1 Nya o, Devid ọrọbh z'Naiyọt kw'oning z'ẹkọma ch'Rama, ochina za ch'Jonatan oning, ọd-ọbọbh-ẹ bẹ́, "Kaam oyenẹ nsi mbọng o? Bọng-odik kw'njẹ o? Mpinẹ atte kwọ yen o, kw'od-oror-m bẹ́, ọfhọ-m o?"

2 Jonatan ọpọhn-ẹ bẹ́, "Minna mòde! Kọ màpe! Tte ntek-ọ e, ọttọhk mavanẹ kode f'atte kwaam osi, zaabẹ́ ọchamẹ yen, obir ọbar yen, f'ina eden od-ochi otek-m. Kayen kw'ikẹ im'odubh-m odik nwoma? Odik nwo minna kode!"

3 Okenaka, Devid ọnwọhngọ, oben-ẹ bẹ́, "Atte kwọ ozong mawuriji bẹ́, kaam ndaak-ọ idik, obir oben z'ettem bẹ́, tte Jonatan oning odik nwoma ozong o, ọfha oning k'oforpyibha oning. Okenaka, k'odik ọkkọkka, k'ose kw'Ọvaar Ibinọkpaabyi orukọ akpen, kọ abir aruk akpen, obo kw'nd-ntima nzenga ma."

4 Jonatan oben Devid bẹ́, "Okpenamkpen f'arorọ bẹ́, nsi nnang-ọ, kaam m'nsosi."

5 Ofona nya, Devid oben bẹ́, "Jima bẹ́, ophyinẹ wọ ode edidaamawu ch'ophe ọbhakwẹ, kw'ọbaan bẹ́, nchi ọttọhk mmaana ọvaarnọng. Okenaka, tte mfona nd-ntubha z'owonọ maa opyirẹ ophyinẹ-ojek k'ẹsọhka. 6 Ó̱de atte kwọ ọbọbh-ọ bẹ́, kaam kẹ? Tek-ẹ bẹ́, ‘Devid kk'ẹfa ọtọka k'kaam bẹ́, m'ọsẹr-ọsẹr ọta k'abẹ, z'Bẹtẹlẹhẹm, okurọ ẹja chabẹ ch'mad-afọhnọ k'obhon maphyir k'icho k'icho.’ 7 Ó̱de obenẹ bẹ́, ‘Ọbaan-ọbaana,’ oyinẹ bẹ́, kaam ọtọhmnọng kwọ kk'nnaanga. Okenaka, óde odik nwo opyibh-ẹ ettem, nya kw'im'azonga k'odik ọkkọkka bẹ́, ọkamẹ itama ọmaan-m. 8 Kọ si ejibha nang kaam ọtọhmnọng kwọ, mach'ikk'acheka anang-m k'Ọvaar Ibinọkpaabyi k'ititika. Ó̱de kaam mpinẹ, kọ oyenẹ zenga mmo fhọ-m! Kayen kw'm'atọk-m ake atte k'mbọhk o?"

9 Jonatan oben bẹ́, "Minna mòde! Ó̱de kaam ikk'ayaabhẹ biribirẹ mmaanga bẹ́, atte kwaam ọkam-ọ itama, wura kọ kìntekẹ o?"

10 Devid ọbọbh-ẹ bẹ́, "Anyi wọ im'otek-m, óde atte kwọ ọpọhn-ọ k'eden-tama?"

11 Jonatan oben bẹ́, "Kwu, tte mochina z'owonọ." Minna kw'matọnọ ẹkaan achina z'owonọ.

12 Nya o, Jonatan oben Devid bẹ́, "Ọvaar Ibinọkpaabyi, kw'ode Ibinọkpaabyi kw'Israẹl wọ im'ode nttẹsẹ kwamina. Ophyinẹ ogbese nwa, wanẹma ophyinẹ-ojek, k'ogbe kw'ikk'atte kwaam ndọna nzonga óde otim-ọ k'ettem ọkkọkka, m'nsọ-ọ azonga. 13 Okenaka, óde atte kwaam ọkamẹ bẹ́, ọsọ-ọ ọttọhk, m'nsọ-ọ azonga k'odik okkọkka, ọfha afona k'odiriji. Ó̱de ina minna nsi, tte Ọvaar Ibinọkpaabyi osi-m itama, zaa wura m'ibar yen. Tte Ọvaar Ibinọkpaabyi oninga ọmaan-ọ k'ose kw'ikk'oninga ọmaana atte kwaam. 14 Ma ch'ntim nruk akpen, kọhk-m ọdaakẹ kira nwo kw'Ọvaar Ibinọkpaabyi, ọfha anọng aning-m afhọ. 15 Kwuna ejibha kàkpọka osisi anang ẹsọhmmọr chaam o, obir ode k'ogbe kw'Ọvaar Ibinọkpaabyi kk'ọwawunanọng kpenamkpen kw'Devid eche odima m'iyagbin."

16 Minna kw'Jonatan osi echekẹ ọnang ẹsọhmmọr ch'Devid, oben bẹ́, "Tte Ọvaar Ibinọkpaabyi otuka itama s'awawunanọng p'Devid asẹ-ẹ." 17 Jonatan osi Devid obir ochekẹ k'ọdaakẹ kw'oyen ọmaan-ẹ, okurọ ch'Devid ọdaak-ẹ mach'ifor sẹ oyenẹ.

18 Nya o, Jonatan oben Devid bẹ́, "Ophyinẹ wọ ode edidaamawu ch'ophe ọbhakwẹ. M'ikọ mòze, okurọ bẹ́, ogbera kwọ m'otte eje. 19 Ophyinẹ-ojek k'ẹsọhka, china z'ibyi njo s'iwendo atubh k'ogbe kw'ẹkọhr ndoma ẹtọm, aninga anyọma ny'ẹta ch'Ẹzẹl atik-m. 20 Kaam m'ntta ayuk attaan k'ẹbhaakẹ danẹ ch'ẹta ndo mach'nkamẹ ọttọhk. 21 M'ntọhm odikkobhnwa, mben-ẹ bẹ́, ‘Zọhng ror ayuk mbo.’ Ó̱de mben-ẹ bẹ́, ‘Kirẹ ka, ayuk mbo aning m'ẹbhaakẹ nda chọ; tọka tima kwu ma,’ nya wọ oyinẹ bẹ́, akwu, okurọ bẹ́, k'ose kw'Ọvaar Ibinọkpaabyi orukọ akpen, kọ kk'anaanga, itama kide. 22 Okenaka, óde mbenẹ odikkobhnwa nwo bẹ́, ‘Kirẹ ka, ayuk mbo aning-ọ z'ororo,’ nya wọ oyinẹ bẹ́, m'abina nya, okurọ bẹ́, Ọvaar Ibinọkpaabyi kk'ọ obena bẹ́, azọhng afona. 23 Z'echekẹ ch'ikọ ọttara kaam nkk'ocheka, jima bẹ́, Ọvaar Ibinọkpaabyi wọ ode nttẹsẹ kwamina kw'ttattampe."

24 Minna kw'Devid otubh z'owonọ nwo. Ch'ogbe kw'odidaama kw'ophe ọbhakwẹ nokwu o, ọvaar Saul oninga ẹwor bẹ́, ochi ọttọhk. 25 Ọvaarnọng oninga z'ogbera kwẹ ọnyọma etumọ mach'od-okkikken oninga, okkerẹ Jonatan ititika. Abnẹr oninga otuma Saul, eninga ch'Devid ette eje. 26 Ny'ewu ndo, Saul odik kpenamkpen kọgbaakẹ okurọ ch'ochibhẹ bẹ́, "Ọttọhk kk'Devid ọsa, ozong-ẹ ifor bẹ́, k'odik ọkkọkka, kẹ Devid kowurọ k'ose kw'im'osi odidaama nwo." 27 Okenaka, k'ewu ndoka ch'ettong ifa s'ophe nwo, eninga ch'Devid ebira ette eje. Nya kw'Saul nọbọbhọ nnwa kwẹ Jonatan bẹ́, "Ode yen kw'chena ọttara menda ojinọngnwa kw'Jẹsẹ ina mina otorọ m'ọchattọhk mva?"

28 Jonatan ọpọhn-ẹ bẹ́, "Devid ọsak ifor ophyem-m bẹ́, nttẹ-ẹ ọbọhk ọta z'Bẹtẹlẹhẹm. 29 Oben-m bẹ́, ‘Ototo, tte-m ọbọhk mfona okurọ bẹ́, ẹsọhmmọr chamina eyen ẹja ch'im'ẹfọhnọ z'obhon e. Agbaanatte kwaam kw'ejinọng kk'ẹkkaabha ọtọhma bẹ́, nta za. Ó̱de ndaak-ọ idik, tte-m ọbọhk mfona nd-nze ivotte paam.’ Kẹ wọ osi pira m'okpokkoro kw'ọvaarnọng kokwu e."

30 Saul ọdọk-ẹ ọmaana Jonatan, oben-ẹ bẹ́, "Kọ nnwa kw'kwanọng-tama! Ọsọ-ọ bẹ́, kinzong bẹ́, atorọ ojinọngnwa kw'Jẹsẹ mad-asi igbardik nja anang ifor sọ, ọttara akka kw'ọmaan-ọ? 31 K'ose kw'ojinọngnwa kw'Jẹsẹ orukọ akpen m'izek nja: ode kọ o, obir ode ẹvaar chọ o, kwuna mèttima. Tọhm anọng yina-yina ma, matim-ẹ akwu, okurọ bẹ́, ọbaan bẹ́, ope!"

32 Jonatan ọbọbh otte bẹ́, "Okurọ yen kw'im'ope o? Ọjẹ mbọng o?" 33 Minna kw'Saul ọbharẹ ọkọhn fẹ bẹ́, ọfhọ Jonatan. Ofona nya, Jonatan ozonga bẹ́, otte ọkamẹ bẹ́, ọfhọ Devid.

34 Ọdọkọ Jonatan maa, obina ny'okpokkoro nwo bẹ́ bik ofona. Ny'ewu ch'ettong ifa s'ophe nwo, ọttọhk kochi okurọ k'oforpyibha kw'igbardik s'otte od-otima otor Devid.

35 Ny'ekpebha, Jonatan otima odikkobhnwa wanẹ ochina z'owonọ bẹ́, od-oyena nttọhna ọmaana Devid. 36 Oben odikkobhnwa nwo bẹ́, "Tima ẹbhar, zọhng ror ayuk mbo p'ntta." K'ose kw'odikkobhnwa nwo ofum ẹbhar, kẹ ọtta oyuk nwo ọkpan-ẹ. 37 Ch'odikkobhnwa nwo opyirẹ z'ibyi s'oyuk kw'Jonatan otto, Jonatan oyer-ẹ, ọbọbh-ẹ bẹ́, "Ma, oyuk nwo kọ kọkpanẹ o?" 38 Obir oben-ẹ bẹ́, "Sẹr-ọsẹr, k'eden kàkpọka o!" Minna kw'odikkobhnwa nwo odung ayuk mbo otima ọkpa nnam ochena otte. 39 (Odikkobhnwa nwo odik kw'od-oyin nya maphyir-phyir kozong. Jonatan ọttara Devid bẹ-bẹ bọ azong.) 40 Nya o, Jonatan ọtọka egbongkpo pyẹ ọnang odikkobhnwa nwo, obir oben-ẹ bẹ́, "Tima ekpo mbyoma kpa nnam z'obhon."

41 Ch'odikkobhnwa nwo ikk'ofona, Devid obina z'ẹbhaakẹ ch'ẹwọn-ẹwọna kw'ọta nwo, okwu ottima ndudungọ, otwu ititika ny'izek, ọraka eso igbedim ittaan ọnang Jonatan. Minna kw'bẹ anọng afa mabaaka ayok, matọn-ọtọn asọhrọ asen. Devid wọ iwa ọsọhrọ asen ọtam.

42 Nya o, Jonatan oben Devid bẹ́, "Zọhng k'ọdaam, okurọ bẹ́, nkk'ocheka k'eche ch'Ọvaar Ibinọkpaabyi bẹ́, ‘Ọvaar Ibinọkpaabyi m'oninga k'njeka kw'ikọ ọttara kaam, ọmaana k'njeka kw'iva p'iva pọ ọttara kw'iva p'iva paam, ttattampe.’ " Nya o, Devid ofona, Jonatan ọkpa nnam z'obhon.