1 Wa asonọng p'nnọhma s'anọng p'Lẹvi, mabin ad-akebha Eleazar kw'ode ọfọhn-ẹja, ọmaana Joshua kw'ode nnwa kw'Nun, ọttara aso mboza p'mfona s'Israẹl 2 z'Shilọ z'Kenaan. Maben bẹ bẹ́, "Wa Ọvaar Ibinọkpaabyi otim Mosẹs oben bọnga bẹ́, mànang mina ibyi s'mm'oruk, ọmaana izek s'etirakpo pyamina im'eyena ọchattọhk." 3 K'ose kw'Ọvaar Ibinọkpaabyi ikk'obena, wa anọng p'Israẹl achin ny'ibhon janẹ s'ide okebh fabẹ, ọmaana izek sabẹ s'etirakpo im'eyena ọchattọhk, matọka anang efona ch'Lẹvi.

4 Wa okebh f'echeden, ode f'anọng p'efona ch'Kohat, otor k'nnọma sabẹ. Anọng mbo p'Lẹvi p'uwa made ẹnọmma ch'Arọn kw'ode ọfọhn-ẹja, manang bẹ ibhon siden ijobh kkanttaan z'efona ch'Juda, ọmaana Simeon ọttara Bẹnjamin. 5 Iva p'iva mboza p'Kohat, manang bẹ ibhon siden ijobh z'nkọma s'mfona s'Ephraim, ọmaana Dan, ọmaana igboka janẹ s'efona ch'Manasẹ.

6 Iva p'iva p'Gershon wa manang bẹ ibhon ijobh kkanttaan s'ifon z'nkọma s'efona ch'Isakar, ọmaana s'Ashẹr, ọmaana Naphtali ọttara igboka janẹ s'efona ch'Manasẹ z'Bashan.

7 Wa manang iva p'iva p'Merari ibhon siden ijobh kkamfa ator k'nnọmma s'Reubẹn, ọmaana Gad, ọttara Zebulun.

8 Minna kw'uwa anọng p'Israẹl atim ọsẹ akebh ibhon nja siden ọmaana ozek f'etirakpo pyabẹ m'echi ọttọhk, anang anọng p'Lẹvi k'ose kw'uwa Ọvaar Ibinọkpaabyi kk'Mosẹs obena.

9 Ibhon siden s'ibin z'ẹkọma ch'Juda ọmaana Simeon s'mayerẹ bẹ k'ache, manangẹ bẹ 10 mfona s'Kohat s'ifon z'nnọmma s'Lẹvi, s'ide iva p'iva p'Aarọn p'uwa ọsẹ ocheden otto kabẹ.

11 Wa manang bẹ Kiriyat-Arba (kw'ode Hẹbrọn) z'ogbe-bhon kw'Juda ọmaana ozek f'ọkọbh bẹ, f'etirakpo im'eyena ọchattọhk. (Arba wọ uwa ode ttatta kwabẹ.) 12 Okenaka, wa nkk'mgba njoza, ọmaana ibhonva s'ikọbh ebhondim, atọka anang Kalẹb kw'ode nnwa kw'Jephunẹ mach'okebh fẹ.

13 Iva p'iva p'Aarọn kw'ode ọfọhn-ẹja, manangẹ bẹ Hẹbrọn (kw'ode itubha-byi s'ọnọng kw'ọfhọ ọnọng), ọmaana Libna, ọmaana 14 Jattir, ọmaana Eshtemoa, ọmaana 15 Holon, ọmaana Debir, ọmaana 16 Ayin, ọmaana Jutta, ọttara Bẹt-Shẹmẹsh. Kibung-kibungọ, wa ode ibhon osowanẹ s'ibin m'nkọma nja mfa.

17 Z'ẹkọma ch'Bẹnjamin, ibhon ọmaana ozek f'etirakpo m'eyena ọchattọhk f'uwa manang afọhn-ẹja, ode Gibeọn, ọmaana Geba, ọmaana 18 Anatot, ọttara Almọn. Ó̱de ágbak-ọgbaka, wa ode ibhon nna.

19 Kibung-kibungọ, ibhon ijobh kkanttaan, ọmaana ozek fabẹ f'etirakpo im'eyena ọchattọhk, vẹ vọ f'uwa manang afọhn-ẹja, p'ade iva p'iva p'Aarọn.

20 Anọng mboza p'ade ẹnọmma ch'Kohat, p'afon z'efona ch'Lẹvi, manangẹ bẹ, ibhon siden z'efona ch'Ephraim.

21 Z'ẹkọma ch'Ephraim ch'egbe, wa manangẹ bẹ Shẹkẹm (kw'ode ebhondim ch'itubha-byi s'ọnọng kw'mabenẹ bẹ́, ọfhọ ọnọng), ọmaana Gezer, ọmaana 22 Kibzayim, ọmaana Bẹt-Horon, ọttara ozek fabẹ f'etirakpo m'eyena ọchattọhk. Kibung-kibungọ, wa ode ibhon siden nna.

23 Z'ẹkọma ch'Dan ọdọk, ozek f'uwa matọk anang bẹ ode, Elteke, ọmaana Gibbeton, ọmaana 24 Aijalọn, ọttara Gat-rimmọn, ọmaana ozek f'etirakpo m'eyena ọchattọhk. Kibung-kibungọ, wa ode ibhon siden nna.

25 Igboka janẹ s'efona ch'Manasẹ ẹtọk ibhon nja s'm'ntta ma, ọmaana ozek f'etirakpo im'eyena ọchattọhk, ẹnang afọhn-ẹja: Taanak, ọmaana Gat-rimmon. Kibung-kibungọ, ode ibhon nna.

26 Kibung-kibungọ, ibhon ijobh ọmaana ozek f'abẹ f'etirakpo m'eyena ọchattọhk, vẹ vọ f'uwa manang mfona njoza s'Kohat s'irik-orik.

27 Wa iva p'iva p'Gershon, kw'ode efona ọdọk-ọdọk ny'ẹkọma ch'Lẹvi, matọk ibhon nja s'm'ntta ma, ọmaana ozek fabẹ f'etirakpo im'eyena ọchattọhk

z'igboka janẹ s'efona ch'Manasẹ:

Golan z'Bashan (kw'ode itubha-byi s'anọng p'afhọ ọnọng), ọmaana Be-Eshtera. Kibung-kibungọ, wa ode ibhon siden ifa,

28 z'ẹkọma ch'Isaka, manangẹ bẹ ibhon s'ide,

Kishon ọmaana Dabera, ọmaana 29 Jarmut, ọmaana En-Gannim, ttara obyi fabẹ f'etirakpo min'eyena ọchattọhk. Kibung-kibungọ, wa ode ibhon siden nna.

30 Z'ẹkọma ch'Asher, manangẹ bẹ ibhon s'ide

Mishal, ọmaana Abdon, ọmaana 31 Helkat, ọmaana Rehob, ttara z'obyi fabẹ f'etirakpo min'echi ọttọhk. Kibung-kibungọ, wa ode ibhon siden nna.

32 Z'ẹkọma ch'Naphtali, manangẹ bẹ ibhon s'ide

Kedesh z'Galili (kw'ode itubha-byi s'ọnọng kw'mabenẹ bẹ́, ọfhọ ọnọng), ọmaana Hammot-Dor, ọttara Kartan, ttara obyi fabẹ f'etirakpo min'eyena ọchattọhk. Kibung-kibungọ, wa ode ibhon siden ittaan.

33 Wa efona ch'Gershon ẹtọk ibhondim ẹrọbh okwuma ijobh, ọmaana obyi fabẹ f'etirakpo min'eyena ọchattọhk.

34 Mfona s'Merari (kw'ode efona ch'Lẹvi ch'erikẹ), wa manangẹ bẹ ibhon

Z'ẹkọma ch'Zebulun, ọmaana

Jokneam, ọmaana Karta, ọmaana 35 Dimna, ọmaana Nahalal, ttara obyi fabẹ f'etirakpo min'eyena ọchattọhk. Kibung-kibungọ, wa ode ibhon siden nna.

36 Z'ẹkọma ch'Reubẹn, manangẹ bẹ

Bezer, ọmaana Jahaz, ọmaana 37 Kedemot, ọmaana Mephaat, ttara obyi fabẹ f'etirakpo min'eyena ọchattọhk. Kibung-kibungọ, wa ode ibhon siden nna.

38 Z'ẹkọma ch'Gad, manangẹ bẹ Ramọt z'Gilead (kw'ode itubha-byi s'ọnọng kw'mabenẹ bẹ́, ọfhọ ọnọng), ọmaana Mahanayim, ọmaana 39 Heshbon, ọmaana Jazer, ttara obyi fabẹ f'etirakpo min'eyena ọchattọhk. Kibung-kibungọ, wa ode ibhon siden nna.

40 Efona ch'Merari (kw'ode anọng p'Lẹvi p'arik-orik), manangẹ bẹ ibhon siden ijobh kkamfa.

41 Wa anọng p'Lẹvi atọk izek sabẹ z'izek s'Israẹl okkikken oyena. Kibung-kibungọ, wa ode ibhon siden arọbh afa okwuma ochenọnttaan, ttara obyi fabẹ f'etirakpo min'eyena ọchattọhk. 42 Wa ibhon nja maphyir iyen obyi f'etirakpo min'echi ọttọhk f'ọkọbh ibhon njo, ọkọbha. Wa ode ose nwo mawanẹ ọmaana ibhondim nja maphyir.

43 Minna kw'uwa Ọvaar Ibinọkpaabyi ọnang anọng p'Israẹl ozek mvo maphyir f'uwa ikk'ocheka bẹ́, m'ọnang ab'ttatta pabẹ. Anọng p'Israẹl atọka obyi mvo, masi oruk kwabẹ nya. 44 Ọvaar Ibinọkpaabyi ọnang anọng p'Israẹl ẹmẹm k'ẹbhaakẹ kpenamkpen k'ose kw'uwa ikk'ocheka ọnang ab'ttatta pabẹ. Ọwawunanọng kwabẹ mawanẹ kode kw'okpo bẹ ábẹ̀. Ọvaar Ibinọkpaabyi ọtọka awawunanọng pabẹ maphyir, oke bẹ k'mbọhk, makema bẹ. 45 Ny'nchekẹ ọkkọkka maphyir s'iwa Ọvaar Ibinọkpaabyi ochekẹ ọnang anọng p'Israẹl, echekẹ madanẹ ch'etun-otuna kede. Wa ettem ening ọnọng kpenamkpen ẹwọr.