1 Wa Joshua kw'ode nnwa kw'Nun otubh-otubha, ọtọhm anọng afa p'afon Shittim bẹ́, "Màzọhng baana izek njo, kidaam-kidaam, Jẹriko." Minna kw'anọng mbo mafon, mad-ayaaka k'ọsọhm kw'ọzaza wanẹ kw'okpen Rahab, maninga nya.

2 Anọng atek ọvaarnọng kw'Jẹriko bẹ́, "Kirẹ e, anọng banẹ p'afon Israẹl kk'erungọ atima akwu ma bẹ́, makwu abaana izek nja e." 3 Nya o, ọvaarnọng kw'Jẹriko ọtọhm ẹkkaabha ọnang Rahab, oben-ẹ bẹ́, "Tima anọng mbo p'asak-ọ, yin ka, kirẹ bẹ makwu bẹ́, makwu abaana izek nja kibung-kibungọ."

4 Ode ch'kwanọng nwo ikk'ajinọng mbo afa ọtọka odubh, pira oben bẹ́, "Iye e, ajinọng mbo kk'akwa m'kaam k'ọsọhm e, okenaka, ibyi s'mafon akwu, kinzong e. 5 Ny'ẹsọhka, k'ogbe kw'nd-abhen ebhumma ch'ebhondim, nya kw'mafon e. Ibyi s'machin kinzong e. Màzọhng, màkwubh bẹ z'eden ẹbhar-ẹbhar. Mm'akpokpo abọka bẹ." 6 Ode ch'ikẹ ikk'ajinọng mbo ọtọka odubh z'agwuchi-bukọ p'otim osi mgbodo, ọjẹ z'ipubhaang. 7 Minna kw'anọng mbo p'Jẹriko matọm ajinọng mbo p'akwu ibyi obubaana okwukwubh. Makwubh bẹ achina z'eden ch'ọraanga kw'Jọrdan, za ch'ọgbẹr-ọgbẹrẹ. K'ose kw'anọng p'akwubhọ bẹ matto obho ny'eden, mabhen ebhumma ndo.

8 Pira anọng mbo p'akwu abaana ibyi mayima ny'erungọ, Rahab ovura okebh bẹ z'ipubhaang, 9 od-oben bẹ bẹ́, "Kaam nzong bẹ́, Ọvaar Ibinọkpaabyi kk'bọnga izek njoma ọnanga, mina mobira oninga k'ojora fiden fabọnga. Ofona nya, nttem s'anọng p'ẹkọma ndo maphyir, irọbh irik bẹ. 10 Nkk'ọbhaanga ose kw'Ọvaar Ibinọkpaabyi osi ẹraanga-kora egwu bẹ́ kẹkẹdẹ ọnang bọnga ch'mabin z'Ijip. Mobira ọbhaanga ọttọhk f'bọnga masi Sihọn ọttara Og, p'ade avaar afa p'Amọr, z'ẹbhaakẹ ch'ewuchen ed-eyin z'Jọrdan, k'ose kw'madimẹ bẹ eche kibungọ. 11 Ch'mọbhaang odik nwo, nttem samina irọbh-ọrọbh, irik mina okurọ ojora f'ọbọk mina, ottembara kw'ọnọng kpenamkpen ọsa maphyir okurọ ch'bọnga major mina. Ọvaar Ibinọkpaabyi kw'ode Ibinọkpaabyi kwabọnga, wọ ode Ibinọkpaabyi kw'oning z'ẹrọng ọmaana m'izek.

12 Ototo o, màchekẹ nang-m k'eche ch'Ọvaar Ibinọkpaabyi bẹ́, bọnga mm'akkaana kaam ọttara ẹsọhmmọr chaam, okurọ bẹ́, kaam kk'ẹkkaana nsa nnang bọnga. Mànang-m ẹkọhka ch'm'mphe nnam 13 bẹ́, bọnga m'atte ọmaana akka kwaam ọttọhk masi, ọmaana ivotte, ọttara ivọkka paam, ọmaaana anọng maphyir p'ade pabẹ. Màbir chekẹ bẹ́, bọnga mm'asi mina mọnaanga obo."

14 Ajinọng mbo apọhn-ẹ bẹ́, "Mina mm'oter ope obo kwabọnga, óde bọ́nga nna mina ayaakẹ k'ọttọhk f'mokwu osisi ma. Mina mm'otima ettem madanẹ osi ọphyaam ọnang bọnga, k'ogbe kw'Ọvaar Ibinọkpaabyi ọnangẹ mina izek nja."

15 Nya o, Rahab ọnang bẹ edik ch'matim azenga k'ọmma kw'ofum asaka z'izek. Wa Rahab orukọ k'ọsọhm kw'etumọ danẹ ede ndo ch'ebhondim. 16 Oben bẹ bẹ́, "Màchina z'agbe, ọfha anọng p'akwubhọ bọnga z'eden, màning bọnga aze. Màtubha k'iwu ittaan maa, anọng p'akwubh bọnga makpa nnam, pira nnachin ororo k'ozenga kwabọnga."

17 Anọn*g mbo aben-ẹ bẹ́, "Echekẹ nda ch'asi mina mochekẹ ma, mina mẹ̀bọka, 18 oyebẹ́, k'ogbe kw'mm'odim m'izek nja, kọ kk'edik-kora atọka agbana ny'ọmma nwo kw'ofum kw'azeng asaka mina k'izek, ọmaana bẹ́, kọ kk'atte ọmaana akka, ọmaana ivotte, ọttara echimma chọ maphyir, atima akwu m'ọsọhm kwọ ẹtaanga. 19 Ó̱de óchimmanọng kwọ ina ny'ikọ k'ọsọhm ẹtaanga oning, óde oyinẹ ezenga-kpaanga, izẹ sabẹ m'ibhakẹ ikpẹkẹ bẹ oyenẹ, k'ọttọhk kpenamkpen f'oyinẹ ọmaana bẹ z'odenkpaarẹ. Ọbọhk kwamina nya, moninga. K'ayok p'aning amaan-ọ ny'ọsọhm, izẹ sabẹ m'ikpẹkẹ mina, óde ọttọhk ọchẹrẹ bẹ. 20 Okenaka, óde áyaakẹ mina k'ọttọhk f'nd-osi ma, echekẹ ch'mochekẹ ma, mina mẹbọka."

21 Kẹ ọpọhna bẹ́, "Kaam ncher minna. Tte ode k'ose kw'mabenẹ." Minna kw'otte bẹ ọbọhk, bẹ mafona. Ọtọka edik-kora ọgbana ny'ọmma nwo kw'ofum.

22 Anọng mbo afa mafona achina z'agbe, maninga za k'iwu ittaan. Anọng p'akwubhọ bẹ maror bẹ z'eden maphyir, m'bẹ kaze. Nya o, makpa nnam z'abẹ k'obhon. 23 Nya o, anọng mbo afa mabina z'agbe masaka, makwu alọhkọ ọraanga ajeka, makebha Joshua kw'ode nnwa kw'Nun za. Matek-ẹ odik kpenamkpen kw'oyinẹ ọmaana bẹ. 24 Maben Joshua bẹ́, "K'odik ọkkọkka, Ọvaar Ibinọkpaabyi kk'izek oyenẹ k'ibungọ ọtọka oke mina k'mbọhk. Nttem s'anọng mbo kk'irọbha maphyir okurọ ch'mojor bẹ e."