1 K'ogbe wanẹ, wa odik oyinẹ kw'ọmaan owonọ kw'grep kw'Nabọt kw'ofon Jẹzẹrẹl. Owonọ nwo, wa oning z'Jẹzẹrẹl, ọnyọma odimpa kw'Ahab kw'ode ọvaarnọng kw'Samariya. 2 Otum k'ogbe wanẹ, Ahab oben Nabọt bẹ́, "Nang-m owonọ kwọ kw'grep ntima nsi ewonọva ma ch'ọnyọm odimpa kwaam. Kaam ọttara kọ mm'osi mmona s'owonọ kw'grep. Kaam m'nnang-ọ owonọ kw'ojibhẹ ọyọhnga nwoma. Ó̱de nwo nya ini kọ ọdaakẹ, kaam m'nnang-ọ akpuka kpenamkpen p'owonọ nwo ope."

3 Nabọt ọpọhna Ahab bẹ́, "Ọvaar Ibinọkpaabyi mòchera bẹ́, ntọka ebo-cha ch'ab'ttatta paam, nnang-ọ."

4 Minna kw'Ahab otim ididọkọ ọmaana ottempyibha ofona z'ọsọhm, okurọ ch'Nabọt kw'ofon Jẹzẹrẹl obenẹ bẹ́, "Kọ ebo-cha ch'ab'ttatta paam mìnnang." Otima ididọkọ oyima z'ikẹ k'ebin, obhum ọttọhk ochichi.

5 Jẹzẹbẹl kw'ode kwanọng kwẹ, okwu okebh-ẹ nya, ọbọbh-ẹ bẹ́, "Ode yen kw'ọdọkọ minna? Ode yen kw'ina ọttọhk acher achi?" 6 Ahab ọpọhn-ẹ bẹ́, "Ofon ch'mbenẹ Nabọt kw'ofon Jẹzẹrẹl bẹ́, ‘Kpe-m owonọ kwọ kw'grep. Ó̱de ini kọ minna ọdaakẹ, tte mosi mmona s'owonọ kw'grep ọdọk-ọdọk.’ Nabọt oben-m bẹ́, ‘Kaam kọ owonọ kwaam kw'grep mìnnang.’ "

7 Jẹzẹbẹl kw'ode kwanọng kwẹ, oben-ẹ bẹ́, "Minna wọ kw'ọvaarnọng kw'Israẹl ọbaan bẹ́, osi o? Bin-obina chi ọttọhk, ayan-ọyan z'ititika. Kaam m'ntọka owonọ nwo kw'grep kw'Nabọt kw'ofon Jẹzẹrẹl nnang-ọ."

8 Minna kw'otim eche ch'Ahab, ọkkẹr nkkaabha, ottima ẹnọhna ch'Ahab ny'nkkaabha njo, ọtọhm ọnang asogbọhkọnọng ọmaana asonọng p'Nabọt matọn aruk ny'ebhondim ndo madanẹ. 9 Ny'nkkaabha njo, kwanọng nwo ọkkẹrẹ bẹ́, "Màyerẹ ọkwa, màtim ọchattọhk. Màtọka Nabọt sok k'ibyi s'ọnọng kpenamkpen m'ọzẹ-ẹ. 10 Màtọka affutẹtẹ-nọng banẹ sok. Tte maninga akkerẹ Nabọt ititika, mabọhm-ẹ odik bẹ́, ọtwọ Ibinọkpaabyi ọmaana ọvaarnọng. Pira nnatim-ẹ ayin z'iyaan, matọbh-ẹ ata maa, ope."

11 Nya o, asogbọhkọnọng, ọmaana asonọng mbo p'Nabọt matọn aruk ny'ebhondim ndo madanẹ, masi k'ose kw'Jẹzẹbẹl ikk'ọkkẹra ọtọhn bẹ bẹ́, masi. 12 Minna kw'mayerẹ ọkwa, matim ọchattọhk, matọka Nabọt asok k'ibyi s'ọnọng kpenamkpen m'ọzẹ-ẹ. 13 Minna kw'affutẹtẹ-nọng afa mayinẹ ka, maninga akkerẹ Nabọt ititika, matọma Nabọt idik obubọhma ny'anọng k'ititika, maben bẹ́, "Nabọt kk'Ibinọkpaabyi ọmaana ọvaarnọng ọtwa e!" Nya o, matọk-ẹ atima abina arik ebhondim, matọhbh-ẹ ata maa, ope. 14 Nya o, matọhm ẹkkaabha anang Jẹzẹbẹl bẹ́, "Nkk'Nabọt ata ọtọhbha maa, ope."

15 K'ose kw'Jẹzẹbẹl obhubhaanga nya bẹ́, nkk'ata atima afhọ Nabọt, oben odim bẹ́, "Bina, zọhng tọka owonọ nwo kw'grep kw'Nabọt kw'ofon Jẹzẹrẹl, ayena, owonọ nwo kw'obhumọ bẹ́, ọkpọ-ọ. Nabọt ọdọk k'akpen kode, kk'ọpa e." 16 K'ogbe kw'Ahab ọbhaang bẹ́, Nabọt kk'ọpa, obina, ofona bẹ́, ọd-ọtọka owonọ nwo kw'grep kw'Nabọt oyena.

17 Nya kw'ẹkkaabha ch'Ọvaar Ibinọkpaabyi ekwu ekebha Ẹlaija kw'ofon Tishbe bẹ́, 18 "Bina, zọhng kebha Ahab kw'ode ọvaarnọng kw'Israẹl, kw'ọbaabh Samariya. Madidanma, oning z'owonọ kw'grep kw'Nabọt. Kk'ochina za bẹ́, ọd-ọtọka oyena. 19 Ó̱de apyirẹ za, tek-ẹ bẹ́, ‘Ọvaar Ibinọkpaabyi obenẹ bẹ́, mba kk'ọnọng afha anẹ-ẹ oyena kwẹ o?’ China ororo ben-ẹ bẹ́, ‘Ọvaar Ibinọkpaabyi obenẹ bẹ́, ny'ibyi njo s'mffa igbẹnẹ izẹ s'Nabọt, nya wọ kw'mffa im'ibir igbẹnẹ izẹ sọ. Iye, izẹ sọ oyenẹ e.’ "

20 Nya o, Ahab oben Ẹlaija bẹ́, "Kọ ọwawunanọng kwaam, mba kk'aam arora maa, kk'aam aza!" Ẹlaija ọpọhna bẹ́, "Iye, kk'ọ nza, okurọ bẹ́, atte ifor sọ ọbọhk anang epyibha k'ititika s'Ọvaar Ibinọkpaabyi. 21 Ọvaar Ibinọkpaabyi obenẹ bẹ́, ‘Kaam m'ntte itama siden ikpẹk-ọ. Kaam m'ndimẹ ẹnọmma chọ maphyir. Ozeng ny'Israẹl, ojinọngnwa kpenamkpen kw'ode okpongannam ny'ntaak s'Ahab, zaa ode ọmmaana, obir ode obira, m'ndim-ẹ eche. 22 Kaam m'nsi ẹsọhmmọr chọ ede mach'ndo ch'Jẹroboam kw'ode nnwa kw'Nẹbat, mbir nsi chẹ ede mach'ndo ch'Baasha kw'ode nnwa kw'Ahija, okurọ bẹ́, kọ kk'ottempyibha kwaam agboka, ch'awọhkọ anọng p'Israẹl masi epyibha.’

23 "Ṉ́nòde odik kw'ọmaan Jẹzẹbẹl, Ọvaar Ibinọkpaabyi obenẹ bẹ́, ‘Ny'etumọ ch'Jẹzẹrẹl, nya wọ kw'mffa im'ichi Jẹzẹbẹl.’

24 "Mffa m'ichi ọnọng kpenamkpen kw'Ahab kw'ope z'ebhondim. Ayok p'ape z'ẹgba, attẹrẹ m'asorọ bẹ."

25 (Wa ọnọng kode kw'osi epyibha obenga Ahab ábẹ̀, k'ititika s'Ibinọkpaabyi. Kẹ wa otte ifor sẹ ọbọhk ọnang epyibha. Jẹzẹbẹl kw'ode kwanọng kwẹ wọ uwa ọd-ọchọhm-ẹ. 26 Wa ọd-ọyak ọbọhk osi ibyibyadik, od-okpobha aka mach'anọng p'Amọr p'Ọvaar Ibinọkpaabyi okwubhọ pira ọtọka izek njo ọnang Israẹl.)

27 K'ogbe kw'Ahab ọbhaang idik nja, ọyaakẹ ekpo py'ọfọr maphyir, ọtọka abara-bina ọfọra, otim ọchattọhk. Od-oyima ọmaana abara-bina mbo, od-ozenga mach'ọnọng kw'okom ifor kidaam.

28 Nya o, Ọvaar Ibinọkpaabyi ọtọhm ẹkkaabha ọnang Ẹlaija kw'ofon Tishbe, oben-ẹ bẹ́, 29 "Kk'Ahab otum aka k'ose kw'ikk'ifor sẹ ọsaka m'kaam k'ititika? Efor-saka ndo ch'm'nzenga ábẹ̀, mkpa nnam mbọra itama njo s'nkamẹ m'ogbe kw'ikẹ oning akpen. Kwuna min'nsi itama njo nnang ẹsọhmmọr chẹ, k'ogbe kw'nnwa kwẹ m'ọbaabha."