1 K'ogbe kw'Mosẹs kw'ode ọtọhmnọng kw'Ọvaar Ibinọkpaabyi ikk'ọpa, Ọvaar Ibinọkpaabyi ọgbaak odik ọnang Joshua kw'Nun obhonọ, obira ode ọnọng kw'ode-oke Mosẹs ọbọhk k'ọtọhm. Oben-ẹ bẹ́, 2 "Mosẹs kw'ode ọtọhmnọng kwaam kk'ọpa. Kọ ọttara anọng pọ maphyir, màdo ifor s'mm'ajeka ọraanga kw'Jọrdan, machina z'izek s'mbenẹ bẹ́, m'nnang bẹ mbo p'ade anọng p'Israẹl. 3 Kaam m'nnang bọnga ibyi kpenamkpen s'ẹtọkọ chabọnga ẹbarẹ, k'ose kw'uwa nchekẹ nnang Mosẹs. 4 Izek sabọnga m'itọma z'ibyi s'owora, ipyirẹ z'Lẹbanọn. Ibir itima maa ipyirẹ z'ọraanga kwiden kw'Eupharetes, ọmaana z'nkọma s'Het maphyir maa pyirẹ z'ẹbhaakẹ ch'ewuchen ed-edimẹ z'ọraanga kwiden kw'Meditereniya. 5 K'akpen pọ maphyir, ọnọng kode kw'im'okem-ọ k'erima. K'ose kw'uwa nning mmaana Mosẹs, minna kw'm'ninga mmaan-ọ. Kwuna kaam kọ ọbọhk mìntte. Kaam nnam mìmbir mkpa mbọr-ọ. 6 Kọ m'agaangẹ ifor, abira abar ettem, okurọ bẹ́, kọ wọ im'atima anọng mboma eden, mad-atọka izek njo s'iwa nchekẹ nnang ab'ttatta pabẹ bẹ́, m'nnang bẹ. 7 Kọ m'agaangẹ ifor, abira abar ettem mawuriji. M'atọka ogbe, akpobha asana mbo maphyir p'uwa Mosẹs kw'ode ọtọhmnọng kwaam ọnang-ọ. Tor asana mbo bẹ́, gbẹẹng k'ose kw'made, ọfha ojibh ọnang-ọ k'ibyi kpenamkpen s'ata. 8 Tte nnwẹr nwa kw'asana oninga ny'ẹmma chọ k'ogbe kpenamkpen, asi ochibhẹ kw'ọmaan asana mbo k'ẹya ọttara k'erungọ, ọfha akpo asi okpenamkpen k'ose kw'makkẹrẹ nya. Minna kw'idik m'izenga mbengana inang-ọ, obira ojibh ọnang-ọ. 9 Mba kk'ọ mbena bẹ́, agaangẹ ifor, abira abar ettem? Tte oning-ọ ojor, ẹfa ening-ọ ebira ẹsa! Kirẹ Ọvaar Ibinọkpaabyi, kw'ode Ibinọkpaabyi kwọ m'oninga ọmaan-ọ k'ibyi kpenamkpen s'ata."

10 Nya o, Joshua oben aso p'Israẹl mbo bẹ́, 11 "Màzọhng z'ibhinga-byi, màtek anọng bẹ́, ‘Màtobha ekpo pyabọnga sok. Tọma menda maa od-opyirẹ iwu ittaan, bọnga mm'ajeka ọraanga kw'Jọrdan, mad-atọka izek njo s'Ọvaar Ibinọkpaabyi kw'ode Ibinọkpaabyi kwabọnga ọd-ọnang bọnga bẹ́, mayena.’ "

12 Okenaka, Joshua oben efona ch'Reuben, ọmaana ch'Gad, ọttara igboka janẹ s'efona ch'Manasẹ bẹ́, 13 "Màjima odik kw'Mosẹs kw'ode ọtọhmnọng kw'Ọvaar Ibinọkpaabyi ọgbaakẹ bọnga, ch'obenẹ bẹ́, ‘Ọvaar Ibinọkpaabyi, kw'ode Ibinọkpaabyi kwabọnga, m'ọnang bọnga odiriji m'izek nja s'ọd-ọnang bọnga ma.’ 14 Panọng pabọnga, ọmaana iva pabọnga, ọttara etirakpo pyabọnga m'eninga ny'izek njo s'iwa Mosẹs ọnangẹ bọnga, z'ẹbhaakẹ ch'ewuchen ed-eyin z'Jọrdan. Okenaka, agbongnọng pabọnga maphyir p'ado ifor s'egbong bọ mm'achi anọng p'Israẹl eden ajeka z'okwubha. Bọnga mm'ake bẹ ọbọhk 15 maa, Ọvaar Ibinọkpaabyi ọnang bẹ ẹwọhngkwoka, k'ose kw'osi ọnang bọnga. Màke bẹ ọbọhk maa, matọka izek njo s'Ọvaar Ibinọkpaabyi, kw'ode Ibinọkpaabyi kwabọnga ọd-ọnang bẹ bẹ́, mayena. K'ogbe kw'nkk'achera, makpa nnam ad-aninga z'izek sabọnga oyenẹ, s'Mosẹs kw'ode ọtọhmnọng kw'Ọvaar Ibinọkpaabyi ọnangẹ bọnga z'ẹbhaakẹ ch'ewuchen ed-eyin z'Jọrdan."

16 Bẹ mapọhna Joshua bẹ́, "Mm'osi ọttọhk kpenamkpen f'abenẹ mina bẹ́, mosi, mobira ọta ibyi kpenamkpen s'atọhmọ mina. 17 K'ose kw'uwa motim ettem madanẹ okpobha Mosẹs, minna wọ kw'mm'okpobh-ọ. Njọm samina ikenka ide bẹ́, tte Ọvaar Ibinọkpaabyi kw'ode Ibinọkpaabyi kwọ, oninga ọmaan-ọ k'ose kw'uwa oning ọmaana Mosẹs. 18 Ọnọng kpenamkpen kw'ọtwọ odik kwọ, odik kwọ kobir okpobha, ọmaana ọpaanga kpenamkpen kwọ, mm'ọfhẹ-ẹ. Kọ kenaka gaangẹ ifor, abira abar ettem!"