Hosea 5

Aponga apyibhẹ Israẹl

1 Bọnga afọhn-ẹja, màyonga itọhng m’odik nwa!

Bọnga anọng p’Israẹl, màke otum m’odik nwa!

Ọvaarsọhm, yonga itọhng!

Aponga mba ade pabọnga:

Bọnga made ọmma kw’manwọn z’Mizpa,

ọmaana ibin s’mabharẹ z’Tabọr.

2 Anọng p’ad-akaanga odik kk’adima k’epyibha ch’inọng-fhufha mawuriji.

Kaam m’nnang bẹ maphyir irem.

3 Kaam nzong odik kpenamkpen kw’ọmaan Ephraim;

Anọng p’Israẹl otutubha katubh m’kaam k’ititika.

Bọnga anọng p’Ephraim nnasi ẹzaza;

Israẹl kk’odoka e.

4 Itama sabẹ kìcher bẹ́,

makpa nnam z’Ibinọkpaabyi kwabẹ.

Ẹzazamaana kk’nttem sabẹ ẹbhọra;

M’ọdọk Ọvaar Ibinọkpaabyi kazong.

5 Eforga ch’Israẹl kk’bẹ ẹka k’odik;

Anọng p’Israẹl, ozeng k’anọng p’Ephraim, masir k’epyibha chabẹ;

anọng p’Juda abir ator bẹ masira.

6 K’ogbe kw’matim arọkimaan ọmaana abhaam pabẹ bẹ́,

mad-aror Ọvaar Ibinọkpaabyi,

m’kẹ màze;

kẹ kk’bẹ mbọhk ogbura.

7 Bẹ m’Ọvaar Ibinọkpaabyi kakpobh amaana ettem madanẹ;

iva pabẹ p’mamaanẹ, m’ab’otte kayen.

K’ogbe kw’mm’asi odidaama kwabẹ kw’Ophe Ọbhakwẹ,

kẹ m’odimẹ bẹ eche, obira okibhẹ iwonọ sabẹ.

8 "Màje enyi-sa z’Gibea,

maje ẹsa z’Rama.

Màwon egbong-mọng z’Bẹt-Aven;

Bẹnjamin, tima mina eden e.

9 Ephraim m’oze irem

ny’ewu ch’im’mkpaara aponga.

Odik kw’mgbaakẹ ma,

m’oyin mbengana ny’nkọma s’Israẹl.

10 Adidennọng p’Juda made

mach’anọng p’mad-arọhbha ata p’enem.

Kaam m’ntima ottempyibha kwaam ntor bẹ,

mach’ẹnwa-nwa.

11 Ephraim oning k’irem,

aponga kk’bẹ apyibha,

ochibhẹ kwabẹ ochin k’aka okpukpobha.

12 Kaam nde mach’ọgọgọ kw’anọng p’Ephraim,

mbira nde mach’echi ch’ẹlọbh-ọlọbha ch’anọng p’Juda.

13 "K’ogbe kw’Ephraim oze ọkọhmaana fẹ,

Juda oze abhaak pẹ,

minna kw’Ephraim ochin z’Asiriya,

ọtọhm bẹ́, ọvaarnọng kwiden, ọkkaan-ẹ.

Okenaka, ọvaarnọng kọ kokpo obina k’ọkọhmaana fọ,

abhaak pọ kobir okpo osi, mape.

14 Kaam m’nde mach’eche ch’im’esi Ephraim itama,

mbira nde mach’eche chiden ch’im’esi Juda itama.

Kaam m’nyaakẹ anọng p’Ephraim ọmaana p’Juda k’akpa-k’akpa, mbina mfona;

Kaam m’ntọr bẹ ntima mfona, ọnọng kode kw’im’ọkkaana bẹ.

15 Nya kw’kaam Ibinọkpaabyi m’mkpa nnam z’iruk-byi saam,

maa, matọka irem s’epyibha chabẹ,

mabira aror-m.

Ny’ogbe nwo kw’irem, nya

kw’mm’atima ettem madanẹ maror-m."