1 K'ogbe kw'ẹkọma ndo ch'Israẹl kibungọ ikk'ọraanga kw'Jọrdan ejeka maphyir, Ọvaar Ibinọkpaabyi oben Joshua bẹ́, 2 "Ny'anọng mbo p'aning nya, rọhbha ọnọng mawanẹ-wanẹ ny'mfonamma njo ijobh kkamfa, 3 abira aben bẹ bẹ́, madunga ata ijobh kkamfa ny'ẹraangattem ch'Jọrdan. Tte madunga ata mbo nya ch'afọhn-ẹja mbo mabe, matima ator-ọ, mad-asok z'ibyi s'bọnga mm'abhing m'erungọ."

4 Minna kw'Joshua oyerẹ anọng mbo ijobh kkamfa p'ikk'oteka ny'anọng p'Israẹl k'ibyi majanẹ, ọd-ọrọhbha ọnọng mawanẹ-wanẹ k'ofonamma kpenamkpen. 5 Obira oben bẹ bẹ́, "Màzọhng z'ẹraangattem ch'Jọrdan, ny'ititika s'Ẹkkọhbhọ ch'Echekẹ ch'Ọvaar Ibinọkpaabyi, kw'ode Ibinọkpaabyi kwabọnga. Tte ọnọng-ọnọng otinẹ ẹta ọnana ny'ebubaang chẹ, otor k'ose kw'afonamma p'Israẹl made, 6 ọfha ode mach'ẹkọhka ọnang bọnga. Z'ogbe ororo, óde iva pabọnga m'abọbh bọnga bẹ́, ‘Ata mba ayinẹ yen o?’ 7 mm'atek bẹ bẹ́, wa ebhobh ch'ọraanga kw'Jọrdan ẹkpaar k'ititika s'Ẹkkọhbhọ ch'Echekẹ ch'Ọvaar Ibinọkpaabyi. Ogbe kw'uwa Ẹkkọhbhọ ndo ejek ọraanga kw'Jọrdan, ebhobh ch'ọraanga nwo ẹkpaara. Ata mboma bọ made ejima anang anọng p'Israẹl ttattampe."

8 Minna kw'anọng p'Israẹl asi k'ose kw'Joshua obenẹ bẹ. Matọka ata ijobh kkamfa ny'ẹraangattem ch'Jọrdan k'ose kw'Ọvaar Ibinọkpaabyi kk'Joshua obena, otor k'mfonamma s'Israẹl. Matima ata mbo ajeka, mad-asok z'ibhinga-byi sabẹ. 9 Joshua ottima ata mbo ijobh kkamfa p'uwa aning ny'ẹraangattem ch'Jọrdan, ny'ibyi s'iwa afọhn-ẹja p'atọhk Ẹkkọhbhọ ch'Echekẹ mabẹ. Ata mbo atim abe za maa, pyirẹ menda.

10 Wa afọhn-ẹja mbo p'atọhk Ẹkkọhbhọ ch'Echekẹ mabe ny'ẹraangattem ch'Jọrdan maa, anọng p'Israẹl asi ọttọhk kpenamkpen f'uwa Ọvaar Ibinọkpaabyi ikk'Joshua obena, mbengana k'ose kw'uwa Mosẹs kk'Joshua ọtọhna. Anọng p'Israẹl maduk-oduka ajeka. 11 Bẹ maphyir majek nya o, Ẹkkọhbhọ ch'Echekẹ ch'Ọvaar Ibinọkpaabyi, ọmaana afọhn-ẹja mbo matima dẹ achina z'ẹbhaakẹ ndoza. Anọng mbo abe nya akkerẹ bẹ. 12 Ajinọng p'Reubẹn, ọmaana p'Gad ọttara igboka janẹ s'efona ch'Manasẹ mado igbong-for, majeka z'okwubha ny'ititika s'anọng p'Israẹl, k'ose kw'uwa Mosẹs kk'bẹ ọtọhna. 13 Wa agbongnọng p'mm'apyirẹ anọng nnọhna arọbh achen, majeka z'okwubha, ny'ititika s'Ọvaar Ibinọkpaabyi bẹ́, mad-arima egbong z'mkpẹmẹ s'Jẹriko.

14 Ny'ewu ndo, Ọvaar Ibinọkpaabyi ọnang Joshua abarada k'ititika s'anọng p'Israẹl maphyir. Tọma ny'ewu ndo, matima opoma atọma Joshua okpukpobha k'akpen pẹ maphyir, mbengana k'ose kw'uwa matim opoma akpobha Mosẹs.

15 Nya o, Ọvaar Ibinọkpaabyi oben Joshua bẹ́, 16 "Ben afọhn-ẹja p'ad-atọhka Ẹkkọhbhọ ch'Echekẹ ch'apaanga bẹ́, màbina ny'ọraanga kw'Jọrdan, mavura k'ogbin."

17 Minna kw'Joshua oben afọhn-ẹja mbo bẹ́, "Màbina ny'ọraanga kw'Jọrdan, màvura ka ogbin."

18 Minna kw'afọhn-ẹja mbo matim Ẹkkọhbhọ ch'Echekẹ ch'Ọvaar Ibinọkpaabyi mabina ny'ọraanga kw'Jọrdan, mavura z'ogbin. Mabubarẹ mmokpatọkọ sabẹ nya ch'ogwo-ogwu z'ogbin, minna kw'asi p'ọraanga kw'Jọrdan makpa nnam. Mabhobh ọttara ẹnwanwa k'ose kw'mad-akkikken abhobh.

19 Ny'ewu ndo ch'ettong ijobh ch'ocheden-phe, anọng mbo mabina z'Jọrdan, mad-abhing z'Gilgal, za ch'ewuchen ed-eyin z'enem ch'Jẹriko. 20 Joshua ottima ata mbo ijobh kkamfa p'matọk z'Jọrdan ny'Gilgal. 21 Oben anọng p'Israẹl bẹ́, "Z'ogbe ororo, óde iva p'iva pabọnga mabọbh ab'otte bẹ́, ‘Ata mboma ayinẹ yen o?’ 22 màtek bẹ bẹ́, ‘Wa anọng p'Israẹl azeng k'izek s'igwo-ogwu majeka ọraanga kw'Jọrdan.’ 23 Wa Ọvaar Ibinọkpaabyi kw'ode Ibinọkpaabyi kwabọnga osi ọraanga kw'Jọrdan ogwu bẹ́ kẹkẹdẹ k'abọnga k'ititika maa, bọnga majeka z'okwubha. Wa Ọvaar Ibinọkpaabyi kw'ode Ibinọkpaabyi kwabọnga osi ọraanga kw'Jọrdan ogwu bẹ́ kẹkẹdẹ k'ose kw'uwa osi Ẹraangakora egwu ny'amina k'ititika maa, mọjeka z'okwubha. 24 Wa osi minna, mfha anọng p'iyagbin maphyir mazonga bẹ́, Ọvaar Ibinọkpaabyi oyen ẹfa, mfha mabir ayena ojora k'Ọvaar Ibinọkpaabyi, kw'ode Ibinọkpaabyi kw'abọnga k'ogbe kpenamkpen."