1 Bọnga anọng p'Israẹl, màbhaanga odik kw'Ọvaar Ibinọkpaabyi,

okurọ bẹ́, Ọvaar Ibinọkpaabyi oyen odik kw'im'otima

oyerẹ bọnga aponga ny'izek njo s'marukọ:

"Odik ọkkọkka kode, ọdaakẹ kode,

ezonga ch'Ibinọkpaabyi ny'izek njo kede.

2 Idik s'iter ininga ide ẹmma oninang, ọmaana afọra, ọmaana inọngfhufha,

ọmaana orubh ofufu, ọttara ẹzaza;

mabir avọhkọ asana maphyir,

makibhẹ izẹ k'ogbe kpenamkpen.

3 Ofon nya pira izek njo igwu bẹ́ kẹkẹdẹ,

anọng maphyir p'arukọ nya, mape maphyir;

nten s'ẹgba, ọmaana ọnọhn f'ẹrọng

ọmaana nten s'ọraanga kwiden, ipe maphyir.

4 "Okenaka, tte ọnọng mawanẹ-wanẹ oning ọnọng aponga oyerẹ,

tte ọnọng mawanẹ-wanẹ oning oyok odik ọnan,

kirẹ anọng pabọnga makerẹ ayok mbo

p'mad-anana ọfọhn-ẹja odik.

5 Bọnga mad-asira k'ẹya, ọmaana k'erungọ,

agbaak-ettem ch'Ibinọkpaabyi mabir ator bọnga masira.

Ofona nya, kaam m'mfhọ akka kwọ.

6 Anọng paam adimẹ, okurọ ch'maworọ ezonga.

"Ch'bọnga nkk'ezonga abhuma,

kaam kk'bọnga mbira mbhuma mach'afọhn-ẹja paam;

ch'bọnga nkk'ọpaanga kw'Ibinọkpaabyi kwabọnga azaama,

kaam m'mbira nzaama iva pabọnga.

7 K'ose kw'uwa afọhn-ẹja masaabhẹ,

minna kw'machin ororo apin-m;

mabhona Ibinọkpaabyi kwabẹ kw'abarada, k'ọtọk f'ode igbardik.

8 Mpyibha s'anọng paam, jẹ jọ ide ọchattọhk fabẹ,

epyibha ch'anọng paam, ebir ilebh bẹ nttem.

9 K'ose kw'im'ode ọmaana anọng mboka, minna kw'im'ode ọmaana afọhn-ẹja.

Kaam m'nnang bẹ irem k'ozenga-bho kwabẹ,

mbira ntuka idik s'masi.

10 "Bẹ mm'achi ọttọhk, okenaka, mmàdọbh;

bẹ mm'asi ẹzaza, okenaka, bẹ okwonọ mẹ̀kaama,

okurọ bẹ́, bẹ nkk'Ọvaar Ibinọkpaabyi kwabẹ abhuma,

matọka ifor sabẹ 11 asok k'ẹzaza;

abhingatuk ọmaana abhatuk,

matọka edikzonga chabẹ.

12 Ọkpata kw'matim echi agwa, kẹ kw'anọng paam ad-abọbh odik,

ẹzangachi chabẹ ẹgbaak bẹ odik.

Ẹzazamaana etima bẹ ettena eden;

m'ettem madanẹ katim ator Ibinọkpaabyi kwabẹ.

13 Bẹ mad-afọhnọ ẹja z'agbeso,

mabir akwọmọ nnanga z'agbe,

ọmaana z'orin kw'ochi kw'oak, ọmaana kw'ochi kw'popla, ọttara kw'ochi kw'terebint,

za ch'ofokodo ode mawuriji.

Ofona nya, aminava pabọnga asi ẹzaza,

aminava p'ade anyẹ pabọnga abira alobh ẹfẹbhẹ.

14 "Kaam panọngva pabọnga irem mìnang

k'ogbe kw'masi ẹzaza,

anyẹ pabọnga p'panọng irem mìmbira nnang

k'ogbe kw'mayim amaana ajinọng p'nna adim pabẹ ade,

okurọ bẹ́, ajinọng oyenẹ ny'abẹ k'ifor, mad-aninga amaana azaza,

mabira afọhnọ ẹja z'ẹzaza-kwuna,

anọng p'aworọ edikzonga, mm'adok-odok!

15 "Zaa bọnga anọng p'Israẹl matto k'ẹfẹbhẹ,

m'anọng p'Juda ọbọhk katte, mapinẹ.

"Bọnga nz'Gilgal kàta;

nz'Bẹt-Avẹn kàta.

Ńkàbirá achekẹ bẹ́, ‘K'odik ọkkọkka, k'ose kw'Ọvaar Ibinọkpaabyi orukọ akpen!’

16 Anọng p'Israẹl magaangẹ eso

mach'ọbhaamkwa kw'ikarẹ.

Yen kw'Ọvaar Ibinọkpaabyi mokpo bẹ ọchattọhk ọnang

mach'manangẹ arọkimaanva ọchattọhk z'ewonọ-kpa ch'azizaarẹ o?

17 Ephraim norukọ z'aka; .

màttẹ-ẹ ọbọhk!

18 Zaa atuk pabẹ kk'asa,

machin ororo k'ẹzaza za,

ekpo py'igbardik ẹdaakẹ abaabh pabẹ ẹyọhng-ọyọhnga.

19 Bhaka-bhaka m'ọtaang bẹ ọbharẹ,

nja sabẹ m'ke bẹ k'mgbar.