1 Nya o, Joshua oyerẹ mfona s'Israẹl maphyir, ittonga z'Shẹkẹm. Oyerẹ asogbọhkọnọng, ọmaana asonọng, ọmaana akpaar-aponga, ọttara adukwa p'Israẹl. Bẹ maphyir makwu abe k'ititika s'Ibinọkpaabyi.

2 Joshua oben anọng mbo maphyir bẹ́, "Ọvaar Ibinọkpaabyi kw'ode Ibinọkpaabyi kw'Israẹl obenẹ bẹ́, ‘Wa k'ẹtama, ab'ttatta pabọnga, ozeng k'Tera kw'obhonọ Abraham ọmaana Nahọr, marukọ za ch'ikk'Yupharetes akpana, makpobha aka ọdọk-ọdọk. 3 Kaam o, nkwu nrọhbha Abraham kw'ode atte kwabọnga z'izek s'ikk'Yupharetes akpana, ntim-ẹ nzenga ny'Kenaan maphyir, nnang-ẹ iva k'ọsaabh, ọmaana iva p'iva, mbir nnang-ẹ Isaak. 4 Nzenga ny'Isaak, nnang-ẹ Jekọb ọmaana Esau. Ntọka ẹkọma ch'Seir ch'ening z'agbe, nnang Esau. Jekọb kẹ otima echimma chẹ ochina z'Ijip.

5 "Minna kw'ntọhmọ Mosẹs ọmaana Aarọn z'Ijip, ntima ọttọhk f'nsi z'Ijip, nyak ọbọhk ntte itama ivura anọng p'Ijip, pira n'ntim bọnga nyin k'iyaan. 6 K'ogbe kw'ntim anọng pabọnga mbina z'Ijip, mazenga maa, makwu apyirẹ z'ẹraanga-kora, anọng p'Ijip atima ijaar s'nnyanya id-itọr, ọmaana nnyanya*, makwubh bẹ maa, mapyirẹ z'ẹraanga-kora. 7 Mabhom akpẹkẹ Ọvaar Ibinọkpaabyi bẹ́, ọkkaana bẹ. Minna kw'Ibinọkpaabyi oke orungibanga ny'ottem kwabọnga ọmaana anọng p'Ijip, otima asi p'ọraanga ọbhọrọ bẹ, marubhọ maphyir. Bọnga oyenẹ matima achen pabọnga aze ọttọhk f'nsi anọng p'Ijip. Wa bọnga makwu aninga z'ibyi s'owora k'ogbe kw'obhir-obhir.

8 "Nkwu ntima bọnga nchina z'izek s'anọng p'Amọn p'aning z'Jọrdan, z'ẹbhaakẹ ch'ewuchen ed-eyin. Marima bọnga ábẹ̀, ntọka bẹ nke bọnga k'mbọhk. Mfhọ bẹ ny'abọnga k'ititika, pira n'ntte bọnga ọbọhk, matọka izek sabẹ ayena. 9 K'ogbe kw'Balak kw'ode nnwa kw'Zipor kw'ode ọvaarnọng kw'Moab odo ifor bẹ́, orima Israẹl ábẹ̀, ọtọhm bẹ́, mayerẹ Balaam kw'ode nnwa kw'Beor okwu ọnang bọnga ẹmma. 10 Okenaka, Balaam itọhng kìnyong. Oter od-odo bọnga ọttar-ọttara. Ny'eden ndo, nkkaana bọnga k'mbọhk sẹ.

11 "K'ogbe kw'majek Ọraanga kw'Jọrdan makwu apyirẹ Jẹriko, anọng p'Jẹriko arima bọnga ábẹ̀ mach'anọng p'Amọr, ọmaana p'Periz, ọmaana p'Kenaan, ọmaana p'Het, ọmaana p'Girgash, ọmaana p'Hiv ọttara p'Jebus. Wa nkema mgbong njo maphyir, nnang bọnga. 12 Nkwu ntọhm agurubhebhe bẹ́, machi bọnga eden mad-akwubh avaar afa p'Amọr. Akkangkkang ọmaana ayuk ọttara abufhọ pabọnga azang akem egbong ndo anang bọnga. 13 Nkwu ntọka izek s'nna ọtọhm nya asi, nnang bọnga. Mbir ntọka ibhon s'bọnga nna mbọhk sabọnga atim asi, kw'ode ibhon s'marukọ maa, pyirẹ ma. Nnang bọnga iwonọ s'grep ọmaana s'oliv s'nna atubhọ bẹ́, machi.’

14 "Ofona nya, màtte Ọvaar Ibinọkpaabyi ojora bọnga, màbir kpobh-ẹ k'odik ọkkọkka. Màbharẹ aka p'ab'ttatta pabọnga akpobh z'okwubha kw'Ọraanga kw'Yupharetes ọmaana z'Ijip. Màkpobha Ọvaar Ibinọkpaabyi. 15 Okenaka, óde Ibinọkpaabyi okpukpobha ina bọnga ọdaakẹ, màteka ọnọng kw'mm'akpobha menda nwa, zaa ode aka p'ab'ttatta pabọnga makpobh z'okwubha kw'Ọraanga kw'Yupharetes, wanẹma, aka p'anọng p'Amọr p'bọnga marukọ z'izek sabẹ. Ṉ́nòde kaam ọmaana ẹsọhmmọr chaam, mm'okpobha Ọvaar Ibinọkpaabyi."

16 Nya o, anọng mbo apọhna bẹ́, "Tọm-tọm kponga za! M'Ọvaar Ibinọkpaabyi mòbhum, mokpobha aka! 17 Ọvaar Ibinọkpaabyi wọ uwa otim mina ọmaana ab'ttatta pamina obina z'Ijip, ny'izek njo s'iwa moning k'ebira, osi adikdim mbo p'akkonọ ọnọng okkonọ ny'amina k'ititika. Ny'ozenga kwamina kw'mosi maphyir, kẹ wọ okkerẹ mina z'eden, obira ọkaam mina ny'nkọma s'mojek maphyir. 18 Kẹ Ọvaar Ibinọkpaabyi nwo wọ okwubhọ nkọma maphyir ny'ititika samina, maa, ozeng k'anọng p'Amọr p'uwa marukọ ny'izek njo. Mina mm'obira okpobha Ọvaar Ibinọkpaabyi ọdọk, okurọ bẹ́, kẹ wọ ode Ibinọkpaabyi kwamina."

19 Joshua oben anọng mbo bẹ́, "Bọnga m'Ọvaar Ibinọkpaabyi makpo akpobha, okurọ bẹ́, kẹ ode Ibinọkpaabyi kw'Owur-owur, obir ode Ibinọkpaabyi kw'oyen ottemma k'anọng p'akpobh aka. Kẹ bọnga mobina ọnang k'osogaangẹ, ọmaana mpyibha sabọnga. 20 Ó̱de mabhumọ Ọvaar Ibinọkpaabyi, matera akpobha aka p'nkọma ọdọk-ọdọk, zaabẹ wa kẹ kk'ejibha ọsa ọnang bọnga k'ochedengbe, kẹ m'ọkpa nnam ọbọra bọnga, obira osi bọnga itama, pira odimẹ bọnga eche."

21 Wa anọng mbo mapọhna Joshua bẹ́, "Mma! Mina mm'okpobha Ọvaar Ibinọkpaabyi."

22 Joshua oben bẹ bẹ́, "Bọnga mabhakẹ abe anttẹsẹ pabọnga k'ifor bẹ́, bọnga nkk'achera bẹ́, mm'akpobha Ọvaar Ibinọkpaabyi."

Mapọhna bẹ́, "Iye, mina bọ mode anttẹsẹ pamina."

23 Joshua nobenẹ bẹ bẹ́, "Ch'inode minna, màbharẹ aka mbo p'nkọma ọdọk-ọdọk p'aning ny'abọnga k'ottem, matte nttem sabọnga ọbọhk anang Ọvaar Ibinọkpaabyi, kw'ode Ọvaar Ibinọkpaabyi kw'Israẹl."

24 Anọng mbo aben Joshua bẹ́, "Mina mm'okpobha Ọvaar Ibinọkpaabyi kw'ode Ibinọkpaabyi kwamina, mobir ọraka nso, ọnang-ẹ."

25 Ny'ewu ndo, Joshua odim k'echekẹ k'anọng mbo k'eso z'Shẹkẹm, obira ojima bẹ asana ọmaana apaanga p'mm'akpobha. 26 Joshua ọkkẹr idik nja maphyir z'Nnwẹr kw'Asana p'Ibinọkpaabyi. Pira ọtọka ẹtakpa, ottima ny'orin kw'oak, nya ch'ọnyọm ibyi s'Ọvaar Ibinọkpaabyi s'iwur-owur.

27 Oben bẹ maphyir bẹ́, "Màze e, ẹta nda m'ede nttẹsẹ kwamina. Ẹta nda kk'idik maphyir s'Ọvaar Ibinọkpaabyi ọgbaakẹ ọnang mina, ẹbhaanga. Ó̱de nna Ibinọkpaabyi k'ọkkọkka atorọ, ẹta ndo m'ede nttẹsẹ k'itama sabọnga."

28 Nya o, Joshua offurọ bẹ. Ọnọng-ọnọng ọbhana z'izek s'ide okebh fẹ.

29 K'ogbe kw'idik nja maphyir ikk'iyina, Joshua kw'ode nnwa kw'Nun, obira ode ọtọhmnọng kw'Ọvaar Ibinọkpaabyi, okwu ope ch'inode icho arọbh achen okwuma ijobh. 30 Manọhng-ẹ z'izek sẹ z'Timnat-Sera, z'ẹkọma ch'Ephraim ch'egbe, z'ebir-ebir kw'egbe ch'Gaash.

31 Anọng p'Israẹl akpobha Ọvaar Ibinọkpaabyi ny'ogbe nwo maphyir kw'Joshua oruk akpen, ọmaana ny'ogbe kw'asogbọhkọnọng p'ayọhng-ẹ k'icho, p'ade mbo p'aze idik maphyir s'Ọvaar Ibinọkpaabyi ikk'ọsa, ọnang bẹ.

32 Akọbhọ p'Josẹph p'uwa anọng p'Israẹl matim abina z'Ijip, manọhnga bẹ ny'Shẹkẹm, ny'izek s'iwa Josẹph odebhẹ k'mbọhk s'iva p'Hamọr kw'ode otte kw'Shẹkẹm, k'asilva arọbh achen. Izek njo jọ ina ikwu ide okebh f'iva p'iva p'Josẹph.

33 Eleazar kw'ode nnwa kw'Aarọn okwu ope, manọhng-ẹ z'Gibea kw'uwa makebhẹ anang Phinẹhas kw'ode nnwa kwẹ, z'ẹkọma ch'Ephraim ch'ening k'egbe.