1 Samwẹl oben anọng p'Israẹl maphyir bẹ́, "Kaam kk'itọhng nyonga k'idik maphyir s'magbaak-m, kk'bọnga ọvaarnọng nnanga kw'm'ọbaabha bọnga. 2 M'ogbe nwa, nkk'ọvaarnọng ayena kw'im'otima bọnga eden. Ṉ́nòde kaam, kk'ntama, mbir mmen asokora. Ajinọngva paam mabira aning ma amaana bọnga. Kaam kk'bọnga mbaabha, tọma z'edikkobh chaam maa, pyirẹ m'ewu ch'menda. 3 Kirẹ kaam wọ mbe ma. Màtek-m mpinẹ saam m'ititika s'Ọvaar Ibinọkpaabyi, ọttara s'ọnọng kw'ikk'ana obyenga k'eso. Ẹbhaam ch'anyi ch'ikk'ntọka? Ẹnyanya ch'anyi ch'ikk'ntọka? Anyi kw'ikk'ntuka? Anyi kw'ikk'nsa akpen akọhn-ẹ? Anyi wọ kw'ikk'ngwu kwẹ ncha pira mpyibh ọnọng aponga? Ó̱de ikk'ọttọhk mavanẹ ny'idik njo s'ntta nya nsa, màtek-m, kaam m'ndo sẹ."

4 Mapọhna bẹ́, "Mina kàtwukọ, akpen kabir asi makọhn ọnọng, ọttọhk f'ọnọng kabir atọka."

5 Samwẹl oben bẹ bẹ́, "Ọvaar Ibinọkpaabyi ọmaana ọnọng kw'ikk'ana obyenga k'eso bọ ade nttẹsẹ kwaam m'ewu nda bẹ́, bọnga m'epinẹ kpenamkpen m'kaam k'ifor kaze."

Bẹ mapọhn-ẹ bẹ́, "Kẹ Ibinọkpaabyi wọ ode nttẹsẹ majijik."

6 Nya o, Samwẹl oben anọng mbo bẹ́, "Ọvaar Ibinọkpaabyi wọ uwa otek Mosẹs ọttara Aarọn, matima ab'ttatta pabọnga abina z'Ijip. 7 Ofona nya, màkwu be ma, okurọ bẹ́, m'mgbaak bọnga m'ititika s'Ọvaar Ibinọkpaabyi, idik s'itor-otor maphyir s'Ọvaar Ibinọkpaabyi ikk'ọsa ọnang bọnga ọttara ab'ttatta pabọnga.

8 "K'ogbe kw'uwa Jekọb kk'ochina z'Ijip, mabhom ẹmọng akpẹkẹ Ọvaar Ibinọkpaabyi. Ofona nya, Ọvaar Ibinọkpaabyi ọtọhm Mosẹs ọmaana Aarọn, p'matim ab'ttatta pabọnga abina z'Ijip, masi oruk kwabẹ m'izek nja.

9 "Okenaka, mazaama Ọvaar Ibinọkpaabyi kwabẹ. Ofona nya o, ọtọka bẹ oke k'mbọhk s'Sisẹra kw'ode oso kw'asoja p'Hazọ, ọmaana k'mbọhk s'aPhilistiya, ọttara k'mbọhk s'ọvaarnọng kw'ọbaabh Moab, marima bẹ ábẹ̀. 10 Minna kw'mabhomọ ẹmọng akpẹkẹ Ọvaar Ibinọkpaabyi bẹ́, ‘O Ọvaar Ibinọkpaabyi, nkk'epyibha ọsa, mobir ọzaam-ọ, motera okpobha aka p'Baal ọmaana p'Ashtọrẹt. Okenaka, rọbha mina z'mbọhk s'awawunanọng pamina, mina mm'okpobh-ọ.’ 11 Nya o, Ọvaar Ibinọkpaabyi ọtọhm Jerubaal, ọmaana Barak, ọmaana Jẹphta, ọttara Samwẹl, mọrọbha bọnga z'mbọhk s'awawunanọng pabọnga, mfha maruk k'ọdaam.

12 "Okenaka, ch'nnaze bẹ́, ọvaar Nahash kw'Ammọn min'orima egbong ọmaana bọnga, maben-m bẹ́, ‘Mma e, mororọ ọvaarnọng kw'm'ọbaabha mina,’ chibhẹ ch'ode bẹ́, Ọvaar Ibinọkpaabyi, kw'ode Ibinọkpaabyi kwabọnga wọ uwa ode bọnga Ọvaarnọng. 13 Nya o, ma wọ ode ọvaarnọng kw'nkk'atéka, kw'ode nwo kw'marorọ. Màze e, Ọvaar Ibinọkpaabyi kk'bọnga ọvaarnọng ọnanga. 14 Ó̱de bọnga mayen ojora f'Ibinọkpaabyi, makpobh-ẹ, m'eso kagaangẹ ọmaana asana pẹ, óde bọnga ọttara ọvaarnọng kw'ọbaabh bọnga matorọ eden ch'Ọvaar Ibinọkpaabyi, m'ojibh ọnang bọnga. 15 Okenaka, óde bọnga nna Ọvaar Ibinọkpaabyi akpobh, óde magaangẹ eso amaana asana pẹ, kẹ m'osi bọnga itama mach'iwa osi ab'ttatta pabọnga.

16 "Ofona nya, màbe ma sẹẹbh, màze ọttọhk mva fiden f'Ọvaar Ibinọkpaabyi ọd-ọkam bẹ́, osi m'abọnga k'ititika! 17 Mba ọphagbe kw'wit kw'moning ma? Kaam m'nyerẹ Ọvaar Ibinọkpaabyi, ọtọhm ẹbhaangkpon, obir osi ẹrọng etebh, mfha mazonga epyibha kira ch'masi z'Ọvaar Ibinọkpaabyi k'ititika, ch'marọrọ ọvaarnọng."

18 Nya o, Samwẹl oyerẹ Ọvaar Ibinọkpaabyi ẹmọng. Ny'ewu ndo madan-danẹ, Ọvaar Ibinọkpaabyi ọtọhm ẹbhaangkpon, obir otebh ẹrọng. Minna kw'anọng mbo maphyir maning k'opoma f'Ọvaar Ibinọkpaabyi, ọttara f'Samwẹl.

19 Anọng mbo maphyir maben Samwẹl bẹ́, "Ze njọm nang Ọvaar Ibinọkpaabyi kwọ k'amina k'nso, mfha moning ope, kirẹ mina nkk'epyibha ch'mororọ ọvaarnọng ọsa ọttara z'mpyibha njoza maphyir."

20 Samwẹl ọpọhna bẹ bẹ́, "Oning bọnga ojor. Zabẹ, nkk'mpyibha nja asa, m'nnam kàkpa abọra Ọvaar Ibinọkpaabyi, màtera kpobh-ẹ maana ettem madanẹ. 21 M'nnam kàkpa z'aka p'nna k'eden ayinẹ. Aka bọnga ejibha masi, m'bọnga mabir akkaana, okurọ bẹ́, k'eden keyinẹ. 22 Ọvaar Ibinọkpaabyi anọng pẹ mòbhum okurọ eche chẹ ch'ẹbar odik, kirẹ wa ọdaam-ẹ z'ettem bẹ́, ọtọka bọnga mach'anọng pẹ. 23 Ṉ́nòde kaam, epyibhase ndo mìnsi s'Ọvaar Ibinọkpaabyi k'ititika bẹ́, ntwuna njọm ozize nnang bọnga. Kaam m'mbira mkpebhẹ bọnga eden ọkkọkka. 24 Okenaka, màzonga bẹ́, mm'ayena ojora f'Ọvaar Ibinọkpaabyi, màbira atima nttem sabọnga maphyir makpobh-ẹ mawuriji, mabir achibhẹ idik siden s'ikk'ọsa ọnang bọnga. 25 Okenaka, óde machin ororo asi itama, bọnga ọmaana ọvaarnọng kwabọnga, mm'adimẹ kibung-kibungọ."