1 Nya o, Joshua oyerẹ efona ch'Reuben, ọmaana ch'Gad ọttara igboka janẹ s'efona ch'Manasẹ. 2 Oben bẹ bẹ́, "Nkk'ọttọhk kpenamkpen asa f'Mosẹs kw'ode ọtọhmnọng kw'Ọvaar Ibinọkpaabyi ọsan bẹ, mabir akpobh-m k'idik maphyir s'mbenẹ bọnga. 3 Node ogbe kw'okem ebhira, maa pyirẹ m'ewu ch'menda, bọnga m'ayok Israẹl kabhumọ. Nkk'ọtọhm f'Ọvaar Ibinọkpaabyi kw'ode Ọvaar Ibinọkpaabyi kwabọnga ọnang bọnga atera asa maphyir. 4 Ch'Ọvaar Ibinọkpaabyi kw'ode Ibinọkpaabyi kwabọnga kk'bọnga ẹmẹm ọnanga k'ẹbhaakẹ kpenamkpen k'ose kw'ochekẹ, màkpa nnam z'obhon kwabọnga, za ch'Mosẹs kw'ode ọtọhmnọng kw'Ọvaar Ibinọkpaabyi ọnang bọnga z'okwubha kw'Jọrdan. 5 Okenaka, màtọka ogbe, kpobha ọsana ọmaana ọpaanga kw'Mosẹs kw'ode ọtọhmnọng kw'Ibinọkpaabyi, ọnang bọnga kw'obenẹ bẹ́, tte Ọvaar Ibinọkpaabyi kw'ode Ibinọkpaabyi kwabọnga, ọdaak bọnga, màzenga maan-ẹ k'ikpukpobha, màbọk-ẹ tima mawuriji, màtima ettem madanẹ, ọmaana ọgbagba kwabọnga kpobh-ẹ."

6 Nya o, Joshua osi bẹ ittabọhng, pira notte bẹ ọbọhk, mabhana. Minna kw'mabhan zabẹ k'ibhon. 7 (Wa Mosẹs kk'igboka janẹ s'efona ch'Manasẹ izek ọnanga z'Bashan, Joshua ọnang igboka njoza izek ọnyọma ayok-Israẹl z'ẹbhaakẹ ch'ewuchen ed-edimẹ z'Jọrdan.) K'ogbe kw'Joshua kk'bẹ ọtọhma bẹ́, mabhana o, osi bẹ ittabọhng, 8 oben bẹ́, "Màtima ojibhada-kkatam kwabọnga, bhana z'abọnga k'ibhon, ọmaana etirakpo pyabọnga k'ọsaabh, ọmaana silva, ọmaana gol, ọmaana bronz, ọmaana mbaanga, ọmaana ọbara k'ọsaabh. Màkebh ekpo py'mana awawunanọng pabọnga maana ayok-Israẹl."

9 Nya o, efona ch'Reubẹn, ọmaana ch'Gad, ọttara igboka janẹ s'efona ch'Manasẹ, ebina erik anọng p'Israẹl p'aning z'Shilọ z'Kenaan, ẹbhana z'Gilead kw'ode obhon kwabẹ oyenẹ kw'uwa Mosẹs ọnang bẹ otor k'ọgbaakadik kw'Ọvaar Ibinọkpaabyi.

10 K'ogbe kw'mapyirẹ z'Gelilot, za ch'ọnyọm Jọrdan, z'izek s'Kenaan, efona ch'Reubẹn, ọmaana ch'Gad, ọttara igboka janẹ s'efona ch'Manasẹ, ittima ija-byi s'ikem ẹbara, nya ch'ọnyọm Jọrdan. 11 K'ogbe kw'anọng p'Israẹl abhaang bẹ́, mfona njo kk'ija-byi ittima z'enem ch'Kenaan, z'Gelilot kw'ọnyọm Jọrdan, z'ẹbhaakẹ ch'anọng p'Israẹl, 12 anọng p'Israẹl abina obhon kibungọ, mattonga z'Shilọ bẹ́, marima bẹ ábẹ̀.

13 Minna kw'anọng p'Israẹl atọhmọ Phinẹhas kw'ode nnwa kw'Eleazar kw'ode ọfọhn-ẹja z'ẹkọma ch'Gilead bẹ́, okebha anọng p'Reubẹn, ọmaana p'Gad, ọttara igboka janẹ s'efona ch'Manasẹ. 14 Anọng p'uwa mator-ẹ ny'ozenga nwo ade asonọng ijobh p'abin k'efona ọmaana echimma kpenamkpen ch'Israẹl.

15 K'ogbe kw'mapyirẹ z'ẹkọma ch'Gilead, makebha anọng p'Reubẹn, ọmaana p'Gad, ọttara igboka janẹ s'efona ch'Manasẹ, maben bẹ bẹ́, 16 "Anọng p'Ọvaar Ibinọkpaabyi kibungọ abenẹ bẹ́, ‘Kayen kw'malukọ Ibinọkpaabyi kw'Israẹl m'edense nda, m'ọdọk kẹ kakpobh? Kayen kw'makpa nnam abọr-ẹ, matera attima ija-byi sabọnga s'matim alukọ Ọvaar Ibinọkpaabyi o? 17 Ma, mpyibha s'iwa mosi z'Peor, itim isaabha o? Maa, pyirẹ m'ewu ch'menda, m'mpyibha njo m'amina k'ifor otim ogbobha, chibhẹ ch'iwa itim itama ikwu k'ikpakaana s'anọng p'Ọvaar Ibinọkpaabyi! 18 Ma, bọnga mmin'akpa nnam abọra Ọvaar Ibinọkpaabyi o?

" ‘Ó̱de bọ́nga makpa nnam abọra Ọvaar Ibinọkpaabyi m'ewu ch'menda, ophyinẹ kẹ m'ọdọk-ẹ ọmaana anọng p'Israẹl kibungọ.

19 Ó̱de izek sabọnga s'mayen ikk'ikibha, màjeka kwuna k'izek s'Ọvaar Ibinọkpaabyi, ka ch'iruk-byi, ining, mfha mọtọn oruk m'izek nja. Kojibhẹ bẹ́, mattima ija-byi sabọnga k'ifor s'mm'atima ayoma mina ọmaana Ọvaar Ibinọkpaabyi k'isung. M'ija-byi ọdọk-ọdọk kattima, kw'ọkpanẹ ija-byi s'Ọvaar Ibinọkpaabyi, kw'ode Ibinọkpaabyi kwamina. 20 K'ogbe kw'Akan kw'ode nnwa kw'Zera opinẹ ọmaana ekpo py'Ibinọkpaabyi, wa ikpakaana s'Israẹl maphyir itọk irem s'ottempyibha kw'Ibinọkpaabyi. Wa kẹ-kẹ kope k'mpyibha sẹ.’ "

21 Nya o, anọng p'Reubẹn, ọmaana p'Gad, ọttara igboka janẹ s'efona ch'Manasẹ, mapọhna asogbọhkọnọng p'mfona s'Israẹl bẹ́, 22 "Ibinọkpaabyi nwo mawanẹ kw'ẹfa, kw'ode Ọvaar Ibinọkpaabyi! Ibinọkpaabyi nwo mawanẹ kw'ẹfa, kw'ode Ọvaar Ibinọkpaabyi! Ozong ma! Tte Israẹl obir ozonga! Ó̱de mina m'obe idungsẹ ọmaana Ọvaar Ibinọkpaabyi, mobir ọmyaan-ẹ, m'mina kayobh m'ewu ch'menda. 23 Ó̱de mina m'ottim ija-byi samina k'ifor bẹ́, m'otima ọkpa nnam ọbọra Ọvaar Ibinọkpaabyi, m'obir otima ija-byi njo ọfọhnọ nja s'ẹkwọmọ, ọmaana s'akpomọma, wanẹma, s'ẹforgbaka, tte Ọvaar Ibinọkpaabyi ozeng mmo oyerẹ mina aponga.

24 "Mma e! Mosi minna okurọ ojora bẹ́, kwuna ewu danẹ, iva p'iva aning ch'abenẹ mina bẹ́, ‘Bọng-ọttọhk vọ ọmyẹ bọnga ọmaana Ọvaar Ibinọkpaabyi kw'ode Ibinọkpaabyi kw'Israẹl o? 25 Ọvaar Ibinọkpaabyi kw'ode Ibinọkpaabyi, kk'Jọrdan otima oke enem ch'mina, ọmaana bọnga p'made anọng p'Reubẹn ọmaana anọng p'Gad. M'okebh kpenamkpen kayen k'Ọvaar Ibinọkpaabyi.’ Ofona nya, iva p'iva pabọnga m'awọhkọ iva p'iva pamina, maning Ọvaar Ibinọkpaabyi akpobh.

26 "Nya wọ osi moben bẹ́, ‘Tte mottima ija-byi s'nna ẹja ch'ẹkwọmọ, ọmaana nja njoza mọfọhnọ.’ 27 K'eden ndoza, oter ode nttẹsẹ kw'bọnga ọmaana mina, ọmaana ipemaanitor bẹ́, mina mm'otima nnanga samina s'ẹkwọmọ, ọmaana nja, ọttara nnanga s'ẹkwọmọ, okwu okpobha Ọvaar Ibinọkpaabyi m'ibyi s'awuriji. Z'ogbe ororo, iva p'iva pabọnga m'ọdọk ayok pamina maben bẹ́, ‘Bọnga m'okebh k'Ọvaar Ibinọkpaabyi kayen.’

28 "Minna kw'mobenẹ bẹ́, ‘Ó̱de íkwuna mabọbh mina, wanẹma, mabọbh iva p'iva pamina, mm'ọpọhna bẹ́, ‘Makirẹ okerim kw'ija-byi s'Ọvaar Ibinọkpaabyi s'ab'ttatta pamina mattim asok k'nnanga s'ẹkwọmọ, ọmaana nja ofufọhnọ. Jẹ jọ ide nttẹsẹ kwabọnga ọmaana mina.’

29 "Ọttọhk kode f'im'osi mina mọmyaana Ọvaar Ibinọkpaabyi, mobir ọkpa nnam ọbọr-ẹ m'ewu ch'menda, pira mosi ija-byi s'ẹja ch'ẹkwọmọ, ọmaana nnanga s'akpomọma, ọmaana nja njoza, kw'ọkpanẹ ija-byi s'Ọvaar Ibinọkpaabyi kw'ode Ibinọkpaabyi kwamina s'ining m'iruk-byi sẹ."

30 K'ogbe kw'Phinẹhas kw'ode ọfọhn-ẹja, ọmaana asonọng p'abaabh ẹkọma ndo, ọttara aso p'nchimma s'Israẹl ibhaang odik kw'Reubẹn ọmaana Gad, ọttara Manasẹ magbaakẹ, ettem ẹdaam bẹ. 31 Phinẹhas kw'ode nnwa kw'Eleazar, obir ode ọfọhn-ẹja, oben Reubẹn, ọmaana Gad, ọttara Manasẹ bẹ́, "Menda nkk'ozonga bẹ́, Ọvaar Ibinọkpaabyi oning ma ọmaana mina, okurọ bẹ́, m'odik nwa, bọnga m'nnam kakpa abọr-ẹ. Ofona nya, bọnga nkk'anọng p'Israẹl arọhbha k'mbọhk s'Ọvaar Ibinọkpaabyi."

32 Nya o, Phinẹhas kw'ode nnwa kw'Eleazar, obir ode ọfọhn-ẹja, ọmaana asonọng mbo, mabina arik anọng p'Reubẹn, ọmaana p'Gad z'Gilead ny'etobha ndo, makpa nnam z'Kenaan, mad-atek anọng p'Israẹl odik nwo. 33 Wa nttem idaam bẹ ch'mabhaang ẹkkaabha ndo, matọhnga Ibinọkpaabyi. Makpa nnam abọra ochibhẹ kw'mm'atima egbong adimẹ ẹkọma ch'anọng p'Reubẹn ọmaana Gad.

34 Anọng p'Reubẹn ọmaana p'Gad mayerẹ ija-byi njo bẹ́, "Nttẹsẹ kw'mina ọmaana bọnga bẹ́, Ọvaar Ibinọkpaabyi wọ ode Ibinọkpaabyi."