1 K'ogbe kw'avaar maphyir p'Amọr, p'aning z'ẹbhaakẹ ch'ewuchen ed-edimẹ z'Jọrdan, ọmaana avaar maphyir p'Kenaan p'arukọ z'akonga p'Jọrdan, mabhaang ose kw'Ọvaar Ibinọkpaabyi kk'ọraanga kw'Jọrdan ọsa ọkka maphyir maa, anọng p'Israẹl azenga nya majeka z'okwubha, ojora ọbọka bẹ maa, m'ọdọk ettem kayen arima anọng p'Israẹl abẹ.

2 Ny'ogbe nwo, Ọvaar Ibinọkpaabyi oben Joshua bẹ́, "Si ngọhbha, atima abhirẹ anọng p'Israẹl inọm ọdọk." 3 Minna kw'Joshua osi ngọhbha njo obira otima obhir anọng p'Israẹl inọm z'Gibeat-Haaralot. 4 Ọttọhk f'uwa ozeng abẹ osi minna ode bẹ́, anọng mbo maphyir p'uwa mabin z'Ijip, p'ade ajinọng maphyir p'ọgbọ kw'egbong oririma, wa mape k'eden z'ibyi s'anọng nna arukọ, ch'nkk'abina z'Ijip. 5 Wa nkk'anọng maphyir p'abin z'Ijip inọm abhira. Okenaka, ayok mbo maphyir p'mamaanẹ bẹ k'eden z'ibyi s'anọng nna arukọ ch'nkk'abina z'Ijip, wa m'bẹ inọm kabhirẹ. 6 Wa anọng p'Israẹl kk'kpangkpangtete asa k'icho arọbh afa z'ibyi s'anọng nna arukọ maa, ajinọng p'igbọ s'egbong oririma p'nkk'abina z'Ijip, mape maphyir, okurọ ch'iwa bẹ nna Ọvaar Ibinọkpaabyi akpobh. Ọvaar Ibinọkpaabyi ochekẹ ọnang bẹ bẹ́, m'izek njo k'ichen maze, s'iwa ikk'ettem madanẹ otima ochekẹ bẹ́, m'ọnang ab'atte pamina, kw'ode izek ọkkọkka s'ijibhẹ ekpo. 7 Wa Ọvaar Ibinọkpaabyi notim ajinọngva pabẹ otera nso sabẹ. Ajinọngva mba bọ p'uwa Joshua nobhirẹ inọm. Wa m'inọm atim abhira okurọ bẹ́, ch'iwa mazeng z'eden, m'bẹ inọm kabhirẹ. 8 Mabhirẹ ẹkọma ndo kibungọ inọm nya o, maninga ny'ibhinga-byi maa, ifor igaangẹ bẹ.

9 Nya o, Ọvaar Ibinọkpaabyi oben Joshua bẹ́, "Kaam kk'ọ nrọhbha k'igbardik s'Ijip menda." Ofona nya o, mayerẹ ibyi njo bẹ́, Gilgal* maa, pyirẹ menda.

10 Ny'ẹsọhka ch'ewu ttong osowanẹ kw'ichi ch'ophe nwo, anọng p'Israẹl atim aning k'odidaama kw'Pasova za ch'mabhingẹ z'Gilgal, z'mkpẹmẹ s'Jẹriko. 11 Ch'ewu ch'Pasova ikk'ẹkpana, ny'ewu ndo madanẹ-danẹ, machi ekpo byanẹ py'efon ny'izek njo, py'ede brẹd kw'nna yist ake, ọttara akpomọma p'mabhaabh-ọbhaabh. 12 Manna nwo ọkpọka, tọma ny'owusobha nwo kw'machi ekpo py'efon ny'izek njo. Wa anọng p'Israẹl m'ọdọk manna kayen, kw'ọkpanẹ nwo kw'machi ny'ewu ch'machi ọchattọhk f'ofon ny'izek njo.

13 K'ogbe kw'Joshua kk'Jẹriko ọnyọma, otinẹ ichen oze ojinọng wanẹ kw'ọbẹ-ẹ ny'ititika ttara ọkkangkkang kw'ikk'ọrọhbha z'ọpa otima z'ọbọhk. Joshua ozenga otum-ẹ, ọbọbh-ẹ bẹ́, "Ma, kọ abe k'amina, wanẹma, k'awawunanọng pamina o?"

14 Ojinọng nwo ọpọhn-ẹ bẹ́, "Ọnọng kw'mbe k'nnam kode, okenaka, kaam kk'nkwa mach'odidennọng kw'agbongsonọng kw'asoja p'Ọvaar Ibinọkpaabyi." Minna kw'Joshua otto okwubha ititika ny'izek k'ikpukpobha, ọbọbh-ẹ bẹ́, "Bọng-ẹkkaabha dọ ch'ttatta kwaam oyen ch'im'ọnang ọtọhmnọng kwẹ o?"

15 Odidennọng nwo kw'agbongsonọng kw'asoja p'Ọvaar Ibinọkpaabyi ọpọhn-ẹ bẹ́, "Wọra idikpatọkọ sọ z'mmo, kirẹ ibyi njo s'abe nya, ide ibyi s'awuriji." Joshua o, osi minna.