1 Nya o, ọvaar Adoni-Zedek kw'Jẹrusalẹm okwu ọbhaanga bẹ́, Joshua kk'egbong orima ọmaana ẹkọma ch'Ayi maa, odimẹ dẹ eche, orima ẹkọma ch'Ayi ọmaana avaarnọng pẹ mach'iwa osi ẹkọma ch'Jẹriko ọttara avaarnọng pẹ. Obira ọbhaanga bẹ́, anọng p'ẹkọma ch'Gibeọn nkk'ẹmẹm asa amaana anọng p'Israẹl, ofona nya, nnazeng ẹkaan madanẹ. 2 Wa odik nwoma, ọwọhkọ opoma ọbọka ọvaar Adoni-Zedek ọmaana anọng pẹ, okurọ ch'Gibeọn ode ebhondim ch'ẹbarẹ odik, ọmaana ch'ede mach'ivaarbhon. Wa Gibeọn ọbarẹ ẹkpa ọyọhnga Ai, ajinọng p'obhon nwo maphyir, made arimanọng ọkkọkka. 3 Ofona nya o, ọvaar Adoni-Zedek kw'Jẹrusalẹm, od-okwukọ ọvaar Hoham kw'Hẹbrọn, ọmaana ọvaar Piram kw'Jarmut, ọmaana ọvaar Japhia kw'Lakish, ọttara ọvaar Debir kw'Eglọn bẹ́, 4 "Màkwu tor-m morima Gibeọn ábẹ̀, okurọ bẹ́, nkk'agba amaana anọng p'Israẹl."

5 Minna kw'avaar mbo achen p'ẹkọma ch'Amọr, p'ade avaar p'Jẹrusalẹm, ọmaana p'Hẹbrọn, ọmaana p'Jarmut, ọmaana p'Lakish, ọttara p'Eglọn makwu agbaka. Matima agbongnọng pabẹ maphyir, mad-ayima egbong z'Gibeọn, marim-ẹ ábẹ̀.

6 Ofona nya, anọng p'Gibeọn, matọhm ẹkkaabha anang Joshua za ch'obhingẹ z'Gilgal bẹ́, "Mina ọbọhk katte o! Kwu kkaana mina ẹbhar-ẹbhar o! Kwu kkaana mina, kirẹ avaar p'Amọr maphyir p'aning z'ẹkọma ch'egbe kk'agbaka bẹ́, marima mina ábẹ̀."

7 Minna kw'Joshua otim asoja pẹ maphyir, ọttara arimanọng pẹ ọkkọkka, obina ozeng z'Gilgal. 8 Ọvaar Ibinọkpaabyi oben Joshua bẹ́, "Oning-ọ ojor, okurọ bẹ́, kaam kk'bẹ ntọka nkọ-ọ ny'mbọhk. Ọnọng nya kode kw'im'okpo orimọ-ọ ábẹ̀."

9 K'ogbe kw'Joshua kk'orungọwu kibungọ otima obina z'Gilgal, okwu oyin anọng p'ẹkọma ch'Amọr bẹ́ fẹrẹm, orima bẹ́, ábẹ̀. 10 Ọvaar Ibinọkpaabyi oke bẹ k'damadama ny'Israẹl k'ititika. Joshua ọmaana anọng p'Israẹl makema anọng p'Gibeọn kibung-kibungọ. Makwubh bẹ k'odum kw'eden ch'echin Bẹt-Horon, mafhọ bẹ maa, mapyirẹ z'eden ch'Azeka ọmaana Makkeda. 11 K'ose kw'nd-arọbh, nya ch'anọng p'Israẹl ad-akwubh bẹ ny'eden, tọma z'Bẹt-Horon maa, pyirẹ z'Azeka, Ọvaar Ibinọkpaabyi otebh bẹ ata ny'ifor maa, mape k'ọsaabh. Anọng p'uwa ata mbo mafhọ, masaabhẹ ayọhnga anọng p'Israẹl atim ọkkangkkang afhọ.

12 Ny'ewu ch'Ọvaar Ibinọkpaabyi ọtọk anọng p'Amọr oke anọng p'Israẹl k'mbọhk bẹ́, makema bẹ, Joshua oning ny'ititika s'anọng p'Israẹl oben Ọvaar Ibinọkpaabyi bẹ́,

"Ewuchen be bẹ́ tting ny'Gibeọn.

Kọ ophe, bira be bẹ́ tting z'ilokodo s'Aijalọn."

13 Minna kw'ewuchen ebe bẹ́, tting,

ophe obira obe bẹ́ tting

maa, anọng p'Israẹl akema awawunanọng pabẹ, otor k'ose kw'uwa nkk'akkẹra k'Nnwẹr kw'Jashar.

Ewuchen ebe bẹ́ tting, ny'ottem kw'ọrọngkpakpa, ọdọk kezeng k'ọttọhk k'ewu kibungọ. 14 Ch'obobe ode, ewu se nda, etim eninga ch'Ọvaar Ibinọkpaabyi oyong oyokinọng itọhng. K'odik ọkkọkka, Ọvaar Ibinọkpaabyi wọ uwa od-osi erima ndo ọnang anọng p'Israẹl!

15 Nya o, Joshua otima anọng p'Israẹl maphyir ọkpa nnam z'ibhinga-byi, z'Gilgal.

16 M'ogbe nwa, wa avaar mbo achen kk'arọbha atubha k'atakpamma p'aning z'Makkeda. 17 Ch'matekẹ Joshua bẹ́, nkk'avaar mbo achen aza ch'matubh k'atakpamma z'Makkeda, 18 oben bẹ́, "Màbingẹ ntakpa, matima ad-akpa atakpamma mbo. Màbir sok ajinọng banẹ nya bẹ́, makkerẹ ibyi njo. 19 Okenaka, bọnga m'nnam kàtọr k'awawunanọng pabọnga okwukwubh! Màkpaama bẹ z'nnam-nnam, marima bẹ ábẹ̀. M'bẹ ọbọhk katte manaanga bọnga achina z'ibhondim sabẹ. Kirẹ Ọvaar Ibinọkpaabyi kw'ode Ibinọkpaabyi kwabọnga kk'bẹ ọtọka oke bọnga k'mbọhk bẹ́, makema bẹ."

20 Minna kw'Joshua ọmaana anọng p'Israẹl mazeng akema bẹ. Okenaka, wa m'bẹ maphyir kafhọ. Anọngva p'manaang, makonga arọbh apyirẹ z'ibhondim s'ide ifa-byi sabẹ. 21 Asoja p'Israẹl maphyir makwuna k'oforgbọhkọ, makebha Joshua za ch'obhingẹ z'Makkeda. Wa otebh ọnọng mawanẹ kw'ọgbaakẹ itama ọnang anọng p'Israẹl.

22 Joshua oben asoja mbo bẹ́, "Màgwunga ọtakpamma nwo, marọhbha avaar mbo achen machen-m m'iyaan." 23 Minna kw'marọhbh avaar mbo achen p'ẹkọma ch'Amọr, kw'ode ọvaarnọng kw'Jẹrusalẹm, ọmaana kw'Hẹbrọn, ọmaana kw'Jarmut, ọmaana kw'Lakish, ọttara kw'Eglọn z'ọtakpamma, mabharẹ k'iyaan. 24 K'ogbe kw'matim bẹ akebh Joshua nya, oyerẹ ajinọng p'Israẹl maphyir, mattonga. Oben aso p'nsoja-kaan s'matọnọ bẹ́, "Màkwu barẹ avaar mba ntọkọ k'ndọngọ." Minna kw'makwu abarẹ avaar mbo ntọkọ k'ndọngọ.

25 Joshua oben bẹ bẹ́, "Oning bọnga ojor; ettem ening bọnga ẹyọhnọ. Màbe z'izek mawuriji, mabir agaangẹ nttem. Minna wọ kw'Ọvaar Ibinọkpaabyi m'osi awawunanọng maphyir p'bọnga mm'arima ábẹ̀." 26 Minna kw'Joshua ọfhọ avaar mbo achen, ọtọka aforbukọ pabẹ orena k'mfafa-chi. Marena nya maa, opyirẹ k'ẹsọhka.

27 Opyirẹ ny'ẹsọhka, Joshua oke ẹfa bẹ́, masanga bẹ z'mfa-fachi njo. Minna kw'masang bẹ, mabharẹ bẹ z'atakpamma mbo p'makkikken atubha. Mabubha ata piden ny'atakpamma mbo, p'atim aning za minna maa, pyirẹ menda.

28 Ny'ewu ndo, Joshua orima maa, ọbọka obhon kw'Makkeda. Ọfhọ ọvaarnọng kw'ebhondim ndo, ọttara ọnọng kpenamkpen kw'orukọ nya. Ọnọng mawanẹ kw'otte ọbọhk oruk akpen, kode. Wa osi ọvaarnọng kw'Makkeda mach'osi ọvaarnọng kw'Jẹriko.

29 Nya o, Joshua ọmaana asoja p'otim maphyir, mabina ny'Makkeda, mad-arima ebhondim ch'Libna ábẹ̀. 30 Ọvaar Ibinọkpaabyi obira ọtọka ebhondim ch'Libna ọmaana ọvaarnọng kw'ọbaabh dẹ, oke anọng p'Israẹl k'mbọhk bẹ́, makema bẹ. Joshua ọfhọ ọnọng kpenamkpen kw'orukọ ny'ebhondim ndo. Ọnọng mawanẹ kw'otte ọbọhk oruk akpen, kode. Joshua osi ọvaarnọng kw'ebhondim ndo, mach'osi ọvaarnọng kw'Jẹriko.

31 Nya o, Joshua ọmaana asoja pẹ maphyir, mabina ny'Libna, mad-ayima egbong z'ebhondim ch'Lakish, marima dẹ ábẹ̀. 32 Ọvaar Ibinọkpaabyi ọtọka ebhondim ch'Lakish oke anọng p'Israẹl k'mbọhk, Joshua ọbọka ebhondim ndo k'ose kw'ewu esobh. Minna kw'ọfhọ ọnọng kpenamkpen kw'orukọ ny'ebhondim ndo. Ọnọng mawanẹ kw'otte ọbọhk oruk akpen, kode. Joshua osi ọvaarnọng kw'ebhondim ndo mach'osi ọvaarnọng kw'Libna. 33 Ode ch'ọvaar Horam kw'Gezer ikk'ọkwa bẹ́, otor ọvaarnọng kw'Libna egbong. Okenaka, Joshua ọfhọ kẹ ọmaana asoja pẹ. Ọnọng mawanẹ kw'otte ọbọhk oruk akpen, kode.

34 Nya o, Joshua ọmaana asoja pẹ maphyir, mabina ny'Lakish, mad-ayima egbong z'obhon kw'Eglọn, marima wẹ ábẹ̀. 35 Mabọka obhon nwo ny'ewu ndo madanẹ-danẹ. Mafhọ ọnọng kpenamkpen kw'orukọ nya. Ọnọng mawanẹ-wanẹ kw'matte ọbọhk oruk akpen, kode. Masi obhon nwo mach'masi obhon kw'Lakish.

36 Nya o, Joshua ọmaana asoja pẹ maphyir, mabina ny'Eglọn, mad-arima obhon kw'Hẹbrọn, ábẹ̀. 37 Minna kw'mabọk ebhondim ndo, mafhọ ọvaarnọng kw'ọbaabh dẹ, mabir adimẹ ibhonva sẹ attara. Mafhọ ọnọng kpenamkpen kw'orukọ nya. Ọnọng mawanẹ kw'matte ọbọhk oruk akpen, kode. K'ose kw'masi z'Eglọn, minna kw'makibhẹ ọttọhk kpenamkpen, ọmaana ọnọng kpenamkpen kw'orukọ nya.

38 Nya o, Joshua ọmaana asoja pẹ maphyir, madanga, mad-arima obhon kw'Debir ábẹ̀. 39 Mabọka ebhondim ndo, ọmaana ọvaarnọng kw'ọbaabh nya, ọttara ibhonva sẹ, pira mafhọ ọvaarnọng nwo. Mafhọ ọnọng kpenamkpen kw'orukọ ny'Debir. Ọnọng mawanẹ kw'matte ọbọhk oruk akpen, kode. K'ose kw'masi z'Libna, ọmaana z'Hẹbrọn, minna kw'masi obhon kw'Debir ọmaana ọvaarnọng kw'ọbaabh nya.

40 Minna kw'Joshua ozeng okema nkọma njo maphyir, ọttara ẹkọma ch'agbe, ọmaana ch'Nẹgẹv, ọmaana ẹkọma ch'igbemmo ch'ening z'ẹbhaakẹ ch'ewuchen ed-edimẹ, ọmaana ch'ẹkọma ch'ening z'iwọn-isaka, ọttara avaar p'nkọma nja maphyir. Ọnọng mawanẹ kw'otte ọbọhk oruk akpen, kode. Ọfhọ ọnọng kpenamkpen kw'orukọ akpen. Wa Joshua osi mach'Ọvaar Ibinọkpaabyi, kw'ode Ibinọkpaabyi kw'Israẹl ikk'ẹ obena. 41 Joshua okema nkọma njo, tọma z'Kadẹsh-Barnea, pyirẹ z'Gaza. Bir tọma ny'ẹbhaakẹ ch'Goshẹn kibungọ maa, pyirẹ z'Gibeọn. 42 Wa Joshua okem avaar mba maphyir, ọttara nkọma sabẹ k'egbong madanẹ, okurọ bẹ́, wa Ọvaar Ibinọkpaabyi, kw'ode Ibinọkpaabyi kw'Israẹl wọ osi erima ch'Israẹl.

43 Nya o, Joshua otima asoja pẹ maphyir, ọkpa nnam z'ibhinga-byi, z'Gilgal.