Hosea 6

Anọng p’Israẹl ọmaana p’Juda m’nttem kacher abhona

1 "Màkwu, mọkpa nnam z’Ọvaar Ibinọkpaabyi.

Kẹ kk’mina ọyaaka k’akpa-k’akpa,

okenaka, kẹ m’obina mina k’ọkọhmaana;

kẹ kk’mina ọttọhk omuma,

okenaka, kẹ m’ogbobhọ abhaak pamina ogbobhọ.

2 Ó̱de iwu ifa ikk’ikpana, kẹ m’obir ọnang mina akpen ọnang;

óttong iwu ittaan, kẹ m’ọnang mina oforgaangẹ ọnang,

mfha moruk ọmaan-ẹ.

3 Tte mozonga Ọvaar Ibinọkpaabyi;

tte mokonga k’ose kw’mm’ozong-ẹ.

K’ose kw’ewuchen ina ed-etuna bẹ́, eyin,

minna kw’kẹ im’okwu okebha mina;

kẹ m’okwu okebha mina mach’ẹrọng ch’ekok-wu,

obir okwu mach’ẹrọng ch’oyomọ, ch’ed-edirẹ izek."

4 "Ephraim, kaam m’ntim-ọ nsi mbọng?

Juda, kaam m’ntim-ọ nsi mbọng?

Ọdaakẹ kwabọnga okerẹ ifọhng,

obir oker abubura p’ekpebha, p’nd-asa ẹbhar-ẹbhar.

5 Ofona nya, kaam ntim agbaak-ettem ch’Ibinọkpaabyi paam mkpaara bọnga k’akwuma-k’akwuma.

Ntima igbaakadik s’ẹmma chaam, mfhọ bọnga,

pira epongakpaara chaam n’eyinẹ mach’ewuchen.

6 Kaam nnorọ ididaaka s’ifon-ọ z’ettem, ẹja ofufọhnọ azang ch’nnorọ.

Nnorọ bẹ́, azonga Ibinọkpaabyi, nja s’ẹkwọmọ azang s’nnorọ.

7 Bẹ nkk’echekẹ chaam avọhka mach’iwa Adam osi;

wa m’kaam kakpobh amaana ettem madanẹ.

8 Gilead ode ebhondim ch’anọng p’ad-asi itama marukọ.

Adenkpaarẹ pabẹ maphyir, made azẹ-azẹ.

9 K’ose kw’arurubha nd-atubha k’eden mafu anọng ekpo,

minna kw’nkaan s’afọhn-ẹja ibir ide;

mad-afhọ anọng ny’eden ch’echin z’Shẹkẹm;

mabir asi nttọhna-tama.

10 Kaam kk’ẹkọngkwurọ nza ny’Israẹl:

Nya wọ kw’Ephraim otte ifor sẹ ọbọhk ọnang k’ẹzaza.

Israẹl kk’odoka e.

11 "Kọ Juda ọdọk,

kk’ẹphawu chọ nka.

"K’ogbe kpenamkpen kw’m’nsi idik ikwuna anọng paam,