1 K'ogbe kw'ọvaar Jabin kw'Hazọr ọbhaang odik nwa, minna kw'ọtọhm ẹkkaabha ochena ọvaar Jobab kw'Madon, ọmaana avaar p'ẹkọma ch'Shimrọn, ọttara ch'Akshaph. 2 Obira ọtọhm ẹkkaabha ochena avaar p'ẹkọma ch'ebir-ebir ch'ening k'agbe, ọmaana ẹkọma ch'Araba ch'ening izek-izek kw'Kinẹrẹt, ọmaana ch'ẹkọma ch'igbemmo ch'ening k'ẹbhaakẹ ch'ewuchen ed-edimẹ, ọttara ch'ẹkọma ch'Naphot-Dọr ch'ening k'ẹbhaakẹ ch'ewuchen ed-eyin. 3 Ọtọhm ẹkkaabha ndo ọnang ẹkọma ch'Kenaan ch'ening k'ẹbhaakẹ ch'ewuchen ed-eyin, ọmaana ch'ẹbhaakẹ ch'ewuchen ed-edimẹ. Ọtọhm ọnang ẹkọma ch'Amọr, ọmaana ch'Hẹt, ọmaana ch'anọng p'Pẹriz, ọmaana ch'Jebus ch'ening z'ẹbhaakẹ ch'agbe, ọttara ch'anọng p'Hiv ch'ening ẹwọn-ẹwọna kw'Hermọn, z'ẹbhaakẹ ch'Mizpa. 4 Minna kw'nkọma njo itim asoja pabẹ maphyir, ikwu. Ibira itima nnyanya ọmaana ijaar s'nnyanya id-itọr k'ọsaabh, ikwu. Wa asoja p'matim akwu, masaabhẹ mach'ofong kw'ẹraangaka. 5 Avaar p'nkọma nja maphyir, magbara mbọhk, masi ibhinga-byi z'Nkeka s'ining z'Mẹrọm, k'ose kw'mm'arima Israẹl ábẹ̀.

6 Ọvaar Ibinọkpaabyi oben Joshua bẹ́, "Tte bẹ maning-ọ ajor, kirẹ ophyinẹ ogbese nwa, kaam m'mfhọ bẹ maphyir, ntọka bẹ nke anọng p'Israẹl k'mbọhk makema bẹ. Bọnga mm'aphyakẹ nnyanya sabẹ ntọhnga, mabira akwọmọ ijaar sabẹ s'nnyanya id-itọr."

7 Minna kw'Joshua ọmaana asoja pẹ maphyir mabin, mad-ayin bẹ bẹ́ fẹrẹm, marima bẹ ábẹ̀, ny'nkeka njo s'Mẹrọm. 8 Ọvaar Ibinọkpaabyi ọtọka bẹ oke anọng p'Israẹl k'mbọhk, makema bẹ. Anọng p'Israẹl akwubh bẹ maa, pyirẹ z'Sidọn kwiden. Machina ororo akwubh bẹ maa, mapyirẹ z'Misrephot-Maim, minna maa, pyirẹ z'ilokodo s'Mizpa z'ẹbhaakẹ ch'ewuchen ed-eyin. Wa ọnọng mawanẹ-wanẹ kw'matte ọbọhk oruk akpen, kode. 9 Wa Joshua osi bẹ mach'Ọvaar Ibinọkpaabyi ikk'ẹ obena, ọphyakẹ nnyanya s'anọng mbo ntọhnga, obira ọkwọmọ ijaar sabẹ s'nnyanya id-itọr.

10 Ny'ogbe nwo, Joshua ọbọka ebhondim ch'Hazọr, obira otima ọkkangkkang ọfhọ ọvaarnọng kw'ọbaabh nya. (Wa Hazọr kk'oso kw'nkọma nja maphyir ọda pira.) 11 Wa matima ọkkangkkang afhọ ọnọng kpenamkpen kw'orukọ ny'ebhondim ndo. M'ọnọng mawanẹ-wanẹ ọbọhk katte bẹ́, oruk akpen. Joshua ọkwọmọ ebhondim ch'Hazọr maphyir.

12 Joshua obira ọtọka ivaarbhon s'nkọma nja maphyir, ọmaana avaar pabẹ maphyir, otima ọkkangkkang ọfhọ bẹ. Ọfhọ bẹ maphyir k'ose kw'Mosẹs kw'ode ọtọhmnọng kw'Ọvaar Ibinọkpaabyi ikk'ẹ obena. 13 Okenaka, wa anọng p'Israẹl m'ebhondim kpenamkpen ch'anọng mbo masi k'isọhm-gbinigbinẹ, kakwọmọ, kw'ọkpanẹ obhon kw'Hazọr kw'uwa Joshua ọkwọmọ. 14 Anọng p'Israẹl macha oyena kw'ivaarbhon nja maphyir, mabir atọka etirakpo pyabẹ atima afona. Mafhọ anọng maphyir p'arukọ nya maa, madimẹ bẹ eche. Ọnọng mawanẹ-wanẹ kw'matte ọbọhk oruk akpen, kode. 15 K'ose kw'uwa Ọvaar Ibinọkpaabyi obenẹ Mosẹs kw'ode ọtọhmnọng kwẹ, minna kw'uwa Mosẹs obenẹ Joshua, Joshua osi minna. Ny'idik s'iwa Ọvaar Ibinọkpaabyi obenẹ Mosẹs maphyir, ọttọhk kode f'uwa ina osi.

16 Minna kw'Joshua ọtọk nkọma nja kibungọ, kw'ode ẹkọma ch'agbe, ọmaana ch'Nẹgẹv maphyir, ọmaana ẹbhaakẹ ch'Goshẹn kibungọ, ọmaana ẹkọma ch'agbemmo ch'ening k'ẹbhaakẹ ch'ewuchen ed-edimẹ, ọmaana ch'Araba, ọmaana agbe p'Israẹl ọmaana agbemmo pabẹ. 17 Tọma z'egbe ch'Halak ch'etim maa, echina z'Seir, maa, pyirẹ z'ẹkọma ch'Baal-Gad ch'ening k'ilokodo s'Lẹbanọn, z'ẹwọn-ẹwọna kw'Egbe ch'Hermọn, Joshua ọtọk-ọtọka maphyir. Wa ọbọka avaar pabẹ maphyir, ọfhọ. 18 Joshua orima egbong ọmaana avaar p'ẹkọma nda maphyir k'ogbe kw'okem ebhira. 19 M'nkọma nja maphyir s'iwa Israẹl okem k'egbong, ẹkọma ch'esi ẹmẹm ẹmaana anọng p'Israẹl kede, kw'ọkpanẹ anọng p'Hiv p'arukọ z'ẹkọma ch'Gibeọn. 20 Wa Ọvaar Ibinọkpaabyi wọ osi bẹ magaangẹ nttem bẹ́, marima anọng p'Israẹl ábẹ̀, ọfha ofona nya, oning bẹ ọjọhkọ, ọfhọ bẹ kibung-kibungọ, obira odimẹ bẹ eche m'iyagbin, k'ose kw'Ọvaar Ibinọkpaabyi ikk'Mosẹs obena.

21 Ny'ogbe nwo, Joshua ofona od-orima egbong ọmaana anọng p'Anak p'arukọ z'ẹkọma ch'egbe. Ọtọma ny'obhon kw'Hẹbrọn orima bẹ ábẹ̀ maa, opyirẹ obhon kw'Debir, ọmaana obhon kw'Anab, ọmaana nkọma s'Juda maphyir s'ining k'agbe, maa pyirẹ z'nkọma s'Israẹl maphyir s'ining k'agbe. Wa Joshua ọfhọ anọng mba maphyir, obira odimẹ ibhon sabẹ kibung-kibungọ. 22 Wa ọ́mmáana kw'Anak mawanẹ-wanẹ kw'ọnaang ny'izek s'Israẹl, kode, kw'ọkpanẹ ayok p'Gaza, ọmaana p'Gat, ọttara p'Ashdọd.

23 Minna kw'Joshua osi k'ose kw'Ọvaar Ibinọkpaabyi obenẹ Mosẹs. Ọtọka ozek mvo maphyir okebh ọnang Israẹl mach'oyena kwabẹ, otor k'mfona sabẹ. Nya o, anọng p'ẹkọma ch'Israẹl akwoka ọwọhng k'egbong oririma.