1 Ọvaar Sọlọmọn wọ uwa ọbaabh Israẹl maphyir. 2 Asonọng p'uwa otim ọbaabha made:

Azariya kw'ode nnwa kw'Zadọk, kw'ode ọfọhn-ẹja:

3 Eliorẹph ọmaana Ahija p'ade iva p'Shisha, made akkẹrẹ;

Jehoshaphat kw'ode nnwa kw'Ahilud, ode oye-idik;

4 Bẹnaya kw'ode nnwa kw'Jehoyada, ode oso kw'asoja;

Zadọk ọmaana Abiyata, made afọhn-ẹja;

5 Azariya kw'ode nnwa kw'Natan, okkerẹ anọng p'abaabh nkọma;

Zabud kw'ode nnwa kw'Natan, ode ọfọhn-ẹja, ọmaana ọnọng kw'ọd-ọnang ọvaarnọng ntọhna;

6 Ahishar, ode okkerẹ-itọhm s'odimpa;

Adoniram kw'ode nnwa kw'Abda, okkerẹ itọhm s'mad-agwa anọng k'ẹfa.

7 Kibung-kibungọ, wa Sọlọmọn oyen anọng ijobh kkamfa p'abaabh nkọma s'Israẹl maphyir. Bẹ bọ uwa mad-aror ọchattọhk achena ọvaarnọng ọttara ẹsọhmmọr chẹ. K'icho kibungọ, wa ọnọng-ọnọng od-oror ọchattọhk f'ophe mawanẹ ochena ọvaarnọng. 8 Wa ache p'avaarnọng mbo ade

Bẹn-Hur, kw'ọbaabh ẹkọma ch'Ephraim kw'ode obhon kw'ọnan k'egbe.

9 Bẹn-Dẹkẹr, kw'ọbaabh Makaz, ọmaana Shalbim, ọmaana Bẹt-Shẹmẹsh, ọttara Ẹlọn-Bẹtanan;

10 Bẹn-Hẹsẹd, ọbaabha Arubot. (Kẹ wọ uwa obira ọbaabha Soko ọmaana Hẹphẹr kibungọ);

11 Bẹn-Abinadab, ọbaabh Naphot-Dọr. (Kẹ wọ uwa ọtọk Taphat kw'ode ominanwa kw'Sọlọmọn k'ọbada);

12 Baana kw'ode nnwa kw'Ahilud, ọbaabh Taanak, ọmaana Megido, ọmaana ẹkọma ch'Bẹt-Shan maphyir ch'ening ẹnyọma Zarẹtan, z'ẹwọn-ẹwọna kw'Jẹzrẹl. Ọbaabha tọma ny'Bẹt-Shan maa, pyirẹ Abẹl-Mẹhola, maa, jeka z'Jokmeam;

13 Bẹn-Gẹbẹr, ọbaabha Ramọt-Gilead. (Wa obira ọbaabha abhonva ny'Gilead p'Jair kw'ode nnwa kw'Manasẹ ọbaabh, ọmaana nkọma s'Argọb s'ining z'Bashan, ọttara ibhondim arọbh attaan s'matim bronz asi mbhumma sabẹ;

14 Ahinadab kw'ode nnwa kw'Ido, ọbaabha Mahanayim;

15 Ahimaz, ọbaabha Naphtali. (Kẹ wọ uwa ọtọk Basemat kw'ode ominanwa kw'Sọlọmọn k'ọba);

16 Baana kw'ode nnwa kw'Hushayi, ọbaabha Ashẹr ọmaana Alọt;

17 Jehoshaphat kw'ode nnwa kw'Parua, ọbaabha Isaka;

18 Shimeyi kw'ode nnwa kw'Ẹla, ọbaabha Bẹnjamin;

19 Gẹbẹr kw'ode nnwa kw'Uri, ọbaabha Gilead. (Wa ọvaar Sihọn kw'Amọr ọmaana ọvaar Ọg kw'Bashan nkk'ẹkọma nda achi eden abaabha). Kẹ-kẹ wọ uwa ode ọbaabh kw'ẹkọma ndo maphyir.

20 Wa anọng p'Juda ọmaana p'Israẹl masaabhẹ mach'ofong kw'ẹraangaka. Mad-achi, magwo mabira aninga k'ottemlebh. 21 Wa Sọlọmọn ọbaabh nkọma maphyir, s'itọm z'ọraanga kw'Yupharetes maa, ipyirẹ z'izek s'Philistiya. Ẹbaabha ndo etima minna maa, epyirẹ z'enem ch'Ijip. K'akpen p'Sọlọmọn maphyir, wa nkọma nja ining izek-izek kwẹ, ibira id-inang-ẹ ntuma.

22 Ọchattọhk f'uwa Sọlọmọn ororọ k'ewu-k'ewu, ode abushẹl p'agwubuma arọbh achenọmfa okwuma ijobh, ọmaana abushẹl p'ẹchakpo ọdọk-ọdọk arọbh ichi, 23 ọmaana abhaam ijobh p'manangẹ ọchattọhk z'ọbhaamsọhm, ọmaana abhaam ẹrọbh p'ad-azenga achi azizaarẹ, ọmaana arọkimaan arọbh achen, ọmaana avu, ọmaana achimẹ, ọmaana ayibh, ọttara ọnọhn f'ọbar-ọbar. 24 Wa ọbaabh nkọma njo maphyir s'ining z'ọraanga kw'Yupharetes, z'ẹbhaakẹ ch'ewuchen ed-edimẹ, tọma z'Tiphsa, pyirẹ z'Gaza. Wa orukọ k'ẹmẹm ọmaana obhon kpenamkpen kw'mayen ayok enem. 25 K'ogbe kw'Sọlọmọn oruk akpen, Israẹl ọmaana Juda maning k'ẹmẹm, tọma z'Dan maa, pyirẹ z'Beershẹba, ọnọng-ọnọng oyen agrepchi ọmaana afigchi pẹ.

26 Wa Sọlọmọn oyen obyi nnọhna ijobh f'mad-asok ijaar s'nnyanya id-itọr, obira oyena nnyanya nnọhna ẹrọbh okwuma ijobh.

27 K'ophe kpenamkpen, abaabh p'nkọma njo, óphe kw'ọnọng-ọnọng opyirẹ, mad-atọka ẹchakpo z'ẹkọma ch'mabaabh, machena ọvaar Sọlọmọn k'ose kw'im'obenga anọng p'ad-achi ọttọhk amaan-ẹ. Wa mobhokọ kw'owora kasokọ. 28 Minna kw'mabira atima abarli ọmaana azizaarẹ-bukọ p'nnyanya s'id-itọr ijaar, ọmaana nnyanya njoza, k'ose kw'ọtabha kw'ọnọng-ọnọng ode. Matọka ekpo mbyo asok k'ibyi s'ibaan-ọbaana.

29 Ibinọkpaabyi ọnang Sọlọmọn ezonga, ọmaana ọyaanttaana ọttara edikzonga chiden ch'ede mach'ofong kw'ẹraangaka kw'ina obhika ede. 30 Wa ezonga ch'Sọlọmọn ẹyọhng ch'ọnọng kpenamkpen kw'ofon z'ẹbhaakẹ ch'ewuchen ed-eyin, ebira ẹyọhnga ch'anọng p'Ijip maphyir. 31 Wa ọyọhng anọng maphyir k'ezonga. Oyena ezonga ọyọhnga Ẹtan kw'ofon Ẹzra. Obira oyena ezonga ọyọhnga ajinọngva p'Mahọl p'ade Heman, ọmaana Kalkol, ọttara Darda. Eche chẹ ẹnyaamẹ ny'nkọma maphyir s'manyọm ayok. 32 Wa ọgbaakẹ nzẹmẹ nnọhna ichenọmfa okwuma arọbh ijobh. Obira ọkkọhn amọng nnọhna mfa okwuma arọbh ijobh okwuma achen. 33 Ọgbaak idik s'imaan ekpo py'emen-omen, tọma k'ochi kw'sida ch'emenẹ z'Lebanọn, tto z'hisop kw'omenẹ k'ntumọ, ọmaana idik s'imaan k'mgbaten, ọmaana ọnọhn, ọmaana ọjọhk, ọmaana nten s'itim mkpabhọr izenga, ọttara nten s'asi. 34 Wa avaar p'nkọma s'iyagbin maphyir p'abhaang ezonga ch'Sọlọmọn, mad-atọhm anọng za bẹ́, mad-ayonga itọhng k'ezonga chẹ.