1 K'ogbe kw'uwa Ọvaar Ibinọkpaabyi ikk'anọng p'Israẹl ẹmẹm ọnanga k'awawunanọng maphyir p'akọbh bẹ ọkọbha, ny'ogbe nwo kw'uwa Joshua ikk'ọtama mawuriji, 2 Joshua owon ọkwa kw'anọng p'Israẹl, ọmaana asonọng, ọmaana abaabh pabẹ, ọmaana akpaar-aponga, ọttara adukwa, oben bẹ bẹ́, "Kaam kk'ntama mawuriji. 3 Bọnga oyenẹ nkk'ọttọhk kpenamkpen aza f'Ọvaar Ibinọkpaabyi kw'ode Ibinọkpaabyi kwabọnga ikk'ọsa ọnang nkọma nja maphyir okurọ bọnga. Ọvaar Ibinọkpaabyi wọ uwa orim erima chabọnga. 4 Màjima ose kw'izek nkebha nnang nkọma njo s'iwa irikẹ maa, ozeng k'nkọma s'iwa ntim egbong ntọka ny'njeka kw'Jọrdan, ọmaana Meditereniya, z'ẹbhaakẹ ch'ewuchen ed-edimẹ. 5 Ọvaar Ibinọkpaabyi oyenẹ kw'ode Ibinọkpaabyi kwabọnga, m'ozeng mmo, okwubh bẹ okurọ bọnga. M'okwubh bẹ ny'abọnga k'ititika, mfha bọnga mad-atọka izek sabẹ k'ẹfa, k'ose kw'Ọvaar Ibinọkpaabyi ochekẹ ọnang bọnga.

6 "Màgaangẹ ifor, màkonga k'ose kw'mm'akpobha okpenamkpen f'makkẹrẹ ny'Nnwẹr kw'asana p'Mosẹs. M'eden kpenamkpen kàtena o! 7 M'ẹgbaka kpenamkpen kàyena amaana anọng p'arikẹ ny'ottem kwabọnga. M'ache p'aka pabẹ kàyerẹ o, m'ache p'aka pabẹ kabir achekẹ o. M'aka mbo, kàkpobha, m'eso kabir araka anang bẹ. 8 Okenaka, bọnga mm'abọka Ọvaar Ibinọkpaabyi kwabọnga k'ẹbọhk-gaangẹ, k'ose kw'nkk'asa maa, pyirẹ ma.

9 "Pira bọnga mapyirẹ ma, Ọvaar Ibinọkpaabyi kk'nkọma s'igaang-ọgaangẹ, ibir iyena ẹfa, okwubha. Maa, pyirẹ m'ewu ch'menda, ọnọng kode kw'okpo orima bọnga ábẹ̀. 10 Ọnọng od-okpo anọng nnọhna mfa okwuma arọbh ijobh okema, okurọ bẹ́, Ọvaar Ibinọkpaabyi kw'ode Ibinọkpaabyi kwabọnga, kẹ wọ od-osi erima chabọnga k'ose kw'ọnwọhngọ. 11 Ofona nya, màtọka ogbe yena ọdaakẹ maana Ọvaar Ibinọkpaabyi, kw'ode Ibinọkpaabyi kwabọnga.

12 "Okenaka, óde makpa nnam abọr-ẹ, magbaka ifor amaana anọng p'nkọma nja s'irikẹ ny'ottem kwabọnga, óde masi ọbada amaana bẹ, makwu azenga ẹkaan madanẹ. 13 Màzonga bẹ́, Ọvaar Ibinọkpaabyi ọdọk nkọma njo mokwubh ny'ititika sabọnga. Nna akkerẹ, nkọma njo m'itera ikwu ide amma p'mm'abọka bọnga, ọmaana ayaangẹ p'mm'asi bọnga abhaak k'nnam, ọttara nchi s'im'ilukọ bọnga achen. Minna kw'mm'atọka irem njo maa, madimẹ eche m'izek ọkkọkka nja s'Ọvaar Ibinọkpaabyi kw'ode Ibinọkpaabyi kwabọnga, ikk'bọnga ọnanga.

14 "Madidanma, kaam min'ntte iyagbin ọbọhk. Bọnga maphyir mazong z'nttem sabọnga ọmaana z'agbagba pabọnga bẹ́, ny'nchekẹ ọkkọkka njo s'Ọvaar Ibinọkpaabyi ọnang bọnga maphyir, madanẹ ch'etun-otuna kede. Nchekẹ njo maphyir, iyinẹ mbengana. Madanẹ ch'etun-otuna, kede. 15 Okenaka, k'ose kw'idik ọkkọkka njo s'Ọvaar Ibinọkpaabyi ochekẹ maphyir ikk'bọnga ikebha, minna kw'im'obir otima idiktama njo maphyir s'ochekẹ, okwu ọfọra bọnga ny'ifor maa, odimẹ bọnga eche m'izek ọkkọkka nja s'ikk'bọnga ọnanga. 16 Ó̱de bọnga m'avọhkọ echekẹ ch'Ọvaar Ibinọkpaabyi kw'ode Ibinọkpaabyi kwabọnga, makpa nnam abọra asana pẹ p'ọnangẹ bọnga, mafona ad-akpobha aka, mabir araka nso anang aka mbo, ottempyibha kw'Ọvaar Ibinọkpaabyi m'ovura bọnga. Minna kw'bọnga mm'adimẹ eche ẹbhar-ẹbhar m'izek ọkkọkka nja s'ikk'bọnga ọnanga.