1 Ma wọ uwa ode okebh f'ofonamma kw'Manasẹ kw'ode ochedennwa kw'Josẹph. Makir kw'ode ochedennwa kw'Manasẹ, obir ode otte kwiden kw'anọng p'Gilead, wa manangẹ Gilead, ọmaana Bashan mach'okebh fẹ, okurọ ch'iwa ode okkikkaama. 2 Nya o, okebh mva, wa ode f'anọng mboza maphyir p'ade nnọmma s'Manasẹ, p'ade Abiezer, ọmaana Hẹlẹk, ọmaana Asriyẹl, ọmaana Shẹkẹm, ọmaana Hephe, ọttara Shẹmida. Ayok mba bọ ade ajinọngva mboza p'abin k'ntaak s'Manasẹ kw'Josẹph obhonọ, atorọ k'nnọmma sabẹ.

3 Zelophedad kw'ode nnwa kw'Hepher, kw'ode nnwa kw'Gilead, kw'ode nnwa kw'Makir kw'Manasẹ obhonọ, wa ajinọngva kobhonọ, kw'ọkpanẹ panọngva bẹ-bẹ, p'akpen Mahlah, ọmaana Noa, ọmaana Hogla, ọmaana Milka ọttara Tirza. 4 Mabina, mad-akebha Eleazer kw'ode ọfọhn-ẹja, ọmaana Joshua kw'ode nnwa kw'Nun, ọttara asonọng, maben bẹ bẹ́, "Ọvaar Ibinọkpaabyi obenẹ Mosẹs bẹ́, ọnang mina okebh k'ottem kw'ivotte pamina." Minna kw'Joshua ọnang bẹ ọttara ivotte okebh fabẹ, otor k'ọgbaakadik kw'Ọvaar Ibinọkpaabyi. 5 Wa okebh f'anọng p'Manasẹ ode azek-kpaama ijobh, agbaarẹ Gilead ọmaana Bashan abharẹ z'okwubha kw'ewuchen ed-eyin z'Jọrdan, 6 okurọ bẹ́, wa aminava ọmaana ajinọngva, matọn ayena okebh ny'efona ch'Manasẹ. Wa izek z'Gilead nikwu iyena iva p'Manasẹ maphyir.

7 Wa ẹkọma ch'Manasẹ ẹtọm z'Ashẹr maa, epyirẹ z'Mikmẹtat z'ẹbhaakẹ ch'ewuchen ed-eyin z'Shẹkẹm. Enem ndo ẹwọna izek-izek maa, ẹd-ẹbọka z'anọng p'arukọ z'Ẹn-Tapua. 8 (Manasẹ wọ oyen izek s'Tapua, okenaka, chibhẹ ch'Tapua oning k'enem ch'Manasẹ anọng Ephraim bọ uwa ayen.) 9 Minna kw'enem ndo etim maa, epyirẹ z'ẹwọn-ẹwọna kw'ilokodo s'Kana. Wa oyen ibhon s'Ephraim s'ining imaana ibhon s'Manasẹ. Okenaka, wa enem ch'Manasẹ ening ebir-ebir kw'ilokodo, ẹd-ẹkpọka z'ọraanga kwiden kw'Meditereniya. 10 Wa Ephraim oyen ẹwọn-ẹwọna, Manasẹ oyena ebir-ebir kw'izek njo. Ẹkọma ch'Manasẹ etima maa, epyirẹ z'ọraanga kwiden kw'Meditereniya, ẹd-ẹbọka z'ebir-ebir kw'Ashẹr, ọmaana z'ẹbhaakẹ ch'ewuchen ed-eyin z'Isaaka.

11 Ny'ẹkọma ch'Isaaka, ọmaana ch'Ashẹr, wa Manasẹ obir oyena ibhon s'ide Bẹt-Shan, ọmaana Ibleam, ọttara anọng p'Dọr, ọmaana Endọr, ọmaana Taanak, ọmaana Mẹdigo ọttara ibhon s'ikọbh bẹ (ẹkọma ch'ettong ittaan ede Naphọt).

12 Chibhẹ nya, wa anọng p'Manasẹ ny'ibhon njo kakpo aruk, okurọ ch'anọng p'Kenaan macher obo bẹ́, mm'aruk ny'ẹbhaakẹ ndo. 13 Okenaka, k'ogbe kw'anọng p'Israẹl nkk'ẹfa ayena, m'anọng p'Kenaan kibung-kibungọ kakwubhọ. Wa mad-agwa bẹ k'ẹfa bẹ́, masi itọhm.

14 Anọng p'Joshua akwu aben Josẹph bẹ, "Osempira anang mina okebh mavanẹ vẹ-vẹ, abira anang mina ẹkọma madanẹ dẹ-dẹ? Mina mọsaabh-ọsaabh, Ọvaar Ibinọkpaabyi kk'mina obir ọda mawuriji."

15 Joshua ọpọhna bẹ bẹ́, "Ó̱de ode bẹ́, bọnga masaabh-ọsaabh, obira ode bẹ́, ẹkọma ch'Ephraim ch'egbe, ọdọk bọnga kebeng, màchina z'ẹtam ch'ening z'Periz ọmaana Rephayit, mattem ibyi za, maninga."

16 Anọng p'Josẹph apọhna bẹ́, "Ẹbhaakẹ ndo ch'agbeso, mina kebeng. Anọng p'Kenaan maphyir p'arukọ z'mkpẹmẹ, mayen ijaar s'nnyanya id-itọr s'ide mgbaka-mgbaka, ozeng k'anọng p'Bẹt-Shan, ọmaana anọng p'arukọ z'ibhonva, ọttara anọng p'arukọ z'ilokodo s'Jẹzrẹl."

17 Okenaka, Joshua oben nkọma s'Josẹph s'ide Ephraim, ọmaana Manasẹ bẹ́, "Bọnga masaabh-ọsaabh, mabira ayena efa mawuriji. Bọnga mm'ẹkọma madanẹ dẹ-dẹ, mayena. 18 Bọnga mm'abira atọka ẹbhaakẹ ch'ẹtam ch'agbe. Ibyi s'mattem apyirẹ, m'ide sabọnga. Zabẹ anọng p'Kenaan ayen ijaar s'nnyanya id-itọr s'ide mgbaka-mgbaka, mabir ayena ẹfa, bọnga makpokpo akwubh bẹ."