1 Ọttọhk kpenamkpen f'anọng p'Ephraim asi, k'eden kod-oyin,

bẹ mad-atima ewu kibungọ makwubh ebum ch'ẹbhaakẹ ch'ewuchen ed-eyin,

mabir asi afọra k'ẹmma, ọttara ikọrdik.

Mad-asi nttọhna amaana Asiriya

mabir atọhm ana p'oliv z'Ijip.

2 Ọvaar Ibinọkpaabyi oyen aponga p'm'oyerẹ Juda;

m'ọnang Jekọb irem otor k'osisi kwẹ,

obir otuk-ẹ otor k'ose kw'ẹ́mmáaná-tama chẹ ede.

3 K'ogbe kw'oning z'ọkka k'ẹbhọr, kẹ ọbọk ọgbaanotte k'ebhokọhrọ,

k'ogbe kw'ikk'ọbara, orima ọmaana Ibinọkpaabyi.

4 Wa orim ọmaana ozeng-eden kw'Ọvaar Ibinọkpaabyi maa, okem-ẹ;

obhom ẹmọng okwukọ ozeng-eden nwo bẹ́, ọkkaan-ẹ.

Ottema ọmaana Ibinọkpaabyi z'Bẹtẹl,

Ibinọkpaabyi ọgbaak odik ọmaan-ẹ za.

5 Ọvaar Ibinọkpaabyi kw'Ẹfa maphyir,

Ọvaar Ibinọkpaabyi wọ ode eche chẹ!

6 Ofona nya, bọnga mm'akpa nnam ator Ibinọkpaabyi kwabọnga;

màchina ororo k'ọdaakẹ kwabọnga ọmaana idik s'itor-otor,

mabir aninga atik Ibinọkpaabyi kwabọnga k'ogbe kpenamkpen.

7 Ozeng-ẹphya od-otima ọgbangbang kw'ina ọbaan, oyoma ekpo,

kẹ ọd-ọdaak-ẹ bẹ́, ottukọ ọnọng.

8 Ephraim od-osi ẹmma bẹ́,

"Kaam ojibh-m mawuriji. Kaam n'nde ọnọng kw'oyen oyena mawuriji.

Ọnọng itama saam mòze, wanẹma, epyibha ch'kaam k'ifor,

okurọ oyena nwa kwaam maphyir."

9 "Kaam kk'Ọvaar Ibinọkpaabyi kw'ode Ibinọkpaabyi kwabọnga nda

tọma z'ogbe kw'mabin z'Ijip;

kaam m'nsi bọnga mabir aruk k'okkira,

mach'iwu njo s'iwa mad-asi odidaama kwabọnga.

10 Kaam mgbaakẹ odik nnang agbaak-ettem ch'Ibinọkpaabyi,

nkọhka bẹ idik saabhada

mbira ntima bẹ mgbaak nzẹmẹ."

11 Ma, Gilead osi ẹyaaka o?

Anọng pẹ ọttọhk áfẹ̀ kabang!

Ma, mad-atima abhaam afọhnọ nja z'Gilgal o?

Ọja-byi fabẹ m'ode mach'atakkin

p'aning k'owonọ kw'matubh-otubh.

12 Jekọb ọrọbhọ ozeng z'ẹkọma ch'Aram;

Israẹl osi agbugbina pira ọtọka kwanọng,

obir okkerẹ arọkimaan otima ọnang ẹba-phya chẹ.

13 Ọvaar Ibinọkpaabyi otim ọgbaak-ettem ch'Ibinọkpaabyi otima anọng p'Israẹl obina z'Ijip,

obir otima ọgbaak-ettem ch'Ibinọkpaabyi okkerẹ bẹ.

14 Okenaka, Ephraim kk'ettem ọsa epyibh Ibinọkpaabyi kwẹ mawuriji.

Ọvaar Ibinọkpaabyi kwẹ m'ọttẹ-ẹ ọbọhk ọtọka irem k'ọzẹ f'okibhẹ

obir ọnang-ẹ irem k'ẹnọng-myaana chẹ.