1 "Màyerẹ ivotte pabọnga p'ejinọng bẹ́, ‘Anọng paam,’ mayerẹ ivotte pabọnga p'panọng bẹ́, ‘Adaakẹ-nọng paam.’

2 "Màgbaak odik nang akka kwabọnga, màgbaak odik nang-ẹ,

kirẹ kẹ kwanọng kwaam kode,

kaam odim kwẹ kimbir nde.

Tte ọkpọka ikkikkerẹ s'ọzaza,

ọttara izazadik s'od-otima aba pẹ osi.

3 Ina minna ode, kaam m'nwọr-ẹ ekpo, okwu otima erinikwum,

kaam m'njanẹ erinikwum chẹ k'iyaan k'ose kw'uwa mamaan-ẹ;

kaam m'nsẹ-ẹ ode mach'izek s'anọng nnarukọ,

m'mbhak-ẹ okwu ode mach'izek s'ina ekpo ed-ejibh,

m'mbira ntima esi-daaka mfhẹ-ẹ.

4 Kaam iva pẹ ọdaakẹ kwaam mìnkọhka,

okurọ bẹ́, mamaanẹ bẹ k'ẹzaza.

5 Ọkka kwabẹ ode ọzaza,

obira otima ibhọr sabẹ k'eden ch'ina ikpukpobha iyen.

Oben bẹ́, ‘Kaam m'ntor adaakẹ-nọng paam,

p'mad-anang-m ọchattọhk ọttara asi,

ọmaana owu, ọmaana ọbara-wurọ, ọmaana ana p'oliv, ọttara atuk.’

6 Ofona nya o, kaam m'ntima akkaangẹ, mkpa ọbhaang kw'kwanọng nwa;

kaam m'ntima etumọ mkpẹ-ẹ z'ẹtaanga, ọfha oning eden ozong.

7 Kẹ kwanọng nwo m'okwubh adaakẹ-nọng pẹ p'ejinọng, okenaka, bẹ mokebha;

kẹ m'oror bẹ, okenaka, bẹ moze.

Nya wọ kw'kẹ m'oben bẹ́,

‘Kaam m'mkpa nnam z'odim kwaam kw'echeden,

kirẹ za kw'uwa ojibhẹ ọtam ọnang-m, ọyọhnga ma.’

8 Kẹ kojim bẹ́, kaam wọ nde nwo

kw'uwa nnang-ẹ akpomọma mbo, ọmaana abhatuk, ọttara ana,

mbir nde nwo kw'uwa nnang-ẹ silva ọmaana gol k'ọsaabh

kw'uwa matim akpobha ọka f'Baal.

9 "Ofona nya o, kaam m'ntọka akpomọma paam k'ogbe kw'ikk'ẹttama,

m'mbira ntọka abhatuk paam k'ogbe kw'nkk'pẹ apa.

Kaam m'mkpa nnam ntọka owu ọttara ọbara-wurọ kwaam,

kw'uwura obubh-ẹ erinikwum.

10 Kaam m'nyaakẹ erinikwum chẹ

ny'ititika s'adaakẹ-nọng pẹ;

ọnọng mawanẹ-wanẹ kode kw'im'ọkpẹ-ẹ ọkkaana k'mbọhk saam.

11 Kaam m'mkpọka odidaama kwẹ maphyir;

ọmaana ididaamawu sẹ s'icho kpenamkpen, ọttara ididaamawu sẹ s'aphe abhapẹ,

mbir mkpọka iwọhngkwokawu s'ide ididaamawu sẹ maphyir.

12 Kaam m'nkibhẹ iwonọ sẹ s'grep, ọttara nchi sẹ s'fig,

s'obenẹ bẹ́, jẹ jọ ide ẹphya ch'adaakẹ-nọng pẹ manang-ẹ;

Kaam m'nsi iwonọ njo sẹ s'grep, ọttara nchi sẹ s'fig ibhakẹ ẹdabhẹ,

mgbaten m'ibira ikibhẹ jẹ.

13 Ọvaar Ibinọkpaabyi kk'ọgbaaka bẹ́,

Kaam m'nnang-ẹ irem ny'iwu njo;

s'ọkwọmọ insẹns ọnang ọka f'Baal;

osi ẹnya ch'oke mbaanga ọttara ekpo py'ẹdọngọ,

otima oyin ẹzaza z'adaakẹ-nọng pẹ,

okenaka, ọzaama kaam."

14 "Ofona nya, kaam m'ndaabh-ẹ;

ntim-ẹ nzeng z'ibyi s'anọng nna arukọ

mbira mgbaak odik k'ẹmmakpa ch'izek-izek, nnang-ẹ.

15 Za wọ kw'm'mkpa nnam ntte iwonọ sẹ s'grep ọbọhk, nnang-ẹ,

Kaam m'nsi ilokodo s'Akọr ide ọmma kwẹ kw'ichen osisok.

Za wọ kw'im'ọbhaang-m odik mach'ogbe kw'uwa ode ominanwa,

mach'ewu ndo ch'iwa obin z'Ijip.

16 Ọvaar Ibinọkpaabyi ọgbaakẹ bẹ́, "Ny'ewu ndo,

kọ m'ayer-m bẹ́, ‘odim kwaam’;

ọdọk kaam màyerẹ bẹ́, ‘atte kwaam.’

17 Kaam m'nrọhbha ache p'aka p'Baal z'ẹmma chẹ;

ọnọng ọdọk ache pabẹ, mochekẹ.

18 Ny'ewu ndo, kaam m'ntima nten s'ẹgba, ọmaana ọnọhn f'ẹrọng,

ọttara ekpo py'ezeng k'izek,

nchekẹ nnang bẹ.

Kaam m'mkpọka oyuk,

ọmaana ọkkangkkang, ọttara egbong ny'izek njo,

mfha anọng maphyir, maninga k'odiriji.

19 Kaam m'nrọk-ọ omina ttattampe;

m'ntima atoriji ọmaana odik ọkkọkka nrọk-ọ omina,

mbir nkọhk-ọ ọdaakẹ ọttara ikwosisi.

20 Kaam m'ntima atoriji, nrọk-ọ omina,

nya kw'kọ m'azonga Ọvaar Ibinọkpaabyi.

21 Ọvaar Ibinọkpaabyi ọgbaakẹ bẹ́,

"Ny'ewu ndo,

kaam m'nnang ọrọngkpakpa ẹpọhna,

ọrọngkpakpa obira ọnang izek ẹpọhna;

22 izek m'inang akpomọma mbo ẹpọhna,

abhatuk ọmaana ana p'oliv

mm'anang Jẹzrẹl ẹpọhna.

23 Kaam m'nttim-ẹ ny'izek njo mach'ọnọng kwaam,

m'nkọhka ọdaakẹ kwaam ny'anọng mbo p'nyerẹ bẹ́, ‘Adaakẹ-nọng paam azang,’

ayok mbo p'mayerẹ bẹ́, ‘Anọng paam azang,’ kaam m'nyerẹ bẹ bẹ́, ‘Bọnga bọ made anọng paam’;

bẹ mm'abira aben bẹ́, ‘Kọ wọ ade Ibinọkpaabyi kwamina.’ "