1 Ny’ogbe nwo, Bẹn-Hadad kw’ode ọvaarnọng kw’Aram* oyerẹ asoja pẹ maphyir mattonga. Avaar minna ẹrọbh okwuma ijobh kkamfa, mator-ẹ, ọmaana nnyanya, ọttara ijaar s’nnyanya id-itọr. Otima ayok ofona, mad-ayima egbong z’Samariya, marim-ẹ ábẹ̀. 2 Minna kw’ọtọhmọ azeng-eden pẹ z’Ahab kw’ode ọvaarnọng kw’Israẹl bẹ́, matek-ẹ bẹ́, "Bẹn-Hadad obenẹ bẹ́, 3 ‘Silva ọmaana gol pọ, made paam, panọng pọ p’ajibhẹ ọtam, ọmaana iva pọ, made paam.’ "

4 Ọvaarnọng kw’Israẹl ọpọhn-ẹ bẹ́, "Ode k’ose kw’ttatta ọvaarnọng kwaam obenẹ nya. Kaam ọttara ọttọhk kpenamkpen f’ode faam, ode fọ."

5 Azeng-eden mbo mabir akwu atek Ahab bẹ́, "Bẹn-Hadad obenẹ bẹ́, ‘Ntọhmọ ẹkkaabha nnang-ọ bẹ́, atte silva pọ, ọmaana gol pọ, ọmaana panọng pọ, ọttara iva pọ ọbọhk, anang-m. 6 Ophyinẹ ogbese nwa, m’ntọhm adukwa paam makwu akebh-ọ. Mm’agbọngọ ọsọhm kwọ maphyir, ọmaana isọhm s’atọhmọ pọ. Mm’anọ-ọ ọttọhk kpenamkpen f’asokọ ettem, matima afona.’ "

7 Minna kw’ọvaar Ahab kw’Israẹl oyerẹ ọkwa kw’asogbọhkọnọng maphyir p’izek njo, oben bẹ bẹ́, "Nkk’aza ose kw’ọnọng nwa od-oror ẹkọhr ka! Ọtọhmọ anọng bẹ́, nnang-ẹ panọng paam, ọmaana iva paam, ọmaana silva paam, ọmaana gol paam, nchera mmaan-ẹ.’ "

8 Minna kw’asogbọhkọnọng mbo ọmaana anọng mboza maphyir mapọhn bẹ́, "Kẹ itọhng kàyonga, odik kwẹ kabir achera."

9 Okwu oben azeng-eden mbo p’Bẹn-Hadad bẹ́, "Màd-itek ttatta ọvaarnọng kwaam bẹ́, ‘Idik njo maphyir s’achi eden aben kaam ọtọhmnọng kwọ bẹ́, nsi, m’nsosi. Ṉ́nòde mvoma f’aphyem-m ma, ọttọhkse mvo, mìmkpo nsi.’ " Azeng-eden mbo makpa nnam achena Bẹn-Hadad ẹpọhna ndo.

10 Bẹn-Hadad o, ọtọhm ẹkkaabha ọdọk-ọdọk ochena Ahab, oben-ẹ bẹ́, "Tte aka asi-m k’ose kpenamkpen kw’ọdaakẹ bẹ, óde ína ọttọhk kpenamkpen ny’Samariya nkibhẹ maa, owor eyiyeng ch’im’efu ẹbọhkpattem ch’asoja paam."

11 Ọvaarnọng kw’Israẹl ọpọhna bẹ́, "Màtek-ẹ bẹ́, ‘Ọnọng kw’ọfọr egbongkpo, ẹmma kod-osi mach’ọnọng kw’ọwọr egbongkpo e.’ "

12 Ẹkkaabha ndo epyirẹ Bẹn-Hadad ọmaana avaarnọng mbo k’ogbe kw’mad-agwo atuk z’okkira fabẹ. Ọbhaang nya o, oben anọng pẹ bẹ́, "Màdo ifor s’erima." Minna kw’mado ifor s’mm’ayin erima ny’ebhondim ndo.

13 Ny’ogbe nwo, ọgbaak-ettem ch’Ibinọkpaabyi wanẹ okwu okebha Ahab kw’ode ọvaarnọng kw’Israẹl nya, oben-ẹ bẹ́, "Ọvaar Ibinọkpaabyi obenẹ bẹ́, ‘Kk’esojakaan nda aza? Kaam m’ntọka dẹ, nkọ-ọ ny’mbọhk menda. Nya kw’m’azonga bẹ́, kaam wọ nde Ọvaar Ibinọkpaabyi.’ "

14 Ahab ọbọbh-ẹ bẹ́, "Bọng-ọnọng wọ im’osi erima nda?"

Ọgbaak-ettem ch’Ibinọkpaabyi ọpọhn-ẹ bẹ́, "Odik kw’Ọvaar Ibinọkpaabyi obenẹ ode bẹ́, ‘Asoja mbo p’ikarẹ p’maning izek-izek kw’agbongsonọng, bẹ bọ mm’asi.’ "

Ahab ọbọbh-ẹ bẹ́, "Anyi wọ im’ochi eden ọtọma erima oyenẹ?"

Ọgbaak-ettem ch’Ibinọkpaabyi ọpọhn-ẹ bẹ́, "Kọ wọ im’atọma."

15 Nya o, Ahab otobha asoja mbo p’ikarẹ p’aning izek-izek kw’agbongsonọng maphyir p’ẹbhaakẹ ndo. Wa made asoja anọng arọbh ijobh kawanẹ okwuma ijobh kkamfa. Ocher nya, obir otobha anọng mboza p’Israẹl maphyir p’ade anọng nnọhna ichi kkamfa okwuma arọbh ijobh. 16 Minna kw’mabin ny’ẹya ndo, k’ogbe kw’Bẹn-Hadad ọmaana avaar ẹrọbh okwuma ijobh kkamfa p’mator-ẹ, maning za abum atuk z’okkira fabẹ. 17 Asoja mbo p’ikarẹ p’aning izek-izek kw’agbongsonọng, machi eden ayin k’iyaan.

Ny’ogbe nwo, Bẹn-Hadad kk’anọng banẹ ọtọhma bẹ́, mad-aninga abaana ibyi. Anọng akwu atek-ẹ bẹ́, "Anọng p’afon Samariya azeng k’ọsaabh akwuma ka e!"

18 Bẹn-Hadad oben bẹ́, "Ó̱de makwu ẹmẹm, màbọka bẹ k’mbọhk. Ó̱de makwu egbong, màbọka bẹ k’mbọhk."

19 Asoja mbo p’ikarẹ p’aning izek-izek kw’agbongsonọng, mayin z’iyaan kw’ebhondim ndo, asoja mboza mayakẹ bẹ nnam. 20 Minna kw’ọnọng-ọnọng ọfhọ ọwawunanọng kwẹ. Anọng p’Aram marọbh, anọng p’Israẹl makwubh bẹ. Okenaka, Bẹn-Hadad kw’ode ọvaarnọng kw’Aram ọnana k’ẹnyanya, kẹ ọmaana ayaar-nnyanya banẹ, marọbh anaanga. 21 Ọvaarnọng kw’Israẹl okwubh nnyanya njo, ọmaana ijaar s’nnyanya id-itọr, ọna bẹ mkpang, obir ọfhọ anọng p’Aram k’ọsaabh.

22 Ogbe nwo ọkpanẹ nya o, ọgbaak-ettem ch’Ibinọkpaabyi okwu okebha ọvaarnọng kw’Israẹl oben-ẹ bẹ́, "Ifor ining-ọ imọmọ o. Chibhẹ ọttọhk f’m’asi, kirẹ ẹyọhm ẹbhakẹ ma, ọvaarnọng kw’Aram obir okwuma bẹ́, orim-ọ ábẹ̀."

23 Minna kw’adukwa p’ọvaarnọng kw’Aram maben-ẹ bẹ́, "Aka pabẹ ade aka p’agbe. Kẹ wọ osi pira magaangẹ ayọhnga mina. Okenaka, óde mórim bẹ ábẹ̀ z’ẹkpẹmẹ, mm’ọgaangẹ ọyọhnga bẹ. 24 Ọttọhk f’masi ode bẹ́, m’asaka avaar mbo maphyir k’nninga sabẹ, atima agbongsonọng p’asoja atera nso sabẹ. 25 Ọbaan bẹ́, atobha asoja p’asaabhẹ mach’mbo p’apope, k’ose kw’ẹnyanya m’ekkerẹ ẹnyanya, mfha mokpo orima Israẹl ábẹ̀ z’mkpẹmẹ. Ny’ogbese nwo, nya kw’maze ose kw’mọgaangẹ ọyọhnga bẹ." Bẹn-Hadad okwu oyonga bẹ itọhng, osi k’ose kw’mabenẹ.

26 Ẹyọhm ẹbhakẹ nya o, Bẹn-Hadad otobha asoja p’Aram maphyir, machina z’Aphek bẹ́, mad-arima Israẹl ábẹ̀. 27 Anọng p’Israẹl abir atobha ifor sabẹ, manang bẹ ekpo py’marorọ, mabina ayin erima amaana bẹ. Anọng p’Israẹl ayima egbong k’ọbọhk nwoka mach’akaana biribirẹ afa p’avu, makkerẹ ayok ititika. Anọng p’Aram z’okwubha, mattonga z’ẹkọma ndoza bẹ́ byimm.

28 Minna kw’ọgbaak-ettem ch’Ibinọkpaabyi wanẹ ozeng ọnyọma ọvaarnọng kw’Israẹl, oben-ẹ bẹ́, "Ọvaar Ibinọkpaabyi obenẹ bẹ́, ‘Ch’anọng p’Aram achibhẹ bẹ́, Ọvaar Ibinọkpaabyi ode ọka f’agbe vẹ-vẹ, ọka f’ilokodo kode, kaam m’ntọka esojakaan nda maphyir, nkkọ-ọ k’mbọhk, mfha atima azonga bẹ́, kaam wọ nde Ọvaar Ibinọkpaabyi.’ "

29 Mabhing egbong z’ibhingabyi akkerẹ ayok ititika k’iwu ichenọmfa. Ny’ewu ndo ch’ettong ichenọmfa, egbong ẹtọma. Anọng p’Israẹl afhọ asoja p’Aram anọng nnọhna arọbh ijobh kkamfa okwuma ijobh k’ewu madanẹ. 30 Ayok mboza arọbh achina z’ebhondim ch’Aphẹk. Etumọ etto ẹkpẹkẹ bẹ anọng ẹrọbh okwuma ochenọnttaan. Bẹn-Hadad ọdọk, ọrọbh od-otubha z’ẹtaanga kw’idongọ janẹ ny’ebhondim ndo.

31 Asonọng pẹ aben-ẹ bẹ́, "Nkk’ọbhaanga bẹ́, avaar p’Israẹl azong inọngkwo. Tte mọkpa abara-bina k’erin, mobir ọdabh ndik k’eso, motima okebha avaar p’Israẹl za. Ina akkerẹ, m’okpo-okpo ọttọ-ọ ọbọhk, aruk akpen."

32 Minna kw’mafọr abara-bina k’erin, mabir adabh ndik k’eso, mafona, mad-akebha ọvaarnọng kw’Israẹl za. Maben-ẹ bẹ́, "Bẹn-Hadad kw’ode ọtọhmnọng kwọ, okwukọ bẹ́, ‘Ototo, tte-m ọbọhk nruk akpen.’ "

Ọvaarnọng kw’Israẹl ọpọhna bẹ bẹ́, "Otim oning akpen za? Agbaanakka kwaam wọ."

33 Wa anọng mbo mad-atik bẹ́, maze ẹkọhka ọkkọkka ch’efon z’ọvaarnọng. Minna kw’manẹ-ẹ z’ẹmma bẹ́, "Iye, Bẹn-Hadad agbaanakka kwọ e!"

Ọvaarnọng oben bẹ bẹ́, "Màd-itọk-ẹ tima kwu." Ch’Bẹn-Hadad opyirẹ nya, Ahab otim-ẹ ovura z’ọkpaar kwẹ kw’ẹnyanya ẹd-ẹtọr.

34 Bẹn-Hadad oben Ahab bẹ́, "Ibhondim njo maphyir s’iwa atte kwaam ọna atte kwọ, m’ntte jẹ ọbọhk maphyir, nnang-ọ. Ó̱de ódaak-ọ, kwu ttima mphya sọ z’Damaskus k’ose kw’uwa atte kwaam osi z’Samariya."

Ahab oben-ẹ bẹ́, "Kaam m’nttọ-ọ ọbọhk azong afona okurọ nttọhna nja." Minna kw’Ahab osi echekẹ ọmaan-ẹ, ọttẹ-ẹ ọbọhk ofona.

35 Ọgbaak-ettem ch’Ibinọkpaabyi wanẹ ny’abẹ k’ẹkaan, otima ẹfa ch’ọgbaakadik kw’Ibinọkpaabyi oben oyok-ẹkaan bẹ́, "Mum-m ọttọhk." Okenaka, oyok obhum.

36 Ofona nya o, ọgbaak-ettem ch’Ibinọkpaabyi nwo oben bẹ́, "Ch’abhumọ ọgbaakadik kw’Ọvaar Ibinọkpaabyi okpukpobha, óde ábin arik-m ma, eche m’ẹfhọ-ọ." K’ose kw’obin orik-ẹ nya, ogbe kobhirẹ, eche eyin nya, ẹfhẹ-ẹ.

37 Kẹ ọgbaak ettem ch’Ibinọkpaabyi nwo o, od-oze ọnọng ọdọk-ọdọk, oben-ẹ bẹ́, "Mum-m ọttọhk." Minna kw’ọnọng nwo omum-ẹ ọttọhk bẹ́ gbirr. 38 Nya o, ọgbaak-ettem ch’Ibinọkpaabyi nwo ofona, od-obe z’eden otik ọvaarnọng. Ọfọra ekpo mach’ina kẹ ode. Ọkpa ẹbarakpa chẹ ch’eso ebubh-ẹ achen. 39 K’ose kw’ọvaarnọng ọd-ọkpan nya, ọgbaak-ettem ch’Ibinọkpaabyi nwo ọsẹ-ẹ ẹmọng, oben-ẹ bẹ́, "Kaam ọtọhmnọng kwọ ntim maa, mpyirẹ z’ettem kw’egbong. Nya wọ kw’osojanọng ochen-m ọnọng kw’mabọk k’egbong, oben-m bẹ́, ‘Kkerẹ ọnọng nwa; óde nnor-ẹ oror, m’atima akpen pọ atera akpen pẹ, wanẹma, anang talẹn mawanẹ kw’silva.’ 40 Ch’oning nya ọyak-m, ọnọng nwo ọnaang-m ọrọbh."

Ọvaarnọng kw’Israẹl oben-ẹ bẹ́, "Minna kw’aponga pọ mm’ade e! Kọ kk’aponga pọ azeng mmo akpaara e."

41 Nya o, ọgbaak-ettem ch’Ibinọkpaabyi nwo ọsẹr-ọsẹr, ọwọra ẹbarakpa ndo ch’eso ny’ichen. Ọvaarnọng kw’Israẹl otin-ẹ bẹ́, ọgbaak-ettem ch’Ibinọkpaabyi wanẹ wọ. 42 Ọgbaak-ettem ch’Ibinọkpaabyi nwo oben ọvaarnọng kw’Israẹl bẹ́, "Ọvaar Ibinọkpaabyi obenẹ bẹ́, ‘Ch’atte ọnọng nwo kw’kaam kk’mphyika bẹ́, ope ọrọbh, akpen pọ bọ mm’atera eso ch’akpen pẹ, akpen p’anọng pọ abira atera eso ch’akpen p’anọng pẹ.’ " 43 Minna kw’ọvaarnọng kw’Israẹl, otim ottempyibha, ọmaana ididọkọ ochina z’ikẹ k’odimpa z’Samariya.