samwẹl obenẹ Saul bẹ́, "Kpọ̀ka odik nwo! Tte ntek-ọ odik kw’Ọvaar Ibinọkpaabyi ọgbaak-m chena k’erungọ."

Saul ọpọhna bẹ́, "Tek-m."

17 Samwẹl oben bẹ́, "Chibhẹ ch’iwa ade nnwa-nnwa z’ikọ k’achen, wa akwu ade oso kw’mfona s’Israẹl. Ọvaar Ibinọkpaabyi obyeng-ọ ana k’eso mach’ọvaarnọng kw’Israẹl, 18 ọtọhm-ọ ọtọhm, oben-ọ bẹ́, ‘Zọhng fhọ abyibyanọng p’Amalẹk maphyir; rima egbong maana bẹ maa, madimẹ eche.’ 19 Osi yen kw’ina Ọvaar Ibinọkpaabyi akpobh? Osempira att-otto z’oyena kw’Amalẹk, ọwọhkọ asi itama z’ititika s’Ọvaar Ibinọkpaabyi?"

20 Saul ọpọhna bẹ́, "Kaam kk’Ọvaar Ibinọkpaabyi mkpobha, nsi k’ose kw’ọtọhm-m, mfhọ anọng p’Amalẹk maphyir, ntima Agag kw’ode ọvaarnọng kwabẹ, nkwuna. 21 Agbongnọng atọk arọkimaan ọmaana adamogbodo p’ajibhẹ ọtam z’egbong mfha matima afọhnọ ẹja z’Gilgal, anang Ọvaar Ibinọkpaabyi, kw’ode Ibinọkpaabyi kwọ."

22 Samwẹl ọpọhn-ẹ bẹ́,

"Ma, Ọvaar Ibinọkpaabyi ọd-ọdaam ettem k’nnanga s’ẹkwọmọ, ọmaana nja ofufọhnọ,

ọyọhnga ọgbaakadik kwẹ okpukpobha o?

Odik okpukpobha ojibhẹ ọtam ọyọhnga ẹja ofufọhnọ.

Odik obhubhaanga ojibh ọyọhnga iyaak s’arọkimaandim.

23 Osogaangẹ opyibhẹ mach’ọtaan,

eforga epyibh mach’itama s’aka okpukpobha.

Ch’ikọ ikk’ọgbaakadik kw’Ọvaar Ibinọkpaabyi abhuma,

kẹ kk’ikọ obir obhuma mach’ọvaarnọng."

24 Nya o, Saul oben Samwẹl bẹ́, "Kaam kk’epyibha nsa. Kk’ọsana kw’Ọvaar Ibinọkpaabyi, ọttara ntọhna sọ mbhuma. Wa agbongnọng paam bọ ajor-m, ofona nya, nchera mmaana bẹ. 25 Ototo, bina nang-m k’epyibha chaam, tor-m mọkpa nnam, ọfha mkpobha Ọvaar Ibinọkpaabyi."

26 Samwẹl oben-ẹ bẹ́, "Kaam kọ mìntor mọkpa nnam. Kk’ọgbaakadik kw’Ọvaar Ibinọkpaabyi abhuma, Ọvaar Ibinọkpaabyi obir obhum-ọ mach’ọvaarnọng kw’ọbaabh Israẹl."

27 K’ose Samwẹl ọbhakẹ bẹ́, ofona, Saul ọbọk-ẹ ny’ammabọhra p’owurọ-baba. Owurọ-baba nwo, ọyaakẹ. 28 Samwẹl oben-ẹ bẹ́, "Menda Ọvaar Ibinọkpaabyi kk’ẹvaar ch’Israẹl ọtọka z’ikọ k’mbọhk, ọnang oyok-obhon kw’ojibh ọyọhng-ọ. 29 Kẹ kw’ode Abarada p’Israẹl, afọra kod-osi, ochibhẹ kod-obir obhona. Kẹ oyokinọng kode, kw’od-obhona ochibhẹ kwẹ."

30 Saul ọpọhna bẹ́, "Kaam kk’epyibha nsa. Ototo, kenaka kpobh-m, m’ititika s’asogbọhkọnọng p’abaabh anọng paam, ọttara s’anọng p’Israẹl, ator-m mọkpa nnam, ọfha mkpobha Ọvaar Ibinọkpaabyi, kw’ode Ibinọkpaabyi kwọ." 31 Ofona nya o, Samwẹl otor Saul makpa nnam, Saul okpobha Ọvaar Ibinọkpaabyi.

32 Nya o, Samwẹl oben bẹ́, "Màchen-m Agag, kw’ode ọvaarnọng kw’Amalẹk."

Agag oyin k’iyaan ẹnyaan-ẹnyaana okebh-ẹ, ochibhẹ bẹ́, "K’odik ọkkọkka, ajobhiji p’obo kk’akpana."

33 Okenaka, Samwẹl oben bẹ́,

"K’ose kw’ọkkangkkang kwọ ikk’panọng ọsa m’iva kayen,

minna kw’akka kwọ ina nnwa moyena k’ikpakaana s’panọng."

Nya o, Samwẹl ọjọhkọ Agag ma tukutuku ny’ititika s’Ọvaar Ibinọkpaabyi, z’Gilgal.

34 Samwẹl obina ochina z’Rama, Saul ọbhana z’obhon kwẹ, z’Gibea. 35 Maa, pyirẹ k’ewu ch’Samwẹl ope, kẹ ọmaana Saul mayok ọdọk kaze. Samwẹl oninga k’oforpyibha okurọ Saul. Wa ettem ẹmma Ọvaar Ibinọkpaabyi ch’osi Saul ọvaarnọng kw’Israẹl.