1 Wa anọng p'Israẹl m'ntọhna s'manangẹ bẹ bẹ́, makibhẹ ọttọhk kpenamkpen z'Jẹriko, kakpobh. Ojinọng wanẹ kw'okpen Akan, ọtọka ekpo byanẹ py'ẹbar-odik, odubh. Wa Akan ofon k'efona ch'Juda, ode nnwa kw'Karmi, kw'ode nnwa kw'Zimri, kw'Zẹra obhonọ. Ofona nya, wa ettem epyibh Ọvaar Ibinọkpaabyi ọmaana anọng p'Israẹl.

2 Joshua ọtọhm ajinọng banẹ, mabina ny'Jẹriko, machina z'Ai, kw'oning ọnyọma Bẹt-Aven, z'ẹbhaakẹ ch'ewuchen ed-eyin, z'Bẹtẹl. Oben bẹ bẹ́, "Màzọhng baana ẹkọma ndo." Minna kw'ajinọng mbo mafon, mad-abaana Ai.

3 K'ogbe kw'nkk'akwuna akebha Joshua, maben-ẹ bẹ́, "Kọbaan bẹ́, asoja maphyir mad-arima Ai ábẹ̀. Kenaka tọhm asoja nnọhna nchen, wanẹma, asoja nnọhna nchenọmfa okwuma arọbh ijobh za. Kirẹ anọng p'arukọ nya kasaabhẹ. Katte asoja maphyir ad-akibhẹ ogbe nya." 4 Minna kw'asoja p'mm'apyirẹ anọng nnọhna nchenọmfa okwuma arọbh ijobh, mabin ayin erima. Okenaka, anọng p'Ai makema bẹ, 5 mafhọ anọng p'Israẹl p'mm'apyirẹ ẹrọbh okwuma ichi kawanẹ. Anọng p'Ai atọma ny'ebhumma ch'ebhondim, makwubh anọng p'Israẹl maa, mapyirẹ z'ibyi s'nd-avọhkọ ata. Mafhọ bẹ z'iwọna-saka. K'ogbe kw'anọng p'Israẹl mabhaang odik nwa, ojora ọbọka bẹ maa, ẹfa ẹsa bẹ kibung-kibungọ.

6 Minna kw'Joshua ọyaakẹ ekpo py'ọfọr, otto okwubha ititika ny'izek, ny'ititika s'Ẹkkọhbhọ ch'echekẹ ch'Ọvaar Ibinọkpaabyi. Oninga nya maa, opyirẹ k'ẹsọhka. Asogbọhkọnọng p'Israẹl mabir asi mach'Joshua osi, matukọ ititọhng zabẹ k'nso. 7 Joshua oben bẹ́, "O Ọvaar Ibinọkpaabyi kw'Ọyọhng, osempira atima mina ajeka ọraanga kw'Jọrdan bẹ́, achena anọng p'Amọr, mafhọ o? Wura ojibhẹ ọtam bẹ́, motera oninga z'okwubha nwoza kw'Jọrdan! 8 O Ọvaar Ibinọkpaabyi, m'mgbaak yen, ch'awawunanọng kk'Israẹl akema? 9 Anọng p'Kenaan ọmaana ọnọng kpenamkpen kw'orukọ ny'ẹkọma ndo, mm'abhaanga odik nwa. M'ofona nya, bẹ mm'akọbha mina ake k'ettem, madimẹ mina eche m'iyagbin. Ó̱de óde minna, abarada p'eche chọ, nade yen?"

10 Ọvaar Ibinọkpaabyi oben Joshua bẹ́, "Bin-obina! Ad-akwubha ititika ny'izek asi mbọng? 11 Anọng p'Israẹl kk'epyibha asa. Bẹ nkk'echekẹ chaam ch'mbenẹ bẹ bẹ́, masok, avọhka. Bẹ nkk'afọra asa, mafu ekpo byanẹ py'ẹbar-odik, mattara z'oyena kwabẹ. 12 Nya wọ osi, anọng p'Israẹl m'awawunanọng pabẹ ábẹ̀ kakpo arima. Marọbh-ọrọbh z'awawunanọng pabẹ okurọ bẹ́, bẹ bọ mazeng mmo awọhkọ bẹ́, ayok afhọ bẹ. Kaam ọdọk bọnga mìninga mmaana, oyebẹ́, nkk'ọttọhk kpenamkpen f'ọbaan ekibhẹ, f'oning ọmaana bọnga, akibha.

13 "Zọhng si anọng p'Israẹl mawur-owur. Ben bẹ bẹ́, ‘Màsok ifor sabọnga iwur-owur k'ewu ch'ophyinẹ, kirẹ Ọvaar Ibinọkpaabyi kw'ode Ibinọkpaabyi kw'Israẹl obenẹ bẹ́: Bọnga nkk'ekpo byanẹ py'ẹbar-odik, py'mbenẹ bọnga bẹ́, makibhẹ atọka ayena. Bọnga m'ọdọk awawunanọng pabọnga ábẹ̀ makpo, oyebẹ́, nkk'ekpo mbyo py'ẹbar-odik arọhbha ny'ikpakaana sabọnga, abharẹ.

14 " ‘Ophyinẹ k'ekpebha, mm'akwu attonga k'mfonamma k'mfonamma. Ofonamma kw'Ọvaar Ibinọkpaabyi otek, m'oyin k'iyaan k'ẹnọmma k'ẹnọmma. Ẹnọmma ch'Ọvaar Ibinọkpaabyi otek, m'eyin k'iyaan k'ẹsọhmmọr k'ẹsọhmmọr. Ojinọng kw'Ọvaar Ibinọkpaabyi otek k'ẹsọhmmọr kpenamkpen, m'oyin k'iyaan. 15 Ọnọng kpenamkpen kw'mabọk amaana ekpo mbyo py'ẹbar-odik, mm'akwọm-ẹ k'ekpon ọmaana ekpo py'oyen maphyir, okurọ bẹ́, ọsana kw'Ọvaar Ibinọkpaabyi kosokọ, obir ọjẹ odik kwiden ny'Israẹl!’ "

16 K'ekpikpebha, Joshua otima anọng p'Israẹl okwu k'mfona-k'mfona. Ọvaar Ibinọkpaabyi oteka efona ch'Juda. 17 Nnọmma s'Juda ikwu iyin k'iyaan, Ọvaar Ibinọkpaabyi oteka ẹnọmma ch'Zera. Oben nnọmma s'Zera bẹ́, iyin k'ẹsọhmmọr k'ẹsọhmmọr. Minna kw'Ọvaar Ibinọkpaabyi otek ẹsọhmmọr ch'Zimri. 18 Joshua osi ojinọng kpenamkpen kw'ẹsọhmmọr ch'Zimri oyin obe. Ọvaar Ibinọkpaabyi oteka Akan kw'ode nnwa kw'Karmi, kw'ode nnwa kw'Zimri, kw'Zera kw'ofon k'efona ch'Juda obhonọ.

19 Nya o, Joshua oben Akan bẹ́, "Nnwa kwaam, nang Ọvaar Ibinọkpaabyi, kw'ode Ibinọkpaabyi kw'Israẹl abarada, abir anang-ẹ ikpukpobha. Yaakẹ ọttọhk f'asi, nang-m; kaam odik kadubh."

20 Akan ọpọhna bẹ́, "Ode odik ọkkọkka bẹ́, kaam kk'epyibha nsa k'ititika s'Ọvaar Ibinọkpaabyi, kw'ode Ibinọkpaabyi kw'Israẹl. Odik nwo kw'nsi ode bẹ́: 21 K'ogbe kw'morim Jẹriko ábẹ̀, ntọk ọnọhma-baba kw'ojibh-ojibh kw'ọnọng kw'ofon Babilọn nyena, ọmaana ashẹkẹl p'silva arọbh ijobh, ọttara ọbaanga-chigimẹ kw'matim gol asi, kw'adọhbhiji pẹ made ashẹkẹl arọbh afa okwuma ijobh. Ntum epe z'kaam k'ikkira, ndubh silva z'ẹtaanga, mbira nyika ekpo mbyoza nttara nya."

22 Minna kw'Joshua ọtọhmọ azeng-eden, matima ẹbhar achina z'ikkira njo. Mad-aze ekpo mbyo ny'epe, ọttara silva z'epewọr. 23 Matọka ekpo mbyo ny'ikkira njo, machena Joshua ọmaana anọng p'Israẹl maphyir, majẹ pyẹ ny'ititika s'Ọvaar Ibinọkpaabyi.

24 Nya o, Joshua ọmaana anọng p'Israẹl matọka Akan kw'Zẹra obhonọ, ọmaana silva mbo, ọmaana ọnọhma-baba nwo kw'ojibh-ojibh, ọmaana ọbaangachi-gimẹ nwo kw'matim gol asi, ọmaana iva pẹ k'ejinọng ọttara k'ẹpanọng, ọmaana adamogbodo pẹ, ọmaana nnyanya s'id-itọhka ekpo, ọmaana arọkimaan, ọmaana ikkira sẹ, ọttara ọttọhk kpenamkpen f'ode fẹ, matima achina z'ilokodo s'Akọr. 25 Joshua oben bẹ́, "Osempira ajẹ odikse nwa anang mina o? Ọvaar Ibinọkpaabyi m'ọkọ-ọ ẹkọhr menda." Minna kw'anọng p'Israẹl maphyir matobhọ Akan ọmaana ẹsọhmmọr chẹ ata maa, mape. Matọka bẹ ọmaana oyena kwẹ, makwọmọ. 26 Ofona nya o, ettem etika Ọvaar Ibinọkpaabyi opyipyibh. Nya ch'uwa mafhọ Akan, ọtakkin oterẹ za maa, pyirẹ menda. Nya wọ osi tọma za, makpe ibyi njo bẹ́, Ilokodo s'Akọr.