1 Wa Sọlọmọn ọtọm Ọsọhm kw'Ọvaar Ibinọkpaabyi osisi k'ophe kw'Ziv, kw'ode ophe kw'ottong afa kw'icho nna s'ọbaabh Israẹl. Wa node icho ẹnọhna okwuma arọbh anna kw'anọng p'Israẹl mabin arik Ijip.

2 Ọsọhm nwo kw'uwa ọvaar Sọlọmọn osi ọnang Ọvaar Ibinọkpaabyi, wa ode ntọkọ arọbh anna okwuma ijobh k'adum, ẹkpa chẹ ede ntọkọ ẹrọbh okwuma ijobh, agoriji pẹ ade ntọkọ arọbh afa okwuma nchen. 3 Adum p'ẹsọhmva ch'iyaan ade ntọkọ ẹrọbh okwuma ijobh, kw'ode mbengana mach'ẹkpa ch'Ọsọhm kw'Ibinọkpaabyi. Bina ny'ẹsọhmva ndo pyirẹ ny'ititika s'Ọsọhm kw'Ibinọkpaabyi, ode ntọkọ ichi. 4 Osi amma p'ofum z'ẹrọng-ẹrọng kw'ntumọ s'Ọsọhm kw'Ibinọkpaabyi mabhọk-ọbhọkọ. 5 Oke etumọ ọkọbha ọsọhm kw'Ibinọkpaabyi ọmaana ibyi s'awuriji, pira nọjọhkọ adongọva ọbọka ny'etumọ ch'ọsọhm nwo. 6 Ọgbaarẹ kw'izek-izek ode ntọkọ nchenọmfa ọmaana ibhaaka, ọgbaarẹ kw'njeka ode ntọkọ osowanẹ, ọgbaarẹ kw'ebir-ebir ode ntọkọ ijobh ọmaana ibhaaka. Osi otergba obubha ny'ntumọ njo maphyir, mfha ọnọng oning z'iyaan oning ọnọhma ọttọhk maa, oyin z'etumọ ch'Ọsọhm kw'Ibinọkpaabyi.

7 Ny'ogbe nwo kw'mad-asi Ọsọhm kw'Ibinọkpaabyi, wa matim ata p'nkk'aphaaka z'ibyi s'ata. Wa ọnọng ẹmọng ch'ọttọhk f'mamin-omin kọbhaang, ch'ọttọhk f'madọng-ọdọngọ kọbir ọbhaanga, ozeng k'ẹmọng ch'ọtọhm-ttọhk ọdọk-ọdọk, ọnọng kọbhaang.

8 Wa ọmma kw'ọgbaarẹ kw'izek-izek oning z'ẹwọn-ẹwọna kw'Ọsọhm nwo. Abhuka pẹ atima minna maa, mayaakẹ z'ọgbaarẹ kw'ottem, mabira atima minna maa, mayaakẹ z'ọgbaarẹ kw'oning z'ebir-ebir. 9 Minna kw'Sọlọmọn osi Ọsọhm nwo kw'Ibinọkpaabyi maa, ọsa. Otima agbaakakpa ọmaana agbaaka p'sida obubha wẹ. 10 Ọkkọma odongọ ny'ntumọ njo maphyir s'Ọsọhm kw'Ibinọkpaabyi ọtọhnga ny'agbaaka mbo p'ochi kw'sida. Agoriji p'idongọ kpenamkpen nya ide ntọkọ nchenọmfa ọmaana ibhaaka.

11 Nya o, Ọvaar Ibinọkpaabyi oben Sọlọmọn bẹ́: 12 "Ó̱dik ókurọ Ọsọhm nwa kw'ad-asi ma, óde atorọ asana ọmaana apaanga paam, abira araka eso anang-m, kaam m'nzenga ny'ikọ, nsi f'uwa nchekẹ nnang Devid kw'ode atte kwọ. 13 Kaam m'nruk ny'ottem kw'anọng p'Israẹl. Kaam anọng paam p'ade Israẹl mìmbhum."

14 Minna kw'Sọlọmọn osi Ọsọhm nwo kw'Ibinọkpaabyi, ochera. 15 Otima agbaakakpa p'ochi kw'sida ọbhọrọ ẹtaang-ẹtaanga kw'Ọsọhm nwo, tọma z'ọgbaarẹ pyirẹ z'mgbodo. Pira notim agbaakakpa p'ochi kw'junipa, ọbhọrọ ọgbaarẹ maphyir. 16 Otima agbaakakpa p'ochi kw'sida okebh idongọ ọdọk-ọdọk ide ntọkọ ẹrọbh okwuma ijobh z'nnam-nnam kw'Ọsọhm nwo ẹtaanga, s'ide Ibyi s'Awuriji p'Ayọhng-ọyọhnga. 17 Adum p'ẹgbaarẹkpattem ch'ening ny'ititika s'idongọ njo s'Awuriji p'Ayọhng, made ntọkọ arọbh attaan. 18 Z'ẹtaanga kw'Ọsọhm nwo kw'Ibinọkpaabyi, wa otim agbaakakpa p'ochi kw'sida osi ntumọ sẹ. Madoka adimava ọmaana agbok nya maphyir. Ọttọhk kpenamkpen f'matim nya ode ochi kw'sida, ẹta ny'ọsọhm nwo maze.

19 Osi ibyi z'ẹtaanga kw'ibyi s'Awuriji ny'Ọsọhm kw'Ibinọkpaabyi bẹ́, ọnana Ẹkkọhbhọ ch'Echekẹ ch'Ibinọkpaabyi. 20 Adum, ọmaana ẹkpa, ọttara agoriji p'ibyi njo s'Awuriji, made ntọkọ ẹrọbh okwuma ijobh. Otima gol ọbhọrọ z'ẹtaanga maphyir. Obira otima gol ọbhọrọ ija-byi s'matim agbaaka p'ochi kw'sida asi. 21 Sọlọmọn otima gol ọkkọkka ọbhọrọ ẹtaanga kw'Ọsọhm nwo kw'Ibinọkpaabyi, obira ọgbana mgbakkọhbhọ k'ẹkaan f'ode gol ny'ititika s'ibyi s'Awuriji s'matim gol abhọrọ. 22 Minna kw'otim gol ọbhọrọ ẹtaang-ẹtaanga kw'Ọsọhm nwo maphyir. Obira otima gol ọbhọrọ ija-byi s'ining z'ẹtaanga kw'ibyi s'Awuriji.

23 Z'ẹtaang-ẹtaanga kw'ibyi s'Awuriji, otim ochi kw'oliv ọgwa chẹrubim afa. Agoriji p'chẹrub kpenamkpen ade ntọkọ ichi. 24 Ebubaang madanẹ ch'chẹrubim kw'ochi eden ede ntọkọ nchenọmfa ọmaana ibhaaka k'adum, ndoza ebir ede ntọkọ nchenọmfa ọmaana ibhaaka. Tọma k'ebubaangso danẹ, pyirẹ z'ebubaangso ndoza, ede ntọkọ ichi. 25 Mbubaang s'chẹrub ttong afa ibira ide ntọkọ ichi. Chẹrubim mbo afa wa mabeng ifor, mabir aker ayok. 26 Agoriji p'chẹrub kpenamkpen made ntọkọ ichi. 27 Ọtọka chẹrubim mbo osok z'ẹtaang-ẹtaanga kw'idongọ kw'Ọsọhm kw'Ibinọkpaabyi. Ebubaang ch'chẹrub wanẹ ẹmmaama etwu etumọ danẹ, ch'chẹrub nwoza ebir ẹmmaama etwu etumọ ndoza. Mbubaang njo sabẹ ikwu twu ayok ny'njeka kw'idongọ njo. 28 Otima gol ọbhọrọ chẹrubim mbo.

29 Ny'ntumọ s'Ọsọhm kw'Ibinọkpaabyi maphyir, ọmaana s'odongọ, ọgwa chẹrubim, ọmaana ajigba, ọmaana agbok p'nkk'ammaama, otima odoka jẹ z'ẹtaanga ọmaana z'iyaan. 30 Obira otima gol oke agbaarẹ z'odongọ f'ẹtaang-ẹtaanga ọmaana f'iyaan-iyaan f'Ọsọhm kw'Ibinọkpaabyi.

31 Ny'ẹsọhmma ch'echin z'ẹtaanga kw'ibyi s'Awuriji, otima ochi kw'oliv osi ammakwukpa achen. 32 Ny'amma mbo afa p'otim ochi kw'oliv osi, ọgwa chẹrubim, ọmaana ajigba, ọmaana agbok, otima gol kw'maduk-oduk odoka chẹrubim ọmaana ajigba mbo. 33 Ny'eden ndo madan-danẹ, otima ochi kw'oliv osi mmakwukchi s'adum, ọmaana ẹkpa chabẹ ede mbengana ny'ẹgbaarẹkpattem ch'Ọsọhm kw'Ibinọkpaabyi. 34 Obira otima ochi kw'junipa osi amma afa p'ayen ammakwukpa afa afa. 35 Ny'amma mbo, ọgwa chẹrubim, ọmaana ajigba, ọmaana agbok p'nkk'ammaama, pira notim gol kw'maduk-oduk ọbhọrọ pyẹ ose mawanẹ k'ose kw'ikk'pyẹ ọgwa.

36 Otima ata p'madok-odoka oyika akaana attaan p'ntumọ s'eterttem. Otima ochi kw'sida osi ibyi s'ammakwukchi anan.

37 Wa maphaakẹ izek s'Ọsọhm kw'Ọvaar Ibinọkpaabyi k'ophe kw'Ziv, k'icho ttong nna s'Sọlọmọn ọbaabh Israẹl. 38 Ny'icho ttong ijobh kkawanẹ kw'ẹbaabha ch'Sọlọmọn, k'ophe kw'Bul, kw'ode ophe ttong ochenọnttaan, nya kw'uwa Sọlọmọn ocher Ọsọhm kw'Ibinọkpaabyi k'ose kw'matọhn-ẹ. Kibung-kibungọ, wa otim icho ichenọmfa osi Ọsọhm kw'Ibinọkpaabyi.