1 Wa Sọlọmọn otim icho ijobh kanttaan ochera ọvaarter kwẹ osisi, 2 okpe ọsọhm nwo bẹ́, Ọvaarter kw'Ẹtam ch'Lebanọn. Adum pẹ ade ntọkọ arọbh achenọmfa okwuma ijobh. Ẹkpa chẹ ede arọbh attaan okwuma ichi. Agoriji pẹ ade ntọkọ arọbh afa okwuma nchen. Ọvaarter nwo oyen mkpọmmachi nna s'ochi kw'sida s'manan agbaaka p'magwọhr-ọgwọhrọ p'ochi kw'sida. 3 Wa matim ochi kw'sida mabubha wẹ z'agbaaka mbo p'anan ny'mkpọmmachi. Agbaaka mbo ade arọbh afa okwuma achen, mabir ade ichi-ichi k'ọkaana. 4 Oke amma attaan-attaan p'ofum z'ẹrọng, makkerẹ ayok ititika. 5 Isọhmma s'ọvaarter nwo maphyir iyen ammakwukchi p'ade ose mawanẹ k'adum, made nkọmẹ k'ẹkpa chabẹ, ininga k'nkwurọ nttaan, ikkerẹ ayok ititika.

6 Wa otim mkpọmmachi osi ọpabọhk kw'ode ntọkọ arọbh attaan okwuma ichi k'adum, ẹkpa chẹ ede ntọkọ arọbh afa okwuma nchen. Ny'ititika s'ọpabọhk nwo, wa matim mkpọmmachi asi ẹsọhmva ch'mabubh-obubha.

7 Osi idongọ s'ẹvaarkkọhbhọ s'ikẹ min'od-oninga ọttọhna aponga. Otima agbaaka p'ochi kw'sida, ọtọma ny'ọgbaarẹ, obubha idongọ njo maa, opyirẹ z'mgbodo. 8 Ọsọhm kw'kẹ oyenẹ m'oruk, kw'ode eterttem ch'ening z'ẹpannam ndoza, ode ose mawanẹ. Wa Sọlọmọn obir osi ọsọhm kw'ode mach'ọvaarsọhm kwẹ, ọnang ominanwa kw'Phero kw'ọtọk k'ọba.

9 Isọhm nja maphyir s'itọm z'iyaan ipyirẹ z'eterttem-gbaakakpa ndo, ibir itọma za ch'maphaakẹ izek, ipyirẹ z'ipatera, wa makkẹbhẹ ata ọkkọkka masọhm-ọsọhmọ, matima asi z'ẹtaanga ọmaana k'iyaan. 10 Wa matim ntakpa ọkkọkka aphaakẹ izek s'ọsọhm nwo. Ata banẹ ade ntọkọ ichi, banẹ ade ntọkọ ijobh kkamfa, k'adum. 11 Wa mabir atima ata p'agaangẹ ẹphya p'mayom-oyoma z'ẹrọng-ẹrọng kw'ọsọhm nwo, mabir atima ochi kw'sida asi ibyi s'ide ẹnana. 12 Wa etumọ ch'matim ata p'madok-odoka ake k'akaana attaan, mabir atima agbaaka p'ochi kw'sida ake ọkaana mawanẹ, ẹkọbh eterttemdim ndo ọkọbha. Minna kw'uwa Ọsọhm kw'Ibinọkpaabyi ode z'ẹtaanga kw'eterttem, ọmaana idongọ s'im'azenga adim z'ẹtaanga.

13 Ọvaar Sọlọmọn ọtọhm ẹkkaabha bẹ́, mayerẹ Hiram z'Taya anang-ẹ. 14 Ọkka kw'Hiram wa ode opokwa kw'ofon ẹkọma ch'Naphtali. Otte kwẹ ofon ẹbhaakẹ ch'Taya, ode omengkka kw'od-otima bronz osi ekpo k'akira k'akira. Kẹ Hiram wa ode omengkka kw'oyen ezonga ọmaana ọyaanttaana k'ọttọhk kpenamkpen f'ọmaan bronz. Okwu ochera eyerẹ ch'ọvaar Sọlọmọn bẹ́, okwu osi ọtọhm kpenamkpen f'bronz.

15 Otima bronz ọrabha mkpọmmachi mfa. Agoriji p'ẹkpọmmachi kpenamkpen ade ntọkọ ẹrọbh okwuma nchenọmfa. Izizing-izizing kwabẹ ode ntọkọ ichi kkanttaan. 16 Z'aso p'mkpọmmachi njo, otima bronz osi ndoka mfa, s'agoriji pabẹ ade ntọkọ nchenọmfa ọmaana ibhaaka. 17 Otima obin ochenọmfa f'matim mgbakkọhbhọ ayok, odoka eso ch'ẹkpọmmachi kpenamkpen. 18 Osi pomegrenet k'akaana afa, otima ọkọbha ibin kpenamkpen s'otim odoka eso ch'ẹkpọmmachi kpenamkpen. Osi minna k'eso kpenamkpen. 19 Wa madok aso p'mkpọmmachi njo s'ẹsọhmma mach'agbok p'lili. Agoriji p'aso mbo made ntọkọ nchadanẹ. 20 Ny'ndoka s'aso p'mkpọmmachi njo mfa, ny'ẹrọng-ẹrọng kw'ọttọhk f'okerẹ ọgbangbang oning ọnyọma ibin njo, nya wọ kw'apomegrenet arọbh ijobh aning k'akaana, makọbha aso mbo maphyir. 21 Hiram ottima mkpọmmachi njo ny'ẹsọhmva ch'im'azenga adim z'Ọsọhm kw'Ibinọkpaabyi. Okpe ẹkpọmmachi ch'ening ẹwọn-ẹwọna bẹ́, Jakin, okpe ch'ening ebir-ebir bẹ́, Boaz. 22 Wa osi aso p'mkpọmmachi njo z'ẹrọng, odoka mach'agbok p'lili. Ny'eden ndo o, ọtọhm f'mkpọmmachi osisi, ọsa.

23 Hiram obira otima bronz osi ẹgbangbangjọ chiden ch'asi okike. Ammabem p'ẹgbangbangjọ ndo made ntọkọ ichi. Agoriji pẹ ade ntọkọ nchenọmfa ọmaana ibhaaka. Izizing-izizing kw'ẹgbangbangjọ ndo, ede arọbh afa okwuma nchen. 24 Izek-izek kw'ammabem mbo oyen akaana afa p'adimava p'akọbh ẹgbangbangjọ ndo ọkọbha. Wa marabh adimava mbo agbaka z'ẹgbangbangjọ ndo k'ibyi majanẹ.

25 Ẹgbangbangjọ ndo ẹnana k'abhaam ijobh kkamfa p'matim bronz asi. Attaan akkerẹ ebir-bir, attaan mboza akkerẹ za ch'ewuchen ed-edimẹ, attaan ọdọk-ọdọk akkerẹ z'ẹwọn-ẹwọna, pira attaan nakkerẹ z'ẹbhaakẹ ch'ewuchen ed-eyin. Bẹ maphyir makpa nnam abọra ayok. 26 Wa ẹgbangbangjọ ndo edinẹ mach'ẹbọhk-kpattem. Abem pẹ ade mach'abem p'ọkkọbh, mabir ade mach'agbok p'lili p'ikk'ammaama. Ẹgbangbangjọ ndo etim asi-kpọ p'ade nnọhna nchen.

27 Hiram obira otima bronz osi ekpo ijobh mach'ọkpaar kw'ogbin. Okpenamkpen ode ntọkọ nchadanẹ k'adum, ntọkọ nchadanẹ k'ẹkpa, ntọkọ nna ọmaana ibhaaka k'agoriji. 28 Eden ch'iwa masi mmo s'ekpo mbyo py'ekerẹ ọkpaar kw'ogbin ede bẹ́, wa mabira asi abem attara ny'okikaan kwabẹ. 29 Ny'njeka kw'abem kw'ekpo mbyo py'ekerẹ ọkpaar kw'ogbin, ode ndoka s'nche, ọmaana abhaam, ọmaana acherubim. Z'ẹrọng-ẹrọng ọmaana ny'izek-izek kw'ndoka njo, obir ode nkaar s'agbok p'maduk-oduk. 30 Okpenamkpen ny'ekpo mbyo py'ekerẹ ọkpaar kw'ogbin, oyen mmo nna s'matim bronz asi, ọmaana mbaanga s'bronz s'ibọk mmo njo. Okpenamkpen obira oyena ọgbangbang kw'ọnan k'mmo nna s'marabh ẹkaar ch'agbok abẹ k'ẹbhaakẹ kpenamkpen. 31 Ny'ẹtaanga kw'ekpo mbyo py'ekerẹ ọkpaar kw'ogbin, ọmma oning nya kw'ode ẹtọkọ madanẹ ọmaana igboka k'adongiji. Oyena mmo s'adum pẹ ade ntọka mfa ọmaana igboka. Ny'abem p'ọmma nwo, masi ndoka akọbha. Abem p'ekpo mbyo py'ekerẹ ọkpaar kw'ogbin ede mbengana, izizing-izizing kede. 32 Mmo njo nna ining izek-izek kw'abem kw'ekpo mbyo py'ekerẹ ọkpaar kw'ogbin. Mbaanga s'mmo njo itọhnga ny'ekpo mbyo py'ekerẹ ọkpaar kw'ogbin. Obho kpenamkpen nya, ode ntọkọ mfa ọmaana igboka k'agoriji. 33 Osi mmo sabẹ mach'mmo s'ọkpaar kw'ẹnyanya ẹd-ẹtọr, otima bronz ọrabha mbaanga s'ibọk mmo njo.

34 Ọttọhk kpenamkpen mvo f'okerẹ ọkpaar kw'ogbin, oyen mbọhk-bọka nna. Okonga kpenamkpen oyena ẹbọhk-bọka madanẹ. 35 Z'ẹrọng-ẹrọng kw'ekpo mbyo py'ekerẹ ọkpaar kw'ogbin, makpa adikpa p'ade izizing-zizing, adongiji pabẹ made ẹtọkọ madanẹ ọmaana igboka. Mbaanga njo ọmaana abem pẹ, ẹd-ẹgbaka ayok z'ẹrọng kw'ọttọhk mvo f'okerẹ ọkpaar kw'ogbin. 36 Ọgwa achẹrubim, ọmaana nche, ọmaana ajigba ọbẹ ny'iyaan-iyaan kw'mbaanga, ọmaana ny'abem, ọttara k'ibyi kpenamkpen s'obhokọ oning. Pira notim ẹkaar ch'agbok, ọbẹ ọkọbha. 37 Eden ch'iwa osi ekpo mbyo ijobh py'ekerẹ ọkpaar kw'ogbin ede bẹ́, wa ọrabh byẹ ose mawanẹ, ebira eker ayok.

38 Hiram obira otima bronz osi agbangbang ijobh ny'ekpo mbyo py'ekerẹ ọkpaar kw'ogbin. Ọgbangbang kpenamkpen, otim asi-kpọ arọbh ijobh kkamfa. 39 Ny'ekpo mbyo py'ekerẹ ọkpaar kw'ogbin, ọtọka echen nya, osok z'ẹwọn-ẹwọna kw'Ọsọhm kw'Ibinọkpaabyi, obir osok echen z'ebir-ebir kw'Ọsọhm nwo. Ọtọka ẹgbangbanjọ chiden osok z'ẹwọn-ẹwọna kw'Ọsọhm nwo, z'ẹbhaakẹ ch'ewuchen ed-eyin. 40 Wa obira osi ọzọhka, ọmaana asọvẹl, ọttara agbangbang p'asi ochichakẹ.

Minna kw'Hiram ocher ọtọhm f'Ọsọhm kw'Ọvaar Ibinọkpaabyi, f'osi ọnang ọvaar Sọlọmọn:

41 wa osi mkpọmmachi mfa,

ọmaana ndoka s'ikerẹ agbangbang p'manan z'aso p'mkpọmmachi,

ọmaana atergba afa p'matim adoka agbangbang p'aso p'mkpọmmachi,

42 ọmaana apomegrenet ẹnọhna, p'magwa ny'atergba mbo afa, (otergba kpenamkpen oyen akaana afa p'pomegrenet, p'mabira atima adoka agbangbang p'aso p'mkpọmmachi),

43 ọmaana ekpo mbyo ijobh py'ekerẹ ọkpaar kw'ogbin py'etim agbangbang ijobh,

44 ọmaana ẹgbangbangjọ chiden ch'asi okike, ọttara abhaam ijobh kkamfa p'aning k'izek-izek kwẹ,

45 ọmaana ọzọhka, ọmaana asọvẹl, ọttara agbangbang p'asi ochichakẹ.

Wa Hiram otim bronz kw'ọnọhn k'ekpon, osi ekpo mbya maphyir py'Ọsọhm kw'Ọvaar Ibinọkpaabyi, ọnang ọvaar Sọlọmọn. 46 Wa ọvaarnọng obenẹ bẹ bẹ́, mabhaabh ididọhbh s'ose z'ẹkpẹmẹ ch'Jọrdan kw'oning k'njeka kw'Sukọt ọmaana Zarẹtan. 47 Wa ekpo mbya ẹsaabhẹ maa, Sọlọmọn ọdọk adọhbhiji pabẹ koyom, ozeng k'bronz, adọhbhiji pẹ kobir oyoma.

48 Wa Sọlọmọn osi ekpo maphyir py'matim adoka Ọsọhm kw'Ọvaar Ibinọkpaabyi py'ede:

ija-byi s'matim gol asi,

ọmaana okpokkoro kw'matim gol asi, kw'brẹd kw'Awuriji ọd-ọnana,

49 ọmaana ettoringkkang-nana ch'matim gol ọkkọkka asi asok ny'ititika kw'ibyi s'Awuriji, (masok nchen k'obhurubọhk, nchen z'odimbọhk),

ọmaana agbok p'matim gol asi, ọmaana attoringkkang, ọttara mbaanga sẹ,

50 ọmaana agbangbang p'matim gol ọkkọkka asi, ọmaana attoringkkang-nọhm, ọmaana agbangbang p'asi ochichakẹ, ọmaana agbangbangva p'nd-atima akwọmọ insẹns,

ọmaana mgbaka s'matim gol asi s'idongọ s'ẹtaang-ẹtaanga, s'ide Ibyi s'Awuriji, ọttara s'amma p'Ọsọhm kw'Ibinọkpaabyi oyenẹ.

51 K'ogbe kw'uwa ọvaar Sọlọmọn ikk'ọtọhm f'Ọsọhm kw'Ọvaar Ibinọkpaabyi ochera, ọtọka ekpo py'awuriji py'iwa Devid kw'ode otte oyen, osok za ch'nd-aye ekpo py'Ọsọhm kw'Ọvaar Ibinọkpaabyi. Wa ekpo mbyo ede silva, ọmaana gol, ọttara ekpo mbyoza py'ndoka.