1 Sọlọmọn odim k'nttọhna ọmaana ọvaar Phero kw'Ijip, ọtọka ominanwa kw'Phero k'ọbada. Otim-ẹ od-oruk z'ebhondim ch'Devid maa, ochera ọvaarter kwẹ, ọmaana Ọsọhm kw'Ọvaar Ibinọkpaabyi, ọttara ọbaaka kw'otim ata osi ọkọbha Jẹrusalẹm maphyir. 2 Ny'ogbe nwo, wa anọng p'Israẹl mad-afọhnọ nja k'ọja-byi f'oning k'ọyaankpa, okurọ ch'iwa nna ọsọhm kw'otim eche ch'Ọvaar Ibinọkpaabyi atima asa. 3 Eden ch'iwa Sọlọmọn ọkọhk ọdaakẹ kw'oyen ọmaana Ọvaar Ibinọkpaabyi ede bẹ́, wa orukọ akpen p'otte Devid ọtọhn-ẹ. Ọttọhk f'uwa osi f'ode nkọmẹ ode bẹ́, wa ọd-ọfọhnọ nja obira ọkwọmọ insẹns k'ọja-byi f'ọyaankpa.

4 Ọvaar Sọlọmọn ochina z'Gibeọn bẹ́, ọd-ọfọhnọ nja, okurọ ch'ode za wọ kw'ija-byi s'ibarẹ odik mawuriji ining. Nya wọ kw'uwa ọnang nnanga s'ẹkwọmọ nnọhna mfa okwuma arọbh ijobh. 5 Ny'erungọ, ch'Sọlọmọn kk'oyima z'Gibeon, Ọvaar Ibinọkpaabyi oyin okebh-ẹ k'ọda, oben-ẹ bẹ́, "Phyem-m ọttọhk kpenamkpen f'arorọ bẹ́, nnang-ọ."

6 Sọlọmọn ọpọhn-ẹ bẹ́, "Kk'ejibha chiden asa anang ọtọhmnọng kwọ Devid kw'ode atte kwaam, okurọ bẹ́, wa okpobh-ọ ọmaana ettem madanẹ, osi ẹmmaana ch'etor-otor, obir oyena ẹmaana ch'ede bẹ́ gbẹẹng. Maa pyirẹ menda, atim achin ororo asi ejibha chiden anang-ẹ, okurọ bẹ́, kọ kk'ẹ nnwa ananga kw'im'otima ẹvaar chẹ.

7 "Ofona nya, o Ọvaar Ibinọkpaabyi, kw'ade Ibinọkpaabyi kwaam, kk'kaam ọtọhmnọng kwọ ẹvaar asa bẹ́, ntera eso ch'Devid kw'ode atte kwaam. Okenaka, kaam ntim nde nnwa-nnwa, ose kw'im'nsi ọtọhm faam kinzong. 8 Kirẹ kaam ọtọhmnọng kwọ m'ikpakaana s'ọnọng-saabh nwa kw'ikk'ateka kw'ina obhika ode. 9 Ofona nya, nang kaam ọtọhmnọng kwọ ezonga ch'im'ntima mbaabha anọng pọ, mbira ntima nzonga odik kw'otor-otor ọmaana kw'ina otorọ, ina minna ode, ọnọng kw'im'okpo ọnọng-saabh nwa ọbaabha kode."

10 Wa ettem ẹdaamẹ Ọvaar Ibinọkpaabyi k'ọttọhk f'Sọlọmọn ophyemẹ. 11 Nya o, Ibinọkpaabyi oben-ẹ bẹ́, "Ch'ina kaam akpen p'adum-odum aphyemẹ, kaam ojibhada kabira aphyem, kaam kabira aphyem bẹ́, mfhọ awawunanọng pọ, atera aphyem-m ezonga ch'im'atima akpaara aponga k'eden ch'etor-otor, 12 kaam m'nsi ọttọhk f'aphyemẹ. M'nnang-ọ ezonga, ọmaana ọyaanttaana kw'ettem, ọfha ọnọng oning oning kw'uwa ikk'ọda mach'ikọ, wanẹma, kw'ikwuna m'ode mach'ikọ. 13 Kaam m'mbira nnang-ọ ekpo mbyoza py'ina kaam aphyemẹ, ekpo mach'ojibhada ọmaana ikpobhaakka, ọfha k'akpen pọ maphyir, ọvaarnọng oning oning kw'im'ode mbengana ọmaan-ọ. 14 Ó̱de atorọ eden chaam, akpobha apaanga ọmaana asana paam k'ose kw'Devid kw'ode atte osi, kaam m'nnang-ọ akpen p'adum-odum."

15 Nya wọ kw'Sọlọmọn nogbe z'ọda, otin bẹ́, idachen jọ. Ọkpa nnam z'Jẹrusalẹm, od-obe ny'ititika s'Ẹkkọhbhọ ch'Echekẹ ch'Ọvaar Ibinọkpaabyi, oninga nya ọfọhnọ nja s'ẹkwọmọ ọmaana nnanga s'eforgbaka. Ocher nya o, osi odidaama ọnang atọhmnọng pẹ maphyir.

16 K'ogbe wanẹ, azaza afa akwu akebha ọvaarnọng nya. 17 Oyok wanẹ oben bẹ́, "Ttatta kwaam, kaam ọmaana kwanọng nwa mọtọn oruk k'ọsọhm mawanẹ. Kaam mmaanẹ nnwa k'ogbe kw'oning ny'ọsọhm ọmaan-m. 18 Ny'ewu ttong ittaan ch'mmaanẹ nnwa kwaam, kwanọng nwa obira ọmaan nnwa ọdọk. Ny'ọsọhm nwo, mode mina anọng afa bẹ-bẹ. Ọnọng ọdọk-ọdọk kw'oning nya ọmaana mina kode.

19 "Otum ny'erungọ, nnwa kw'kwanọng nwa ope, okurọ ch'oyim ọyak-ẹ. 20 Minna kw'obin ny'orungittem, ny'ogbe kw'kaam ntim nttaabh-ọttaabha, otinẹ nnwa kwaam za ch'oyim ọmaan-m, orurọ ọnyọma ẹba chẹ, okwu otinẹ kwẹ kw'ikk'ọpa, orurọ ọnyọma ẹba chaam. 21 K'ogbe kw'ewu ikk'esobha, mbina bẹ́, nnang nnwa kwaam ẹba, nze bẹ́, kk'ọpa. Ewu ẹttaanẹ nya o, nkker-ẹ mawuriji, nze bẹ́, nnwa kw'mmaanẹ azang nya."

22 Kwanọng nwoza oben bẹ́, "Mma! Nnwa kw'oruk-oruk wọ ode kwaam, nwo kw'ikk'ọpa ode kwọ."

Ocheden-kwanọng ọgbana bẹ́, "Mma! Nnwa kw'oruk-oruk ode kwaam, nwo kw'ikk'ọpa ode kwọ." Minna kw'makaang ayok odik nwo ny'ọvaarnọng k'ititika.

23 Ọvaarnọng oben bẹ́, "Oyok wanẹ od-oben bẹ́, ‘Nnwa kwaam wọ orukọ akpen, kwọ wọ opope’, oyok nwoza oben bẹ́, ‘Mma! Kwọ wọ opope, kwaam orukọ akpen.’ "

24 Nya kw'ọvaarnọng nobenẹ bẹ́, "Mànang-m ọkkangkkang." Matọka ọkkangkkang achen-ẹ. 25 Ọvaarnọng ọnang ẹfa, oben bẹ́, "Màkebh nnwa kw'orukọ akpen agboka afa. Màtọka igboka janẹ nang oyok wanẹ, màtọka igboka njoza anang oyok nwoza."

26 Kwanọng nwo kw'oyen nnwa kw'orukọ akpen otima ẹ́kká-ttem, oben ọvaarnọng bẹ́, "Ttatta kwaam, ototo, tte nnwa nwo kw'oruk akpen ọbọhk nang-ẹ za! Kẹ kafhọ!"

Okenaka, kwanọng nwoza oben bẹ́, "Mina anọng afa, ọnọng kw'im'oyena nnwa nwo kode. Màkebh-ẹ k'ibyi ifa!"

27 Nya o, ọvaarnọng ọkpaara aponga mbo, oben bẹ́, "M'nnwa nwo kw'orukọ akpen kafhọ. Màtọk-ẹ nang ocheden-kwanọng nwo, kirẹ kẹ wọ ode ọkka."

28 K'ogbe kw'anọng p'Israẹl maphyir mabhaang aponga mbo p'ọvaarnọng ọkpaar nya, bẹ maphyir maninga k'ojora f'ọvaarnọng, okurọ ch'maze bẹ́, Ibinọkpaabyi kk'ẹ ezonga ọnanga ch'otim ọkpaara aponga k'eden ọkkọkka.