1 K'ogbe kw'uwa akpaar-aponga mabaabh Israẹl, wa okwo f'ọgaang-ọgaangẹ oning ny'izek s'Israẹl. Ojinọng wanẹ kw'ofon Bẹtẹlẹhẹm z'ẹbhaakẹ ch'Juda otima kwanọng kwẹ ọttara adikkobhva pẹ afa, mabina mad-aruk z'ẹkọma ch'Moab. 2 Ojinọng nwo okpen Ẹlimẹlẹk, kwanọng kwẹ okpena Naomi. Ajinọngva pẹ afa, oyok wanẹ okpen Malọn, nwoza okpena Kiliyọn. Bẹ maphyir wa made ámmáaná p'Ẹphrat z'Bẹtẹlẹhẹm z'ẹkọma ch'Juda. Mabina achina z'Moab maruk za.

3 Ẹlimẹlẹk, kw'ode odim kw'Naomi, okwu ope, orik Naomi ọmaana ajinọngva pẹ afa. 4 Ajinọngva mbo makwu atọka panọng p'ade ámmáaná p'Moab. Kwanọng wanẹ okpen Ọpa, nwoza okpena Rut. Marukọ nya maa, opyirẹ ọttọhk k'icho ijobh. 5 Malọn ọmaana Kiliyọn mabir ape, ọwọhkọ Naomi, ọdọk odim ọttara iva pẹ koyen.

6 K'ogbe kw'Naomi oning z'Moab, ọbhaanga bẹ́, Ọvaar Ibinọkpaabyi kk'anọng pẹ okwu ọkkaana, ọnang bẹ ọchattọhk, Naomi odo ifor bẹ́, otima anyẹ pẹ obina z'Moab ọkpa nnam z'ikẹ k'obhon. 7 Minna kw'Naomi otim anyẹ pẹ afa mabina, matọma ozenga achina z'ẹkọma ch'Juda.

8 Naomi okwu oben anyẹ mbo pẹ afa bẹ́, "Ọnọng-ọnọng zọhng bhana z'ọsọhm kw'akka. Tte Ọvaar Ibinọkpaabyi osi ọphyaam ọnang bọnga, k'ose kw'bọnga nkk'asa anang kaam ọttara adim pabọnga p'apope. 9 Tte Ọvaar Ibinọkpaabyi ọnang ọnọng-ọnọng ẹwọhngkwoka z'ọsọhm kw'odim ọbhakwẹ."

Minna kw'ozeng ọbaaka bẹ, oben bẹ bẹ́, mayima. Bẹ panọng mbo mabhom amọng k'ẹrọng, 10 maben-ẹ bẹ́, "Mma e, mina mm'otor-ọ mọbhana z'anọng pọ."

11 Okenaka, Naomi oben bẹ bẹ́, "Iva paam, màkpa nnam bhana z'abọnga k'obhon. Bọng-ọttọhk f'mm'azeng ábẹ̀ mator-m? Ma, bọnga machibhẹ bẹ́, yina kw'kaam m'mbir mmaan ajinọngva p'mm'akwu ade adim pabọnga yirẹ? 12 Iva paam, màkpa nnam. Kaam kk'ntama nyọhnga edimba. Zaabẹ́ kaam ntim nsok ichen k'edimba za, nkwu mba odim m'erungọ mmaan ajinọngva, 13 bọnga mm'aninga atik bẹ mabar pira maba ayok o? Bọnga mmin'akpọka ọbada okurọ bẹ o? Mma e, iva paam, kaam kw'opyibh ọnang ọtam ọyọhnga bọnga, okurọ bẹ́, Ọvaar Ibinọkpaabyi kk'nnam ọkpa ọbọr-m."

14 Minna kw'mabir abhom amọng. Ọpa ọbaaka ọkka kw'odim, oben-ẹ bẹ́, yima e. Okenaka, Rut ọgbana bẹ́, kẹ m'otor ọkka kw'odim.

15 Naomi okwu oben Rut bẹ́, "Kirẹ e, oyok-bhọbha kk'nnam ọkpa z'anọng pẹ ọttara z'aka pẹ. Kọ tor-ẹ makpa nnam."

16 Rut ọpọhn-ẹ bẹ́, "Kaam kàbhọkọ bẹ́, nning-ọ ntorọ. Ibyi kpenamkpen s'ata, kaam m'nta. Ibyi kpenamkpen s'ayim, kaam m'nyima. Anọng pọ mm'ade anọng paam. Ibinọkpaabyi kw'akpobh, kẹ kw'kaam m'mbir mkpobha. 17 Ibyi kpenamkpen s'ape ayima, kaam m'mpe nya, mm'abir anọhng-m nya. Tte Ọvaar Ibinọkpaabyi ọnang-m irem k'ose kpenamkpen kw'ọdaak-ẹ, ọttọhk kode f'im'ọbhaangẹ kaam ọttara kọ, ina obo kẹ-kẹ ode."

18 Naomi okwu oze bẹ́, Rut kk'ifor ọda bẹ́, m'otor-ẹ mafona, ọdọk odik kpenamkpen kobenẹ.

19 Panọng mbo afa mazenga maa, makwu apyirẹ z'Bẹtẹlẹhẹm. Mapyirẹ za o, ẹlọ etto z'obhon maphyir okurọ bẹ́, panọng p'aning nya mad-abọbh ayok bẹ́, "Ma, Naomi wọ ma yirẹ?"

20 Kẹ ọpọhna bẹ bẹ́, "M'kaam Naomi kàyerẹ! Màyer-m Mara*, okurọ bẹ́, Ọvaar Ibinọkpaabyi kw'Ẹfa maphyir kk'akpen paam ọsa majobhọ mawuriji. 21 Wa ntim oyena k'ọsaabh mbina nrik obhon, Ọvaar Ibinọkpaabyi otim-m okwuna mbọhk-mbọhk. Osempira mayer-m Naomi, ch'Ọvaar Ibinọkpaabyi kw'Ẹfa maphyir ikk'nnam ọkpa ọbọr-m?"

22 Minna kw'uwa Naomi otim ọnyẹ kwẹ kw'ode Rut kw'ofon Moab, okwuna z'Bẹtẹlẹhẹm. Mapyirẹ za k'ogbe kw'mad-atọma ipha s'ọraasi-kira kw'mayerẹ, barli osisi.Masi ipha