1 Nya o, Ọvaar Ibinọkpaabyi oben Joshua bẹ́, "Oning-ọ ojor; ifor ining-ọ imọmọ. Tima asoja maphyir, ad-arima obhon kw'Ai ábẹ̀. Kirẹ, kaam kk'ọvaarnọng kw'Ai, ọmaana anọng pẹ, ọmaana ebhondim chẹ, ọttara ẹkọma chẹ, ntọka nkọ-ọ k'mbọhk. 2 Si obhon kw'Ai ọttara ọvaarnọng kwẹ, mach'asi obhon kw'Jẹrikọ ọttara ọvaarnọng kwẹ. Okenaka, mọkpanda, m'atọka ekpo, ọttara etirakpo pyabẹ. Yima egbong kọbha ebhondim ndo ke k'ettem."

3 Minna kw'Joshua ọmaana asoja maphyir mafon bẹ́, mad-arima obhon kw'Ai ábẹ̀. Joshua ọrọhbha arimanọng pẹ p'agaang-ọgaangẹ anọng nnọhna arọbh attaan okwuma ichi. Ọtọhm bẹ k'erungọ, 4 oben bẹ bẹ́, "Màyonga itọhng mawuriji. Mm'ayima egbong z'nnam-nnam kw'ebhondim ndo. M'ebhondim ndo obhokọ kidaam kànang. Bọnga maphyir m'ifor kàzaama o. 5 Kaam ọmaana anọng maphyir p'm'ntima, mm'odim ny'ebhondim ndo. K'ogbe kw'makwu arima mina ábẹ̀, mach'nd-akkikken asi, mm'ọrọbh. 6 Mm'ọdaabha bẹ mabina arik ebhondim chabẹ, makwubh mina maa, maben bẹ́, ‘Mina bọ p'nd-arọbh nya mach'nd-akkikken arọbh.’ Ó̱de nkk'mina akwubha minna o, 7 nya kw'bọnga mm'abina za ch'mayim egbong, mad-abọka ebhondim ndo. Ọvaar Ibinọkpaabyi kw'ode Ibinọkpaabyi kwabọnga m'ọtọka ebhondim ndo oke bọnga k'mbọhk. 8 K'ogbe kw'nkk'ebhondim ndo abọka, màke dẹ ekpon. Màsi k'ose kw'Ọvaar Ibinọkpaabyi ikk'obena. Màzonga bẹ́, kk'bọnga ẹfa nnanga."

9 Minna kw'Joshua ọtọhm bẹ, mad-ayima egbong z'njeka kw'Bẹtẹl ọmaana Ai, z'ẹbhaakẹ ch'ewuchen ed-edimẹ z'Ai. Okenaka, Joshua obhing ọmaana asoja ny'orungiwu nwo.

10 Joshua obina ny'ekpikpebha, otobha asoja pẹ. Kẹ ọttara adidennọng p'Israẹl matim bẹ azeng z'Ai. 11 Esojakaan ndo maphyir ch'uwa ening ẹmaan-ẹ, mazenga manyọma ebhondim ndo. Mattima ibhingabyi z'ebir-ebir kw'Ai, ilokodo ininga ny'njeka kw'bẹ ọttara Ai. 12 Ode ch'Joshua ikk'agbongnọng p'mm'apyirẹ nnọhna ijobh kkamfa okwuma arọbh ijobh ọtọhma bẹ́, mad-ayima egbong z'njeka kw'Ai ọmaana Bẹtẹl, z'ẹbhaakẹ ch'ewuchen ed-edimẹ ny'ebhondim ndo. 13 Minna kw'makebhẹ asoja mbo masok k'ibyi-k'ibyi. Masok ibhingabyi sabẹ z'ebir-ebir kw'ebhondim ndo. Mayim egbong z'ẹbhaakẹ ch'ewuchen ed-edimẹ ny'ebhondim ndo. Ny'orungiwu nwo, Joshua ochina z'ilokodo.

14 K'ogbe kw'ọvaarnọng kw'Ai oze odik nwa, minna kw'kẹ ọmaana ajinọng p'ebhondim ndo maphyir masẹr-ọsẹr abina k'ekpebha erungọ-rungọ bẹ́, mad-arima anọng p'Israẹl ábẹ̀ z'ibyi janẹ s'ikkerẹ Araba ititika. Okenaka, kẹ kozong bẹ́, nkk'egbong ayima atik bẹ z'nnam-nnam kw'ebhondim ndo. 15 Joshua ọmaana anọng p'Israẹl maphyir matte anọng p'Ai ọbọhk makwubh bẹ achina z'ibyi ch'anọng nna arukọ. 16 Wa mawon ẹmọng bẹ́, ojinọng kpenamkpen kw'Ai oyin ka makwubh Joshua. Minna kw'makwubhọ Joshua maa, ọdaabh bẹ otima obina orik ebhondim. 17 Wa ojinọng korikẹ ny'Ai wanẹma ny'Bẹtẹl kw'ina anọng p'Israẹl okwubhọ. Minna kw'matte obhon ọbọhk otte eje, makwubh anọng Israẹl.

18 Nya o, Ọvaar Ibinọkpaabyi oben Joshua bẹ́, "Tena ọkọhn f'atim ny'ọbọhk kwọ z'Ai, kirẹ, kk'ebhondim ndo ntọka nkọ-ọ ny'ọbọhk." Minna kw'Joshua oten ọkọhn mvo f'otim ny'ọbọhk, z'ẹbhaakẹ ch'Ai. 19 K'ose otitena ọkọhn mvo za, ajinọng mbo p'mayim egbong, matima ẹbhar abina za ch'matubh, mayin k'iyaan. Minna kw'madimẹ z'ebhondim ndo, mabọka dẹ, mabir asẹr-ọsẹr ake dẹ ekpon.

20 Anọng p'Ai abhakẹ nnam, maze izizong s'id-iyin z'ebhondim ichina z'ọrọngkpakpa. Okenaka, bẹ m'ọdọk obhokọ kayen kw'mm'azenga arọbh achina ibyi kpenamkpen, okurọ bẹ́, anọng p'Israẹl p'uwa nd-arọbh-ọrọbh achina z'ibyi s'anọng nna arukọ, bẹ nnatera abhakẹ nnam arima bẹ ábẹ̀. 21 Ch'Joshua ọmaana anọng p'Israẹl maphyir maze bẹ́, anọng mbo p'mayim egbong kk'ebhondim ndo abọka, ọmaana bẹ́, nkk'izizong aza s'id-iyin za, minna kw'mabhakẹ, marima ajinọng p'Ai ábẹ̀. 22 Anọng mbo p'mayim egbong mabir abina z'ebhondim, makọbh bẹ ake k'ettem. Anọng p'Israẹl mafhọ bẹ maphyir, ọnọng mawan-wanẹ, kọnaang. 23 Okenaka, mabọka ọvaarnọng kw'Ai k'ẹmmọri, matọk-ẹ achena Joshua.

24 K'ogbe kw'anọng p'Israẹl nkk'ajinọng p'Ai afha maphyir z'mgba sabẹ, ọmaana z'ibyi s'anọng nna arukọ ch'makwubh bẹ abharẹ, ọttara bẹ́, nkk'ọnọng kpenamkpen afha, minna kw'anọng p'Israẹl makpa nnam z'Ai, mad-afhọ anọng p'aning nya. 25 Anọng p'Ai maphyir k'ejinọng ọmaana k'ẹpanọng p'uwa mafhọ ny'ewu ndo, made anọng nnọhna ẹrọbh okwuma ijobh. 26 Wa Joshua ochina ororo otima ọkọhn mvo ny'ọbọhk mach'otim nya maa, ọfhọ anọng p'arukọ ny'Ai maphyir. 27 Anọng p'Israẹl atọka etirakpo, ọttara oyena kw'ebhondim ndo, matima afona, tor k'ose kw'Ọvaar Ibinọkpaabyi ikk'Joshua obena.

28 Minna kw'Joshua ọkwọmọ obhon kw'Ai maa, ọdọk eruka kode, pyirẹ menda. 29 Joshua orena ọvaarnọng kw'Ai edik k'echi, otte oforbukọ kwẹ ọbọhk orena nya maa, opyirẹ k'ẹsọhka. Otum ny'ẹsọhka, Joshua oke ẹfa bẹ́, màsanga oforbukọ nwo ny'echi, mad-abharẹ z'ebhumma ch'ebhondim ndo. Mayak-ẹ ata maa, ozeng ọtakkin. Ọtakkin nwo, otim oning za maa, pyirẹ menda.

30 Nya o, Joshua osi ija-byi s'Ọvaar Ibinọkpaabyi, kw'ode Ibinọkpaabyi kw'Israẹl z'egbe ch'Ebal, 31 tor k'ose kw'uwa Mosẹs kw'ode ọtọhmnọng kw'Ọvaar Ibinọkpaabyi ikk'anọng p'Israẹl obena. Wa osi ija-byi njo otor k'ose kw'nkk'akkẹra z'Nnwẹr kw'apaanga p'Mosẹs. Ata p'uwa nna ọtọhmttọhk mach'ẹbaanga atim akpaara bọ p'uwa matim asi ija-byi njo. Ny'ija-byi njo jọ s'iwa makwọmọ nnanga, mabir afọhnọ nja s'eforgbaka anang Ọvaar Ibinọkpaabyi. 32 Joshua oninga ny'ititika s'anọng p'Israẹl, ọkkẹr apaanga p'Mosẹs ny'ata mbo. 33 Anọng p'Israẹl maphyir, ọmaana asogbọhkonọng pabẹ, ọmaana asonọng pabẹ, ọttara akpaar-aponga, wa mabe k'okwubha-k'okwubha kw'Ẹkkọhbhọ ch'Ẹchekẹ ch'Ọvaar Ibinọkpaabyi, makkerẹ afọhn-ẹja p'ẹnọmma ch'Lẹvi, p'atọhk Ẹkkọhbhọ ndo. Akikennọng p'arukọ amaana bẹ ọttara ammaana maninga nya ọttara. Igboka janẹ s'anọng mbo ibe z'ititika-ititika kw'Egbe ch'Gerizim, igboka janẹ ibe z'ititika-ititika kw'Egbe ch'Ebal, tor k'ose kw'Mosẹs kw'ode ọtọhmnọng kw'Ọvaar Ibinọkpaabyi ikk'okkikken oben k'ogbe kw'ọnang ntọhna s'otim odo anọng p'Israẹl.

34 Nya o, Joshua oyerẹ idik s'apaanga mbo maphyir k'ose kw'nkk'akkẹra z'Nnwẹr kw'apaanga, kw'ode ejibha ọmaana itama. 35 Wa odik ny'apaanga p'Mosẹs ọkkẹrẹ kode, kw'Joshua ina oyerẹ ọnang ikpakaana njo s'Israẹl, s'ittar ivava, ọmaana panọng, ọttara akikennọng p'arukọ amaana bẹ.