1 K'ogbe kw'Sọlọmọn kk'Ọsọhm kw'Ọvaar Ibinọkpaabyi ọmaana odimpa ọsa maphyir, ọmaana idik njoza maphyir s'idaak-ẹ bẹ́, osi, 2 Ọvaar Ibinọkpaabyi oyin okebh-ẹ ttong igbedim ifa, k'ose kw'uwa oyinẹ okebh-ẹ z'Gibeọn. 3 Ọvaar Ibinọkpaabyi oben-ẹ bẹ́,

"Kaam kk'njọm ọmaana ẹmọng chọ mmaanga. Kaam kk'Ọsọhm nwa kw'Ibinọkpaabyi kw'asi ma ntọka mach'Ọsọhm kwaam. Kk'eche chaam nka nya ttattampe. Achen paam ọmaana ettem chaam m'eninga nya k'ogbe kpenamken.

4 Ṉ́nòde kọ, óde ator-m ọmaana ettem madanẹ, ọmaana ẹmmaana ọkkọkka, ọmaana atoriji p'ettem k'ose kw'uwa atte Devid osi, abira asi idik maphyir s'mbenẹ, akpobha asana ọmaana apaanga paam, 5 kaam m'nsi ẹvaar chọ ettima m'Israẹl ttattampe, k'ose kw'nchekẹ nnang Devid kw'ode atte kwọ bẹ́, ‘Kwuna ọnọng mòwor kw'm'otera eso chọ ny'ẹvaarkkọhbhọ ch'Israẹl.’

6 "Okenaka, ode kọ, wanẹma, ode iva p'iva pọ bọ akpa nnam abọr-m, m'idik saam ọttara asana p'kk'ọ nnanga ọdọk kakpobh, matera ad-araka nso makpobha ekpo ọdọk-ọdọk, 7 nya kw'kaam m'nrọbha anọng p'Israẹl z'izek s'kk'bẹ nnanga. M'mbira mbhum ọsọhm nwa kw'Ibinọkpaabyi kw'kk'nteka nkọm nsok k'eche chaam okpukpobha. Nya kw'anọng p'Israẹl nna ọdọk ọttọhk áfẹ̀ mabanga, anọng maphyir m'amma bẹ asa. 8 Ọsọhm nwa kw'Ibinọkpaabyi m'okwu ode ọtakkin kw'ọsọhm kw'ikk'ọvọhka. M'ope anọng maphyir p'akpan-ọkpan ifor, obira okkonọ bẹ maa, m'aben bẹ́, ‘Ode yen kw'Ọvaar Ibinọkpaabyi osi ọttọhkse mva m'izek nja, ọmaana m'ọsọhm nwa kw'Ibinọkpaabyi?’ 9 Anọng m'apọhna bẹ́, ‘Ofon ch'nkk'Ọvaar Ibinọkpaabyi kw'ode Ibinọkpaabyi kwabẹ kw'uwa otim ab'ttatta pabẹ obina z'Ijip, abhuma. Bẹ matera akpobha aka, mabira araka nso anang aka mbo. Kẹ wọ osi Ọvaar Ibinọkpaabyi ọtọhm itama nja maphyir ọnang bẹ.’ "

10 Wa node icho ẹrọbh ch'Sọlọmọn osi isọhm njoma ifa, kw'ode Ọsọhm kw'Ọvaar Ibinọkpaabyi ọmaana odimpa. 11 Ọvaar Sọlọmọn ọtọka ibhon ẹrọbh s'ining ny'Galili ọnang Hiram, kw'ode ọvaarnọng kw'Taya, okurọ ch'Hiram ikk'ẹ nchi s'sida ọmaana siprẹs ọttara gol maphyir kw'ororọ, ọnanga. 12 Okenaka, ch'Hiram nobin z'Taya od-oze ibhon njo s'Sọlọmọn ikk'ẹ ọnanga, ibhon njo kẹ ettem kidaamẹ. 13 Ọbọbh Sọlọmọn bẹ́, "Agbaanatte kwaam, bọng-ibhonse jọma s'anang-m ma o?" Oyerẹ ibhon njo bẹ́, Ẹkọma ch'Kabul*. Ẹkọma ndo etim ekpen za minna maa, pyirẹ menda. 14 Ode ch'iwa Hiram kk'atalẹnt p'gol arọbh achadanẹ ọtọhma ochena ọvaar Sọlọmọn.

15 Ma wọ ode ose kw'uwa Ọvaar Sọlọmọn ọgwa anọng k'ẹfa otima osi ọsọhm kw'Ọvaar Ibinọkpaabyi, ọmaana odimpa kwẹ oyenẹ, ọmaana abhukakpa, ọmaana etumọ ch'Jẹrusalẹm, ọmaana Hazọ, ọmaana Megido, ọttara Gẹza. 16 (Ode ch'iwa Phero kw'ode ọvaarnọng kw'Ijip kk'egbong orima, ọbọka obhon kw'Gẹza. Wa oke wẹ ekpon, ọkwọmọ. Obira ọfhọ anọng p'Kenaan p'arukọ nya. Pira nọtọk izek njo s'Gẹza ọnang ominanwa kwẹ mach'ẹtaam, k'ọba kw'osi ọmaana Sọlọmọn. 17 Minna kw'Sọlọmọn nobir okwu osi obhon kw'Gẹza obe.) Wa obira osi izek-izek kw'obhon kw'Bẹt-Horon, 18 ọmaana Baalat, ọttara Tamar z'ẹbhaakẹ ch'anọng nna arukọ, ny'izek njo sẹ. 19 Wa obira osi ibhondim sẹ maphyir s'od-oye ekpo, ọmaana ibhon s'od-osok ijaar sẹ s'nnyanya id-itọr, ttara nnyanya oyenẹ. Osi ọttọhk kpenamkpen f'ọdaak-ẹ bẹ́, osi z'Jẹrusalẹm, ọmaana z'Lebanọn, ọttara z'nkọma maphyir s'ikẹ ọbaabh.

20 Wa anọng banẹ p'afon Amọr, ọmaana Hit, ọmaana Periz, ọmaana Hiv, ọttara Jebus, atim arikẹ nya. (Wa anọng mba mammaana p'Israẹl kade). 21 Iva p'iva pabẹ p'arik-orik, p'uwa anọng p'Israẹl nnafhọ, bẹ bọ p'uwa Sọlọmọn ọgwa k'ẹfa mach'abira pẹ, od-otima osi itọhm. Otim ode za minna maa, pyirẹ menda nwa. 22 Ọnọng mawanẹ kode kw'ofon Israẹl, kw'uwa Sọlọmọn osi ebira. Bẹ bọ p'uwa otim osi arimanọng pẹ, ọmaana adukwa p'ẹbaabha chẹ, ọmaana asonọng pẹ, ọmaana abaabh-agbongso pẹ, ọmaana aso p'ijaar sẹ s'nnyanya id-itọr. 23 Bẹ bọ uwa mabira ade adukwa mbo p'ade anọng ẹnọhna okwuma arọbh achenọmfa okwuma ijobh, p'atim itọhm s'Sọlọmọn, mabira akkerẹ atọhmnọng.

24 Ch'ominanwa kw'Phero kk'obina z'ebhondim ch'Devid okwu z'ọvaardimpa kw'Sọlọmọn kk'ọsa ọnang-ẹ, nya kw'Sọlọmọn oke abhukakpa mbo.

25 Igbedim ittaan k'icho, wa Sọlọmọn ọd-ọfọhnọ ẹja ch'ẹkwọmọ ọttara ẹja ch'eforgbaka ny'ija-byi s'ikk'ọsa ọnang Ọvaar Ibinọkpaabyi. Wa obira ọd-ọkwọmọ insẹns ny'Ọvaar Ibinọkpaabyi k'ititika. Minna kw'uwa ozeng ochera itọhm s'ọsọhm kw'Ibinọkpaabyi.

26 Wa ọvaar Sọlọmọn obira osi akkaara-kpaar z'Ẹziyọn-Gẹbẹr kw'ọnyọm Elat kw'oning z'ẹkọma ch'Edom, z'ẹpa ch'ẹraangakora. 27 Nya o, Hiram ọtọhm ajinọng pẹ pad-ayaar asi, mabira azonga ọraanga kwiden bẹ́, mator anọng p'Sọlọmọn mayaar akkaara-kpaar mbo. 28 Mayaar achina z'Ophir, matima gol kw'ode atalẹnt ẹnọhna okwuma ẹrọbh, machena ọvaar Sọlọmọn.