1 K'ogbe kw'Ephraim ọgbaak odik, anọng ad-afọnọ-ọfọn k'ifor;

wa matin-ẹ k'ẹrọng z'Israẹl.

Okenaka, okwu otto k'epinẹ ch'okpobh Baal, ofona nya, ope.

2 Machina ororo asi mpyibha;

matima silva pabẹ asi akpata anang ifor sabẹ,

matima ezonga marabha agbagba,

mbyo maphyir ede itọhmbọhk s'amengkkanọng.

Mad-aben odik kw'anọng mba bẹ́,

"Bẹ mad-atima ayokinọng afọhnọ nja!

Mad-abaaka akpata p'abhaamva!"

3 Ofona nya, bẹ mm'ade mach'ebonọ ch'ekpebha,

mm'ade mach'ifọhng s'ekpebha s'id-ininga k'egbeva,

mm'ade mach'abhera p'magwum z'ọgbaarẹ kw'nd-aduk wit,

mm'ade mach'izizong s'izeng k'ọmma kw'ofum iyin k'iyaan.

4 "Okenaka, kaam wọ nde Ọvaar Ibinọkpaabyi kw'ode Ibinọkpaabyi kwabọnga

tọma z'ogbe kw'mabin z'Ijip.

Bọnga m'ọttọhk ọdọk-ọdọk màkpobha kw'ọkpanẹ kaam Ibinọkpaabyi,

m'ọkkaan kpenamkpen màbira atin, kw'ọkpanẹ kaam.

5 Kaam wọ nkkerẹ bọnga z'ibyi s'anọng nna arukọ,

z'izek s'asi nnade.

6 K'ogbe kw'nnangẹ bẹ ọchattọhk, machi maa madọhbh;

ch'nkk'adọhbha o, makwu ayena ẹgaga;

minna kw'mazeng azaam-m.

7 Ofona nya, kaam m'nde mach'eche nnang bẹ,

m'mbir nde mach'ochenyang kw'otubh k'ọbhaang otik ayok-nten.

8 Kaam m'nde mach'eten-tama ch'manẹ-ẹ iva pẹ

kaam m'nrima bẹ ábẹ̀, mbhaaka mmọr sabẹ;

kaam m'nchi bẹ mach'eche,

etentama m'ẹyaakẹ bẹ k'akpa k'akpa.

9 "Kwọ kk'ọsa e, Israẹl,

ch'akpa nnam abọra kaam oyenẹ, kaam kw'nde ọkkaan kwọ.

10 Ọvaarnọng kwọ kẹ o, ọfha ọkkaan-ọ?

Abaabh p'ibhon sọ maphyir kẹ o,

p'ad-aben bẹ́,

‘Nang-m ọvaarnọng abir anang-m ajinọngva p'ọvaarnọng’?

11 Nya o, ntima ottempyibha nnang-ọ ọvaarnọng,

mbir ntima ottempyibha kwaam kwiden, ntọk-ẹ ntima mfona.

12 Maye epyibha ch'Ephraim oye,

makkẹrẹ mpyibha sẹ k'nnwẹr aye.

13 Iremse s'kwanọng ọd-ọtọka k'ogbe kw'ọmaan, jẹ jọ ikebh-ẹ,

okenaka, kẹ ode nnwa kw'ina ezonga oyen;

óde ópyirẹ k'ogbe kw'ọmaan,

edikzonga koyen ch'im'otima oyin k'iyaan z'ẹbhọr.

14 "Kaam m'nkkaana nrọbha bọnga k'ẹfa ch'obo;

m'nkkaana bọnga manaanga k'ẹfa epekwuk.

Kọ obo, itama sọ kẹ o?

Kọ epekwuk, ẹfa chọ kẹ o?

"Kaam inọngkwo ọdọk mìnyena mmaana bọnga,

15 zaa wura ojibh-ẹ ọyọhnga ivotte.

Ebum ch'efon z'Ọvaar Ibinọkpaabyi z'ẹbhaakẹ ch'ewuchen ed-eyin, ekwuma,

m'ẹtọma z'ibyi s'anọng nna arukọ egwuma;

ekeka chẹ, ọdọk asi mèyin

esipe chẹ m'ebir ẹkka.

Ikaanga sẹ m'iwor ọttọhk kpenamkpen f'ọbarẹ odik.

16 Anọng p'Samariya m'atọka irem k'mpyibha sabẹ,

okurọ bẹ́, nkk'eso agaanga amaana Ibinọkpaabyi kwabẹ.

Akkangkkang bọ p'mm'atima afhọ bẹ;

mm'anyunọ ivava pabẹ amaam ny'izek,

mm'abhaaka mmọr s'panọng pabẹ p'atim ibhọr."