1 Wa ọvaar Sọlọmọn oyerẹ asogbọhkọnọng p'Israẹl ny'Jẹrusalẹm, ọmaana aso p'mfonamma maphyir, ọttara avaar p'nnọmma s'Israẹl bẹ́, makwu, mfha matinẹ Ẹkkọhbhọ ch'Echekẹ ch'Ọvaar Ibinọkpaabyi z'Zayọn, kw'ode ebhondim ch'Devid. 2 Ajinọng p'Israẹl maphyir makwu attonga z'ọvaar Sọlọmọn k'ogbe kw'odidaama, k'ophe kw'Ẹtanim, kw'ode ophe kw'ottong achenọmfa k'icho.

3 K'ogbe kw'asogbọhkọnọng p'Israẹl maphyir nkk'attonga, afọhn-ẹja atinẹ Ẹkkọhbhọ ndo ch'Echekẹ. 4 Matima Ẹkkọhbhọ ndo, ọmaana ikkira s'etobha, ọttara ekpo py'awuriji maphyir py'ening ny'ẹtaanga, akwu z'Ọsọhm kw'Ibinọkpaabyi. Afọhn-ẹja ọttara aLẹvi, matinẹ byẹ. 5 Ọvaar Sọlọmọn ọmaana anọng p'Israẹl maphyir p'nkk'attonga nya amaan-ẹ ny'ititika s'Ẹkkọhbhọ ch'Echekẹ, matima arọkimaan k'ọsaabh, ọmaana adamogbodo p'nna obhika ade, mafọhnọ ẹja.

6 Afọhn-ẹja mbo matinẹ Ẹkkọhbhọ ndo ch'Echekẹ ch'Ọvaar Ibinọkpaabyi, mad-anana z'ibyi sẹ, z'ẹtaanga kw'ibyi s'awuriji z'Ọsọhm kw'Ibinọkpaabyi, kw'ode Ibyi s'Awuriji p'Ayọhng. Masok Ẹkkọhbhọ ndo k'izek-izek kw'mbubang s'cherubim. 7 Achẹrubim mbo ammaama mbubang sabẹ abubha ibyi njo maphyir s'Ẹkkọhbhọ ch'Echekẹ ening, ọttara nzemachi s'nd-atima atọhk-ẹ. 8 Wa nzemachi nja idumọ mawuriji. Ọnọng ẹkpọka chabẹ mokpo oze, oye bẹ́, od-obe za ch'Ibyi s'Iwur-owur ining, ny'ititika kw'Ibyi s'Awuriji. Nchi njo itim ining za maa, pyirẹ menda. 9 Wa ọttọhk kpenamkpen ny'Ẹkkọhbhọ ch'Echekẹ kode, kw'ọkpanẹ anwẹrta afa p'uwa Mosẹs oyik ny'ẹtaanga, ch'iwa oning z'egbe ch'Horẹb, ny'ogbe kw'uwa Ọvaar Ibinọkpaabyi osi echekẹ ọmaana anọng p'Israẹl ch'nkk'abina z'Ijip.

10 K'ogbe kw'afọhn-ẹja mayibhẹ ny'Ibyi s'Awuriji, ebonọ ebubha Ọsọhm kw'Ọvaar Ibinọkpaabyi. 11 Ebonọ ndo ẹwọhkọ afọhn-ẹja m'ọdọk ọtọhm fabẹ kakpo asi, okurọ ch'abarada p'Ọvaar Ibinọkpaabyi mafu Ọsọhm kw'Ibinọkpaabyi.

12 Nya o, Sọlọmọn oben bẹ́, "Ọvaar Ibinọkpaabyi kk'obena bẹ́, kẹ m'oruk k'ebonọ ch'epyi-opyi; 13 ofona nya, kaam kk'ọsọhm kw'abarada nsa nnang-ọ k'odik ọkkọkka, kw'ode iruk-byi sọ ttattampe."

14 Nya ch'ikpakaana njo s'anọng p'Israẹl kibungọ itim ibe nya, ọvaar Sọlọmọn ọbhakẹ nnam, osi bẹ ittabọhng. 15 Nya o, oben bẹ́, "Ẹtọhnga ede ch'Ọvaar Ibinọkpaabyi, kw'ode Ibinọkpaabyi kw'Israẹl. Kẹ kk'ọbọhk kwẹ oyenẹ otima osi ọttọhk f'otim ẹmma chẹ ochekẹ ọnang Devid kw'ode atte kwaam, ch'obenẹ bẹ́,

16 ‘Tọma za ch'ntim anọng paam p'Israẹl mbina z'Ijip, ebhondim kpenamkpen ny'mfonamma s'Israẹl ntim nteka bẹ́, esi Ọsọhm kw'Ibinọkpaabyi kw'mm'aninga nya akpobha eche chaam. Okenaka, kaam kk'Devid nteka bẹ́, ọbaabha anọng paam p'Israẹl.’

17 "Wa obin Devid kw'ode atte kwaam z'ettem bẹ́, osi ọsọhm k'eche ch'Ibinọkpaabyi, kw'mmad-aninga akpobha Ọvaar Ibinọkpaabyi, kw'ode Ibinọkpaabyi kw'Israẹl. 18 Okenaka, Ọvaar Ibinọkpaabyi oben Devid kw'ode atte kwaam bẹ́, ‘Kk'asa mawuriji ch'obin-ọ z'ettem bẹ́, asi ọsọhm kw'Eche chaam. 19 Zaa wura ode minna, kọ zang im'asi ọsọhm kw'Ibinọkpaabyi. Nnwa kwọ, kw'ode izẹ sọ oyenẹ wọ im'osi ọsọhm kw'Ibinọkpaabyi, k'eche chaam.’

20 "Ọvaar Ibinọkpaabyi kk'ọsa k'ose kw'ochekẹ. Kaam kk'eso ch'Devid kw'ode atte kwaam, ntera. Ma, n'nnan k'ẹvaarkkọhbhọ ch'Israẹl, k'ose kw'uwa Ọvaar Ibinọkpaabyi ikk'ocheka. Kaam kk'Ọsọhm kw'Ibinọkpaabyi nsa, k'eche ch'ikẹ kw'ode Ọvaar Ibinọkpaabyi kw'Israẹl. 21 Kaam kk'ibyi s'Ẹkkọhbhọ ch'Echekẹ m'eninga nsa nya. Ny'Ẹkkọhbhọ ndo, nya kw'Echekẹ ch'Ọvaar Ibinọkpaabyi ochekẹ ọmaana ab'ttatta pamina eyik, k'ogbe kw'uwa otim bẹ obina z'Ijip."

22 Wa Sọlọmọn obe ny'ititika s'ija-byi s'Ọvaar Ibinọkpaabyi, ny'ititika s'ikpakaana s'anọng p'Israẹl k'ibungọ, ọmmaama mbọhk otena z'ọrọngkpakpa, 23 oben bẹ́, "O Ọvaar Ibinọkpaabyi, Ibinọkpaabyi kw'Israẹl. Ibinọkpaabyi za kode kw'ode mach'ikọ, z'ẹrọng ọttara m'izek! Kọ nwo kw'ad-akpobha echekẹ ch'ọdaakẹ kw'ayen amaana atọhmnọng pọ, p'akpobh-ọ achina ororo ọmaana ettem madanẹ.

24 "Kọ kk'echekẹ chọ akpobha, ch'achekẹ anang Devid kw'ode ọtọhmnọng kwọ, kw'ode atte kwaam. K'ose kw'uwa atim ẹmma chọ achekẹ, k'ọbọhk kwọ abira atima asi, mach'ode ma menda.

25 "O Ọvaar Ibinọkpaabyi, kw'ode Ibinọkpaabyi kw'Israẹl, kpobha nchekẹ sọ s'achekẹ anang ọtọhmnọng kwọ Devid, kw'ode atte kwaam. Wa aben-ẹ bẹ́, ‘Kwuna otera kw'im'ọnana ny'ẹvaarkkọhbhọ ch'Israẹl mowor m'ititika saam, óde iva p'iva pọ mazong bẹ ifor, matima nttem sabẹ azenga amaan-m k'ose kw'ikọ ikk'asa.’ 26 O Ibinọkpaabyi kw'Israẹl, tte odik kwọ kw'achekẹ anang ọtọhmnọng kwọ Devid, kw'ode atte kwaam, ode minna.

27 "Okenaka, ina Ibinọkpaabyi oruk m'izek o? Ozeng k'ọrọngkpakpa kw'ogorọ ọyọhng-ọyọhnga, kọ mokpo obenga. Pira nkwu mben ọsọhm nwa kw'Ibinọkpaabyi kw'ikk'nsa! 28 Zaa ode ch'ode, o Ọvaar Ibinọkpaabyi kw'ode Ibinọkpaabyi kwaam, bhaanga njọm s'ọtọhmnọng kwọ, ọttara nkwukọ sẹ s'ikwosisi. Tte ẹmọng ọttara njọm s'ọtọhmnọng kwọ oze m'ititika sọ menda, ittọ-ọ k'itọhng. 29 Tte achen pọ awonga akkerẹ ọsọhm nwa kwọ, k'erungọ ọttara k'ẹya, m'ibyi nja s'abenẹ bẹ́, ‘Eche chaam m'eninga nya,’ ọfha abhaanga njọm s'ọtọhmnọng kwọ im'od-oninga ma oze. 30 Bhaanga ẹmọng ch'ọtọhmnọng kwọ, ọttara ch'anọng pọ p'Israẹl, k'ogbe kw'maze njọm akkerẹ ibyi nja. Ninga z'ẹrọng kw'ode irukbyi sọ abhaanga. Íkk'abhaanga, bina anang bẹ.

31 "Ó̱de ọ́nọng opinẹ oyok-oter kwẹ, k'odik kw'ọbaan bẹ́, m'ochek-ochekẹ, óde okwu ochekẹ m'ititika s'ija-byi sọ, m'ọsọhm nwa kw'Ibinọkpaabyi, 32 ninga z'ẹrọng bhaanga, abira asi f'ọbaan. Si aponga p'atọhmnọng pọ, tte itama s'oyok kw'opin-opinẹ ikpẹk-ẹ k'ọttọhk f'ikk'ọsa. Ṉ́nòde ọnọng kw'ina odik ososo ọwọr-ọwọr ozong, tte aponga adaam-ẹ ator k'ose kw'mbọhk sẹ iwurọ.

33 "K'ogbe kw'ọwawunanọng kk'anọng pọ p'Israẹl okema okurọ k'mpyibha s'masi, óde makpa nnam akwu akebh-ọ, makpobha eche chọ, maze njọm, mabir abhom akpẹk-ọ m'ọsọhm nwa kwọ, 34 ninga z'ẹrọng bhaanga ẹmọng chabẹ, abira abina anang anọng pọ p'Israẹl k'epyibha chabẹ, atima bẹ akpa nnam z'izek s'iwa anang ab'ttatta pabẹ.

35 "K'ogbe kw'agbakẹ ọrọngkpakpa, abira akpọka ẹrọng bẹ́, ening etebhẹ okurọ mpyibha s'anọng pọ masi, óde máze njọm akkerẹ m'ibyi nja, manang eche chọ ikpukpobha, mabir akpa nnam abọra epyibha chabẹ, okurọ itama s'ikk'bẹ asa, 36 ninga z'ẹrọng bhaanga, abira abina anang epyibha ch'atọhmnọng pọ p'ade anọng p'Israẹl. Kpebhẹ bẹ oruk kw'otor-otor, abira atebh ẹrọng k'izek s'anang anọng pọ, mach'okebh fabẹ.

37 "K'ogbe kw'okwo fiden okwu, wanẹma ebubuka, wanẹma ọkọhmaana f'eborakpo, wanẹma mbonana, wanẹma agurubhebhe, wanẹma afha-afha, wanẹma ode bẹ́, ọwawunanọng wọ ọkọbh ebhondim kpenamkpen chabẹ oke k'ettem, wanẹma, okwurọ-dik kpenamkpen, obira ode bẹ́, ọkọhm-kọhmọ wọ okwu, 38 ode ọnọng wanẹ m'ẹkaan ch'anọng pọ p'Israẹl oze njọm, wanẹma ophyem-ọ ọttọhk k'ọkọhmaana f'ọnọng-ọnọng ozong bẹ́, ọmmẹ-ẹ z'ettem, ọmmaama mbọhk sẹ otena m'ọsọhm nwa kw'Ibinọkpaabyi, 39 ninga z'obhon kwọ z'ẹrọng, abhaanga. Bina nang bẹ, abira asi f'ọbaan. Si nang ọnọng-ọnọng tor k'osisi kwẹ maphyir, ch'ode kọ wọ azong nttem sabẹ (kirẹ kọ-kọ wọ azong nttem s'ayokinọng maphyir), 40 mfha bẹ maruk k'ojora kwọ k'akpen pabẹ maphyir, ny'izek s'anang ab'ttatta pamina.

41 "Ṉ́nòde okikennọng kw'oning m'Israẹl, kw'ozeng eche chọ abẹ́, ofona z'odenbhir okwu, 42 m'ofona ny'ikẹ, anọng abhaanga eche chọ ch'ekpobh-okpobha, ọmaana ẹfa chọ, ọmaana idik siden s'ad-asi. Ó̱de ọ́nọngse nwo okwu oze njọm okkerẹ m'ọsọhm nwa kw'Ibinọkpaabyi, 43 ninga z'obhon kwọ z'ẹrọng kw'ode iruk-byi sọ, abhaanga. Si okpenamkpen f'okikennọng nwo ophyem-ọ, mfha ayagbin maphyir mazonga eche chọ, mabira ayena ojora fọ, k'ose kw'anọng pọ p'Israẹl mayen ojora k'ikọ. Nya kw'mm'azonga bẹ́, ọsọhm nwa kw'kk'nsa otim Eche chọ.

44 "K'ogbe kw'anọng pọ mayinẹ egbong amaana awawunanọng pabẹ k'ibyi kpenamkpen s'atọhmọ bẹ, óde maze njọm anang kọ Ọvaar Ibinọkpaabyi, makkerẹ ititika k'ebhondim ch'ikọ ikk'ateka, ọttara k'Ọsọhm kw'Ibinọkpaabyi kw'kk'nsa k'Eche chọ, 45 ninga z'ẹrọng bhaanga njọm sabẹ, ọmaana ọttọhk f'maphyem-ọ, anang bẹ ẹkkaana.

46 "K'ogbe kw'mapin-ọ, pira ọdọk-ọ ọmaana bẹ, ch'ọnọng ina ode kw'oworọ epyibha, óde atọk bẹ anang ọwawunanọng, ọbọka bẹ k'ẹmmọri otima ozeng z'ẹkọma chẹ oyenẹ ch'ebhirẹ eden, wanẹma ch'effor-offora, 47 ókwu óde bẹ́, maning z'nkọma s'mabọk bẹ k'ẹmmọri, mabhakẹ nttem sabẹ, makwuk-ọ, maben-ọ bẹ́, ‘Mina nkk'epyibha ọsa, mopin-opinẹ, mobira osi itama mawuriji’, 48 óde mátim nttem sabẹ ọmaana agbagba pabẹ maphyir makpa nnam ator-ọ, za ch'awawunanọng pabẹ mabọk bẹ k'ẹmmọri, óde maze njọm akkerẹ m'izek s'iwa anang ab'ttatta pabẹ, m'ebhondim ch'kk'ateka, ọmaana m'ọsọhm kw'kk'nsa k'Eche chọ; 49 ninga z'obhon kwọ z'ẹrọng kw'ode irukbyi sọ, abhaanga njọm ọmaana ọttọhk f'maphyem-ọ, anang bẹ ẹkkaana. 50 Abira abina anang anọng pọ p'nkk'ọ epyibha asa. Bina nang mpinẹ maphyir s'nkk'ọ asa, abira asi anọng p'abọk bẹ k'ẹmmọri maze bẹ okwo, 51 kirẹ bẹ bọ made anọng pọ oyenẹ, mabira ade oyena kwọ, kw'atim abina z'Ijip, kw'arọbh z'ekpon ch'ẹd-ẹyaana mgbaka.

52 Tte achen pọ awonga aze ọttọhk f'kaam ọtọhmnọng kwọ mphyem-ọ, ọmaana f'anọng pọ p'ade Israẹl. Yonga bẹ itọhng k'ogbe kpenamkpen kw'mabhomọ akpẹk-ọ. 53 Kirẹ kọ wọ uwa atim Mosẹs kw'ode ọtọhmnọng kwọ asi ẹyaakẹ bẹ́, bẹ bọ p'atek m'nkọma s'iyagbin maphyir bẹ́, made anọng pọ oyenẹ, ny'ogbe kw'uwa kọ Ọvaar Ibinọkpaabyi kw'ọyọhng, atim ab'ttatta pamina abina z'Ijip."

54 K'ogbe kw'Sọlọmọn kk'njọm nja ọza maphyir, ọmaana idik s'ophyemẹ Ọvaar Ibinọkpaabyi, obina ny'ititika s'ija-byi s'Ọvaar Ibinọkpaabyi, s'iwura ọtọm k'ogbe ottima ndudungọ, ọmmaama mbọhk otena z'ẹrọng. 55 Obe ny'iyokinọng-kpakaana njo s'Israẹl maphyir, osi bẹ ittabọhng, oben k'ẹrọng bẹ́:

56 "Ẹtọhnga ede ch'Ọvaar Ibinọkpaabyi, kw'ọnang anọng p'Israẹl p'ade anọng pẹ ẹwọhngkwoka, k'ose kw'uwa ochekẹ. Odik mawan-wanẹ kode kw'ina osi ny'idik ọkkọkka maphyir s'otim Mosẹs kw'ode ọtọhmnọng kwẹ, ochekẹ. 57 Tte Ọvaar Ibinọkpaabyi, kw'ode Ibinọkpaabyi kwamina, oninga ọmaan mina, k'ose kw'uwa oning ọmaana ab'ttatta pamina. Tte oning mina ọbọhk otte, tte oning mina obir ọzaama. 58 Tte ọbhakẹ nttem samina motor-ẹ, mfha mọsaka nso ọnang-ẹ, mobir okpobha asana pẹ, ọmaana apaanga pẹ, ọttara idik sẹ s'iwa ọnang ab'ttatta pamina. 59 Tte idik nja saam s'kk'ntima nze njọm m'Ọvaar Ibinọkpaabyi k'ititika, ininga Ọvaar Ibinọkpaabyi kw'ode Ibinọkpaabyi kwamina z'ettem, k'ẹya ọmaana k'erungọ. Tte ọkkaana ọtọhmnọng kwẹ ọttara anọng pẹ p'ade Israẹl otor k'idik s'imyẹ bẹ k'ewu k'ewu, 60 mfha ayagbin maphyir mazonga bẹ́, Ọvaar Ibinọkpaabyi wọ ode Ibinọkpaabyi, Ibinọkpaabyi ọdọk-ọdọk za kode. 61 Màtte nttem sabọnga kibung-kibungọ iyika k'Ọvaar Ibinọkpaabyi, kw'ode Ibinọkpaabyi kwamina, mfha maruk ator k'asana pẹ ọmaana apaanga pẹ, k'ose kw'ode m'ogbe nwa."

62 Nya o, ọvaar Sọlọmọn ọmaana anọng p'Israẹl maphyir, mafọhnọ nja anang Ọvaar Ibinọkpaabyi. 63 Sọlọmọn otima adamogbodo nnọhna arọbh afa okwuma ichi, ọmaana arọkimaan ọmaana avu nnọhna arọbh ichi, ọfọhnọ ẹja ch'eforgbaka ọnang Ọvaar Ibinọkpaabyi. Minna kw'ọvaarnọng ọttara anọng p'Israẹl maphyir, matte Ọsọhm nwo ọbọhk anang Ọvaar Ibinọkpaabyi.

64 Ny'ewu ndo madan-danẹ, ọvaarnọng ọtọka ottem kw'eterttem kw'oning ny'ititika s'Ọsọhm kw'Ọvaar Ibinọkpaabyi, ọkọm osok mach'ibyi s'Ibinọkpaabyi. Oninga nya ọfọhnọ nja s'ẹkwọmọ, ọmaana nnanga s'akpomọma, ọttara iyaak s'ifon z'nnanga s'eforgbaka. Wa osi minna okurọ bẹ́, ija-byi s'ide brons s'ining ny'Ọvaar Ibinọkpaabyi k'ititika, ichamẹ ọkpan bẹ́, ibenga nnanga s'ẹkwọmọ, ọmaana s'akpomọma, ọttara nnanga s'iyaak s'eforgbaka.

65 Minna kw'uwa Sọlọmọn osi odidaama ny'ogbe nwo, ọmaana anọng p'Israẹl maphyir. Wa ode ikpakaana s'ibar-ọbar s'anọng abin tọma z'Lẹbo Hamat maa, pyirẹ z'akekava p'Ijip. Wa masi odidaama nwo k'iwu ichenọmfa, k'ititika s'Ọvaar Ibinọkpaabyi kw'ode Ibinọkpaabyi kwamina, mabira attara wẹ k'iwu ichenọmfa. Kibung-kibungọ, wa matim iwu osowanẹ kw'ichi masi odidaama nwo. 66 Ewu esobh nya o, ọvaarnọng oben anọng mbo bẹ́, mabhana. Manang kẹ ọvaarnọng ezima, pira nnabhan z'isọhm sabẹ. Ettem ẹdaam bẹ, ebira elebh bẹ, k'ejibha maphyir ch'Ọvaar Ibinọkpaabyi kk'ọsa ọnang ọtọhmnọng kwẹ Devid, ọttara anọng pẹ p'Israẹl.