1 Ma wọ ode nkọma s'anọng p'Israẹl atọk mach'okebh fabẹ z'izek s'Kenaan s'iwa Eleaza kw'ode ọfọhn-ẹja, ọmaana Joshua kw'ode nnwa kw'Nun ọttara aso p'mfonamma s'Israẹl, makebhẹ anang bẹ. 2 Wa mabharẹ ọsẹ atima akebh nkọma njo osowanẹ ọmaana ibhaaka, otor k'ose kw'Ọvaar Ibinọkpaabyi ikk'Mosẹs ọtọhna. 3 Wa Mosẹs kk'nkọma mfa ọmaana ibhaaka okebh fabẹ ọnanga z'ẹbhaakẹ ch'ewuchen ed-eyin z'Jọrdan. Okenaka, ny'anọng p'Israẹl maphyir, anọng p'Lẹvi bẹ-bẹ p'uwa Mosẹs ina okebh ọnangẹ. 4 Wa iva p'iva p'Josẹph nnakwu ade mfona mfa, kw'ode Manasẹ ọmaana Ephraim. Wa anọng p'Lẹvi m'okebh f'izek njo kayen, kw'ọkpanẹ ibhon s'mm'aruk, ọttara ozek f'arọkimaan, ọmaana abhaam pabẹ m'ayena ọchattọhk. 5 Minna kw'anọng p'Israẹl akebhẹ izek njo k'ose kw'Ọvaar Ibinọkpaabyi ikk'Mosẹs ọtọhna.

6 Wa anọng p'Juda akebha Joshua z'Gilgal. Kalẹb kw'ode nnwa kw'Jẹphunẹ, kw'ofon Kẹniz, obenẹ bẹ́, "Z'Kadẹsh-Barnea, Ọvaar Ibinọkpaabyi ogbaak Mosẹs kw'ode ọgbaak-ettem ch'Ibinọkpaabyi odik kw'ọmaan kọ ọttara kaam. Kọ azong odik nwo ma. 7 Wa nde icho arọbh afa, k'ogbe kw'Mosẹs kw'ode ọtọhmnọng kw'Ọvaar Ibinọkpaabyi ọtọhm-m z'Kadẹsh-Barnẹa bẹ́, nd-mbaana izek njo. Wa kk'Mosẹs odik kw'ọmaan izek njo nteka k'ose kw'nze. 8 Okenaka, ivotte paam p'mọtọnọ ọd-ọbaana izek njo, machena anọng ẹkkaabha ch'esi nttem sabẹ irọbh. Chibhẹ ch'ode minna, ntima ettem chaam maphyir, ntor Ọvaar Ibinọkpaabyi, kw'ode Ibinọkpaabyi kwaam. 9 Minna kw'Mosẹs ochekẹ ny'ewu ndo bẹ́, "Izek njo s'ẹtọkọ chọ ikk'ẹbara nya, m'ide okebh fọ, ọmaana f'iva pọ ttattampe, okurọ ch'ikk'ettem chọ maphyir atima ator Ọvaar Ibinọkpaabyi, kw'ode Ibinọkpaabyi kwaam."

10 "Ofona nya, k'ose kw'Ọvaar Ibinọkpaabyi ochekẹ, kẹ kk'aam akpen osoka maa, n'nde icho arọbh afa okwuma ichen, tọma z'ogbe kw'uwa ọgbaak odik nwa ọnang Mosẹs, k'ogbe kw'uwa anọng p'Israẹl mad-akpaanga z'ibyi s'anọng nna arukọ. Menda nwa, kaam n'nde icho arọbh anna okwuma ichen k'atam. 11 Kaam ntim nyen ẹfa ka menda, mach'iwa nyen ny'ewu ndo ch'Mosẹs ọtọhm-m ozenga nwo. Kaam ntim mgbir-ogbirẹ bẹ́, nyin egbong mach'iwa nde z'ogbe nwo. 12 Ofona nya, nang-m ẹkọma nda ch'agbe ch'iwa Ọvaar Ibinọkpaabyi ochekẹ ny'ewu ndo bẹ́, m'ọnang-m. Wa kọ oyenẹ kk'abhaanga bẹ́, anọng p'Anak p'ibhondim sabẹ ibar-ọbar, ibir iyena abaaka piden, bẹ bọ uwa arukọ ny'izek njo. Okenaka, k'ẹfa ch'Ọvaar Ibinọkpaabyi, kaam m'nkwubh bẹ ny'izek njo k'ose kw'Ọvaar Ibinọkpaabyi obenẹ."

13 Minna kw'uwa Joshua osi Kalẹb kw'ode nnwa kw'Jẹphunẹ ittabọhng, obira ọnang-ẹ ẹkọma ch'Hẹbrọn mach'okebh fẹ. 14 Tọma k'ogbe kw'okem ebhira, Hẹbrọn node ẹkọma ch'Kalẹb kw'ode nnwa kw'Jẹphunẹ, kw'ofon Kẹniz, okurọ ch'kẹ otim ettem chẹ maphyir, otor Ọvaar Ibinọkpaabyi kw'ode Ibinọkpaabyi kw'Israẹl. 15 (Wa mad-abira ayera Hẹbrọn bẹ́, Kiriyat-Arba, kw'ode eche ch'ọnọng kw'uwa ọbarẹ ọtam z'ikpakaana s'anọng p'Anak.)

Minna kw'ẹkọma ndo ezeng ekwoka ọwọhng k'egbong oririma.