1 Wa anọng p'Israẹl made mach'echi ch'grep ch'ẹd-ẹnyaam-ọnyaamẹ;

ẹwọm aduk p'ikẹ k'ifor.

K'ose kw'aduk pẹ asaabhẹ,

minna kw'mattim ọja-byi k'ọsaabh;

k'ose kw'izek sabẹ ijibh ekpo,

minna kw'madok ata p'aka p'mad-akpobha.

2 Nttem sabẹ id-ibọhra bẹ ọbọhra,

ofona nya, bẹ mm'atọka irem k'mpyibha sabẹ m'ogbe nwa.

Ọvaar Ibinọkpaabyi m'ọvọhkọ ọja-byi fabẹ,

obir okibhẹ ata p'aka p'mad-akpobha.

3 Nya o, mm'aben bẹ́, "Mina m'ọvaarnọng koyen

okurọ ch'nna Ọvaar Ibinọkpaabyi okpobh.

Okenaka, zaa wura moyen ọvaarnọng oyena,

bọng-ọttọhk f'kẹ im'osi ọnang mina o?"

4 Bẹ mad-atọka nwọhngọ k'ọsaabh,

masi nchekẹ k'ẹfọraden, mabira asi nttọhna;

ofona nya, aponga-tama masaabh

mach'azizaarẹ

p'amenẹ k'owonọ kw'nkk'atubha.

5 Anọng p'arukọ z'Samariya aning k'ojora

okurọ ọkpata kw'ọbhaamnwa kw'Bẹt-Avẹn.

Anọng p'akpobh ọkpata nwo mm'aninga k'oforpyibha,

ozeng k'afọhn-ẹja pẹ,

ọttara ayok mbo p'uwa ad-alobh ajibhada p'ọkpata nwo,

okurọ ch'iwa mana bẹ atima achina k'ẹkọma ọdọk-ọdọk.

6 Bẹ mm'atinẹ ọkpata nwo atima achina z'Asiriya,

mad-anang ọvaarnọng kwiden mach'ntuma.

Bẹ mm'asi anọng p'Ephraim igbardik;

mgbar m'isi anọng p'Israẹl okurọ eforgbaka ch'mayen amaana aka.

7 Bẹ mm'afhọ ọvaarnọng kw'Samariya,

madim-ẹ eche mach'ochikpakpa kw'owokọ k'asi.

8 Mm'avọhkọ ọja-byi f'ọyaankpa f'mad-aninga asi epyibha,

kw'ode epyibha ch'anọng p'Israẹl.

Akkaangẹ, ọmaana isidima mm'amen,

mabhọrọ ọja-byi fabẹ.

Nya kw'mm'aben agbe p'agor-ogorọ bẹ́,

"Màbubha mina!’’

mabira aben agbe p'ikarẹ bẹ́, ‘‘Màtto kpẹkẹ mina!"

9 "Tọma z'ogbe kw'Gibea, bọnga anọng p'Israẹl nkk'mpyibha asa,

maa pyirẹ ma, matim aning ny'mpyibha njo.

Ma, egbong ọdọk mètto ch'im'ẹfhọ

anọng-tama m'Gibea yirẹ?

10 Kaam m'nnang bẹ irem k'ogbe kw'ọdaak-m;

nkọma m'igbaka, irima bẹ ábẹ̀,

isok bẹ k'irem okurọ epyibha chabẹ ch'masi mabira-obira.

11 Ephraim ode ọbhaamkwa kw'ikk'okpebhẹ ọkkọkka ọtọka;

kw'ọdaak-ẹ bẹ́, oduk barli;

kaam m'nkẹ-ẹ ikwubha

k'ekikora.

Kaam m'nkwubh anọng p'Ephraim,

anọng p'Juda matubh izek,

anọng p'Jekọb m'achaara izek.

12 Bọnga màsi ẹ́mmáaná ch'etoro-otor,

mfha maze ejibha ch'ọdaakẹ kw'ina ẹkpọka oyen.

Màbhona akpentama pabọnga,

okurọ bẹ́, ogbe kw'mm'aror Ọvaar Ibinọkpaabyi wọ ma,

maa, kwuna otima atoriji pẹ okwu

odo bọnga.

13 Okenaka, bọnga nkk'itama atubha,

mapha itama,

bọnga nkk'ochiduk kw'ẹnọngbọhra acha.

Ch'bọnga maphe nnam k'ẹfa chabọnga, ọmaana k'ẹfa ch'akkikkaama saabhada

pabọnga,

14 anọng p'abhaang ẹmọng ch'egbong m'arima anọng pabọnga ábẹ̀,

ofona nya, mm'avọhkọ ọfa-byi fabọnga maphyir

mach'iwa Shalam ọvọhkọ Bẹt-Arbẹl k'ewu ch'egbong,

k'ogbe kw'uwa matọk ab'ọkka, ọmaana iva pabẹ mamaam z'izek.

15 Minna kw'im'oyin ọmaana bọnga anọng p'Bẹtẹl,

okurọ bẹ́, itama sabọnga ibar-ọbar.

Ó̱de éwu ndo ikk'epyira,

ọvaarnọng kw'Israẹl m'odimẹ eche kibung-kibungọ.