1 Bọnga anọng p'Israẹl, ettem ening bọnga ẹdaamẹ;

m'odidaama kasi mach'nkọma njoza.

Kirẹ bọnga mm'apyir kabe amaana Ibinọkpaabyi;

Atọhm-kpuka p'ọzaza bọ adaakẹ bọnga

k'ọgbaarẹ kpenamkpen kw'nd-agwuma akpo- mọma.

2 Agbaarẹ p'mad-agwuma akpo mọmma, ọmaana obyi f'mad-amyaana atuk p'achiduk, m'anọng ọchattọhk manang;

m'atuk abhapẹ mabir aze.

3 Bẹ nny'izek s'Ọvaar Ibinọkpaabyi maruk achina ororo;

Anọng p'Ephraim m'akwuna z'Ijip,

bẹ mm'achi ọchattọhk f'ọbang-ọbangẹ z'Asiriya.

4 Bẹ m'atuk mabyenga mach'nnanga anang Ọvaar Ibinọkpaabyi,

ozeng k'nja sabẹ s'mm'afọhnọ, Ọvaar Ibinọkpaabyi ettem mèlebh.

Njase njo sabẹ m'ide mach'ọchattọhk f'anọng p'aning k'oforpyibha;

bẹ mbo maphyir p'achi ọchattọhk mvo, mm'abang-ọbangẹ.

Ọchattọhk mva m'ode fabẹ vẹ-vẹ;

ọchattọhk mvo k'ọsọhm kw'Ọvaar Ibinọkpaabyi mòdim.

5 Bọnga mm'asi bọng k'ididaamawu sabọnga,

ọmaana k'ididaamawu s'Ọvaar Ibinọkpaabyi?

6 Zaabẹ́ marọbhọ itama s'im'ikebha bẹ,

anọng p'Ijip m'atobha bẹ k'ibyi majanẹ,

anọng p'Mẹmphis manọhnga bẹ.

Akkaangẹ m'amen, matọka oyena kwabẹ kw'silva maphyir,

isidima m'ibir imen, itọka iruk-byi sabẹ maphyir.

7 Iwu s'irem ikwuma,

iwu s'eponga-kpaara n'be ma.

Tte anọng p'Ijip azonga odik nwa.

Kirẹ mpyibha sabọnga isaabhẹ ọkpan,

iwawuna sabọnga ibir ibar ọkpan,

matọk ọgbaak-ettem ch'Ibinọkpaabyi mach'ọnọng kw'otur-oturọ,

mabir atọka ọnọng kw'oyen egwugwuma ch'Ibinọkpaabyi mach'odingidingẹ.

8 Ọgbaak-ettem ch'Ibinọkpaabyi, ọmaana Ibinọkpaabyi kwaam,

bẹ bọ akkerẹ Ephraim,

chibhẹ nya, amma ánwọn atik-ẹ z'nden sẹ maphyir,

iwawuna ibir itik-ẹ z'ọsọhm kw'Ibinọkpaabyi kwẹ.

9 Bẹ nkk'itama asa mawuriji,

mach'iwa Gibea osi.

Ibinọkpaabyi m'ojima itama sabẹ,

obir ọnang bẹ irem k'mpyibha sabẹ.

10 K'ogbe kw'nze anọng p'Israẹl,

wa ode mach'nze grep z'ibyi s'anọng nna arukọ;

k'ogbe kw'uwa nze ab'ttatta pabọnga,

wa ode mach'nze acheden-duk p'fig.

Okenaka, k'ogbe kw'mapyirẹ z'Baal-Peọr,

matte ifor sabẹ ọbọhk anang ọkpata nwo kw'ina ọttọhk áfẹ̀ ọbang,

makwu apyibh mach'ọkpata nwo kw'ọdaakẹ bẹ bẹ́, makpobha.

11 Abarada p'Ephraim mm'akwur afona mach'inọhn s'ẹrọng,

ọdọk ọmaan mòsi, ibhọr mòtima, ophe kẹ mòbir okponga.

12 Zaabẹ mamaanẹ iva,

m'nsi bẹ mape maphyir.

M'opyibh ọnang bẹ,

k'ogbe kw'mkpa nnam mbọra bẹ!

13 Kaam kk'Ephraim nza mach'nze anọng p'Taya

p'mattim k'ibyi ọkkọkka.

Okenaka, iva p'Ephraim m'atto k'mbọhk s'anọng

p'mm'afhọ bẹ."

14 O Ọvaar Ibinọkpaabyi, nang bẹ,

bọng-ọttọhk f'm'anang bẹ o?

Si ọbhọr fabẹ oyin,

asi aba pabẹ akka asi.

15 Bẹ mabọk-m idik okurọ itama s'masi z'Gilgal,

kaam m'nkwubh bẹ z'ọsọhm kwaam, okurọ mpyibha s'mad-asi.

Kaam ọdọk bẹ ọdaakẹ kwaam mìnkọhka,

asonọng pabẹ

maphyir,

made akikọhra.

16 Anọng p'Ephraim ade mach'echi ch'ẹpọhk-ọpọhka,

ẹranga chẹ kk'ẹpa,

aduk kẹwọmọ.

Zaabẹ́ mamaanẹ iva,

kaam m'mfhọ iva mbo p'akpẹ bẹ z'nttem."

17 Ibinọkpaabyi kwaam m'obhum bẹ,

okurọ bẹ́, m'ikẹ kakpobh;

bẹ mm'ade attittenanọng k'ottem kw'nkọma s'iyagbin.