1 K'ogbe kw'avaar maphyir p'aning z'ẹbhaakẹ ch'ewuchen ed-edimẹ z'okwubha kw'Jọrdan mabhaang idik nja, ọmaana avaar p'ẹkọma ch'agbe, ọmaana avaar p'agbemmo p'aning z'ẹbhaakẹ ch'ewuchen ed-edimẹ, ọttara avaar p'arukọ ny'akonga maphyir p'Ọraanga Kwiden kw'Meditereniya maa, pyirẹ z'Lebanọn, (p'ade avaar p'ibhon s'Hẹt, ọmaana p'Amọr, ọmaana p'Kenaan, ọmaana p'Periz, ọmaana p'Hiv, ọttara p'Jebu), 2 bẹ maphyir makwu agbaka mbọhk bẹ́, marima egbong amaana Joshua ọmaana Israẹl.

3 Okenaka, k'ogbe kw'anọng p'Gibeọn mabhaang ọttọhk f'Joshua ikk'anọng p'Jẹriko ọmaana p'Ai ọsa, 4 minna kw'matim nkkar afona mach'anọng p'matọhm bẹ ọtọhm. Matọka mkpa, ọmaana nkpa s'atuk s'matim ntenkpa asi s'ikk'itama, ibira ike abhaak p'mabọhr-ọbọhra, manana k'nnyanya s'id-itọhka ekpo. 5 Matọka idikpa-tọkọ s'ikk'itama s'nkk'abọhra make z'mmo, mafọra ekpo py'ikk'ẹtama z'ifor. Brẹd maphyir kw'uwa matim, ogwu bẹ́ kẹkẹdẹ, obira otto mbonaana. 6 Nya o, mafona mad-akebha Joshua za ch'obhingẹ z'Gilgal. Maben kẹ ọmaana anọng p'Israẹl bẹ́, "Mofon k'ẹkọma ch'ebhir-obhir okwu ma e. Tte mochekẹ ọnang ayok."

7 Okenaka, anọng p'Israẹl aben anọng p'Hiv bẹ́, "Okerẹ mina bẹ́, bọnga marukọ anyọma mina ma. Kayen kw'mm'ochekẹ ọnang ayok?"

8 Bẹ maben Joshua bẹ́, "Mina mode atọhmnọng pọ.

Okenaka, Joshua ọbọbh bẹ bẹ́, "Bọnga made bọng-anọng? Mafon memma?"

9 Mapọhna Joshua bẹ́, "Atọhmnọng pọ afon k'ẹkọma ch'ebhirẹ eden mawuriji akwu, okurọ ose kw'Ọvaar Ibinọkpaabyi kw'ode Ibinọkpaabyi kwabọnga, oyinẹ eche. Mina nkk'idik sẹ ọbhaanga, kw'ode idik maphyir s'osi z'Ijip, 10 ọmaana s'osi avaar afa p'Amọr p'aning z'ẹbhaakẹ ch'ewuchen ed-eyin, z'ọraanga kw'Jọrdan, p'ade ọvaar Sihọn kw'Hẹshbọn, ọmaana ọvaar Ọg kw'Bashan kw'ọbaabh ẹkọma ch'Ashtarọt. 11 Nya o, asogbọhkọnọng ọmaana anọng maphyir p'marukọ ny'ẹkọma chamina maben mina bẹ́, ‘Màtima ẹchakpo bina ozenga; màzọhng kebha bẹ, maben bẹ bẹ́, "Mina mode atọhmnọng pabọnga. Tte mochekẹ ọnang ayok." ’ 12 Wa brẹd nwa kwamina ọdaan-ọdaana k'ogbe kw'mobin ozenga bẹ́, mokwu ma. Kirẹ ose kw'ikk'ọgwa bẹ́ kẹkẹdẹ obira otto mbonana m'eninga nda. 13 Wa mkpa nja s'atuk ide ibhasẹ k'ogbe kw'moke atuk. Okenaka, kirẹ ose kw'ikk'abhaak ika. Ẹfọrakpo pyamina ọmaana ndikpatọkọ famina kk'ọtama kpo okurọ odenbhir nwo."

14 Anọng p'Israẹl o, matọka ekpo py'anọng mbo matim akwu, m'Ọvaar Ibinọkpaabyi odik kabọbhọ. 15 Joshua ochekẹ ọmaana bẹ bẹ́, m'otte bẹ ọbọhk maruk k'ẹmẹm ny'ẹkọma chẹ. Adidennọng p'Israẹl machera k'echekẹ ndo.

16 Ch'iwu ittaan ikk'ikpana s'echekẹ chabẹ ọmaana anọng p'Gibeọn, anọng Israẹl akwu abhaanga bẹ́, anọng mbo matera afona ny'ẹkọma ch'ẹnyọm bẹ nya. 17 Minna kw'anọng p'Israẹl mabin ozenga ny'iwu ttong ittaan, machina z'ebhondim ch'Gibeọn, ọmaana ch'Kephira, ọmaana ch'Beerọt, ọttara ch'Kiriat-Jearim. 18 Okenaka, anọng p'Israẹl m'erima kasi amaana bẹ, okurọ echekẹ ch'mayen amaana ayok k'eche ch'Ọvaar Ibinọkpaabyi, kw'ode Ibinọkpaabyi Israẹl.

Ọttọhk f'adidennọng p'Israẹl asi, ọwọhkọ ikpakaana s'Israẹl inwọhnọ. 19 Okenaka, adidennọng mbo maphyir mapọhna bẹ́, "M'bẹ ọttọhk mòsi okurọ bẹ́, nkk'ocheka k'eche ch'Ọvaar Ibinọkpaabyi, kw'ode Ibinọkpaabyi kw'Israẹl. 20 Ọttọhk f'mm'osi bẹ ode bẹ́, mm'otte bẹ ọbọhk maruk akpen, mfha Ibinọkpaabyi oning ottempyibha kwẹ otim otor mina ch'mọvọhkọ echekẹ ch'moyen ọmaana bẹ." 21 Adidennọng mbo machina ororo aben bẹ́, "Mm'otte bẹ ọbọhk maruk akpen. Okenaka, ọtọhm f'bẹ mm'asi anang iyokinọng-kpakaana nja s'Israẹl, ode nchi okkikkọhbh ọmaana asi okikaabha." Minna kw'adidennọng mbo, makpobh echekẹ ch'mayen amaana ayok.

22 Joshua oyerẹ anọng p'Gibeọn mattonga, ọbọbh bẹ bẹ́, osempira mabọhra mina bẹ́, "Mofon k'ẹkọma ch'ebhirẹ eden okwu, ch'bọnga marukọ anyọma mina ma? 23 Ofona nya, nkk'bọnga ẹmma ọnanga. Ọtọhm f'bọnga mm'asi k'akpen pabọnga maphyir ode nchi okkikkọhbh ọmaana asi okikaabha k'ọtọhm f'ọsọhm kw'Ibinọkpaabyi kwaam."

24 Mapọhna Joshua bẹ́, "Mina mosi minna okurọ ch'nkk'ozonga bẹ́, wa Ọvaar Ibinọkpaabyi kw'ode Ibinọkpaabyi kwọ kk'Mosẹs kw'ode ọtọhmnọng kwẹ obena bẹ́, ọtọka izek nja maphyir ọnang bọnga, obira ọfhọ anọng p'arukọ nya maphyir. Nya wọ osi, mosi odik nwa okurọ akpen pamina ọmaana ojora kw'moyen k'ikọ. 25 Mina nnoning k'mbọhk sọ. Si mina ọttọhk okpenamkpen f'ọdaak-ọ, ọmaana f'obira ojibh-ọ."

26 Minna kw'Joshua ozeng ọkkaana bẹ k'mbọhk s'anọng p'Israẹl. M'ọdọk bẹ kafhọ. 27 Ny'ewu ndo, Joshua osi anọng p'Gibeọn atọhmnọng p'mmin'akkọhbh nchi, mabira akaabha asi anang anọng p'Israẹl, mfha matima asi ọtọhm f'ija-byi s'Ọvaar Ibinọkpaabyi, k'ibyi s'ikẹ Ọvaar Ibinọkpaabyi im'oteka bẹ́, mad-aninga akpobh-ẹ. Maa, pyirẹ menda, anọng mbo atim osi ọtọhm mvo osi za.