1 K'ogbe kw'Ahab opyirẹ z'ọsọhm, otek Jẹzẹbẹl ọttọhk kpenamkpen f'Ẹlaija kk'ọsa, ọmaana ose kw'otim ọkkangkkang ọfhọ abọhnganọng p'Baal maphyir. 2 Minna kw'Jẹzẹbẹl ọtọhm ozeng-eden wanẹ ẹkkaabha z'Ẹlaija bẹ́, "Ophyinẹ ogbe ose nwa, óde ína akpen pọ ndimẹ k'ose kw'adimẹ akpen p'abọhnganọng p'Baal, tte aka asi-m k'ose kpenamkpen kw'ọdaakẹ bẹ."

3 Ẹlaija okwu ojor-ẹ, ọrọbh, mfha ọkkaana akpen pẹ. Ch'opyirẹ z'Beershẹba, z'ẹkọma ch'Juda, obina orik ọtọhmnọng kwẹ nya. 4 Kẹ osi ozenga kw'ewu kibungọ ochina z'ibyi s'anọng nna arukọ. Okwu opyirẹ k'ofokodo kw'echi danẹ, ọphyak ẹwor oninga nya, oze njọm bẹ́, wura ope, oben bẹ́, "Ọvaar Ibinọkpaabyi, akpen kk'aam abenga e! Tọka akpen paam, kire kaam kìnjibhẹ nyọhnga ab'ttatta paam." 5 Minna kw'oyim ny'echirin ndo, ọttaabha.

Ogbe kobhirẹ, ozeng-eden kw'Ọvaar Ibinọkpaabyi ọtwẹ-ẹ, oben-ẹ bẹ́, "Bin-obina, chi ọttọhk." 6 Okkerẹ ọkọbha, oze brẹd ny'eso kw'nkk'abhaabha k'ekpon, ọmaana ógberénwa kw'asi. Ochi ọttọhk, obir ogwo asi, pira nobir oyima.

7 Ozeng-eden kw'Ọvaar Ibinọkpaabyi okpa nnam ttong igbedim ifa, ọtwẹ-ẹ, oben-ẹ bẹ́, "Bina, chi ọttọhk, kirẹ ozenga kw'm'asi, okem ẹbara e." 8 Minna kw'obin ochi ọttọhk, obir ọgwa asi. Ọchattọhk mvo ọnang-ẹ ẹfa ch'otim osi ozenga kw'iyawu arọbh afa ọmaana irungiwu arọbh afa. Ozenga maa, opyirẹ z'Horẹb, kw'ode egbe ch'Ibinọkpaabyi. 9 Nya wọ kw'nodimẹ k'ọtakpamma wanẹ, obhing nya.

Minna Ọvaar Ibinọkpaabyi ọtọhm ẹkkaabha ọnang-ẹ bẹ́, "Ẹlaija, ad-asi mbọng ma?"

10 Ẹlaija ọpọhn-ẹ bẹ́, "Kaam ncher obo k'Ọvaar Ibinọkpaabyi kw'Ẹfa mapyhir. Anọng p'Israẹl kk'echekẹ chọ abhuma, machikẹ ọja-byi fọ maphyir, mabir atima akkangkkang afhọ agbaak-ettem chọ. Kaam kaam wọ ina nrikẹ, kẹ kw'nnad-akam bẹ́, macher-m afhọ ma."

11 Ọvaar Ibinọkpaabyi oben bẹ́, "Yin k'iyaan zọhng be z'egbe k'ititika s'Ọvaar Ibinọkpaabyi, kirẹ Ọvaar Ibinọkpaabyi min'ọkpan nya."

Nya o, ebum ch'ẹgaang-ọgaangẹ etima ẹfa, ẹbhaaka agbe k'akpa, ebir ẹvọhkọ ntakpa ma tuku-tuku ny'ititika s'Ọvaar Ibinọkpaabyi. Wa Ọvaar Ibinọkpaabyi ny'ebum ndo kode. Ebum ndo ẹkpọk nya o, izek itọma onyinyengẹ, okenaka, wa Ọvaar Ibinọkpaabyi ny'izek njo s'nyeng-onyenga kode. 12 K'ose kw'izek ikpọk enyengẹ, ekpon ẹwọma. Okenaka, wa Ọvaar Ibinọkpaabyi ny'ekpon ndo kode. K'ose kw'ekpon ndo edimẹ, okwu ọbhaanga ayaabhẹ. 13 K'ogbe kw'Ẹlaija ọbhaang ayaabhẹ mbo nya o, okpena owurọ-baba kw'obubh ny'ititika, oyin z'iyaan od-obe ny'ititika s'ọtakpamma.

Nya kw'ọbhaang ẹmọng ch'ẹbọbh-ẹ bẹ́, "Ẹlaija, ad-asi mbọng ma?"

14 Ẹlaija ọpọhna bẹ́, "Kaam ncher obo k'Ọvaar Ibinọkpaabyi kw'ẹfa mapyhir. Anọng p'Israẹl kk'echekẹ chọ abhuma, machikẹ ọja-byi fọ maphyir, mabir atima akkangkkang afhọ agbaak-ettem chọ. Kaam kaam wọ ina nrikẹ, kẹ kw'nnad-akam bẹ́, macher-m afhọ ma."

15 Ọvaar Ibinọkpaabyi oben-ẹ bẹ́, "Zọhng kpa nnam z'eden ch'iwura azeng akwu, achina z'ibyi s'anọng nna arukọ, z'ẹbhaakẹ ch'Damaskọs. Ápyirẹ za, yaana Hazayẹl mach'Ọvaarnọng kw'Aram. 16 Abir ayaana Jehu kw'ode nnwa kw'Nimshi mach'Ọvaarnọng kw'Israẹl. Akwu ayaana Ẹlisha kw'ode nnwa kw'Shafat kw'ofon Abẹl-Mẹhola bẹ́, otera eso chọ mach'ọgbaak-ettem ch'Ibinọkpaabyi. 17 Jehu m'ọfhọ ọnọng kpenamkpen kw'ọnaang ọkkangkkang kw'Hazayẹl. Ẹlisha m'ọfhọ ọnọng kpenamkpen kw'ọnaang ọkkangkkang kw'Jehu. 18 Chibhẹ ch'ode minna, kaam kk'anọng nnọhna ichi kkamfa okwuma arọbh afa okwuma ijobh nkọma nsok ny'Israẹl, p'nna ndudungọ attim anang Baal, ọttara ayok p'nna kẹ abir abaaka."

19 Minna kw'Ẹlaija ofon od-oze Ẹlisha kw'ode nnwa kw'Shafat ch'ode otima abhaam ijobh kkamfa, otima ọbhakẹ izek. Wa kẹ oyenẹ, ọd-ọyaar ẹbhaam ndo ch'ettong ijobh kkamfa. Ẹlaija obina okebh-ẹ za, ọwọra owurọ-baba kwẹ, obubh-ẹ. 20 Nya o, Ẹlisha obina orik abhaam pẹ, otima ẹbhar otor Ẹlaija. Oben bẹ́, "Tte nd-mbaaka atte kwaam ọmaana akka kwaam, mben bẹ bẹ́, ‘Màyima,’ pira nkwu ntorọ."

Ẹlaija ọpọhn-ẹ bẹ́, "Zọhng kpa nnam. Kaam kọ eden kimkpa."

21 Minna kw'Ẹlisha ọkpa nnam, ọd-ọtọka abhaam pẹ ọfhọ. Ọtọka ẹtọhmkpo py'od-otima ọbhakẹ izek, oke ekpon ch'otim ọwọhn nten njo, ọtọka ọnang anọng pẹ, machi. Nya o, Ẹlisha ofona, otor Ẹlaija, okwu ode ọtọhmnọng kwẹ.