1 ogbe kpenamkpen kw'im'ibina Israẹl k'ọkọhmaana,

epyibha ch'Ephraim ẹd-ẹjan k'iyaan,

mpinẹ s'Samariya iyaakẹ k'ọyaankpa.

wa ẹ́mmáaná chabẹ ede itwutwukọ,

arurubha mad-avọhkọ isọhm mafu orubh,

arurubha mafu anọng irubh z'adenkpaarẹ;

2 Bẹ nkazong bẹ́,

kaam njim itama sabẹ maphyir.

Mpyibha sabẹ kk'bẹ ibhọra maphyir;

mpyibha njo ijanẹ m'ikaam k'ititika k'ogbe kpenamkpen.

3 "Matim itama sabẹ asi ettem elebh ọvaarnọng,

matima afọra asi nttem ilebh asonọng pabẹ.

4 Bẹ maphyir made azaza,

made mach'okpon-kkin kw'nkwuka

kw'ọnọng kw'osi brẹd ina ọbaan bẹ́, ogbokọ

maa, abuma p'brẹd abir.

5 K'ewu ch'ọvaarnọng kwamina osi odidaama,

asonọng mabuma atuk,

mawọhkọ ọvaarnọng ochi ẹbọhk-bhina ọmaana anọng p'ad-alokọ ọnọng.

6 Nttem sabẹ ikọmọ mach'okpon-kkin kw'nkwuka;

matima nkkaar ator-ẹ.

K'orungiwu kibungọ, ottempyibha kwabẹ ode mach'ekpon ch'ede ma tanitaanẹ;

k'ekpebha, ottempyibha nwo ọyaak mach'okponkkin.

7 Bẹ maphyir makọmọ nttem mach'ekpon ch'nkwuka;

mafhọ abaabh pabẹ.

Avaarnọng pabẹ maphyir, mape,

ọnọng mawanẹ kw'obhomọ ẹkkaana ọkpẹk-m kode.

8 "Ephraim nọgbak ifor ọmaana nkọma ọdọk-ọdọk;

Ephraim node brẹd kw'obyi ẹbhaakẹ danẹ.

9 Akikennọng kk'ẹ ẹfa ana,

okenaka, kozong.

Atam kk'ẹ abọka,

okenaka, ifor sẹ kotinẹ.

10 Eforga ch'Israẹl kk'ẹ ẹka k'odik.

Chibhẹ ny'idik nja maphyir s'ikk'iyina,

kẹ nnam kọkpa otor Ọvaar Ibinọkpaabyi, kw'ode Ibinọkpaabyi kwẹ,

Ibinọkpaabyi kobir oror.

11 "Ephraim ode mach'ikpommuka

s'ichamẹ ẹbọhra, ibira iwor ezonga,

od-oror ẹkkaana z'Ijip,

ọmaana z'Asiriya.

12 K'ogbe kw'mm'afona, kaam m'mbharẹ ibin saam ibubha bẹ;

Kaam m'ntọr bẹ mbin k'izek mach'ọnọhn f'iwokọ.

K'ogbe kw'mbhaang bẹ ch'maning k'ibyi majanẹ,

kaam m'mbọka bẹ.

13 M'opyibh ọnang bẹ

okurọ bẹ́, nkk'eden chaam attena!

Itama m'ikpẹkẹ bẹ,

okurọ ch'magaangẹ nso atima ator-m!

Kaam nd-nkam bẹ́, nkkaana bẹ,

okenaka, bẹ mad-agbaak afora anan-m.

14 Ẹmọng ch'bẹ mabhomọ ayer-m, bẹ z'nttem, kefon.

Okenaka, matera aninga z'mbin sabẹ mabhom ayer-m.

Mapyi abhaak zabẹ k'ifor, makwukọ aka pabẹ bẹ́,

manang bẹ akpomọma, ọmaana abhatuk.

okenaka, magbaarẹ kaam abharẹ.

15 Kaam nnang bẹ okpebhẹ ọkkọkka, mbira nsi mbọhk igaangẹ bẹ,

okenaka, bẹ machibhẹ itama amaan-m.

16 Bẹ m'nnam kakpa ator Ibinọkpaabyi kw'Ọyọhng;

bẹ made mach'oyuk kw'ina ojibhẹ.

Ọkkangkkang wọ im'ọfhọ aso pabẹ,

okurọ ililẹkẹ-dik sabẹ.

M'ofona m'idik nja, matima bẹ masi ekirẹ

ny'ẹkọma ch'Ijip.