1 Wa mazeng anọng p'Israẹl abẹ, magbak mbhumma s'Jẹriko maa, igaangẹ. Ọnọng k'iyaan koyinẹ, ọnọng z'ẹtaanga kobir odim.

2 Nya o, Ọvaar Ibinọkpaabyi oben Joshua bẹ́, "Kirẹ e, kaam kk'Jẹriko, ọmaana ọvaarnọng kwẹ, ọttara arimanọng pẹ, ntọka nkk'ọ ny'mbọhk. 3 Tima agbongnọng pọ maphyir zenga kọbha ebhondim ndo ogbe mawanẹ. Si minna k'iwu ichadanẹ. 4 Tte afọhn-ẹja achenọmfa màtima nsa s'abhik p'attongoro màchi ẹkkọhbhọ ch'echekẹ eden. Ny'ewu ttong ichenọmfa, màzenga kọbha ebhondim ndo igbedim ichenọmfa, ọmaana nsa s'afọhn-ẹja mm'aje. 5 K'ogbe kw'mabhaang nsa njo s'maje atọr-ọtọr, tte agbongnọng kibungọ makwọhrọ ẹmọng k'ẹrọng. Minna kw'etumọ ch'ebhondim ndo im'etto, ogbongnọng kpenamkpen ọzọhng odim z'ẹtaanga."

6 Minna kw'Joshua kw'Nun obhonọ, oyerẹ afọhn-ẹja mbo, oben bẹ bẹ́, "Màtinẹ Ẹkkọhbhọ ch'Echekẹ ch'Ọvaar Ibinọkpaabyi. Tte afọhn-ẹja achenọmfa m'atima nsa machi chẹ eden." 7 Joshua oke agbongnọng mbo ẹfa bẹ́, "Màchina ititika-ititika! Màzenga kọbha ebhondim ndo. Tte akker-ibyi p'atim mkpon màchi Ẹkkọhbhọ ch'Echekẹ ch'Ọvaar Ibinọkpaabyi eden."

8 K'ogbe kw'Joshua kk'odik ọgbaaka ọnang anọng mbo o, afọhn-ẹja mbo achenọmfa p'atim nsa njo ichenọmfa ny'Ọvaar Ibinọkpaabyi k'ititika, maje sẹ atima achi eden. Ẹkkọhbhọ ch'echekẹ ch'Ọvaar Ibinọkpaabyi ẹyakẹ bẹ nnam. 9 Akker-ibyi mbo p'atim mkpon, mazenga achi afọhn-ẹja mbo p'aje nsa eden. Akker-ibyi p'maning z'nnam, mazenga ator Ẹkkọhbhọ ch'Echekẹ ndo. M'ogbe nwa maphyir, nsa ije mach'ije nya. 10 Okenaka, Joshua kk'agbongnọng obena bẹ́, "M'agbong-mọng kabok, m'ẹmọng kakwọhrọ, m'odik maphyir-phyir kagbaak maa, opyirẹ ewu ndo ch'm'mben bọnga bẹ́, makwọhrọ ẹmọng. Nya kw'mm'akwọhrọ!" 11 Minna kw'obenẹ bẹ matinẹ Ẹkkọhbhọ ch'Echekẹ ch'Ọvaar Ibinọkpaabyi, matima dẹ akọhbha ebhondim ndo ogbedim mawanẹ. Pira agbongnọng mbo nnakpa nnam z'ibhinga-byi, mad-abhing za.

12 Joshua ọphyabha k'ekpikpebha, afọhn-ẹja atinẹ Ẹkkọhbhọ ch'Echekẹ ch'Ọvaar Ibinọkpaabyi. 13 Afọhn-ẹja mbo achenọmfa p'atim nsa njo nchenọmfa, maje sẹ, matima azenga achi Ẹkkọhbhọ ch'Echekẹ ch'Ọvaar Ibinọkpaabyi eden. Agbongnọng p'atim mkpon m'achi bẹ eden. Akker-ibyi p'aning z'nnam-nnam, mazenga ayakẹ Ẹkkọhbhọ ch'Echekẹ ch'Ọvaar Ibinọkpaabyi nnam. Nsa ije ichina ororo. 14 Ttong iwu ifa, mabir azenga akọbha ebhondim ndo ogbedim mawanẹ, makpa nnam z'ibhinga-byi. Mabir asi minna-minna, k'iwu ichadanẹ.

15 Ttong iwu ichenọmfa, maphyabha ny'owusobha. Mazenga akọbha ebhondim ndo igbedim ichenọmfa k'ose kw'mad-asi. Okenaka, ny'ewu ndo, makọbh ebhondim ndo igbedim ichenọmfa. 16 Ttong igbedim ichenọmfa s'makọbh ebhondim ndo, afọhn-ẹja maje ẹsa k'ẹrọng. Minna kw'Joshua obenẹ agbongnọng bẹ́, "Màkwọhrọ! Kirẹ Ọvaar Ibinọkpaabyi kk'bọnga ebhondim ndo ọnanga! 17 Ebhondim ndo, ọmaana ekpo maphyir py'ening nya, ede py'Ọvaar Ibinọkpaabyi. Rahab kw'ode ọzaza, ọmaana anọng maphyir p'aning amaan-ẹ ny'ọsọhm kwẹ, bẹ-bẹ bọ p'mm'ayobh, okurọ ch'iwa odubhọ anọng p'mọtọhmọ bẹ́, makwu abaana ibyi. 18 Okenaka, màrọhbha ichen z'ekpo py'obhon nwo, mfha maning mmo azeng aror obo kwabọnga ch'mm'atọka ọttọhk kpenamkpen nya. Ó̱de máyom, obo ọttara ẹkọhr dọ ch'mm'atima akwu z'ibhinga-byi s'Israẹl. 19 Silva ọmaana gol, ọmaana ekpo py'matim bronz asi, ọttara py'ede mbaanga maphyir, m'ede py'Ọvaar Ibinọkpaabyi, ebira ẹbaana bẹ́, echina z'ekwurukpa chẹ."

20 K'ogbe kw'nsa njo ije, agbongnọng akwọhrọ ẹmọng, nsa ibir ije, agbongnọng ado akwọhrọ k'ẹrọng, etumọ ndo etto. Minna kw'ọnọng kpenamkpen odimẹ z'ebhondim ndo ẹtaanga. Ọnọng-ọnọng oje etum, odim z'ẹtaanga, matọka ebhondim ndo kibungọ. 21 Matte ebhondim ndo ọbọhk, anang Ọvaar Ibinọkpaabyi. Matima akkangkkang afhọ ọttọhk kpenamkpen f'oning akpen nya, ode ajinọng o, panọng o, igbọgbọ o, ataminọng o, adamogbodo o, arọkimaan ọ, ozeng k'nnyanya s'id-itọhka ekpo o, mafhọ-ọfhọ maphyir.

22 Nya o, Joshua oben anọng mbo afa p'uwa makwu abaana izek njo bẹ́, "Màzọhng z'ọsọhm kw'ọzaza nwo. Màtima kẹ ọttara anọng mbo p'ade pẹ maphyir, yin k'iyaan, tọr k'ose kw'machekẹ anang-ẹ." 23 Minna kw'ajinọng mbo p'uwa makwu abaana obhon nwo, madimẹ z'obhon ẹtaanga, mad-atọka Rahab, ọmaana otte, ttara ọkka, ọmaana ivọkka p'ejinọng ọttara p'panọng, ọttara anọng pẹ maphyir. Matima echimma chẹ kibungọ, mayin k'iyaan, mad-asok bẹ k'ibyi janẹ z'iyaan-iyaan kw'ibhinga-byi s'Israẹl.

24 Pira nnakwọmọ ebhondim ndo kibungọ, ttara ọttọhk kpenamkpen f'oning ny'ẹtaanga. Okenaka, matọka silva, ọmaana gol, ọmaana ekpo py'matim bronz asi, ọttara py'ede mbaanga-mbaanga, mayika z'ekwurukpa ch'Ọsọhm kw'Ọvaar Ibinọkpaabyi. 25 Wa Joshua oyobh Rahab kw'ode ọzaza, ọmaana echimma chẹ. Obira oyobh ọnọng kpenamkpen kw'ode kw'Rahab, okurọ ch'iwa odubhọ ajinọng p'Joshua ọtọhmọ bẹ́, mabaana obhon kw'Jẹriko. Rahab oruk ọmaana anọng p'Israẹl maa, pyirẹ menda.

26 Ny'ogbe nwo, Joshua ọtọr anọng p'Israẹl itọhng bẹ́, "M'opyibh ọnang ọnọng nwo k'ititika s'Ọvaar Ibinọkpaabyi, kw'ikwuna im'oyoma bẹ́, m'ottima ebhondim nda ch'Jẹriko,

"Eso ch'ocheden-jinọngnwa kwẹ,

dọ ch'im'otima ọphaakẹ izek s'ọtọhm mvo,

eso ch'okpongannam-jinọngnwa kwẹ,

dọ ch'im'otima ottima mbhumma sẹ."

27 Nya o, wa Ọvaar Ibinọkpaabyi oning ọmaan Joshua. Minna kw'eche ch'Joshua ẹnyaamẹ ny'ẹkọma ndo maphyir.