1 Rẹhoboam ochina z'Shẹkẹm, za ch'anọng p'Israẹl maphyir nkk'attonga bẹ́, masẹ-ẹ ẹvaar. 2 K'ogbe kw'Jẹroboam kw'ode ojinọngnwa kw'Nẹbat, ọbhaang odik nwa (ch'otim oning z'Ijip, za ch'ọrọbh ebira ch'ọvaar Sọlọmọn), obina z'Ijip okwuna. 3 Minna kw'matọhmọ bẹ́, Jẹroboam okwu. Kẹ ọmaana ẹnọngkaan ch'Israẹl maphyir, mafona akebha Rẹhoboam, maben-ẹ bẹ́, 4 "Wa atte kwọ ọyakẹ mina ẹtọhka ch'ẹdọhbh-ọdọhbh. Kọ n'yekẹ mina atọhm-gbọhka, ọmaana ẹtọhka ndo ch'ọyakẹ. Mina mm'ode atọhmnọng pọ."

5 Rẹhoboam ọpọhna bẹ́, "Màzọhng, màkpa nnam k'iwu ittaan." Minna kw'anọng mbo mafon.

6 Nya o, ọvaar Rẹhoboam obina okebha asogbọhkọnọng mbo p'uwa nkk'ọtọhm asa anang Sọlọmọn kw'ode otte k'ogbe kw'oning akpen. Ọbọbh bẹ bẹ́, "Yen kw'mm'atọhn-m bẹ́, mpọhna anọng mba?"

7 Bẹ mapọhn-ẹ bẹ́, "Ó̱de kọ m'ade ọtọhmnọng kw'anọng mba menda, kw'im'osi ọtọhm ọnang bẹ, abira anang bẹ ẹpọhna ọkkọkka, bẹ mm'ade atọhmnọng pọ k'igbe maphyir."

8 Okenaka, Rẹhoboam obhum ntọhna s'asogbọhkọnọng mbo manang-ẹ. Ofona od-okebha ayok adikkobhva p'matọn akwurọ, p'ad-asi ọtọhm anang-ẹ. 9 Ọbọbh bẹ bẹ́, "Ntọhna sabọnga ide yen? Yen kw'mm'ọpọhna anọng mba p'aben-m bẹ́, yekẹ mina ẹtọhka ch'atte ọyakẹ mina’?"

10 Ayok adikkobhva mbo p'matọn akwurọ mapọhn-ẹ bẹ́, "Tek anọng mba p'nkk'ọ abena bẹ́, ‘Wa atte kwọ ọyakẹ mina ẹtọhka ch'ẹdọhbh-ọdọhbh, okenaka, kọ n'si ẹtọhka ndo ebhekẹ mina obhekẹ.’ Tek bẹ bẹ́, ‘Ẹnọhna-gberẹ chaam, edinẹ ọtam ẹyọhnga erin ch'atte kwaam. 11 Wa atte kwaam ọyakẹ bọnga ẹtọhka ch'ẹdọhbh-ọdọhbh, kaam m'ntera nsi chẹ nẹdọhbh bọnga ọtam. Wa atte kwaam otim ayaangẹ ottema bọnga, kaam m'ntima aninaangẹ nttem bọnga.’ "

12 Iwu ittaan ikpanẹ nya o, Jẹroboam ọmaana anọng p'Israẹl maphyir makpa nnam akwu akebha ọvaar Rẹhoboam k'ose kw'kk'obena bẹ́, "Màkpa nnam k'iwu ittaan, makwu aze-m." 13 Ọvaar Rehoboam ọpọhna anọng mbo odik ẹgbọhk-ẹgbọhka. Obhum ntọhna njo s'asogbọhkọnọng mbo manang-ẹ, 14 oter otor ntọhna s'ayok adikkobhva anang-ẹ. Oben bẹ́, "Wa atte kwaam ọyakẹ bọnga ẹtọhka ch'ẹdọhbh-ọdọhbh. Kaam m'ntera nsi chẹ nẹdọhbh ẹyọhng-ọyọhnga. Wa atte kwaam otim nnyaangichi ottema bọnga, kaam m'ntima aninaangẹ nttema bọnga." 15 Minna kw'ọvaarnọng obhumọ anọng mbo itọhng oyiyonga. Wa Ọvaar Ibinọkpaabyi wọ osi bẹ́, idik njo iyin minna, mfha ode k'ose kw'uwa ikk'Ahija kw'ofon Shilọ otima ọgbaak odik ọnang Jẹroboam, kw'Nẹbat obhonọ.

16 K'ogbe kw'anọng p'Israẹl maphyir makwu aze bẹ́, ọvaarnọng odik kwabẹ kọtọk, mapọhna ọvaarnọng bẹ́,

"Bọng-okebh f'moyen k'Devid,

Bọng-ọttọhk vọ ọmyẹ mina ọmaana nnwa kw'Jẹsẹ?

O bọnga anọng p'Israẹl, màbhana z'abọnga k'isọhm!

Devid o, zenga mmo kkerẹ ọsọhm kwọ!" Minna kw'anọng p'Israẹl mabhan kabẹ k'isọhm.

17 Okenaka, wa Rẹhoboam nọbaabh anọng mbo p'Israẹl p'arukọ ny'ibhon s'Juda bẹ-bẹ.

18 Ọvaar Rẹhoboam okwu ọtọhm Adoniram kw'uwa od-okkerẹ anọng p'ad-asi agbugbuna. Minna kw'anọng p'Israẹl maphyir, mater atọhbh-ẹ ata maa, ope. Ọvaar Rẹhoboam oyena owujibha, ọsẹr-ọsẹr oyika k'ọkpaar kwẹ kw'ẹnyanya ẹd-ẹtọr, ọrọbh ọnaanga, ozeng z'Jẹrusalẹm. 19 Minna kw'anọng p'Israẹl atọm nya, mattaangẹ ivaartaak s'Devid maa, pyirẹ menda.

20 K'ogbe kw'anọng p'Israẹl maphyir mabhaang bẹ́, Jẹroboam kk'okwuna, mayer-ẹ k'ikpakaana sabẹ, masẹ-ẹ ọvaarnọng kw'Israẹl maphyir. Ofonamma kw'Juda kẹ-kẹ wọ uwa norikẹ kw'okpobh ivaartaak s'Devid.

21 K'ogbe kw'Rẹhoboam opyirẹ z'Jẹrusalẹm, otobha arimanọng p'ọsọhm kw'Juda kibungọ, ọttara p'ofonamma kw'Bẹnjamin, p'ade anọng nnọhna ẹnọhna okwuma arọbh afa, okwuma ijobh bẹ́, marima anọng p'Israẹl ábẹ̀, ọfha ẹvaar ebira ẹkpa nnam z'Rẹhoboam, kw'ode nnwa kw'Sọlọmọn.

22 Okenaka, Ibinọkpaabyi oben Shẹmaya kw'ode ọgbaak-ettem ch'Ibinọkpaabyi bẹ́: 23 "Ben Rẹhoboam kw'ọvaar Sọlọmọn obhonọ, ọmaana ọsọhm kw'Juda kibungọ, ọmaana anọng p'Bẹnjamin, ọttara anọng mboza maphyir bẹ́, 24 ‘Ọvaar Ibinọkpaabyi obenẹ bẹ́, M'erima kasi amaana Israẹl, kirẹ ivotte pabọnga bọ. Ọnọng kpenamkpen ọzọhng ọbhana. Kaam wọ nsi odik nwa.’ " Minna kw'makpobh ọgbaakadik kw'Ọvaar Ibinọkpaabyi, makpa nnam abhana k'ose kw'Ọvaar Ibinọkpaabyi kk'bẹ obena.

25 Wa Jẹroboam osi obhon kw'Shẹkẹm z'ẹkọma ch'agbe, z'ẹbhaakẹ ch'Ephraim, oruk nya. Obina nya obira od-osi obhon kw'Pẹniyẹl.

26 Jẹroboam ochibhẹ z'ettem bẹ́, "Oker-m bẹ́, ẹvaar nda min'ebira ẹkpa nnam z'ọsọhm kw'Devid. 27 Ó̱de ánọng mba mata z'Jẹrusalẹm bẹ́, mad-afọhnọ nja z'Ọsọhm kw'Ọvaar Ibinọkpaabyi, maning ch'mabira araka nso anang Rẹhoboam kw'ode ttatta kwabẹ, ọmaana ọvaarnọng kw'Juda. Bẹ mm'akpo-okpo afhọ-m, makpa nnam ator ọvaar Rẹhoboam."

28 Ch'ikk'anọng ọbọbha ose kw'im'osi, ọvaarnọng otima gol osi akpata afa p'abhaam. Oben anọng mbo bẹ́, "Kọbaan bẹ́, mabir ata z'Jẹrusalẹm. Anọng p'Israẹl o, màkirẹ aka pabọnga ma e, p'atim bọnga abina z'Ijip e." 29 Ọtọka ọkpata wanẹ ommin z'Bẹtẹl, obira ommin nwoza z'Dan. 30 Ọttọhk mva f'osi ma, okwu ode epyibha. Wa anọng mbo mad-azenga k'odenbhir mad-akpobha ọka f'oning z'Bẹtẹl, mabir azenga k'odenbhir mad-akpobha mvoza f'oning z'Dan.

31 Jẹroboam osi akapa p'ọyaankpa. Ọrọhbha anọng-kira kpenamkpen p'mm'ad-ataam aka mbo, zaa wura k'efona ch'Lẹvi kafon. 32 Jẹroboam ọbhaaka edidaamawu osok k'iwu ichi s'ophe kw'ottong ochenọnttaan, mach'odidaama nwo kw'mad-asi z'Juda. Obira ọfọhnọ nja ny'ija-byi. Minna kw'uwa obira od-osi z'Bẹtẹl, ọd-ọfọhnọ nja ọnang akpata p'abhaam mbo p'ikk'ọsa. Za Bẹtẹl ọdọk, wa osokọ afọhn-ẹja p'akapa mbo p'ikk'ommina k'ọja-byi f'ọyaankpa. 33 Ny'iwu ichi s'ophe kw'ottong ochenọnttaan, kw'ode ophe nwo kw'ozeng mmo oteka, ọd-ọfọhnọ nja k'ija-byi s'ikk'ọsa z'Bẹtẹl. Minna kw'uwa Jẹroboam ọbhaak edidaamawu osok anọng p'Israẹl, kẹ ozeng z'ija-byi, ọd-ọnang nnanga.