1 "K'ogbe kw'uwa Israẹl otim ode nnwa-nnwa, nyen ọdaakẹ mmaan-ẹ,

nyerẹ nnwa kwaam z'Ijip.

2 Okenaka, k'ose kw'nyerẹ bẹ,

minna kw'makpa nnam abọr-m.

Mafọhnọ nja anang aka p'Baal,

mabira akwọmọ insẹns anang akpata.

3 Kaam wọ uwa mkpebhẹ Ephraim ozenga,

ntọka bẹ nwọhka k'mbọhk saam;

okenaka, bẹ nkazong bẹ́,

kaam wọ mbin bẹ k'ọkọhmaana.

4 Ọphyaam f'ettem chaam, vẹ f'ntim nchi bẹ eden,

mgbaka ifor mmaana bẹ k'ọdaakẹ.

Wa kaam nde mach'ọnọng kw'ọrọhbh

ọbhanwa irem k'ẹdọngọ

mbir nraka-ọraka nnang bẹ ọchattọhk.

5 "Bẹ m'nnam z'Ijip makpa,

Asiriya wọ im'ọbaabha bẹ,

okurọ ch'nna acher abhona.

6 Anọng m'atima akkangkkang arima ibhondim sabẹ,

mafhọ anọng p'ad-agbaak ettem ch'Ibinọkpaabyi k'ẹfọraden,

mabira akpọka nttọhna sabẹ.

7 Anọng paam acher obo bẹ́, mm'akpa nnam abọr-m.

Zaabẹ́ nnayer-m Ọvaar Ibinọkpaabyi kw'Ọyọhng,

eden kede ch'kaam m'nnang bẹ ikpukpobha.

8 "Anọng p'Ephraim,

kaam bọnga m'nzaama.

Anọng p'Israẹl, kaam bọnga ọbọhk mìntte.

Kaam bọnga mìnsi mach'nsi Adma.

Kaam bọnga mìnsi mach'nsi Zeboyim.

Kaam kk'achibhẹ paam mmona; ikwosisi saam maphyir k'nnam ikpa.

9 Kaam ottempyibha kwaam mìnkọhka,

ọdọk Ephraim itama mìmbir nsi.

Kaam nde Ibinọkpaabyi, oyokinọng kinde,

kaam kw'nwur-owur k'ottem kwabọnga.

Kaam ibhondim sabọnga itama mìnsi.

10 Bẹ mm'ator Ọvaar Ibinọkpaabyi;

kẹ Ọvaar Ibinọkpaabyi m'osi ẹmọng mach'eche.

K'ogbe kw'osi ẹmọng ndo,

iva pẹ m'atima ifufọnọ abina z'ẹbhaakẹ ch'ewuchen ed-edimẹ, makwu.

11 Bẹ mm'abina z'Ijip akwu,

mafọnọ mach'ọrarora,

mabir abina z'Asiriya, makwur mach'okpommuka.

Kaam m'ntima bẹ mkpa nnam zabẹ k'ibhon,"

kaam Ọvaar Ibinọkpaabyi wọ mgbaakẹ minna.

12 Anọng p'Ephraim kk'afọra atima akọbh-m ake k'ettem,

anọng p'Israẹl atima ẹbọhra ator-m.

Anọng p'Juda z'okwubha, magaangẹ nso atima ator Ibinọkpaabyi,

magaangẹ nso maa, matima ator kẹ nwo kw'owur-owur kw'od-obe k'odik kwẹ.