1 Wa ikpakaana s'anọng p'Israẹl k'ibungọ, ikwu ittonga z'Shilo, ibira ittima ikkira s'etobha za. Wa ẹkọma ndo nening kabẹ k'ẹfa. 2 Okenaka, wa mfonamma ichenọmfa s'Israẹl itim irikẹ za, s'ina okebh fabẹ itim itọka. 3 Nya o, Joshua oben anọng p'Israẹl bẹ́, "Kwuna m'ọtọka bọnga ogbe opyirẹ yen o, pira matọka izek njo s'Ọvaar Ibinọkpaabyi, kw'ode Ibinọkpaabyi kw'ab'atte, ikk'bọnga ọnanga o? 4 Màteka ajinọng attaan-attaan k'ofonamma kpenamkpen. Kaam m'ntọhm bẹ bẹ́, mabaana izek njo, ọfha makkẹr k'ose kw'ide, otor k'okebh f'ofonamma kpenamkpen, pira makwuna akebh-m ka. 5 Màkebh izek njo k'akwumọ achenọmfa. Tte Juda ochina ororo oninga k'ẹbhaakẹ chẹ ch'ẹwọn-ẹwọna. Nnọmma s'Josẹph ibira ido ininga k'ẹbhaakẹ chabẹ ch'ebir-ebir. 6 Ó̱de nkk'ose kw'akwumọ achenọmfa p'izek njo ade akkẹra maphyir, màtọka chen-m ma. Kaam m'mmarẹ ọsẹ nang bọnga k'ititika s'Ọvaar Ibinọkpaabyi, kw'ode Ibinọkpaabyi kwamina. 7 Okenaka, anọng p'Lẹvi m'ibyi kayen mach'bọnga, okurọ bẹ́, ọtọhm f'ẹja ch'Ọvaar Ibinọkpaabyi ofufọhnọ, vọ ode okebh fabẹ. Gad, ọmaana Reubẹn, ọttara igboka janẹ s'efona ch'Manasẹ, nkk'okebh f'abẹ atọka z'ẹbhaakẹ ch'ewuchen ed-eyin z'Jọrdan. Mosẹs kw'ode ọtọhmnọng kw'Ọvaar Ibinọkpaabyi, wọ uwa ọnang bẹ." 8 K'ose kw'ajinọng mbo mabin bẹ́, matọma okebh f'izek njo, Joshua ọtọhn bẹ bẹ́, "Màzọhng baana izek njo, makkẹr ose kw'ide, pira makwuna akebh-m ma. Kaam m'mmarẹ ọsẹ nnang bọnga m'Shilo k'ititika s'Ọvaar Ibinọkpaabyi." 9 Minna kw'ajinọng mbo mabin, mazenga akọbha izek njo. Makkẹr k'ose kw'ide k'ibhon-k'ibhon, k'ikwumọ ichenọmfa make k'ọnwẹrkpa, pira nn'akwun akebha Joshua z'Shilo. 10 Nya o, Joshua ọbharẹ ọsẹ ọnang bẹ z'Shilo, k'ititika s'Ọvaar Ibinọkpaabyi. Wa obira oninga nya okebh izek njo otor k'nkwurọ s'mfonamma sabẹ, ọnang anọng p'Israẹl.

11 Ọsẹ kw'uwa machi eden abharẹ otto k'ofonamma kw'Bẹnjamin, otor k'nnọmma sabẹ. Ibyi s'iwa manangẹ bẹ, ining ny'njeka kw'ofonama kw'Juda ọmaana kw'Josẹph: 12 Z'ẹbhaakẹ ch'ebir-ebir, enem chabẹ ẹtọm z'Jọrdan, ejeka z'isakada s'ebir-ebir kw'Jẹriko, echina z'okwubha kw'ewuchen ed-edimẹ, z'ẹkọma ch'egbe, minna maa, eyin z'ibyi s'anọng nna arukọ, z'Bẹt-Aven. 13 Ebina nya, ejeka z'isakada s'Luz (kw'ode Bẹtẹl), ebira ẹsaka z'Atarọt-Ada, z'egbe ch'ening z'ẹwọn-ẹwọna kw'Izek-izek kw'Bẹt-Horon.

14 Tọma z'egbe ch'ekkerẹ z'Bẹt-Horon z'ẹwọn-ẹwọna, enem ndo ẹbhakẹ ny'ẹwọn-ẹwọna, ezenga ny'ẹbhaakẹ ch'ewuchen ed-edimẹ, eyin z'Kiriat Baal (kw'ode Kiriyat-Jearim), kw'ode obhon wanẹ kw'anọng p'Juda. Ẹbhaakẹ ch'iwa ewuchen ed-edimẹ dọ ma.

15 Ẹbhaakẹ ch'ẹwọn-ẹwọna ẹtọm z'mbọr-mbọr kw'Kiriyat-Jearim, z'ẹbhaakẹ ch'ewuchen ed-edimẹ. Enem ndo ebira ekwu eyin z'ekeka ch'asi p'Nẹphtoa. 16 Ekwu ẹwọna z'mmo s'egbe ndo ch'ekkerẹ z'ilokodo s'Bẹn-Hinnọm, z'ebir-ebir kw'ilokodo s'Rephaim. Minna kw'echin ororo ẹsaka z'ilokodo s'Hinnọm, etor ny'isakada s'ẹbhaakẹ ch'ẹwọn-ẹwọna kw'ebhondim ch'anọng p'Jebu maa, epyirẹ z'Ẹn-Rogel. 17 Ekwu ẹkwọr echina ebir-ebir kw'Shẹmẹsh, echina ororo z'Gẹlilọt kw'okkerẹ ititika z'eden ch'Adumin, maa, ẹsaka z'Ọta kw'Boham, kw'ode nnwa kw'Reubẹn. 18 Etima minna maa, epyirẹ z'isakada s'ebir-ebir kw'Bẹt- Araba, ẹwọna maa, epyirẹ z'Araba. 19 Pira nechin z'isakada s'ebir-ebir kw'Bẹt-Hogla, ekwu eyin k'ebir-ebir kw'ẹka ch'Ọraanga kw'onung, za ch'ọyaakẹ z'ẹwọn-ẹwọna kw'Jọrdan. Wa enem ch'ẹwọn-ẹwọna ede minna.

20 Wa Jọrdan wọ ode enem z'ẹbhaakẹ ch'ewuchen ed-eyin.

Nnem nja jọ iwa ikọhk okebh f'nnọmma s'Bẹnjamin k'ẹbhaakẹ kpenamkpen.

21 Ibhon s'isi efona ch'Bẹnjamin atorọ k'nnọma sabẹ ide; Jẹriko, ọmaana Bẹt-Hogla, ọmaana Ẹmẹk-Kẹziz, ọmaana

22 Bẹt-Araba, ọmaana Zemaraim, ọmaana Bẹthẹl, ọmaana 23 Avim, ọmaana Para, ọmaana Ophra, ọmaana 24 Kẹphar-Amoni, ọmaana Ophni, ọttara Geba. Kibung-kibungọ, wa ode ibhon siden ijobh kkamfa, ọttara ibhonva sabẹ.

25 Ibhon s'iwa ittar nya ide Gibeọn, ọmaana Rama, ọmaana Bẹrọt, ọmaana 26 Mizpa, ọmaana Kephira, ọmaana Moza, ọmaana 27 Rekem, ọmaana Irpẹl, ọmaana Tarala, ọmaana 28 Zẹla, ọttara Haeleph, kw'ode ebhondim ch'anọng p'Jẹbus (kw'ode Jẹrusalẹm), ọmaana Gibea, ọttara Kiriyat. Kibung-kibungọ, wa ode ibhon siden osowanẹ kw'ichi ọmaana ibhonva sabẹ.

Minna kw'uwa okebh f'efona ch'Bẹnjamin ode, atorọ k'nnọmma sabẹ.