1 Ma wọ ode ọgbaakadik kw'Ọvaar Ibinọkpaabyi ọgbaak Hosea kw'ode nnwa kw'Beeri, k'ogbe kw'uwa Uziya, ọmaana Jotam, ọmaana Ahaz, ọttara Hezekiya nkk'Juda abaabha. Ny'ogbe nwo wọ kw'uwa Jẹroboam kw'Jehoash obhonọ, obir ọbaabha Israẹl.

2 K'ogbe kw'Ọvaar Ibinọkpaabyi ọtọm odik ogbugbaak ọnang Hosea, wa obenẹ Hosea bẹ́, "Zọhng tọka ọzaza-kwanọng k'ọbada, ọmaan-ọ iva, kirẹ k'ose kw'aponga apyibhẹ kwanọng kw'otto k'ẹfẹbhẹ, minna kw'aponga apyibhẹ ẹkọma nda k'izazadik s'masi anang Ọvaar Ibinọkpaabyi." 3 Nya o, Hosea ọtọka Goma kw'ode ominanwa kw'Diblaim k'ọbada. Goma okwu otima ibhọr, ọmaan Hosea ojinọngnwa.

4 Ọvaar Ibinọkpaabyi oben Hosea bẹ́, "Kpe nnwa nwo bẹ́, Jẹzrẹl, okurọ bẹ́, ogbe mọ̀tọka, kaam m'nnang ọsọhm kw'Jehu irem k'anọng p'uwa mafhọ z'ẹkọma ch'Jẹzrẹl. Kaam m'mbira mkpọka ẹvaar ch'ẹkọma ch'Israẹl. 5 Ny'ewu ndo, kaam m'nsi ẹfa ch'anọng p'Israẹl ẹsa z'ilokodo s'Jẹzrẹl."

6 Goma obira otima ibhọr, ọmaan kwanọngnwa. Ọvaar Ibinọkpaabyi oben Hosea bẹ́, "Kpe kwanọngnwa nwo bẹ́, Lo-Ruhama (kw'oyinẹ bẹ́, "ọnọng kọdaakẹ"), kirẹ kaam ọdọk ọdaakẹ mìnyena mmaana anọng p'Israẹl maphyir-phyir k'ose kw'úwúra mbin nnang bẹ. 7 Okenaka, kaam m'nkọhka anọng p'Juda ọdaakẹ, mbira nkkaana bẹ. Oyuk azang kw'm'ntima nkkaana bẹ́, ọkkangkkang azang, egbong azang, nnyanya ọmaana ayaar-nnyanya mìmbira ntima. Okenaka, kaam Ọvaar Ibinọkpaabyi, kw'nde Ibinọkpaabyi kwabẹ, m'nkkaana bẹ."

8 K'ogbe kw'ikk'Lo-Ruhama okwura, Goma obira otima ibhọr, ọmaan ojinọngnwa. 9 Ọvaar Ibinọkpaabyi oben Hosea bẹ́, "Kpẹ-ẹ bẹ́, Lo-Ammi (kw'oyinẹ bẹ́, "anọng paam azang"), kirẹ bọnga m'anọng paam kade, kaam Ibinọkpaabyi kwabọnga kìmbir nde.

10 "Okenaka, kwuna anọng p'Israẹl m'asaabh mach'ofong kw'ẹraangaka kw'ina eyoma ode, ebhika kobir ode. Ny'ibyi njo s'iwa mabenẹ bẹ bẹ́, ‘Bọnga m'anọng paam kade,’ nya kw'mm'ayerẹ bẹ bẹ́, ‘Iva p'Ibinọkpaabyi kw'orukọ akpen.’ 11 Anọng p'Juda ọttara p'Israẹl mm'akwu agbaka. Bẹ mm'atéka osonọng mawanẹ, mabir abina ny'izek njo, kirẹ, ewu ch'Jẹzrẹl, m'ede ewu chiden.